Matiusu 21
21
O Yerusaleeme ma kotaika womahiadonoka de o nyawa duru iwidafongo irahai o Yesusu
Maruku 11:1-11; Lukasa 19:28-40; Yohanese 12:12-19
1De ipaha de o Yesusu de ona yomakokutuono yoiki de de Una yomahiadonoka o Saitunu ma lokuika, abe imahikitigino de o Betefage ma kapongo. De gea yomahitigikaka o Yerusaleeme ma kotaika. De genangoka, o Saitunu ma lokuoka de o Yesusu wairiki yahinooto iwinii-niikino de wahidingoto doka o kapongika gea. 2De yahinootoika wahuloko wato, “Ngini niloikohi o kapongika gea. De o kapongoka de o keledai ma beka niamake ihilikoika de nagali to ena ma ngofaka moi abe ma beka ma datekoka, ho ka ma moi ihidilikoika. Ho ma keledai gea niohoheohi la niao Ngohino. 3Masara nako o nyawa initaere ato, ‘Nihidodoa ho manga keledai gea de niahohe?’, gea de ahao kiani niapaluhu onangika hokonaa, niato, ‘Mia Baluhu Una woperelu.’ De nako nianiiki ahi demo gea de ahao ka yosanangi dika ihidingoto ma aewani Ngohino.”
4-8De wahuloko ibooto de ona yahinooto yoiki genangika de duru yaniiki to Una ai demo onangika. Ho o keledai ma aewani gea ona yaoino o Yesusino de ahao manga baju ma gogurutuku ihinao o keledai ma ngofaka ma poretoka. De ihinaoika de ahao o Yesusu wobarenuku. De naga o nyawa manga ngoe ato iwibuhuku o Yesusu ho ihinao manga baju de manga ngoere ma ngekomika gea la idadi manga horomati ma dodunguu abe ma titi o nyawa yokokurutiye yoboa. De o nyawa utuoli yoiki manga dumuleika de atobiki ma tage ma ngoe abe ma rupa hoka o biso ma tage, de gea ihinao o ngekomika. De gea mata-mata yodiai de duru yogogarago ma titi manga horomati o Yesusika. De abe o Yesusu wobarene o keledai ma ngofaka ma poretuku de o nyawa duru iwidafongo irahai, gea duru imaketero de Ma Jou ai Demo-demoka moi abe ma dodihiraino to Una ai uru ma dodofanga wohitulihukuoka. De gea ma demo ato,
“Nahingahu onangika abe o Yerusaleeme ma kotaka yogogere nato, ‘Abeika ti ngini nia Koano naga woboa nginino. De abeika ai hininga ma dodipokouku, angamoi Una ka o keledai dika abe wobarenuku. De ma keledai gea ka ma ngofakohi wobarene.’” # 21:4-8
Yesaya 62:11
; Sakaria 9:9
Hokogea Ma Jou ai uru ma dodofanga ai demo ma dihiraino, de hokogea idadi abe ma oraha o Yesusu womahitigi o Yerusaleeme ma kotaika.
9Ho o Yesusu wobarenuku de ma keledai ma ngofaka iwihidagi-dagi o Yerusaleemika de o nyawa naga utu ai himangokahi, masara naga utu iwihidoduru ai poretino. De o nyawa ko manga ngoe gea duru yogogarago hiadono yokokipoaka ato,
“Hihigogiriiri Una woboaino naa, nanga tofora o Dautu ai totoforaukuino abe ma dodihiraino de Ma Jou wonahibehehongo wato ahao wonahikoano!
De naa adonoka ma oraha abe Una naa wonahikoano hoka ma dodihiraka abe nanga tofora o Dautu wonahikoano!
Hihigogiriiri nanga Jou o Horogaka!” # 21:9
Higiriiri 118:25-26
10De hokogea ona yokokipoaka hiadono o Yesusu womahiadonoka o Yerusaleeme ma kota ma goronaika. Ho o Yerusaleeme ma nyawa o kota ma amokika yamake de yoihene abe ma oraha Una woboaino angamoi o nyawa gea duru yohagaaga ho ona yomakokeleha ato, “Gea ka onaguna hiadono hokogea manga gigoro?”
