Matiusu 20
20
O hiketero ma ade-ade abe ma titi ngone Ma Jou ai nyawa hokokia nanga utumu ma hasili
1De o Yesusu wohigila-gila ai demo onangika de wahitararonohi abe ma titi ahao ma utumu hokokia Ma Jou wahidoaka ai nyawaika. Ho gea wohiketero wato, “Abe ma oraha Ma Jou wahikoano ai nyawa de ka idadi tohiketero hokonaa. De naga womatengo o tonaka ma dutu de ai tonakoka gea naga ai angguru ma redi wodatomoka. De o wange moiuku de ma tonaka ma dutu gea duru wongoru-ngorumu wohupu de walingiri o nyawa la wato o wange gea de ona yokarajaanga ai angguru ma redioka. 2De ona de ma dutu yomahiketehibehehongo la bootino o bobimaowaka de wahidoaka onangika o tiwi o haaka moi, abe gea biaha o nyawa yamake nako o wange moi ma gahumu yokarajaanga. De yomahiketehibehehongoka de una wahuloko la yoiki ai redika de yokarajaanga, ho yosobo.”
3“Ho abe ma wange idoaiye ma hohutulu abe ngade-ngade o takoro hiwo adonoka de o redi ma dutu wohupuoli ma kapongika de o paharoka womahiadonika de genangoka wamake o nyawa yamuruono naga abe yomatoomuino yomakoketemo masara ko kia-kiaua yodiai. 4Ho o redi ma dutu onangoo wahikarajaanga de wahibehehongo onangika wato, ‘Bootino o bobimaowaka de nia utumu o kia dika itiai de ti ngini nia karajaanga, gea ahao tinihidoaka nginika.’ Ho onangoo yosobo ai redika la yokarajaanga.”
5“Ho ipahaino o wange ikorona adonoka de woikoli de wamake o nyawa utuoli de onangoo wahikarajaanga. De to una ai behehongo ma demo onangika ka imaketero dika abe hoka ona kangano wahikarajaanga, abe wato, ‘Bootino o bobimaowaka de nia utumu o kia dika itiai de ti ngini nia karajaanga, gea ahao tinihidoaka nginika.’ Ho onangoli yosobo yokarajaanga.”
“De ino de o wange ilobioka abe ngade-ngade o takoro hange de wohupuoli de naga utuoli abe wamake de wahikarajaanga, de ai behehongo ma demo onangika ka imakadaene dika abe hoka kanganoinoli.”
6“De inoli abe ngade-ngade o takoro motoa o bimaowaka de ma redi ma dutu wohupuoli ma kapongika de ka wamake o nyawa utuoli abe yomakoketemo dika ma ko kia-kiaua yodiai. De onangika una waleha wato, ‘Adodoa ho ngini kanganohi de ko nikarajaangua?’”
7“De ona yopaluhu ato, ‘Angamoi ko moiuahi imihikarajaanga.’”
“De gea ma tonaka ma dutu wahuloko wato, ‘Nako hokogea ngini niloiki nimakuduhunu de ona abe kanganohi tahikarajaangoka la nginioo nikarajaanga ahi angguru ma redioka gea.’ Ho onangoli yosobo yokarajaanga.”
8“De o wange ihumuririhuku ho ma dutu wahuloko ai duduhunu abe wahitobahiaturu ona yotobakarajaanga wato, ‘Abe ona yokarajaanga o wange naa, ona mata-mata nahokino de manga karajaanga ma hasili nahikokidoaka onangika gea. De ihira-hira nahokino ona abe ahao kangano o takoro motoa de tahikarajaanga. De ahao ona abe o takoro hange de ahao yomulaenge yokarajaanga, onangoli nahokino. De ka hokogea dika hiadono ona abe yohira-hira yokarajaanga, ona ma bobahaka de ahao nahokino de nahidoaka manga karajaanga ma hasili.’ Hokogea wihuloko ai duduhunika.”
9“Ho ai duduhunu wahokino ona abe o takoro motoa o bimaowaka yomulaenge yokarajaanga ma redioka, de ona homoi-homoi yamake manga tiwi o haaka moi, abe gea biaha o nyawa yamake nako o wange moi ma gahumu yokarajaanga. 10De ipahaino de onangoli wahokino abe hatoli ka o ngoruminohi de wahikarajaanga. De ona gea manga hiningaka yato bote ahao utuohi ilamoko to ona manga hasili manga karajaangino, angamoi manga dekana yokarajaanga. Masara onangoo yamake o tiwi o haaka moi dika, abe imaketero hoka ona utuoli ikuranga yatedekana yokarajaanga. 11Ho ma tiwi gea ka de yamake de iwihigurubungu ma dutuika ato, 12‘Ou! Ona gea kangano yokarajaanga ka o takoro moiino dika masara onangoo yamake manga tiwi ma gahumu moi abe imaketero hoka ngomioli naa! Masara ngomi naa mia karajaanga duru o wange moi ma gahumu abe imidahauku ma oraha o wange ma hau-haukoka! Ho gea duru ko idadiua nomidiai hokogea!’”
13“De ma dutu wopaluhu womatengoika onangino wato, ‘Hobata, ani demo gea ko itaanua, angamoi ngini naa tiniao itiai. Abeika nomahihohininga kangano o ngoru-ngorumino de gea nanga behehongo ma demo hokokia? Gea ngohi de ngini homahiketehibehehongoka abe nako ngini nikarajaanga o wange moi, gea ahao niaborimake ma tiwi o haaka moi, angamoi hokogea biaha o nyawa yamake nako o wange moi ma gahumu yokarajaanga. 14Ho naa irahai nia karajaanga ma hasili niokokidafongo dika de nikokilioka. Angamoi ngohi naa ka ngohi dika ahi hininga la tahikoketero to ona manga karajaanga ma hasili abe naa ma duru yomulaenge yokarajaanga la imaketero hoka ti nginioli. 15De naa tonileha, sarakia, ko idadiua to ngohi ma hirete ahi tiwi de ngohi tomaputuhu de tohiaturu abe hokokia ahi hininga adaene? De sarakia, gea itiai abe ani daleana ipuda ani hiningaka mangale ma titi ngohi tosanangi tohifoloi tahidoaka o nyawa utuika? Marai gea ani hininga ko itiaiua, e?’”
16De o Yesusu wato, “Hokogea ahi hiketero ma ade-ade. De genangino ka idadi hamake Ma Jou ai hininga abe ahao ma oraha Una wahikoano ai nyawa. Angamoi igoungu naga o nyawa abe ma oraha naa ona manga gogere hatoli ikurutiye masara ona gea ahao wahitipokouku Ma Jou abe ma oraha ahao iboa. De o nyawa utuoli naga abe ma oraha naa ona ka yotipokoukuohi, masara ahao Ma Jou wagoraka ona gea de wahitihira la manga gogere ikurutiye o Horogaka.”
O Yesusu wahingahuoli iwinii-niikika ma titi ahao iwihohonenge
Maruku 10:32-34; Lukasa 18:31-34
17De ipahaino de o Yesusu de iwinii-niiki de o nyawa utuoli yowoe-woe yomakiniiki yoiki daku o Yerusaleeme ma kotaiye. De manga dodagi ma goronaka de o Yesusu wahidohikika ona yangimoi de yahinooto o ngekomo ma datekoka la ka ona dika de womahingahu abe ahao idadi hokokia Unangika. 18De o ngekomo ma datekoka womahingahu onangika wato, “Naa hodoa o Yerusaleemiye, de o wange muruonohi naga ipahaikali de ahao genangoka Ngohi o Nyawa ma Ngofaka ihihidoaka to ngone o Yahudi ma nyawa nanga hohidimonika. Ihihidoaka onangika abe nanga hidemo Ma Jouiye manga hohidimonika de abe inatobadoto-dotoko o Musa ai Paretaino ma onangikaoo ihihidoakika. De ihiaoika de ona ahao aputuhu la ato ihihohonenge. 19De ihiurusu ibooto de ahao ihihidoakoli o Roma ma poparetaika abe ko o Yahudi ma nyawaua. De o popareta gea ahao ihihohedu, de ihipoha-poha de o hohonenge ma boboha, de ahao ihihohonenge abe ihidapakuika o gota isosalioaika. De ngaro tohonengoka masara ka o wange hange dika ipahaika de tomomikokali.” Hokogea o Yesusu womahingahu onangika.
Hokokia ngone Ma Jou ai nyawa homalingiri nanga gogere Ma Jouoka
Maruku 10:35-45
20De ipahaino de o Sebedeusu ai ngofaka yahinooto o Yakobusu de o Yohanese, abe o Yesusu iwinii-niiki yangimoi de yahinootoino, ona de manga meme yoboa o Yesusino. De manga meme matilabukuku o Yesusu ai himangoka la mato mogahoko moi Unangino. 21De o Yesusu wotemo wato, “Ho ani gogahoko Ngohino o kia?”
De muna mopaluhu mato, “Marai togahoko tato abe ahao ma oraha o nyawa nahikoano, toigo la kiani ahi ngofaka yahinooto naa onangoo yokoano de de Ngona. De ma oraha o nyawa inihigiriiri de nogogeruku ani pareta ma kaderaka de o nyawa nahikoano, de onangoo ato yogogeruku ani arigumurukoka la to onangoo manga kuaha naga. De moi ani nirakoka yogogere, de moi ani gubadioka yogogere.”
22De o Yesusu watemo onangika wato, “Ngini naa niato nihidodiawo ma oraha o nyawaika tahikoano, masara bote ngini ko nihiorikuahi abe nagali ma kokangela kiani niohimangohi nako nioigo la ahao nidadi o koano. Ho marai duru ko nihiorikuahi abe nimagahokoka. Ho gea abe ma oraha ahi kokangela tohimanga, sarakia, ma oraha genangoo ka idadi niapoa nihidodiawo?”
De ona yahinooto iwipaluhu Unangika ato, “Iya. Ngomi ka miakunu hokogea.”
23De Una wato, “Igoungu nginioo ahao o nyawa inihikangela ma ngoe de naga utuohi o hohangihara irupa-rupa niaohana. Masara abe nia gogahoko gea, Ngohi duru ko idadiua tinihidoaka ma gogere gea abe ahi arigumurukoka, angamoi gea to Ma Jou o Baba ai putuhu. Ho onagona dika abe Una wairikokau, ona gea de ahao yamake ma gogere gea.”
24De manga gogahoko gea manga dodiawo yangimoi yoihene, de duru yahininga kuranga o Yakobusu de o Yohanesika. 25-26De ahao o Yesusu iwinii-niiki yangimoi de yahinooto wahokino de wahitiari onangika la ufa yokadatoro ma gogere gea. Wahitiari wato, “Ngini naa ufa nimagoraka. Abe ufa nimaaduru hoka onangoli abe ko o Yahudi ma nyawaua. Gea nihiorikoka hokokia abe ona gea yahipareta manga kokawaaha. Abe manga kokoanoo de manga balu-baluhoo duru yoigo yahipareta de duru yoigo yahuloko hokonaa de hokonaa manga kokawaahaika. Masara ngini naa, ufa nia hiningaka nimaaduru abe hoka onangoli manga hininga.”
“Abe nginioka onagona dika niato nia dodiawo inihoromati nginika, gea kiani nialeleani onangika gea. 27De hokogenangoo, ngini abe niato nginiohi nimahikurutiye Ma Jou ai himangoka, de gea kiani nidadi nia dodiawo mata-mata manga gilaongo.”
28“Abeika ngaro Ngohi o Nyawa ma Ngofaka abe toboa o Horogaka de tauku, ma Ngohi toboa ko ma titiua la o nyawa ihileleani Ngohino, masara ma titi toboa Ngohi la taleleani o nyawaika. De ma titi moioli naga, abe toboa la ahi wowango tomahidoaka la idadi o nyawa manga ngoe manga hiluasa ma bobangu. Abe imaketero hoka o gogilaongoli yalikoika manga karajaanga, de hokogenangoo o nyawa mata-mata yalikoika manga howono. Ho gea ahi wowango tomahidoaka la o nyawa manga ngoe tahiluasa manga kangelaino abe tahihohe manga howo-howonino. Mangale ma titi hinooto gea hiadono Ngohi toboa ma duniauku, abe ko ma titiua la o nyawa ihileleani Ngohino.” Hokogea o Yesusu ai hitiari ma demo iwinii-niikika abe wahitiari wato ufa yomalingiri manga gogere ikokurutiye.
Naga o nyawa yahinooto yorafi-rafi gea o Yesusu wahitogumu
Maruku 10:46-52; Lukasa 18:35-43
29De ipahaino de o Yesusu de iwinii-niiki yogila-gilali abe manga dumutu o Yerusaleeme ma kotaika. De manga dodagioka de yoboa o Yeriko ma kotaino, de ahao ma oraha o Yeriko yoporetoka de naga o nyawa ko manga ngoe yaniiki. 30De o ngekomo ma datekoka de naga o nauru yahinooto yorafi-rafi yomagoo-gogere. De ona ka de iwigihene naga o Yesusu woboa ma ngekomino wotigioka de yomulaenge o duduhunu yomagahoko yopoa-poaka ato, “Mia Baluhu! O Dautu ai Toforauku! Ngomi mimagahoko la nomidora ngomi naa!” 31De o nyawa manga ngoe genangoka yataere onangika ato, “Ufa nigigoro hokogea! Nimariidoka dika!” Masara ka de hokogea de utuohi yaamo-amokiye abe imaketero hoka manga demo ihira-hira ato, “Mia Baluhu! O Dautu ai Toforauku, ngomi mimagahoko la nomidora ngomi naa!”
32De o Yesusu woihene manga demo gea de womatogumuku o ngekomoka de wahoko ona yahinootoika wato, “Ngini o kia nimagahoko Ngohino la niato tiniduhunu?”
33De ona yopaluhu ato, “Mia Baluhu, duru mioigo mimahioriki.” 34De o Yesusu ai hininga ma dora ma hiokoo duru itagi ona yahinooto yorafi-rafika ho wakokisoika manga lakoika. De ka de wakokisoika de yotogumoka ho ka idadi yomahioriki! De ahao ona yahinooto onangoo iwiniiki o Yesusu abe yotagi-tagi ma ngekomoka.
Currently Selected:
Matiusu 20: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman