Luke 20
20
1Ma lalae mai, ana tee fa boṉi afa boṉi eki, si maṉa na nia kai kwaifamanatai isana toa eki la biu baita tha God, ma kai ṉata sulia si faaroṉoa lea eri, wane inoto ni foa ki ma wane ni kekeda ki keka fula isana bia ulunao ki; 2Ma kera ṉata isana, keka una eri, Faaroṉo kamilia: Sukwaia ta oki ilia ana do nei ki? mado ni tei ana ne falea sukwaia nei ifamu? 3Ma nia luuda, ka soree isada, Nau lau boo kwai soetoomulua uria tee do; muki luu nau: 4Babataesi la tha Jone, do e ita mai ana thalo, mado ana imole? 5Ma kera ṉata uri kera i talaadalua, keka una eri, Mada sa kuka sorea, I thalo mai; nia kai sorea, Sui uria ta na musi fitoona? 6Sui mada sa kuka sorea, E ita mai ana imole; toa nei sui boo keki ufaukulua: uria na kera faamamanea na tha Jone ṉa porofeta. 7Ma kera luua, keka sorea kera dora asi kula ne ita mai iei. 8Ma tha Jesus ka soree isada, Nau lau boo kwasi faaroṉo kamulua ana sukwaia na nau kwai ilia ana do nei ki.
9Ma nia kai bii ṉata isana toa eki asi tarifula nei: Tee wane e fasia oolee faene, sui ka sorea toa ni ra ana oolee faene keki to i la oole eri, ma nia ka lae uria ta fanua eeta, kai to ka tau. 10Ma si maṉa na unii faene nia arasia tee wane ni ra isana toa ni ra ana oole eri, fasi keki falea tei fo ana foana oolee faene eri ifana: ma toa eki kera kwae nia, ma keka arasia kai tona oli bana. 11Ma nia ka arasia lau ta wane ni ra lau: ma keka kwae nia lau boo, keka malakita, ma keka arasia kai tona oli bana. 12Ma nia ka arasia lau ula wane: ma nia kera kwae mala ania lau boo, ma keka suia i thara. 13Sui wane ne inoto ana oolee faene eri ka sorea, Si ta na kwai ilia? kwai arasia kaluwane liliothaua nau: do mado e ai keki fare baita ania si maṉa na keki riki nia. 14Ma toa eki na kera ra ana oolee faene eri, si maṉa na kera riki nia, keka ṉata kwailiu uri kera, keka una eri, Wane na kai tae fulii ana maka nia nai nia: kulu thauṉia akulua, fasi si do na maka nia sa kai akwasia isana kuki ṉalia ifakulua. 15Mania kera suia i thara faisia oolee faene eri, ma keka thauṉia. Mania si ta na wane inoto ana oolee faene eri kai ilia anida? 16Nia kai lae mai, kai thaulabatania toa ni ra ana oolee faene eri, ma kai falea oole eri ifana toa eeta. Ma si maṉa na kera roṉoa, keka sorea, Si do eri ka ai neri. 17Ma nia e lio urida, ka sorea, Mania si ta neri na kera keda,
Gwa fau na toa na kera kasibiu kera lalakwa ania,
Fau eri kera alua i gwauna lokosuua?
18Ni tei bana na kai aru i fafona fau eri kai maga; ma ni tei bana na fau eri kai aru fafia, kai takaloṉania wane eri mala gegeona theegano.
19Ma wane inoto ni foa ki bia wane ni kekeda ki, kadee maṉa eri u boo, keka rofe uria rau lana; sui keka mau ana toa eki: uria na kera thaitoomana na nia e ṉata asi tarifula eri suli kera. 20Ma kera lio uri nia, ma keka arasia kau wane na keki urei, kera lole sa kera kokoto, fasi keki bulasi garo ana bae lana, fasi keki fale nia ifana inotoa ma sukwaia wane gwauwai. 21Ma kera soetoona, keka una eri, Wane ni kwaifamanatai ae, mili thaitoomana noki sorea ma oki tooa si do kokoto, me ai si oga oe boo uria ta wane, oki tooa mamana boo tala tha God: 22Kera alamatai kamilia miki falea malefo ifatha Sisa, mado e ai? 23Ma nia ka thaitoomana kwaiolofi la taa kera, ma ka soree isada, Uria ta na muki ilitooku? 24Fatai nia ta peni isaku. Ni tei na nuna ma kekeda lana ni seena? Kera luua, keka sorea, Tha Sisa. 25Ma nia ka soree isada, Mania si do tha Sisa ki muki oli fafia isatha Sisa, ma si do tha God ki muki oli fafia isatha God. 26Ma keka dora ana bulasi garo la ana bae lana inaofana toa eki: keka kwele asi do ne luua ana ṉata lada, ma keka bona bada.
27Sui tei wane ana Sadiusi ki kera fula isana, toa na keki sorea e ai ta tatae la faisia maea; ma keka soetoona, 28Keka una eri, Wane ni kwaifamanatai ae, tha Mosesi e kekeda isakulua, mada sa ta wane doorana ka mae, ne ana ta kwai, me ai ana ta wela, doorana kai tolea kwaina, ma kai aluwela ifana doorana. 29Mania ta fiu wai doorana kera toto: ma ulunao e tolekini, sui ka mae, e ai ana ta wela; 30Ma ruana wane ka tolea kini eri, ma e mae, e ai ana ta wela; 31Ma ula wane ka tolea; ma fiu nonii wane eki kera ade una eri lau boo kesi akwasia ta wela, keka mae. 32Iburiada sui kini eri e mae lau boo. 33Mania toto ana tatae la faisia maea ni tei iada kai tolea? uria na fiu wane eki kera totolea. 34Ma tha Jesus e luuda, ka soree isada, Toa kada nei ki keki tolekini, ma keki toowane: 35Ma toa na kera sorea kera farana keki fulatoona kada lo, ma tatae la faisia toa mae, e ai kesi tolekini, me ai kesi toowane: 36Bia sa keka mae lau ta si maṉa e ai: uria kera bobolo bia angel ki; ma ni kera kaluwane tha God ki, sulaania kera kaluwane tatae la faisia maea. 37Ma sulia toa na kera mae na keki tataeda, tha Mosesi mena e fatai nia, isana ’Ai ba, asi maṉa ne alaṉia tha Lord ana God tha Aberahamo, ma God tha Aesaka, ma God tha Jekofo. 38Uria nia God toa mae e ai, nia God toa maruki: uria ni kera sui kera maruki inunufana. 39Sui tei wane ana wane ni kekeda ki kera luua, keka sorea, Wane ni kwaifamanatai ae, o sorea si do ne too. 40Ma iburiana e ai kesi seeraa uria soetoona lana lau uria ta si do.
41Ma nia ka soree isada, Nifana ade lana keki sorea ṉa Christ nia kaluwane tha Defeta? 42Ma tha Defeta talani nia e sorea i la buka ana Ṉu ki,
Tha Lord e soree isana Lord nau,
Oki ono ibali aba aola nau,
43Maasia si maṉa kwai adea maalimae oe ki kera do ni alu lana aaemu ifafona.
44Mania tha Defeta e alaṉia ana Lord, ma nia kaluwane nia ufita lau?
45Sui si maṉa na toa eki sui boo keki roṉoa, nia ka soree isana toa nia ne toleda, 46Muki fia wane ni kekeda ki, na keka thathamii liliu ana tooni tekwa ki, ma kera thathamia kwaiaratai lea la ki la usia ki, ma si kula inoto ni ono la ki la biu ni ofu la ki, ma si kula inoto ki isana fafaṉa ki; 47Toa na kera lagua si do nai maafera gwa oru ki, ma keki lole ana foa la tau ki: toa eki toto keki fulatoona kwae la ne baita ka tatha.
Currently Selected:
Luke 20: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951