Luke 21
21
1Ma nia lio alaa, ka rikia wane na kera rikii do ki keki u asi do kera na keki tona faledaki la fuila malefo. 2Ma nia rikia lau boo tee gwa oru ne ai si rikii do bana ka u ana ro migee lifoia iei. 3Ma nia ka sorea, Si do mamana ku soree isamulua, Gwa oru nei ne ai si rikii do e u asi do ne oro ka tatha ani kera sui boo: 4Uria na toa nei ki sui boo kera u bada ana tei fo ana malefo oro kera ki isana do na kera tona falea ifatha God: ma ni nia, kai to mena ana rofe la, ka u asi do ne rikidaki sui boo.
5Ma si maṉa na tei toa keki ṉata sulia biu baita tha God, na kera lauṉia asi fau lea ki ma asi do kera tona faledaki, nia ka sorea, 6Ma si do nei ki na muka rikia, fa boṉi ki kai fula, na toto kesi ekwa ata fau si to fafona ta fau, keki aga teefau ania. 7Ma kera soetoona, keka una eri, Wane ni kwaifamanatai ae, iaṉita na do eki kai mamana? ma nifenia bala si maṉa na do eki karaṉia keki ilia naa? 8Ma nia ka sorea, Muki fia ada keki talai garo ani kamulua: uria na toa oro toto keki lae mai ana thataku, keki una eri, Nau ni nia; bia, Si maṉa ni karaṉi naa: mania musi lae iburiada. 9Ma lalae muki roṉoa omea ki ma ṉalu la sulia omea ki, musi aanu: uria na kera tooa u boo sa do eki kai lae mai totonao e ai si ei; ma susui lana si do e ai si fula asi maṉa eri u boo.
10Sui nia ka soree isada, Toa ata fanua toto keki tatae keki firu bia toa ata fanua, ma toa ta wane inoto keki firu bia toa ta wane inoto: 11Ma anunu baita ki kai liu ata fanua ma ta fanua na mai, ma unii thaofa ki, ma mataia taa ki ne sisigi; ma si do riki lana kwaifamaui ki ma bala si do baita ki kai ita mai i thalo. 12Ma si do totonao sui do eki ka bii fula, keki rau ani kamulua, ma keki tona ilamatai kamulua, keki fale kamulua ifana biu ni ofu la ki ma lokafu ki, keki talai kamulua inaofana kiṉa ki ma wane gwauwai ki inunufana thataku. 13Si do fasi muki faamamanea si do na mulu thaitoomana. 14Mania muki alua tee si lio ana ruruumulua, musi laloma totonao sulia si do na toto muki luuda ania: 15Uria nau kwai falea ta fokee imole bia liotooa ifamulua, na maalimae kamulua ki sui boo toto keki dora ana luu lana ma suusi lana. 16Ma toto maka kamulua ki ma thainamulua ki, bia dooramulua ki, ma ina lamulua kera, ma toa na muki ado ki, keki fale kamulua; ma keki adea keki thauṉia tei toa iamulua. 17Ma toto toa ni sui keki riki kamulua ka taa inunufana thataku. 18Ma ta kwakwee ifu ana gwaumulua so keka labatania e ai. 19Muki ṉalia maṉomulua asi lio ni susuu la.
20Ma si maṉa na mulu rikia keki toria Jerusalema ana omea ki, si maṉa eri muki thaitoomana faafunu lana ni karaṉi naa. 21Asi maṉa eri toa na kera ni Judia keki thaka ada uria gwa tolo lo ki; ma toa na kera ni initoona toaa susu eri keki lae nada faisia; ma toa na kera ni la fanua kakali ki mai kesi kotho iei. 22Uria fa boṉi eki fa boṉi ana duu lana si do ki, fasi si do eki sui boo na kera keda kai mamana. 23Taa la kai thauṉia ai na kera iana ma ai na keki faasusu afa boṉi eki! uria na unii fualaṉa kai fula ana fanua nei, ma rakeiria uria toa nei. 24Ma keki mae ana ṉari lana nini ni firu, ma keki talaia toa omea e lauda uria fanua ni sui: ma Jenetaele ki keki uria Jerusalema, maasia si maṉa na si kada ana inotoa Jenetaele ki kai mamana nae. 25Ma bala si do ki kai to i la thato ma ṉa madami ma bubulu ki; ma fafia fanua nei iano unii fualaṉa toa na fanue ki, manatade rurua; amali ma lua kai kuru; 26Imole maṉoda ka ote sui sulia mau la, ma sulia fi lana si do na kai fula ana fanua nei iano: uria na do sukwai ki ana thalo lo ki keki igiigia. 27Asi maṉa eri keki rikia Kaluwane imole kai lae mai asi datha ana sukwaia ma inotoa baita. 28Sui lalae do eki e thafalia kai mamana, muki bii lio alaa, ma muki tafoa gwaumulua; uria na tae la faisi kamulua ni karaṉi naa.
29Ma nia ṉata isada asi tarifula: Muki rikia thakwari, ma ’ai ni sui bana: 30Si maṉa na keki ṉoṉothaa, muka rikia ma muki tala thaitoomana na unii thato ni karaṉi naa. 31Una eri lau boo ni kamulua, lalae mulu rikia si do eki kai mamana, muki thaitoomana na tooa tha God e ni karaṉi naa. 32Mamana ku soree isamulua, Kulee toa nei toto kesi sui u, ma si do ki sui boo kai mamana. 33Thalo lo ma fanua nei iano toto kai sui: ma bae laku toto si sui.
34Sui muki to kinakina ana beta lamulua la, ada ana ta si maṉa ruruumulua kai kulua asi do ne liliṉa, ma bula la na kafo bubula kai buloa imole, ma manata baita la asi do fanua nei iano ki, ma fa boṉi eri kai fula fatonamulua: 35Uria fa boṉi eri kai fula mala ta aikwai fafia toa eki sui na kera ni fafona fanua nei iano ni sui bana. 36Mania muki lio, ma muka foa ta si maṉa si ei, fasi keki ala fafi kamulua mulu farana si do eki sui bana na kai fula si fulatoomulua, ma muki takwe inaofana Kaluwane imole.
37Ma afa thato ki nia kai kwaifamanatai la biu baita tha God; ma afa rodo ki nia ka lae i thara, kai to ana i la gwa tolo na kera alaṉia ana Olifesi. 38Ma toa eki sui boo kera kalo isana afa uusuwadia ki la biu baita tha God, uria roṉo lana bae lana.
Currently Selected:
Luke 21: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951