11De o Yerusaleeme ma nyawa utuoli abe iwibuhuku de iwihigilolitino o Yesusu ona yopaluhu ato, “Naa Una o Yesusu, Ma Jou ai uru ma dodofanga abe o Nasaretino woboa abe gea o Galilea ma tonakoka.” Hokogea to ona manga hininga ma sanangi ma demo ma oraha iwidafongo o Yesusu.
Ma Jou ai Tauoka o Yesusu waduhu ona yotobafuku-fukunu
Maruku 11:15-19; Lukasa 19:45-48; Yohanese 2:13-22
12De o Yesusu o Yerusaleeme ma kota ma goronaika wowohamoka de Una wowohamikali Ma Jou ai Tau ma loaka. De ma loaka gea de naga wamake o nyawa yomatiwi-tiwi genangoka, abe utu yotobafuku-fukunu o aewani la o nyawa yomaija de yomahihuba de o aewani gea. De naga utuoli o aewani yotobaija-ija genangoka. Ho ona mata-mata o Yesusu womulaenge waduhu Ma Jou ai Tau ma loaino. De utuoli genangoka abe ona yotobaturuuru o nyawa manga tiwi, de ona yotobaturuuru manga meja wamotumu la hiadono manga tiwi ikokipurarahoka. De utuoli yotobafuku-fukunu o namodaara, to onangoo manga kuruhii wakumuruku. 13De gea waduhu ai gogiriaka de wataere onangika wato, “Abeika nitotoihene Ma Jou ai Demo-demo abe ma dihira ihitulihukuoka. Ma dihira gea Ma Jou wotemo hokonaa wato,
‘Ahi tau ahao ihiromanga o niniata ma tau la ka idadi o nyawa yoboa ahi tauino naa de yomaniata Ngohino.’
‘Masara ngini naa nihidadioka Ma Jou ai Tau yotobarusi-rusi manga ngi.’” # 21:13
Yesaya 56:7
; Yeremia 7:11
14De o Yesusu waduhu ipahaino de ahao Una Ma Jou ai Tau ma loakahi de naga o nyawa manga ngoe abe yorafi-rafi de yolugu-lugu yoboaino de Una wahikokitogumu genangoka. 15De naga o ngofa-ngofaka ma loaka gea abe yamake to Yesusu ai datoro ho hiadono ona duru yosanangi de yopoa-poaka ato, “Hihigogiriiri Una naa nanga tofora o Dautu ai toforauku abe ma dodihiraino de Ma Jou wonahibehehongo wato ahao wonahikoano!” Hokogea manga higiriiri ma demo Unangika.
Masara nagali genangoka ona o hohidemo ma nyawa Ma Jouiye abe yokokurutiye de onangoo abe o Musa ai Pareta yotobadoto-dotoko. De ona gea ka de yamake o Yesusu ai heheranga ma hohailoa de yoihene ma ngofa-ngofaka gea iwihigiriiri Unangika de naga manga hiningaka manga dohata. 16Ho ona iwitaere o Yesusika ato, “Abeika to ona naa manga higiriiri ma demo Ngonaika. Mode nahigunoa o ngofaka gea la inihiromanga Ngonaika ato nanga Koano abe Ma Jou wonahibehehongoka?”
De o Yesusu wapaluhu onangika wato, “O ngofa-ngofaka gea manga demo toihenoka, masara Ngohi ko tataerua. Angamoi tanu to ona manga demo gea duru imakiniiki de abe ma dodihiraino ihitulihukuoka Ma Jou ai Demo-demoka. Ho mode ngini naa ko nibasauahi ma demo abe yotemo Ma Jouika ato,
‘Ngona nadotoko o ngofa-ngofakika gea, abe ngaro ka o ngofaka ma gogilauohi, ma gea nadotoko la inihigiriiri Ngonaika.’ # 21:16
Higiriiri 8:2
De hokogea itemo ma dodihiraino, de hokogea abe ma oraha naa idadi nenangoka.”
17De wapaluhu ibooto de o Yesusu wanoaika de wohupu ma kotaino gea de wolio o Betania ma kapongika de genangoka womaidu.
O gogilioro ma gota abe ko iwa ma hofoko
Maruku 11:12-14, 11:20-24
18De ma dawangeinoli o ngoru-ngorumino de o Yesusu de iwinii-niiki yoikoli daku o Yerusaleemiye. De ai dodagi ma goronaka de iwihafini. 19De ma gurutikahi de naga wamake o gogilioro ma gota o utu moi o ngekomo ma datekoka gea. De ma gotaika gea wolegahi la wato wamake ma hofoko, masara ka ma hoka dika naga, ho ko iwa ma gogilioro ma hofoko. Ho gea de Una wohikoboto ma gotaika gea wato, “Ibootohi nohofoko naa de ka hiado-adonika!” De ka de wohikoboto enangika de ma gogilioro ma gota gea imoraaka.#21:19 Hokogea wohikoboto angamoi ma gogilioro gea wahiketero de o Isiraele ma nyawa. Angamoi ma oraha gea de tanu o Isiraele ma nyawa koaho naga de manga hofokoka abe iwihisanangi Ma Jouika. Masara duru ko iwa manga hofoko ma rorahai manga wowangoka, ho kiani Una wahohowono onangika. Irahai hobasa o Yeremia 8:4-13 de o Yeremia 24.
20De ona iwinii-niiki ka de yamake gea de duru yokokiheranga ho iwileha Unangika ato, “Naa done sarakia hiadono ka de notemo de ma gota gea imoraaka?”
21De o Yesusu wotemo wato, “Naa tagou-goungu tinihingahu. Abe nako ngini naga de nia ngongakuoka de ko idomo-domoua, gea ahao ka idadi nginioo nidiai o heheranga ma datoro abe imaketero hoka nenangoli todiaioka. De tanu utuohi ilamoko ma heheranga ahao ngini niakunu nidiai nako de nia ngongakuoka. Abe ngaro ngini niahuloko o lokuika gea niato, ‘Nomagorakoka de nomahidulutuoka o gahiuku!’, de gea ahao idadi nako de nia ngongakuoka. 22De gea ho hiadono tinihingahu tato abe ma oraha nimagahoko moi Ma Jouino, gea iti ningaku abe nia gogahoko gea Ma Jou ka idadi winihidoaka, de gea ngaro o kia dika nimagahoko de igoungu winihidoaka Ma Jou. Masara nako hoka nia hininga hinooto nia gogahokika, gea ko niamakeua.”
O Yahudi ma nyawa manga hohidimono iwileha o Yesusika ma titi ai kuaha
Maruku 11:27-33; Lukasa 20:1-8
23De ipaha de yomahiadoniyeoli o Yerusaleeme ma kotaiye. De abe ma oraha o Yesusu wodotoko ai gogiriaka Ma Jou ai Tau ma loaka de naga o nyawa manga hidemo Ma Jouiye abe yokokurutiye de o Yahudi ma nyawa manga hohidimono utuoli, ona mata-mata yokokiboa o Yesusino. De ona gea iwileha o Yesusika ato, “O kiaino ani kuaha la hiadono kanugono o nyawa naduhu abe yotobafuku-fukunu Ma Jou ai Tauoka? De onagona honanga inihidoaka manga kuaha ngonaika la gea ka idadi nodiai?”
24Masara o Yesusu ko womafetongua onangika ho watemo wato, “Iya, marai gea ko tinipaluhuahi. Masara naga moi Ngohi tato tinilehahi nginika. De nako ngini ka idadi nihipaluhu Ngohino, de ahao Ngohioli tinibaluhu nginika abe tinihingahu ma titi ahi kuaha o kiaka de aino. Masara nako ngini ko nihipaluhua, Ngohioo ko tinipaluhua nginika. Ho hokonaa ahi leleha. 25Nako nengokadau abe o Yohanese Wotobaohi-ohiki, to una ai kuaha o kiaino ho hiadono o nyawa waohi-ohiki, Ma Jouoka de aino eko o nyawaka dika de aino ai kuaha? Abeika nipaluhu!”
Ho ona duru yomakoketemo ma titi ai leleha gea, ho yotemo ato, “Ou, ai leleha naa done sarakia hapaluhu? Nako hipaluhu Unangika hato, ‘Ma Jouoka de aino o Yohanese ai kuaha,’ gea de ahao kiani Una wonalehali wato, ‘Ho gea adodoa ho ko niwingakua unangika?’ 26De masara nako hipaluhu hato, ‘O nyawaka dika de aino ai kuaha,’ de done sarakia, angamoi nanga kokawaaha ona ko manga ngoe iwingaku abe o Yohanese una Ma Jou ai uru ma dodofanga womatengo. Ho nako hipaluhu hokogea ahao ma kokawaaha duru inangamo ngoneino de marai o huruhara ihititi genangoka! Ho ngone done sarakia?”
27Ho ma bahauku de manga hohidimono gea iwitemo o Yesusika ato, “Marai gea ko mihiorikua.”
De ahao o Yesusu wotemo wato, “Angamoi gea ngini ko nipaluhua, Ngohioo toluku tinihingahu abe ma titi ahi kuaha o kiaka de aino la ka idadi o nyawa gea taduhu Ma Jou ai Tauino.” Hokogea idadi abe ma oraha o Yesusu de o Yahudi ma nyawa manga hohidimono yomakoketemo, de manga demo o Yesusu wahikala abe to ona manga hininga wohikawalimoka.
O hiketero ma ade-ade abe ma titi o baba womatengo ai ngofaka yahinooto hokokia manga hingounu
28De ahao o Yesusu ka wotemohi o Yahudi ma nyawa manga hohidimonika wato, “Abeika ngini nimadoihene ahi hiketero ma ade-adeino naa la hokokia ma titi niataoko genangino. De naga womatengo o baba abe ai ngofaka yahinooto. De manga baba wihuloko ai ngofaka ma riakika wato, ‘Ahi ngofaka, ngona noiki nokarajaanga doka o angguru ma redioka o wange naa.’ 29De ma riaka wato, ‘Koua, ko ihimagaweua ho ko toikua.’ De una wosoboka, masara ko itedekanuahi de ai hininga womaduruuru ho woiki ma redika wokarajaanga.
30De ahao manga baba wihulokoli ma dodotika de ai demo ka imaketero dika abe hoka ma riakika. De ma dodoto wipaluhu ai babaika wato, ‘Iya, ahi baba, ngohi ahao toiki tokarajaanga.’ Masara ngaro hokogea to una ai demo ma una wieluku ho ko woikua. 31-32Hokogea dika aika ahi ade-ade. Ho naa tinileha nginika, nako ai ngofaka yahinootoino de onaguna iwihingounu ai babaika? Ma riaka eko ma dodoto?”
De o Yahudi ma nyawa manga hohidimono gea yopaluhu ato, “Gea kiani ma riaka abe wihingounu ai babaika.”
De o Yesusu wotemo onangika wato, “Gea nia bobaluhu duru niagoungu. Ho naa abeika nimafikirohi ahi hiketero ma demo ma dumutu. Angamoi nanga tonakoka naa de naga utu o nyawa iwihingounu nanga Baba Ma Jouika de utuoli abe ko iwihingounua, abe duru imaketero hoka o ria-dodoto yahinooto gea ahi ade-ade ma goronaka. Ho naa duru tagou-goungu tinihingahu. Nako o nyawa abe nengokadauino de manga wowango ma datoro itobatorou, abe hoka ona o pajaka ma tiwi yotobagaho-gahoko eko hoka o ngo-ngofeka abe yomatobafuku-fukunu manga badanga, ma ona gea ahao ka idadi Ma Jou wadafongo de wahidadi to Una ma hirete ai nyawa la wahikoano ona. De gea ka idadi Una wadafongo ona gea mangale ma titi ona yotoihene o Yohanese Wotobaohi-ohiki ai hingahu ma demoino de hiadono yotoba de manga hininga yomaduruuru hiadono manga hingounu naga Ma Jou o Babaika. Abe o Yohanese wotobadoto-dotoko ma titi o wowango ma totiai ma ngekomo, de ona gea abe ma dihiraino de manga datoro itobatorou, ona gea yaniiki de ihingounu ai demoika gea.”
“Masara nako ngini naa Ma Jou ko winidafongua. Angamoi ngini abe nidadi o Yahudi ma nyawa manga hohidimono, ngini naa barikua niamakeoka abe to ona gea manga wowango ma datoro aturuuruoka ma ka niolukohi niwingaku to Yohanese ai demoika. De gea mangale ma titi ti ngini nia howo-howono ko nioporetua de ko nitobaua, ho gea ngini nimaketero dika hoka o ngofaka o dodoto abe ma ade-ade ma goronaka kanganoika abe una o dodoto wato, ‘Iya,’ masara ma bahauku de ko iwa ai hingounu ai babaika.”
O angguru ma redi ma hiketero abe ma titi o Yahudi ma nyawa manga hohidimono iwioluku o Yesusika
Maruku 12:1-12; Lukasa 20:9-19
33De ahao o Yahudi ma nyawa manga hohidimono gea nagahi o Yesusoka de Una wahingahu o hiketero moioli onangika wato, “De naga womatengo o angguru ma redi wodatomo. Wodatomo ibooto de wohigilolitino wadaduhu ai angguru ma redi gea. Wadaduhoka, de ahao wodiai o baiti moi abe idadi o angguru ma teongo ma ngi. De ahao moi wodiai abe o redi yogoa-goana manga tau. De gea mata-mata wabootoka de o nyawa yamuruono naga ahao wahewa la wato ona yoogoana to una ai redi gea. De o redi ma dutu de yogoa-goana yomahiketehibehehongo la nako adonoka ma oraha abe ahao amake o redi ma hasili, de ahao ma hasilino gea yaregu la ahao ma hononga iwihidoaka o redi ma dutuika. De yomahiketehibehehongo ibooto de ahao o redi ma dutu wosobo de wotagi-tagi o tonaka utuikali. 34De ipahaino naga ma oraha ai redi naga de ma hasiloka, de o redi ma dutu ai huhuloko yamuruono naga wahidingoto yogoa-goanika la wato yale ma hasili ma hononga o angguru ma redino gea. 35Masara ma gogoana gea ahao yataokino ma huhuloko gea de womatengo onangino iwipoha-poha, de womatengoli iwitomaka, de womatengohi iwihakaru unangika hiadono unangoo wohonenge.”
36“De ahao ma redi ma dutu ai huhuloko utuoli wairiki de wahidingoto abe ma redi yogoa-goanika la onangoli ka idadi yale ma hasili ma redino. De onangikaoo ma idadiokali abe imaketero hoka ona yohira-hiraika.”
37“De ipaha o redi ma dutu wihidingoto to una ai ngofaka o nauru angamoi ai hiningaka womafikiri wato, ‘Ona gea kiani naga manga horomati ahi ngofakika.’”
38“Masara ka de yogoa-goana iwimake de iwihioriki abe ma redi ma dutu ai ngofaka woboaino de ona yomahikagaro ato, ‘Una gea o redi ma dutu ai ngofaka. Abeika hitoma la naa ai oara mata-mata homahitongoneoka dika!’ 39De iwihidee hokogea de iwitaokino ma dutu ai ngofaka gea de iwiao o redioka de aino ma hoanika de genangoka iwitomaka. Marai hokogea dika aika ahi hiketero.”
40De o Yesusu wotemohi o Yahudi ma nyawa manga hohidimonika wato, “Masara naa moi tinileha. Nako ngini, o angguru ma redi ma dutu gea ahao woboali ai redika de koaho o kia wodiai onangika abe yotobagoa-goana to una ai redioka?”
41De o hohidimono gea yopaluhu ato, “Nako ngomi miato koaho una woboa la ona abe ai redi yogoa-goana de abe yotobatorou, koaho wahibinaaha de o hohonenge ma dorou onangika. Wahibinaaha ibooto de ahao o nyawa utuoli wairiki la onangoli ahao yogoa-goana ai angguru ma redi gea, la nako adonoka ma oraha abe ahao amake o redi ma hasili de ona iwihidoaka ma dutuika ma hasilino ma hononga ai angguru ma redino gea.”
42-44De gea o Yesusu wotemo onangika wato, “Gea nia bobaluhino de duru niagoungu. Ho naa abeika nimafikirohi abe tanu onagonaika itiai yamake ma hohowono gea abe ngini nifetongoka. Angamoi nako o angguru ma redi ma ade-adeoka, gea ma dutu una womaketero de Ma Jou o Baba. De Una duru wonganono ka idadi wamake ma hofoko ma rorahai to Una ai nyawaino. Masara ngini naa nia wowangoka de ko nihihofokua o hofoko abe iwihisanangi Unangika. De tanu ngini naa abe winihitagongo la niatobagoana to Una ai nyawa, masara ngini niao duru ko itiaiua ho Una ko wamakeua ma hofoko abe wongano-nganono to Una ai nyawaino.”
“De ngini naa ka hiadono to Ma Jou ai duduhunu de ai Ngofaka masara onangoo ngini niao itorou onangika. Angamoi naa tinihingahu dika abe Ngohi naa tomaketero abe hoka ma redi ma dutu ai ngofaka, ho gea ngini nihiolukoka Ngohi. De gea duru ngini naa abe itiai ma hohowono inidaene abe kangano nifetongoka! Abe nia hohowono gea Ma Jou ahao winihituruuru de o nyawa utuoli o homoa ma nyawaino la onangoli yatobagoa-goana ai nyawa, de hiadono ona gea ahao o hofoko ma rorahai ihihofoko manga wowangoka. De gea ma titi ngini naa ko nidadiokaua Ma Jou ai kokawaaha angamoi ngini ka niawohangoka ai behehongo nginika.”
“De naa ma hiketero moioli ka idadi tagoraka Ma Jou ai Demo-demoino la enangoo ngini nihidifikirohi de ma ade-ade kangano. Abe ma dodihiraino de ihitulihuku hokonaa ato,
‘Naga moi o hakaru abe aolukoka o tau yotobadodiai,
de duru ma hakaru gea ahao idadioka o tau ma lifunu.
De abe ma hakaru gea idadi o tau ma lifunu,
gea Ma Jou Una ma hirete ai datoro,
de duru inahisanangi de abe duru inahiheranga.’” # 21:42-44
Higiriiri 118:22-23
“Hokogea itemo ma dodihiraino. De ma demo gea tanu imaketero dika ma dumutu de o angguru ma redioli ma hiketero ma dumutu. Angamoi abe ma hakaru ifetongoka Ma Jou ai Demo-demoka, de genangoo tomahiketero hoka Ngohi naa. De abe o tau yotobadodiai, gea ngini abe ma dihirainohi de Ma Jou winihitagongoka la nitobadodiai ai tau abe ma titi to Una ai nyawa niatobagoana. De ngaro hokogea Una winihitagongo nginika masara naa ngini nihiolukoka Ngohi abe wohihidingotino! Ho mode ngini ko ma moiuahi niabasa Ma Jou ai Demo-demoka gea abe ma titi ma hakaru? Angamoi ai demo gea duru ihidumutu Ngohino!”
De o Yesusu wohigila-gilali ai hitararono onangika wato, “De gea Ngohi tato, onagona dika yopeleke ma hakaruika gea de ona manga hininga itefu-tefuruku. De hongoli nako ma hakaru gea yahitapaluku o nyawauku, ona gea manga hininga ahao duru iwede-wederuku. Abe ahi demoino gea ma titi nako nihioluku Ngohi ahao kiani niamake nia hohowono nginika!”#21:42-44 Nako o buku ma asli utu, genangoka ko hamakeua o ayata naa.
45De o Yesusu wotemo ibooto de o Yahudi ma nyawa manga hidemo Ma Jouiye yokokurutiye de o Farisi manga doomuino ma nyawa ona gea duru yomahiorikoka abe o Yesusu ai hiketero ma dumutu onangika abe tanu wahiketero ona o Yahudi ma nyawa manga hohidimono, abe ona hoka o nyawa gea yotobagoa-goana o angguru ma redi, de abe ona gea iwioluku Unangika. 46De ona manga hininga duru iwingamo Unangika, ho tanu ma oraha gea dika de o Yesusu iwitaokino masara ko idadiua angamoi yohawana abe o nyawa yowoe-woeika. Abe yowoe-woe ona ato o Yesusu Ma Jou ai uru ma dodofanga womatengo. Ho ka iwinoaika dika de ko iwitaokuali.
Currently Selected:
Matiusu 21: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman