Matius 21
21
Orang banya puji-puji Yesus di Yerusalem
21:1-11
(Markus 11:1-10; Lukas 19:28-38; Yohanis 12:12-15)
1Yesus deng Antua pung murid-murid su amper sampe ka kota Yerusalem. Dong ada di kampong Betfage yang ada di gunung Saitun. Tarus, Antua suru Antua pung murid dua orang kata, 2“Kamong dua pi ka kampong yang ada di muka tu! Pas sampe di sana, kamong nanti dapa lia keledai mai satu ada taika la akang pung ana ada di pinggir akang. Lapas la bawa dua-dua kamari par Beta. 3Kalo ada orang tanya kamong, bilang par dong kalo Tuhan mau pake akang. Abis pake, Antua nanti langsung kasi bale akang.”
4Samua tu jadi, sama deng apa yang Allah bilang dolo lewat Antua pung juru bicara kata,
5“Bilang par orang-orang Yerusalem#21:5 Orang-orang Yerusalem: Teks bahasa Yunani bilang, “Sion pung ana parampuang”. Itu tu nama laeng dari kota Yerusalem. bagini:
Hoe orang-orang Yerusalem e.
Lia, kamong pung Raja datang par kamong!
Antua paleng bae deng randa hati.
Antua datang nai keledai paranggang saekor.”#Sakaria 9:9
6Tarus, dong dua pi la biking macang deng apa yang Yesus suru. 7Dong bawa keledai mai tu deng akang pung ana par Antua. Dong alas akang pung balakang deng dong pung baju panjang luar la Antua nai di atas akang. 8Orang banya kawang-kawang yang ada di sana buka dong pung baju panjang luar la taru di jalang deng ada lai yang potong jaga-jaga pohong la taru di jalang biar Antua bajalang di atas akang, par taru hormat par Antua. 9La orang banya yang bajalang di muka deng di balakang Antua bataria kata,
“Hosana! Mari puji Raja Daud pung Turunang ni!
Mari puji Antua yang datang deng Tuhan pung kuasa ni!
Mari puji Allah yang pegang parenta di tampa yang paleng tinggi di sorga!”#Lagu-Lagu 118:26
10Waktu Antua maso kota Yerusalem, satu kota tu jadi hebo. La orang-orang tanya kata, “Itu sapa?” 11La orang banya yang ada bajalang sama-sama deng Yesus jawab kata, “Ini ni Allah pung Juru Bicara Yesus dari kampong Nasaret di propinsi Galilea.”
Yesus user orang-orang bajual di kintal Tampa Sombayang Pusat
21:12-17
(Markus 11:15-19; Lukas 19:45-48; Yohanis 2:13-16)
12Tarus, Yesus maso ka kintal Tampa Sombayang Pusat la user orang-orang yang ada bajual di sana. Antua bula-bale orang-orang yang jaga tukar kepeng pung meja-meja deng orang-orang yang jual burung pombo pung bangku-bangku. 13La Antua bilang par dong kata, “Hoe! Dalang Allah pung Tulisang ada bilang, ‘Beta pung ruma ni nanti jadi tampa sombayang.’#Yesaya 56:7 Mar kamorang su biking akang jadi ‘pancuri-pancuri pung tampa basambunyi!’ ”#Yeremia 7:11
14Tarus, orang-orang buta deng tempang pi par Antua di kintal Tampa Sombayang Pusat tu la Antua kasi bae dong. 15Mar waktu imam-imam kapala deng guru-guru Torat lia tanda-tanda herang yang Antua biking tu deng anana yang ada di situ bataria, “Hosana! Mari puji Raja Daud pung Turunang ni!”, dong pung hati panas.
16La dong bilang par Antua kata, “Ale dengar apa yang anana ni bilang ka seng?”
Antua jawab dong kata, “Beta dengar. Kamong balong parna baca dalang Allah pung Tulisang ka kata, ‘Allah su ajar anana kacil deng anana mera-mera par puji Antua?’ ”#Lagu-Lagu 8:3
17Tarus, Antua kasi tinggal dong la kaluar dari kota Yerusalem. Antua pi ka kampong Betania la tidor malang di situ.
Yesus kutok pohong ara yang seng babua
21:18-22
(Markus 11:12-14, 20-24)
18Akang pung eso, pagi-pagi lai Yesus dong su bale ka kota Yerusalem kombali. Waktu dong ada di tenga jalang, Antua rasa lapar. 19Antua lia pohong ara satu di pinggir jalang tu la pi lia kata akang ada pung bua ka seng. Mar seng ada, cuma daong-daong sa. La Antua kutok pohong ara tu kata, “Mulai dari oras ni, se seng babua-babua lai!” Oras itu tu jua pohong ara tu langsung karing.
20Waktu Antua pung murid-murid lia bagitu, dong taherang-herang paskali la dong bilang kata, “He, bagemana kong pohong ara tu bisa langsung karing e?”
21La Antua bilang par dong kata, “Dengar bae-bae tagal apa yang Beta bilang ni batul! Kalo kamong parcaya Allah sunggu-sunggu deng seng bimbang sadiki lai, kamong bisa biking macang deng apa yang Beta biking par pohong ara tu. Mar bukang cuma itu sa. Kamong jua bisa bilang par gunung ni, ‘He gunung! Tacabu la talempar ka dalang lautang!’, la akang nanti jadi.#Matius 17:20; 1 Korintus 13:2 22La apa sa yang kamong minta dari Allah dalang sombayang, kamong pasti dapa akang kalo kamong parcaya.”
Orang Yahudi pung pamimping-pamimping tantang Yesus
21:23-27
(Markus 11:27-33; Lukas 20:1-8)
23Tarus, Yesus maso ka orang Yahudi pung Tampa Sombayang Pusat pung kintal la kasi balajar orang di situ. Waktu Antua ada kasi balajar, imam-imam kapala deng orang Yahudi pung pamimping-pamimping datang tanya Antua kata, “Dari mana Ale dapa hak par biking samua tu? Sapa yang kasi hak tu par Ale?”
24La Antua jawab dong kata, “Beta jua mau tanya kamong lai. Kalo kamong jawab akang, Beta jua nanti bilang par kamong dari mana Beta dapa hak par biking samua tu. 25Dari mana Yohanis dapa hak par baptis orang? Dari Allah ka manusia?”
La dong mulai baku bicara soal itu kata, “Kalo katong jawab, ‘Dari Allah’, Dia nanti bilang, ‘Kalo bagitu mangapa kong kamong seng parcaya Yohanis?’ 26Mar kalo katong jawab, ‘Dari manusia’, katong taku orang banya ni, tagal dong anggap Yohanis tu Allah pung juru bicara.”
27Jadi dong jawab Yesus kata, “Katong seng tau.”
La Antua bilang par dong kata, “Kalo bagitu, Beta jua seng mau bilang dari mana Beta dapa hak par biking samua tu.”
Ande-ande soal bapa satu deng dia pung ana dua
21:28-32
28Tarus, Yesus bale bilang par imam-imam kapala deng orang Yahudi pung pamimping-pamimping kata, “Kira-kira, kamong pikir apa soal carita satu ni? Satu kali bagini, ada bapa satu. Dia pung ana laki-laki ada dua. Dia pi par ana yang tua la bilang kata, ‘Ana e, pi karja di kabong anggor hari ini do!’ 29La ana tu jawab, ‘Beta seng mau!’ Mar abis itu, dia roba dia pung pikirang la pi. 30Tarus, bapa tu pi par ana bongso la bilang bagitu lai, la ana tu bilang, ‘Iya bapa!’ Mar dia seng pi.
31Kalo iko kamong, dari ana dua tu, sapa yang biking dong pung bapa pung mau?”
La dong jawab Antua kata, “Yang partama.”
Tarus Antua bilang par dong kata, “Dengar bae-bae tagal apa yang Beta bilang ni batul! Tukang-tukang tagi pajak deng parampuang-parampuang tarbae tu yang nanti jadi Allah pung orang-orang waktu Antua pegang parenta jadi Raja, mar kamong seng. 32Barang, Yohanis Tukang Baptis su datang par kasi unju jalang yang batul,#Yohanis 14:6 mar kamong seng mau parcaya dia. Mar tukang-tukang tagi pajak deng parampuang-parampuang tarbae tu, dong parcaya dia. Deng biar kata kamong su lia dong parcaya dia, mar kamong masi seng mau roba kamong pung pikirang deng masi seng mau parcaya.”#Lukas 3:12, 7:29-30
Orang Yahudi pung pamimping-pamimping tu sama deng orang-orang yang kalesang kabong anggor
21:33-46
(Markus 12:1-12; Lukas 20:9-19)
33Yesus bilang lai kata, “Coba dengar ande-ande satu ni lai. Satu kali bagini, ada tuang tana satu buka kabong anggor. Dia biking pagar koliling akang. Dia gale lobang batu par biking tampa ambe aer anggor. Dia jua biking paparisa satu par jaga kabong tu. Abis itu, dia kasi sewa akang par babarapa orang par kalesang akang la pi ka negri laeng.#Yesaya 5:1-2
34Waktu su musing pete bua anggor, dia suru dia pung jongos-jongos par pi ambe dia pung bagiang dari orang-orang yang kalesang kabong tu. 35Mar, dong tangkap dia pung jongos-jongos tu. Ada yang dong pukul, ada yang dong bunu, deng ada lai yang dong lempar deng batu.
36Abis itu, dia bale suru dia pung jongos-jongos laeng, yang labe banya dari yang kamuka, pi par dong. Mar orang-orang yang kalesang kabong tu biking dong sama deng dong pung tamang-tamang yang kamuka tu. 37Akang pung laste, dia suru dia pung ana laki-laki pi par dong, tagal dia pikir, ‘Kalo beta pung ana, dong nanti taru hormat par dia.’
38Mar, waktu orang-orang yang kalesang kabong tu lia tuang kabong pung ana tu, dong laeng bilang par laeng kata, ‘He, dia ni yang nanti dapa kabong ni! Mari katong bunu dia biar katong bisa dapa dia pung kabong ni!’
39Jadi, dong tangkap dia, hela dia kaluar dari kabong tu, la bunu dia.”
40La Yesus tanya dong kata, “Jadi, kalo tuang kabong anggor tu datang, dia nanti biking apa orang-orang yang kalesang kabong tu?”
41La dong bilang, “Dia pasti kasi mati orang-orang jahat tu la kasi sewa kabong anggor tu par orang laeng yang nanti kasi dia pung bagiang waktu musing ambe hasil.”
42Yesus bilang lai, “Masa kamong balong parna baca dalang Allah pung Tulisang yang bilang kalo Orang yang Allah su Angka par Kasi Salamat Manusia nanti seng dapa tarima, macang deng batu yang tukang-tukang su buang ka? Akang bilang kata,
‘Batu yang tukang-tukang su buang tu,
Akang su jadi batu pandasi yang paleng panting.
Itu tu Tuhan yang biking
la akang luar biasa par katong.’#Lagu-Lagu 118:22-23
43Tagal itu, dengar Beta bilang par kamong: Kamong pung hak par jadi Allah pung orang-orang waktu Antua pegang parenta jadi Raja, Antua nanti cabu akang dari kamong la kasi akang par bangsa laeng yang iko Antua pung mau. 44[Sapa sa yang jatu di atas batu tu, dia nanti ancor. La sapa sa yang dapa tindis dari batu tu, dia nanti ancor sampe jadi abu.]”
45Waktu imam-imam kapala deng orang-orang Farisi dengar Yesus pung ande-ande tu, dong tau kalo Antua ada sindir dong. 46Jadi, dong mulai cari jalang par tangkap Antua, mar dong taku orang banya, tagal orang banya anggap Antua tu Allah pung juru bicara.
Currently Selected:
Matius 21: ABMA
Highlight
Share
Copy
Want to have your highlights saved across all your devices? Sign up or sign in
© 2022, Sinode Gereja Protestan Maluku