Matiusu 28
28
O Yesusu ai momomiki ma ade-ade
Maruku 16:1-10; Lukasa 24:1-12; Yohanese 20:1-10
1De o Hiaini ma wange ipahaino de ahao ma dawangeino abe de ahao o wange ipotokaiha o Gareja ma wangeoka, de o ngo Maria Madalena de o ngo Maria momatengoli gea yomakiniiki yoiki o Yesusu ai lungunika. 2De ona ko yomahiadonuahi de naga idadi o tonaka ihikelu-kelu duru kohagiria. De gea ma tonaka ihikelu-kelu mangale ma titi nanga Baluhu idodutu ai malaekata womatengo o Horogaka de wauku woboa. De ma malaekata gea waluluika ma hakaru ma amo-amoko gea o lungunu ma bionoka de ahao wogogeruku ma hakaruoka gea. 3De to una ai himanga gea duru kohadararono abe hoka o leletongo ma dararono, de nako ai baju gea duru ma gare-garehe, abe ma magarehe gea hoka o gotoaka ma gogo ma magarehe. 4De ma tentara gea abe yogoa-goana ona ka de iwimake ma malaekata de duru yokokihawanoka de yahiraramaka yofafara ka hiadono manga hininga ihihihanga ho yorubauku de ngade-ngade hoka yohonengoka.
5De ma malaekata gea wotemo o ngofeka yahinootoika gea wato, “Ngaro ufa de nihimodongo! Angamoi tohiorikoka abe ngini niwilingiri o Yesusu, abe Una gea iwihohonengoka o gota isosalioaka. 6Masara Una ko iwiwaka ai dingiioka naa, angamoi womomikoka ai honengino! De gea idadi duru imaketero abe hoka ma dihiraino de winihingahuokau. Abeika ai dingii naa o kiaka iwikelengauku ai honenge.” 7De yomahitigika yatutumu ai dingii gea de igoungu Una ai honenge ko iwiwaka. De ahao ma malaekata wotemoli wato, “Ho naa ngini nimataiti niloikohi de niahingahu iwinii-niikika abe Una womomikoka ai honengino. De niahingahuoo niato, ‘O Yesusu Una gea wohiraka o Galilea ma tonakika, ho ahao niwihiduruika la genangoka de ahao nimakamakeoli de Una.’ Hokogea kiani niahingahu onangika. De ufa niawohanga ahi demo naa abe tinihingahuoka la gea ahao niadofanga iwinii-niikika.”
8De ma malaekata wotemo ibooto onangika de o ngo-ngofeka gea yomataiti o lungunoka de yosobo yomapopaata de yalingiri abe iwinii-niiki o Yesusu la ka idadi ma malaekata ai demo yadofanga onangika. De gea manga hiningaka de yohawana masara nagaoo manga garago kohaamoko hiadono manga hininga aomangoka de o garago. 9De manga dodagi ma gogiriakahi de ka itodokanino de yomakamake de o Yesusu. De Una wotemo wato, “Ho duru nisanangioka dika!” De ona yomahitigi Unangika de yatilabukuku la ka idadi iwiso ai louika de yomahuba-huba Unangika. 10De ahao o Yesusu wotemo onangika wato, “Ho ngaro ufa ngini nihawana! Masara niloikohi ahi gogianongoruika de niahibehehongo la ona yosobo yoiki o Galilea ma tonakika, la ahao ona de Ngohi mimakamake genangoka.”
O tentara abe ma lungunu yogoa-goana manga ngeluku ma ade-ade
11De abe ma oraha o ngo-ngofeka yahinooto gea manga dodagi ma gogiriakahi abe yoiki yatutumu iwinii-niikika, de duru ma oraha gea doka o Yesusu ai lungunoka de o tentara ma nyawa abe yogoa-goana, ona ahao gea yokokimomikino. De ka de yomomikino de yosoboka yoiki o Yahudi ma nyawa manga hidemo Ma Jouiye manga hohidimono yokokurutiyeika. De yomahiadonika onangoka de yoade-ade abe ma titi idadioka ma oraha ma malaekata woboa ma lungunuku. 12De ma hidemo ma nyawa gea yoihene ma ade-ade de ahao yahokino manga dodiawo mata-mata abe onangoo yodadi o Yahudi ma nyawa manga hohidimono. De ona mata-mata yomakokitoomuinoka de yomakoketemo abe ma titi koaho o kia yodiai. De ma bahauku de yomaputuhu ato kiani yahewa ma gogoanika gea abe o tentaraino de duru yahibehehongo la yaeluku o nyawaika ma titi abe o kia idadioka. 13De ma tiwi yahidoaka onangika de yadotoko ato, “Kiani hokonaa niade-ade o nyawaika, niato, ‘O futuika ona abe iwinii-niiki o Yesusu yomatohi-tohiki yoboaino ai lungunino ma oraha ngomi imikokikiookoka de ko miamaoua abe ma oraha yagoraka to Una ai honenge de iwiaoka.’ Hokogea dika ngini niade-ade o nyawaika. 14De nako ma gubernuuru woihene ma ade-ade gea de winingamo nginika, gea ngomi minidemo de miniduhunu ho ko winihohowonua nginika.”
15De ma tentara gea yahimoteke de o Yahudi ma nyawa manga hohidimono manga hidee ho yodafongo ma tiwi gea onangino de yoade-ade o nyawaika abe imaketero hoka yadotokoka onangika. De manga ade-ade gea duru imahikabarihi ka hiadono o Yahudi ma nyawa duru ko manga ngoe yoihene. De ngaro ma oraha naa abe ngohi ahi Abari ma Rorahai ma ade-ade tohitulihukuoka ma ona manga ngoe ka yomaketeade-adeohi manga ngeluku ma ade-ade gea.
O Yesusu wahibehehongo iwinii-niikika
Maruku 16:14-18; Lukasa 24:36-49; Yohanese 20:19-23; Hidingoto 1:6-8
16De ipaha de abe o Yesusu iwinii-niiki yangimoi de yamoi ona yosoboka yoiki o Galilea ma tonakika, de manga dumutu o loku moiika abe ma loku gea o Yesusu wahibehehongoka. 17Ho ona yomahiadonoka genangika de yomakamake de o Yesusu, ho yomahuba-huba Unangika. De barikua yomahuba Unangika ma naga utu onangino abe ka ikurangohi yongaku abe Una wagou-goungu womomikoka!
18De o Yesusu womahitigi iwinii-niikika de wahibehehongo onangika wato, “Ngaro o Horogaka ma kuaha de ngaro o duniakaoo ma kuaha, masara gea mata-mataika ihihidoakoka Ngohino. 19De mangale ma titi ma oraha naa de o kuaha mata-mata naga ahi giamoka ho Ngohi ka idadi tinihibehehongo de tinihitagongo hokonaa nginika. De tinihitagongo la ngini niloiki o dunia ma amokika de nihiabari ma titi Ngohi o nyawa mata-mataika la onangoo ka idadi ihinii-niiki Ngohi. De ona abe ahao ihinii-niiki, ngini niaohiki ona la genangino ona yomahitunguu abe ona gea duru yomatingakoka de Ma Jou o Baba, de Ma Jou o Ngofaka, de Ma Jou o Womaha. 20De nihidodiai niadotoko onangika abe ihinii-niiki la o huhuloko mata-mataika abe tinihulokoka nginika, gea mata-mata niadotoko la hiadono onangoo naga manga hingounu ahi huhuloko ma demoika.
De abeika nitotoihene ahi demoino naa de ufa niawohanga, abe naa tinihingahu abe Ngohi ka ihikaika tininiiki nginioka. De ngaro ka hiadono o dunia ma bobahaika ma Ngohi ko tininoaikaua ma ka nagahi nginioka.” De hokogea o Yesusu ai behehongo iwinii-niikika.
Hokogea dika aika ahi buku. Ngohi o Matiusu.
Currently Selected:
Matiusu 28: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman