متّی 9
9
یِسُوع ہِک مفلُوج کُوں شِفا ݙیندِن
(رَلدا مِلدا حوالہ: مرقس 2:1-12؛ لُوقا 5:17-26)
1اَتے یِسُوع ٻیڑی اِچ ٻَہہ کرائیں وَلا اپݨے شہر کفرنحوم اِچ آ ڳیا۔ 2اَتے ݙیکھو لوک ہِک بندے کُوں کھٹڑے اُتے چا کرائیں اُوندے کولھ گھِن آئے کیوں جو او فالج دی وجہ کنُوں ٹُر پِھر نہ سڳدا ہا، اُنہیں دا اِیمان ݙیکھ کرائیں یِسُوع فالج تھئے بندے کُوں آکھیا، ”اَے پُتر! حوصلہ رکھ تیݙے گُناہ مُعاف تھئے۔“ 3ایہ سُݨ کرائیں اُتھاں کھڑے کُجھ شرع دے عالم دِل اِچ آکھݨ لڳے ایہ کُفر اَہدے۔ 4پَر یِسُوع اُنہیں دے دِلیں دے خیال ڄاݨ کرائیں آکھیا، ”تُساں کیوں اپݨے دِلیں اِچ بُرے خیال سوچیندو؟ 5اِنہیں ݙُو ڳالھیں اِچوں کیرھی ڳالھ آکھݨ سَوکھی ہے، ’تیݙے گُناہ مُعاف تھئے‘ یا ایہ جو ’اُٹھی کھڑ اَتے ٹُر پِھر؟‘ 6پَر اِیں کیتے جو تُہاکُوں پتا لڳے جو اِبنِآدم یعنی مَیکُوں زمین اُتے گُناہ مُعاف کرَݨ دا اِختیار ہے۔“ اِیندے بعد اُوں مفلُوج کُوں آکھیا،”اُٹھی اپݨا کھٹڑا چا اَتے اپݨے گھر دو لڳا وَنڄ۔“ 7او بندہ کھڑا تھِیا اَتے اپݨے گھر دو لڳا ڳیا۔ 8ایہ ݙیکھ کرائیں بھِیڑ ݙَر ڳئی اَتے خُدا دی حمدوثنا کرَݨ لڳی جَیں بندئیں کُوں اینجھا اِختیار ݙِتے۔
یِسُوع، متّی کُوں شاگِرد چُݨدِن
(رَلدا مِلدا حوالہ: مرقس 2:13-17؛ لُوقا 5:27-32)
9یِسُوع اُتھوں اَڳوں ٹُریا اَتے ہِک بندے کُوں چُنڳّی اُتے مصُول گھِندے ݙِٹھا اُوندا ناں متّی ہا۔ اَتے یِسُوع اُونکُوں آکھیا، ”میݙے پِچھُوں لڳا آ“
اَتے متّی اُٹھی کرائیں اُوندے پِچھُوں ٹُر پِیا۔
10اَتے کُجھ ݙینہہ بعد متّی دے گھر یِسُوع اَتے اُوندے شاگِرد کھاݨا کَھندے ٻیٹھے ہَن اَتے ٻَہُوں سارے مصُول گھِنݨ آلے اَتے گُنہگار لوک وی آ کرائیں یِسُوع اَتے اُوندے شاگِردئیں نال کھاوَݨ کیتے آن ٻیٹھے۔ 11ایہ ݙیکھ کرائیں فرِیسیئیں اُوندے شاگِردئیں کُوں آکھیا، ”تُہاݙا اُستاد مصُول گھِنݨ آلئیں اَتے گُنہگاریں دے نال کیوں کَھندے؟“ 12ایہ سُݨ کرائیں یِسُوع جواب اِچ آکھیا، ”چَنڳے بھلیں کُوں حکیم دی لوڑ نَئیِں ہوندی بلکہ بِیماریں کُوں لوڑ ہوندی ہے۔ 13تُساں وَنڄ کرائیں اِیں ڳالھ دا مطلب ڳولو، ’مَیں قُربانی نَئیِں پَر رَحم پسند کرینداں‘ کیوں جو مَیں نیک لوکیں کیتے نَئیِں بلکہ گُنہگاریں کُوں سَݙݨ آیاں۔“
روزے دے بارے اِچ سوال
(رَلدا مِلدا حوالہ: مرقس 2:18-22؛ لُوقا 5:33-39)
14اِیندے بعد یُوحنّا بپتِسمہ ݙیوَݨ آلے دے شاگِرد یِسُوع کولھ آئے اَتے پُچھݨ لڳے، ”اَساں اَتے فرِیسی تاں روزہ رکھیندوں پَر تیݙے خاص شاگِرد روزہ کیوں نَئیِں رکھیندے؟“ 15یِسُوع اُنہیں کُوں جواب ݙِتا، ”کیا براتی گھوٹ دے نال ہوندئیں ݙُکھی تھی سڳدِن؟ پَر او ویلا اَؤسی جݙّاں گُھوٹ اُنہیں کنُوں اَنجھ کر گھِدا ویسی اَتے وَل او روزہ رکھیسِن۔ 16کُوئی وی نَویں ٹاکی پُراݨے چولے اِچ نَئیِں لیندا جے او اِیویں کریسی تاں نَواں کپڑا چھکیڄ ویسی اَتے پُراݨا چولا پہلے کنُوں زیادہ پَڑیڄ ویسی۔ 17اَتے نَویں مَے پُراݨی مَشکیں اِچ نَئیِں بھریندے نَئیِں تاں مَشکاں پھَٹ کرائیں برباد تھی ویندِن اَتے مَے وِٹیڄ ویندی ہے پَر نَویں مَے نَوئیں مَشکیں اِچ بھریندِن اَتے او ݙُوہیں بچ ویندِن۔“
یِسُوع ہِک چُھوہِر کُوں زندہ کریندِن اَتے ہِک تریمت کُوں شِفا ݙیندِن
(رَلدا مِلدا حوالہ: مرقس 5:21-43؛ لُوقا 8:40-56)
18اَڄݨ یِسُوع اُنہیں نال ایہ ڳالھیں کریندا ای پِیا ہا جو عبادت گاہ دا ہِک مذہبی رِہنما آ کرائیں اُوندے پیریں اِچ جُھک کرائیں آکھیا، ”میݙی دِھی تھوڑی دیر پہلے موئی ہے تُوں ڄُل کرائیں اُوندے اُتے اپݨا ہَتھ رکھ تاں او وَلا زندہ تھی ویسی۔“ 19یِسُوع اُٹھی کرائیں اپݨے شاگِردئیں سمیت اُوندے کٹھے اُوندے گھر دو ٹُر پِیا۔
20جیرھے ویلے یِسُوع اُوندے گھر دو ویندا پِیا ہا تاں ہِک تریمت جَیندا ٻارھاں سالیں کنُوں خُون نہ پِیا رُکدا ہا اُوں یِسُوع دے پِچھُوں آ کرائیں اُوندی پُشاک کُوں ہَتھ لایا۔ 21کیوں جو اُوندا اِیمان ہَئی جو پُشاک کُوں ہَتھ لاوݨ نال مَیکُوں شِفا مِل ویسی۔
22یِسُوع پِچھُوں مُڑ کرائیں اُونکُوں ݙِٹھا اَتے آکھیا، ”اَے میݙی دِھی! ترسلّا رکھ! تیݙے اِیمان تَیکُوں شِفا ݙِتی ہے۔“ اَتے تریمت کُوں اُوں ویلے شِفا تھی ڳئی۔
23وَل یِسُوع اُوں مذہبی رِہنما دے گھر پُڄا تاں ماتمی ساز وَڄدے پئے ہَن اَتے ٻَہُوں وَݙّی بھِیڑ کُوں وَیݨ کریندے ݙِٹھا۔
24یِسُوع کوڑیج کرائیں آکھیا، ”تُساں سارے اِتھوں ٻاہر لڳے وَنڄو، کیوں جو چُھوہِر موئی کَینی بلکہ سُتی پَئی ہے“ ایہ ڳالھ سُݨ کرائیں لوک کِھلݨ لڳ پئے۔
25جیویں ای بھِیڑ کُوں ٻاہر کڈھ ݙِتا ڳیا تاں یِسُوع کمرے اِچ وَنڄ کرائیں چُھوہِر دا ہَتھ پکڑیا تاں او اُٹھی ٻیٹھی۔ 26اَتے اُوں چھُوہِر دے زندہ تھِیوَن دی خبر سارے علاقے اِچ کھِنڈ ڳئی۔
یِسُوع ݙُو اَندِھئیں کُوں دید ݙیندِن
27جݙّاں یِسُوع اُتھوں اَڳوں تے ڳیا تاں ݙُو اَندھے اُوندے پِچھُوں لڳ پئے اَتے آکھݨ لڳے! ”اَے داؤد دے پُتر! ساݙے اُتے رَحم کر۔“
28جݙّاں یِسُوع گھر اِچ پُڄ ڳیا تاں او اَندھے اُوندے کولھ آئے اَتے یِسُوع اُنہیں کنُوں پُچھیا، ”کیا تُہاݙا اِیمان ہے جو مَیں ایہ کر سڳداں؟“
تاں اُنہیں جواب ݙِتا، ”جِیا سَئیِں!“
29اِیندے بعد یِسُوع اُنہیں دی اَکھیں کُوں ہَتھ لا کرائیں آکھیا، ”جیویں تُساں اِیمان رکھیندو تُہاݙے کیتے اُونویں تِھیوے۔“ 30اَتے اُنہیں دی دید وَل اَئی اَتے یِسُوع اُنہیں کُوں آکھیا، ”خبردار کہیں کُوں وی ایہ پتا نہ لڳے۔“
31پَر یِسُوع دے ہٹکݨ دے باوجود اُنہیں اِیں ڳالھ کُوں علاقے اِچ کھِنڈا ݙِتا۔
یِسُوع ہِک گُنگے کُوں ٻولݨ دی طاقت ݙیندِن
32جݙّاں او ݙُوہیں اَندھے ٹھیک تھی کرائیں ویندے پئے ہَن تاں لوک ہِک بندے کُوں یِسُوع کولھ گھِن آئے جیرھا بَدرُوح دی وجہ کنُوں ٻول نہ سڳدا ہا۔ 33اَتے یِسُوع بَدرُوح کُوں کڈھ ݙِتا تاں گُنگا ٻولݨ لڳ پِیا اَتے بھِیڑ حیران تھی کرائیں آکھݨ لڳی جو اِیہو جیہاں کَم اَساں بنی اِسرائیل اِچ کݙاہیں وی نَئیِں ݙِٹھا۔
34پَر فرِیسیئیں آکھیا،”ایہ تاں بَدرُوحیں دے سردار دی مدد نال بَدرُوحیں کُوں کڈھیندے۔“
یِسُوع کُوں لوکیں اُتے ترس اَندے
35اَتے یِسُوع سارے شہریں اَتے وَستیئیں اِچ پِھردا اَتے اُنہیں دی عبادت گاہیں اِچ تعلیم ݙِیندا اَتے خُدا دی بادشاہت دی خُوشخبری دا پرچار کریندا اَتے ہر طرحاں دی بِیمارئیں اَتے کمزورئیں کنُوں شِفا ݙِیندا ریہا۔ 36اَتے بھِیڑ کُوں ݙِیکھ کرائیں اُونکُوں اُنہیں تے ترس آیا کیوں جو او اُنہیں بِھیݙیں وانگوں پریشان اَتے مجبور ہَن جنہیں دا آڄڑی نہ ہووے۔ 37اِیندے بعد اُوں اپݨے شاگِردئیں کُوں آکھیا، ”رَڑھ تاں ٻَہُوں ہے پَر مَزدُور گَھٹ ہِن۔ 38اِیں کیتے رَڑھ دے مالک دی مِنّت کرو جو او اپݨی رَڑھ کپݨ کیتے ٻئے مَزدُور بھیڄے۔“
Currently Selected:
متّی 9: سرائیکی
Highlight
Share
Copy
Want to have your highlights saved across all your devices? Sign up or sign in
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY