Luka 1
1
Mawu awaamba
1Ooriiheya Teofilo, athu anchichi yaheeseesa ototella vamodda epilli ya ddeko ddeereyille variyari vahu. 2Yatotenlle ddeko ddennddo nalleelliweehu ni amboni ayo yoonille ddeereyaka vawaambeella ni oollalleya awaamba a othenga waphaama. 3Sika wa miyaano kahoonattho wi tti waphaama wi kaashaashe phaama ddene ddeko ddittheddene ovenyera vawaamba nave kuulembelleni ddaweereyannddo mootthopoowa. 4Nave kenre yeella wi mudduwelle ddawoona dda nnddo mwahuddihiweenyu.
Oyariwa wa Yohane Oobatiza waallotelliwa
5 #
1 Epi 24.10
Mu enthawi eyo Herode* aariiye mwene a echigawo ya Yudeya, waakhalla mullupa mukutho nnddina naye Zakariya, a mulloko wa allupa mukutho wa Abiya. Mwaariye aari a nlloko na Aroni nave nnddina naye aari Elizabeti. 6Eellaalla yaari oolungama vamiitthoni va Mulluku nave yahiiwellella phaama malamulo ni ddoolamulella dda Apwiya. 7Nave kheyaarina mwaana kaambiiwa Elizabeti khaayara nave eellaalla yahuulluvalla.
8Nllapo nimodda Zakariya aarumeyella mu enyumba ya Mulluku vawi yaari enthawi ya mullokwaaye wi orumeyelle. 9Moollikana ni makhallello a allupa mukutho, olliyooyo aatthoolliwa mwawoombesa wi oose mukutho wa lubani* mu enyumba ya Apwiya. 10Mulloko muullupalli wa athooyo waari ovekellaka vaatte va enthawi yawoosa mukuthooyo.
11Vano mungelo a Apwiya aamooneyella. Mungelooyo iimenlle onnattanatta wa nikuwa noowoosella mukutho wa lubanooyo. 12Nave Zakariya aarurumuwa amoonilleeye nave ahoova. 13Koma mungelooyo aallota wi, “Zakariya, ohoove! Mulluku ohiiwa nivekello nawo sika mwaariyo, Elizabeti, aneerewuuyarella mwaana aamullopwana nave oneeromuvaha nnddina nawi Yohane.
14Oneerohakallalla ni murimaawo muttheene,
nave athu anchichi eneerohakallallattho ni oyariwa waye!
15 #
Num 6.3
Aneerokhalla muullupalli vamiitthoni va Apwiya.
Khawa amuwirya vinyo apaalle erive yoolezeliha.
Aneeroddalliwa ni Munepa Waweella naari ahinayariwe.
16Aneerorukunusa mirima dda Aisraele anchichi
wi ehokollweelle wa Apwiya Mullukwiiwa.
17 #
Mlk 4.5,6 Aneeroowa vahoollo va Apwiya, mwa munepa ni mwamasiva a namallotella Eliya.
Aneerowaattaniha makhollo ni aniiwa
nave aneerewaarukunusa mirima athu oohiiwellella
wi ekhalle ni ezeru wonanko dda athu oolungama.
Aneeroweeriha athu wi yaakhozekelle Apwiya.”
18Zakariya aallota wa mungelooyo wi, “Kinaadduwelle mwawiidde wi yeella tti yawoona? Mi kohuulluvalla nave mwaaraka nayeenettho ohuulluvalla.”
19 #
Dan 8.16; 9.21 Mungelooyo ahaakhulla wi, “Mi tti Gaburiyele, oorumeyella a Mulluku, oyo akirumalle wi kuulleelle othenga waphaamoolla. 20Vano weyaano khawaawukhulupililalle othengaakoolla, oyo onaakwakhwanihiwe va enthawi yaphaama. Sika oneerollakallakeya nave khoworaka ollota, ophiyera nllapo nno yoollotiweeyo eneeriiwa yeereye.”
21Enthawi yeeyo athu yaari vaattaayo yaanamutiyera Zakariya nave yaanattikhina kaambiiwa aanallekellamo mu enyumba ya Mullukummo. 22Akhumalleeye, khaawonre ollota ni athwaayo, allota ni matta nave aallakallakeya. Sika athwaayo yaadduwella wi muwarimmo ohoonamo masomphenya ovenyera wa Mulluku. 23Nave enthawi yoorumeyella mu enyumba ya Mulluku yamanlliiwa, Zakariya aarowa owaniwa. 24Vatulli viwa, mwaariye Elizabeti aakhalla ni erukullu nave khaakhumalle mpa wa miyeri mitthanu. 25Aallota wi, “Omamallihello wiwa Apwiya aakeerella echifundo, aakivenyihella owulliwa muru waka variyari va athu.”
Oyariwa wa Yesu waallotelliwa
26Nave mweeri waneetthanu ni mmodda wa erukullu ya Elizabeti mungelo Gaburiyele aarumiwa ni Mulluku o etawoni o echigawo ya Galileya yooromolliwa Nazareti. 27#Mat 1.18Arumiwe wa namwalli nnddina naye Mariya oyo atomeliwe ni mullopwana nnddina naye Yosefe, edduullu ya Davide. 28Mungeloolle aawa wa Mariya allota wi, “Mooni! Apwiya aaweerella echifundo nave eri ni weyaano!”
29Mariya aatthukumellana wunchichi mawu a mungelwaalla nave aavirellella wiikoha yeekhaaye m'murimani mwaye wi mawu yaalla enattaphullella tini? 30Mungelooyo aallota wi, “Ohoove, Mariya, Mulluku ooweerella echifundo. 31#Mat 1.21Oneerokhalla ni erukullu nave oneeromuyara mwaana aamullopwana nave omuvahe nnddina nawi Yesu. 32#2 Sam 7.12,13,16; Yes 9.7Olliye aneerokhalla muullupalli nave aneeroromolliwa Mwaana a Mulluku Muullupalli. Apwiya Mulluku eneeromweera akhalle mwene wonanko nikhollo naye, Davide. 33Nave aneerolamulella Aisraele mallapo mattheene nave omwenaaye khomalla!”
34Koma Mariya aallota wa mungelooyo wi, “Mi namwalli oohimudduwella mullopwana, ddenndda ddinaaworeye mwawiidde?”
35Mungelooyo ahaakhulla wi, “Munepa Waweella aneerophiya va weyaano nave masiva a Mulluku Muullupalli eneerewuuhuruwella. Ekaamba ya yeella, mwaana ooyariwooyo anaakhalle Aweella nave aneeroromolliwa wi Mwaana a Mulluku. 36Vano ngiiwa, mbalaawo Elizabeti, nayeenettho naari uulluvanlle ookhalla ni erukullu. Athu yaganiza wi khawa ayara koma vano ookhalla ni erukullu ya miyeri mitthanu ni mmodda. 37#Gen 18.14Vawi kheyiivo ello enaalepheliwe ni Mulluku.”
38Vano Mariya aallota wi, “Mi tti owaarumeyella Apwiya, ddeereye wa miyaano ollikana ni ollota wanyu.” Nave mungelooyo aavenyavo.
Mariya anamweetella Elizabeti
39Ddimallille ddenndda, Mariya aatimulla mwawaakuva aya o echigawo yamiyaango, o etawoni emodda ya o Yudeya. 40Aavollowa mpa mwa Zakariya amvaha mooni Elizabeti. 41Elizabeti iiwalleeye mooni wa Mariyooyo, mwaana aari m'mirimani mwayemmo ahiirukunusarukunusa. Vano Elizabeti aaddalliwa ni Munepa Waweella 42Nave aallota mookhuwa wi, “We sika oodalisiwa mwa atthiyana attheene nave oodalisiwa tti mwaana onaamuyarawooyo! 43Miyaano kiri aani wi ameewa a Apwiyaaka ekeetella? 44Kiiwalleemi moonaawoolle, mwaana aarukunuwarukunuwa m'mirimani mwaka moohakallalla. 45Oodalisiwa tti weyaano kaambiiwa waakhulupilila ddallotille Apwiya wi ddineereweereya!”
