متّی 8
8
یِسُوع ہِک کوڑھی کُوں شِفا ݙیندِن
(رَلدا مِلدا حوالہ: مرقس 1:40-45؛ لُوقا 5:12-16)
1جݙّاں یِسُوع پہاڑ کنُوں تَلے لَہہ آیا تاں ٻَہُوں وَݙّی بھِیڑ اُوندی سَنگت اِچ ٹُر پَئی۔ 2اَتے اچانک ہِک کوڑھی اُوندے کولھ آیا اَتے اُوندے اَڳوں جُھک کرائیں آکھیا، ”سَئیِں! جے تُوں چاہیں تاں مَیکُوں پاک صاف کر سڳدیں۔“
3یِسُوع اُونکُوں ہَتھ لایا اَتے آکھیا، ”مَیں چاہنداں، تُوں پاک صاف تھی وَنڄیں۔“ اَتے اُوندے ہَتھ لیندئیں ای او کوڑھ کنُوں پاک صاف تھی ڳیا۔ 4یِسُوع اُونکُوں آکھیا، ”خبردار! لوکیں کُوں ݙساوَݨ کنُوں پہلے مذہبی پیشوا دے کولھ وَنڄ کرائیں پہلے او نذر نیاز ݙِے جیرھی خُدا موسیٰ دی راہِیں مقرر کیتی ہے وَل لوکیں کُوں تیݙی شِفا دا پتا چلے جو تُوں ٹھیک تھی گئیں۔“
یِسُوع ہِک رومی صوبیدار دے نوکر کُوں شِفا ݙیندِن
(رَلدا مِلدا حوالہ: لُوقا 7:1-10)
5وَل یِسُوع شہر کفرنحوم آیا اُتھاں ہِک رومی صوبیدار اُوندے کولھ آ کرائیں اُوندی مِنّت کریندئیں ہوئیں آکھیا، 6”سَئیِں! میݙے نوکر کُوں فالج ہے اَتے ٻَہُوں دَرد نال پریشان تھِیا گھر اِچ پئے۔“ 7یِسُوع اُونکُوں آکھیا، ”مَیں آ کرائیں اُونکُوں شِفا ݙیساں۔“ 8صوبیدار جواب ݙِتا، ”سَئیِں! مَیں اِیں لائق کَینی جو تُوں میݙی چھت تَلے آویں بَس اِتھاؤں آکھ ݙیو تاں میݙے نوکر کُوں شِفا تھی ویسی۔ 9کیوں جو مَیں آپ وی وَݙّے اَفسریں دے اِختیار اِچ ہاں اَتے میݙے تَلے وی سپاہی ہِن۔ مَیں اِنہیں کُوں آوَݨ دا حُکم ݙیواں تاں اَندِن اَتے وَنڄن دا حُکم ݙیواں تاں ویندِن اَتے اِیویں ای اپݨے ٻاہنے کُوں جیرھا کُجھ کرَݨ دا اَہداں او کریندے۔“ 10ایہ سُݨ کرائیں یِسُوع ٻَہُوں حیران تھِیا اَتے اُوں مُڑ کرائیں اپݨے پِچھُوں آوَݨ آلے لوکیں کُوں آکھیا، ”مَیں تُہاکُوں سچّ اَہداں جو بنی اِسرائیل اِچ وی مَیں اِینجھا اِیمان نَئیِں ݙِٹھا۔ 11مَیں تُہاکُوں اَہداں جو ٻَہُوں سارے لوک پچادھ اَتے پُواَدھ کنُوں آ کرائیں ابرہام، اِضحاق اَتے یعقُوب دے نال اَسمان دی بادشاہی دی دعوت اِچ شامِل تھِیسن۔ 12پَر ٻَہُوں سارے اِسرائیلی جیرھے خُود کُوں بادشاہی دے اصل وارث سمجھدِن اُنہیں کُوں اندھارے اِچ سَٹ ݙِتا ویسی جِتھاں او روندے اَتے ݙَند پِیہندے رَہسِن۔“ 13وَل یِسُوع صوبیدار دو ݙیکھ کرائیں آکھیا، ”تُوں گھر دو لڳا وَنڄ جیویں تَیں اِیمان رکھیے تیݙے کیتے اُونویں ای تھیسی۔“ اَتے اُوں لحظے اِچ ای اُوندے نوکر کُوں شِفا مِل ڳئی۔
پطرس دی سَس اَتے ٻَہُوں لوکیں کُوں یِسُوع شِفا ݙیندِن
(رَلدا مِلدا حوالہ: مرقس 1:29-34؛ لُوقا 4:38-41)
14اَتے یِسُوع، پطرس دے گھر آ کرائیں ݙِٹھا جو پطرس دی سَس بُخار اِچ کھٹڑے اُتے پئی ہے۔ 15یِسُوع اُوندا ہَتھ پکڑیا تاں اُوندا بُخار لَہہ ڳیا اَتے او اُٹھی کرائیں اُوندے کھاوَݨ پِیوَݨ دا بندوبست کرَݨ پئے ڳئی۔ 16جݙّاں شام تھئی تاں لوک اپݨے نال ٻَہُوں سارے اِینجھے لوکیں کُوں یِسُوع کولھ گھِن آئے جنہیں اِچ بَدرُوحاں ہَن اَتے اُوں بَدرُوحیں کُوں حُکم ݙے کرائیں کڈھ ݙِتا اَتے سارے بیماریں کُوں شِفا ݙِتی۔ 17تے اِیویں یِسُوع، یسعیاہ نبی دی او ڳالھ پوری کیتی،
”اُوں آپ ساݙیاں کمزوریاں اپݨے اُتے گھِن گھِدیاں اَتے ساݙیاں بیماریاں مُکا چھوڑیاں۔“
یِسُوع دی پیروی کرَݨ کیتے تیار لوک
(رَلدا مِلدا حوالہ: لُوقا 9:57-62)
18جݙّاں یِسُوع اپݨے چَودھاروں ٻَہُوں وَݙّی بھِیڑ ݙِٹھی تاں اُوں شاگِردئیں کُوں گلِیل دی جھیل دے پار ڄُلݨ دا آکھیا۔ 19اَتے ہِک شرع دا عالم اُوندے کولھ آ کرائیں آکھݨ لڳا، ”اَے اُستاد! جِتھاں تُوں ویسیں مَیں تیݙے پِچھُوں اَوساں۔“ 20یِسُوع جواب ݙِتا، ”لُومبڑئیں دیاں گھوراں ہوندِن اَتے پَکھئیں دے آلھݨے پَر اِبنِآدم یعنی میݙے کیتے سِر لُکاوَݨ دی وی کُوئی جاہ کَینی۔“ 21ہِک ٻئے شاگِرد اُونکُوں آکھیا، ”سَئیِں! مَیکُوں اِجازت ݙے جو مَیں پہلے وَنڄ کرائیں اپݨے پیِوُ کُوں دفنا آواں۔“ 22پَر یِسُوع اُونکُوں آکھیا، ”مُردئیں کُوں اپݨے مُردے آپ دفن کرَݨ ݙے پَر تُوں میݙے پِچھُوں ٹُر۔“
طوفان، یِسُوع دا حُکم منیندے
(رَلدا مِلدا حوالہ: مرقس 4:35-41؛ لُوقا 8:22-25)
23اَتے اِیندے بعد یِسُوع ٻیڑی اِچ آ ڳیا اَتے اُوندے خاص شاگِرد وی نال تھی پئے۔ 24یِسُوع ٻیڑی اِچ سُتا پِیا ہا اَتے ݙیکھو گلِیل دی جھیل اِچ اچانک ٻَہُوں زور دا طوفان آ ڳیا اَتے ٻیڑی چھولِئیں اِچ ٻُݙݨ لڳی۔ 25اَتے خاص شاگِرد اُوندے کولھ ڳئے اَتے اُونکُوں جگا کرائیں آکھݨ لڳے، ”اَے خُداوند! ساکُوں بچا کیوں جو اَساں ٻُݙدُوں۔“ 26یِسُوع جیرھا سب کُجھ ڄاݨدا ہا اُنہیں کنُوں پُچھیا، ”اَے بےیقینو! ݙَردے کیوں ہِوے؟“ اِیندے بعد اُوں اُٹھی کرائیں ہوا اَتے پاݨی کُوں دَڑکا ݙِتا اَتے جھیل اِچ بالکل امن تھی ڳیا۔ 27اَتے شاگِرد حیران تھی کرائیں آپت اِچ آکھݨ لڳے،”ایہ کینجھا بندہ ہے جَیندا حُکم ہوا اَتے پاݨی وی مَنیدِن؟“
یِسُوع ݙُو بَدرُوح گرفتہ بندئیں کُوں شِفا ݙیندِن
(رَلدا مِلدا حوالہ: مرقس 5:1-20؛ لُوقا 8:26-39)
28جݙّاں یِسُوع گلِیل دی جھیل دے پار گدرِینئیں دے مُلک اِچ پُڄیا تاں ݙُو بندے جیرھے بَدرُوحیں دے قبضے اِچ ہَن او اِینجھے وحشی ہَن جو اُوں رَستے کنُوں کُوئی لنگھ نہ سڳدا ہا، او گُستان اِچوں نِکل کرائیں یِسُوع کُوں مِلیے۔ 29اَتے اُنہیں چیکاں مار کرائیں یِسُوع کُوں آکھیا، ”اَے خُدا دے پُتر! ساݙا تیݙے نال کیا واسطہ؟ کیا تُوں اِیں کیتے اَئیں جو ساکُوں وقت کنُوں پہلے عذاب اِچ سَٹیں؟“
30اِنہیں کنُوں کُجھ پندھ تے جِتامئیں دا اَڄڑ چَردا وَدا ہا۔ 31اَتے بَدرُوحیں یِسُوع دی مِنّت کیتی جے تُوں ساکُوں کڈھݨ چاہندیں تاں ساکُوں جِتامئیں دے اَڄڑ اِچ بھیڄ ݙے۔ 32یِسُوع اُنہیں کُوں آکھیا، ”وَنڄو“ بَدرُوحاں نِکل کرائیں جِتامئیں اِچ لڳیاں ڳئیاں اَتے جِتامئیں دا سارا اَڄڑ جھیل دے کنارے تے بݨی ریڑھ کنُوں اُوں جھیل اِچ وَنڄ پِیا اَتے ٻُڈ کرائیں مَر ڳیا۔ 33ایہ ݙیکھ کرائیں جِتامئیں دے آڄڑی بھڄئے اَتے شہر اِچ وَنڄ کرائیں لوکیں کُوں سارا حال سُݨایا اَتے او حال وی جیرھا بَدرُوح گرفتہ بندئیں نال تھِیا ہا۔ 34وَل سارا شہر نِکل کرائیں یِسُوع کُوں مِلّݨ آیا اَتے اُونکُوں ݙیکھ کرائیں مِنّت کیتی جو ساݙے علاقے کنُوں لڳا وَنڄ۔
Currently Selected:
متّی 8: سرائیکی
Highlight
Share
Copy
Want to have your highlights saved across all your devices? Sign up or sign in
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY