Luke 19
19
1Ma tha Jesus e fula ma kai tatha i Jeriko. 2Ma rikia fasi, tee nonii wane thatana tha Sakiasi; ne inoto ana toa ni ṉali lana takisi ki, ma nia rikii do. 3Ma nia rofe uria riki lana tha Jesus fasi kai thaitoomana; ma sui ka dora ania sulia toa oro eki, uria nia wane ṉuṉuru. 4Ma nia ka fita nana inao, ka raa i gwauna sikomo fasi kai riki nia: uria nia kai tatha ana tala eri. 5Ma si maṉa na tha Jesus e fula i kula eri, nia ka lio alaa, ka riki nia, ma ka soree isana, Sakiasi, lakwasia, oko sifo mai; uria itaraena kwai to i biu oe e ai si ei boo. 6Ma nia lakwasia, ka sifo, ma ka thathagoni nia ana seethathala la. 7Ma si maṉa na kera rikia, kera sui boo keka uubulu taa, keka una eri, Nia e lae kai to si ana bia wane ne abula taa. 8Ma tha Sakiasi e takwe, ka soree isana ṉa Lord, Rikia fasi, Lord, ta bali ana do nau ki kwai falea ifana toa na kesi rikii do; ma mada sa nau ku ṉalia ta si do ata wane ana banigaura la, kwai oli fafia ana fai si do. 9Ma tha Jesus ka soree isana, Itaraena marukia e fula i biu nei, uria na nia kaluwane tha Aberahamo lau boo. 10Uria na Kaluwane imole e fula uria rofe lana ma faamaruki lana si do ne lalae garo.
11Ma si maṉa na kera roṉoa si do eki, nia safua ma ka ṉata asi tarifula, uria ne to karaṉia i Jerusalema, ma uria na manatade soso na tooa tha God kai fula fatai asi maṉa eri u boo. 12Mania nia ka sorea, Tee nonii wane inamaruki e lae uria ta fanua da, fasi ka ṉalia ana ta tooa ifana, ma ka oli mai. 13Ma nia ka ailia akwalee wane ni ra nia ki, ma ka falea tafulu pauda ifada, ma ka soree isada, Muki ra ania maasi nau kwai fula. 14Ma toa na fanua nia kera riki nia ka taa, ma keka arasia toa ni ṉaliṉata iburiana, keka una eri, Misi thathamia sa wane nei kei inoto iamilia. 15Ma lalae mai, si maṉa ne oli lau mai, buriana ne ṉalia naa tooa eri, nia ka sorea keki ailia mai wane ni ra eki isana, na nia e falea malefo ba ki ifada, fasi nia ka thaitoomana si do na kera toda ana ra la. 16Sui wane totonao e fula, ka una eri, Lord, pauda oe ba e toda lau tee tafulu pauda. 17Ma nia ka soree isana, Lea neri, wane ni ra no abula lea: uria no mamana asi do ne faekwa asia, oki gwauwai ana tafulu toaa susu ki. 18Ma ruana wane e fula, ka una eri, Lord, pauda oe ba e toda lau ta lima pauda. 19Ma nia ka sore una eri lau boo isana, Oki gwauwai lau boo ana lima toaa susu ki. 20Ma ta wane lau e fula, ka una eri, Lord, rikia fasi, pauda oe nania, na nau ku beta mai la si maku faekwa: 21Uria nau ku mau iamu, uria ni oe wane o naunau: oki tafoa si do nosi ekwatania iano, ma oki kwaia unii do ne rafo nosi afusia. 22Ma nia ka soree isana, Sulia si do ne tatha faisia fokomu nau ṉa wane ni kotu kwai ṉata suli oe, wane ni ra no taa. O thaitoomana ni nau wane ku naunau, kwa tafoa si do na kwasi ekwatania iano, ma kwa kwaia unii do ne rafo na nau kwasi afusia; 23Sui nifana ade lana nosi falea malefo nau asi kula na malefo kai toda malefo, fasi lalae ku fula kwa sorea keki falea mai malefo nau bia tei malefo lau ka safua? 24Ma nia ka soree isana toa na keki takwe isada, Ṉalia pauda eri faisi nia, muki falea ifana wane eri ne ana tee tafulu pauda. 25Ma keka soree isana, Lord, nia ana tee tafulu pauda. 26Uria nau ku soree isamulua, na ni tei ne rikia si do, keki falea si do ki ifana; ma wane ne ai ana ta si do, si do ne rikia mena keka ṉalia faisi nia. 27Ma maalimae nau ba ki, na kesi thathamia kwai inoto iada, muki talaida mai, muki thauṉida inaofaku.
28Ma si maṉa ne ṉata naa una eri, nia ka lae inao, kai tae uri Jerusalema.
29Ma lalae mai, si maṉa ne fula karaṉia Bethefage ma Bethani, isana gwa tolo na kera alaṉia ana Olifesi, nia ka arasia ro wane ana toa nia ne toleda, 30Ka una eri, Moki lae i la toaa faekwa na ni otofamaroa; toaa na lalae moro fula iei do moki fulatoona tee kalee ase na kera kania, na ta wane si ono u i suila: lubea, moki talaia mai. 31Ma mada sa ta wane kai soetoomaroa, Uria ta na moki lubea? moki una eri isana, Uria na ṉa Lord e thathamia. 32Ma wane ne arasida keko lae nadaroa, ma keko rikia si do ka ’uria boo si do ne soree isadaroa. 33Ma si maṉa na keki lubea kalee ase eri, toa na do kera keka soree isadaroa, Uria ta na moki lubea kalee ase ena? 34Ma keko sorea, Ṉa Lord e thathamia. 35Ma kero talaia mai isatha Jesus: ma keka naṉa ana tooni kera ki i fafona kalee ase eri, ma keka finua tha Jesus ka ono i fafona. 36Ma si maṉa nia kai lae, keka regweta tooni kera ki sula tale. 37Ma si maṉa nia fula karaṉi naa, ana si tala toli i gwa tolo i Olifesi, malului wane eki sui boo ana toa ne toleda keka bii seethathala ma keka taṉoa tha God ana ’ai la baita fafia si ra baita eki sui boo na kera rikia; 38Keka una eri, Lea iana, Kiṉa eri ne fula ana thatana tha Lord: enenoa i thalo lo, ma inotoa asi kula da ia ka tatha. 39Ma tei Farisi ana malului wane eki keka soree isana, Wane ni kwaifamanatai, oki sorea toa oe noki toleda. 40Ma nia luuda, ka soree isada, Ku faaroṉo kamulua, mada sa toa nei keki bona, fau ki kai ’ai si maṉa eri u boo.
41Ma si maṉa ne fula karaṉi naa, nia rikia toaa susu eri ma ka aṉi sulia, 42Ka una eri, Mado so thaitoomana, ni oe boo, itaraena mena afa boṉi oe, si do ana enenoa oe ki! ma si maṉa eri kera thaufuni naa faisia maamu. 43Uria na fa boṉi ki kai fulatoomu, na maalimae oe ki keki lakali faisi oe, ma keki to kali oe, ma keki suusi oe ta si kula si ei, 44Ma keki naṉatai oe i theegano, ma wela oe ki na kera ni isamu; ma kesi akwasia ta fau isamu fafona ta fau; uria nosi thaitoomana si maṉa ana thai la suli oe.
45Ma nia ka kotho i la biu baita tha God, ma ka bii taria toa na keki usi asi do ki iei, bia toa na keki usido, 46Ka una eri isada, Kera keda, Biu nau biu ni foa la: ma kamulua mulu adea biu nau ṉa maufi toa na keki laulau.
47Ma nia kai kwaifamanatai sulia boṉi la biu baita tha God. Ma wane inoto ni foa ki bia wane ni kekeda ki bia toa inoto ana toa eki kera rofe uri thauṉi lana: 48Ma keka dora ana rofetoona lana si do fasi mado e ai keki ilia; sulia na toa eki sui bana kera atabubu uri nia, keki roṉo uria ṉata lana.
Currently Selected:
Luke 19: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951