Luka 2

Oyariwa wa Yesu

(Mat 1.18-25)

1Mallapo yaayo Kaisara* Augusto, mwene a o Roma, aalamulella wi mu ellapwaaye ettheene athu elembiwe. 2Kalembeloolla eereyeeye Kwiriniyo aari oolamulella ellapo ya Siriya. 3Nave arive muthu aaya wi alembiwe o etawoni yoowaniwa.

4Yosefe avenyera o etawoni ya Nazareti o Galileya, aya o etawoni ya Betelehemu o Yudeya, wayarelliwe Davide kaambiiwa Yosefooyo aari edduullu ya Davide. 5Aaya woolembiwanko ni Mariya, oyo amutomelilleeye nave aakhalla ni erukullu. 6Vano eri o Betelehemunko, enthawi yaamukwakhwanella yawi amuyare mwaana. 7Nave aamuyara mwanaye awaamba aamullopwana. Aamuhuruwella ni ekuwo, amukonaatthiha moochella enama vawi yaarama nipuro nawi ekhallemo mu enyumba ya alleto.

Abusa ni angelo

8Waakhalla abusa amodda mu echigawo yeeyo, ayo yakhalla ohakani naari mahiiyu echihaka eziweto ddiwa. 9Mungelo a Apwiya aawooneyella nave ntitimiho na Apwiya naawala moowaapheella nave abusaayo yahoova wunchichi. 10Koma mungelooyo aallota wi, “Muhoove! Vawi kiwiille wi kuulleelleni othenga waphaama, oyo onaahakallallihe athu attheene a mu ellapwaanyu. 11Ollello vaava mu etawoni ya Davide, oovullusaanyu ooyariwa, nnddina naye Khrisitu Apwiya! 12Echizindikirweene tti ella, muneeromuphwanya kantchewa ahuruwelliwe ni ekuwo nave akonaatthihiwe moochella enama.”

13Moorurumusa, waawa mulloko wa angelo woovenyera oddullu, emutitimihaka Mulluku ellotaka wi,

14“Ntitimiho nikhalle wa Mulluku Muullupalli,

nave murendelle okhalle va athu ayo anahakallalleeyena vatthimva!”

15Angelwaayo yavenyilliiwa ohokollweella oddullu, abusaayo yaatakhellana wi, “Hankoni niye o Betelehemu, noone ello yeereyilleella, eyo nalleelliweehu ni Apwiya.”

16Sika mwawaakuva yaatimulla nave yaawa wa Mariya ni Yosefe, emoonattho kantchewooyo akonaatthille moochella enama. 17Abusaayo yamoonilliiwa mwaanooyo, yahaalleella nnddo ddallotiwe ni mungelo dda mwaanooyo. 18Attheene yiiwalle ddallotille abusaayo yaattikhina. 19Koma Mariya aaddisunga m'murimani mwaye nave aanaddiganizera ddeko ddittheddenenndda. 20Abusaayo yaahokollowa, emutitimihaka Mulluku va ddittheddene yiiwalliiwa ni woona, nnddo ddaallikanne ni yalleelliwiiwa ni angelwaalle.

Yesu anaromolliwa nnddina

21 # Lev 12.3; Luk 1.31 Viviralle mallapo matthanu ni mararu, enthawi yaakwakhwana yawi mwaanooyo aphaddiwe nave aavahiwa nnddina nawi Yesu. Nnddina nenna avahiwe ni mungelo, Mariya ahinakhalle ni erukullu.

Yesu anoonihiwa mu enyumba ya Mulluku

22Enthawi yaakwakhwanilliiwa wi yeellihiwe voothwarani malamulo a Mose, Yosefe ni Mariya yaamukusa mwaanooyo eyaana o enyumba ya Mulluku o Yerusalemu wi yamoonihe wa Apwiya. 23#Eks 13.2,12Vawi moolembiwa m'malamuloni a Apwiya wi, “Arive mwaana aamullopwana, awaamba, avelleelliwe wa Apwiya.” 24#Lev 12.6-8Yaavelleellattho mukutho voothwarani malamulo a Apwiya awi, “Eheraatthi ekhunda piilli apaalle mawunda a ekhunda meelli.”

25Mallapo yaayo waakhalla mullopwana o Yerusalemunko nnddina naye Simiyoni. Aari muthu oolungama, oomwiiwellella Mulluku, atiyera enthawi yawi Mulluku aavulluse a Israele nave Munepa Waweella aari va olliyooyo. 26Nave Munepa Waweellooyo aamuwululella wi khakhwa ophiyera amonne Mesiya* oovenyera wa Apwiya. 27Voohoollelliwa ni Munepa Waweella, Simiyoni aavollowa mu enyumba ya Mulluku nave makhollo a Yesu alliwattho yaavollowa munyumbanimmo ni mwaanooyo wi yamweerelle ddoopaalleya moollikana ni malamulo. 28Simiyoni aamukusa mwaanooyo m'mattani mwaye amutitimiha Mulluku wi,

29“Apwiya, mookwakhwaniha mawaanyu,

Vano mwaakhullelle wi mi oorumeyellaanyu kikhwe ni murendelle.

30Vawi miitthwaaka ahoona ovullusa wanyu,

31nko mwakhozilleenyu wi athu attheene yoone,

32 # Yes 42.6; 49.6; 52.10 owala wawuupullulla opaalla wanyu wa athu oohimullapella Mulluku,

ni ovelleella ntitimiho va athwaanyu Israele.”

33Attiitthinnya ni amennyaayo yaattikhinana ddeko ddallotille Simiyoni dda mwaanooyo. 34Vano Simiyoni ahaadalisa nave allota wa Mariya amennyaayo wi,

“Mwaanoolla ootthoolliwa ni Mulluku

wi akhalle ollakiwa ni ovullusiwa wa athu anchichi a o Israele.

Aneerokhalla echizindikiro yoovenyera wa Mulluku,

eyo athu anchichi eneeriiwa yiitanena.

35Nave oneeromoriwa ethakaraka, wonanko nsupada nawiisha sika ninahoma murimaawo

koma ddoovittheya dda m'murimani mwa athu anchichi ddineerewuupullulliwa.”

36Namallotella aamutthiyana Anna aakhallattho mu enyumba ya Mulluku, aari, mwaana a Fanuwele, a mulloko wa Asheri. Nave aari awuulluvalla, aatthelliwa ari namwalli, wa miyakha mitthanu ni miillive koma mamune aakhwa. 37Vano aari ni miyakha 84.#2.37 aari ni miyakha 84: apaalle aakhalla naamukhwelle wa miyakha 84. Khaavenyillemo mu enyumba ya Mulluku koma aanallapella mahiiyu ni otthaana, voohallani ocha ni ovekella. 38Va enthawi yeeyo aayattho wa Mariya ni Yosefe, aamba omutitimiha Mulluku, allotakattho dda mwaanooyo wa attheene ayo yatiyera wi Mulluku amoopolle Yerusalemu.

Dda ohokollweella o Nazareti

39 # Mat 2.23 Yosefe ni Mariya yamallihalliiwa weera ddittheddene voothwarani malamulo a Apwiya, yaahokollweella o Nazareti mu Galileya o etawoni yoowaniwa. 40Nave mwaanooyo ahunnuwa akhalla ni masiva owaakattho ezeru navettho Mulluku aanamweerella echifundo.

Musombwe Yesu mu enyumba ya Mulluku

41 # Eks 12.1-27; Deu 16.1-8 Makhollwaaye a Yesu yaanaya o Yerusalemu muyakha ni muyakha o Ehakallallo ya Paska. 42Yesu aariiye ni miyakha khumi ni miilli, aaya ni makhollwaaye o Ehakallallonko moollikana ni mmo yaddollweellelliiwa. 43Ehakallallweeyo yamallilliiwa nave etimullalle ohokollweella owaniwa musombwe Yesu aahalla o Yerusalemu. Koma makhollwaaye kheyaadduwenlle wi oohalla. 44Koma alliwaayo yeesa wi ari nimodda ni athu a voolendonaayo, sika yeetilliiwa nllapo nimodda, yahaamba omwaashaasha mwa abaliiwa ni akhwiiwa. 45Kheyaamuphwanyille, sika yaahokollweella o Yerusalemu emwaashaashaka. 46Va nllapo naneeraru yaamphwanya mu enyumba ya Mulluku, akeraatthille variyari va ahuddihi a Ayuda, awiiwellellaka, aakohakattho makoho. 47Attheene yamwiiwalle yaattikhina ni waakhulla waye wa ezeru. 48Makhollwaaye yamoonilliiwa yaattikhina nave amennya yaamukoha wi, “Mwanaka, weerelle tini ddenndda? Attiittho ni miyaano naanakhupanya dda weyaano nawaasheewe.”

49Koma Yesu ahaakhulla wi, “Mwakaashaasha kaambiiwa tini? Khemwaadduwella wi kinaphwanella kikhalle mu enyumba ya Attiitthaaka?” 50Koma alliwaayo kheyaawiiwesesille waakhulla wayenko.

51Vano Yesu aahokollowana vamodda oya o Nazareti nave aanawiiwellella. Amennyaayo yaasunga ddittheddenenndda m'murimani mwiwa. 52#1 Sam 2.26; Miy 3.4Nave Yesu ahunnuwa mu ezeru ni m'mwiillini nave aanakondiwa ni Mulluku ni athu.

Currently Selected:

Luka 2: MW2019

Highlight

Copy