Nchipo na Mariya
46Nave Mariya aallota wi,
“Murimaaka onnaatitimiha Apwiya,
47nave munepaaka wohakallalla ekaamba ya Mulluku, oovullusaaka,
48 #
1 Sam 1.11
vawi ookuupuwella miyaano, oorumeyellaaye oovevuwa!
Waambeella ollello oya muhoollo athu attheene eneerokeera oodalisiwa,
49kaambiiwa Mulluku amasiva ookeerella ddeko dduullupalli.
Nnddina naye sika naweella.
50Anaweerella echifundo ayo enamoova olliye ovenyera va mbado mmodda ophiyera mmodda.
51Oheera ddeko ddamasiva ni muwonwaaye,
nave ohaapallallesa athu awiitukhulla m'murimani mwiwa.
52 #
Yob 5.11; 12.19 Ohaavenyiha mamwene vamipandoni ddiwa dda omwene,
koma athu oovevuwa ohaawelliha.
53Athu oohoowa ohaakwakhwanihella ni ddeko ddaphaama,
nave athu eeyuuma ahaahokollosa ahaavahille ello.
54Ookwakhwaniha allotilleeye wa makhollwaahu,
nave oohaakavihera athwaaye a Israele, oomurumeyellaaye.
55 #
Gen 17.7
#
1 Sam 2.1-10
Sika ohuupuwella omweerella echifundo Abrahamu
ni edduullu ddaye mallapo mattheene.”
56Nave Mariya aakhalla ni Elizabeti miyeri miraru nave aahokollweellattho owaniwa.
Oyariwa wa Yohane Oobatiza
57Enthawi yawi Elizabeti amuyare mwaana yaakwakhwana nave aamuyara mwaana aamullopwana. 58Akhwaaye ni abalaaye yahiiwa wi Apwiya aamweerella echifundo nave yaahakallallana.
59 #
Lev 12.3
Nave mwaanooyo aariiye ni mallapo matthanu ni mararu, yaawa wi yoonelle ophaddiwa waye nave yapaalla omuvaha nnddina naattiitthinnya Zakariya. 60Koma amennyaayo yaakhoota ellota wi, “Iyaayi! Nnddina naye anaakhalle Yohane.”
61Athwaayo yaallota ni Elizabeti wi, “Khaavo a mbalaanyu ari ni nnddina nenna!” 62Nave yaallota ni attiitthinnya ni matta, yaakoha wi mwaanooyo nnddina naye anaakhalle aani.
63Zakariya aaveka voolemba nave alemba wi, “Nnddina naye tti Yohane.” Athu attheenaayo yaattikhina. 64Enthawi yeeyo Zakariya aattaphuwa muwano, aamba ollota, vano aamutitimiha Mulluku. 65Nave athu attheene awaatamanana yahoova nave epilli ya ddeko ddenndda yaavuwa mu echigawo ettheene yamiyaango ya Yudeya. 66Athu attheene ayo yiiwalle, yaanaddiganizera, eniikoha wi, “Mwaana yoolla anaakhalle muthu awiidde?” Vawi ddaanooneya wi masiva a Apwiya eri ni olliyooyo.
Ollotella wa Zakariya
67Nave Zakariya, attiitthinnya a Yohane, yaaddalliwa ni Munepa Waweella nave yaallotella wi;
68“Ootitimiheya tti Apwiya Mulluku a Aisraele!
Oowa wi aakavihere athwaaye nave awoopolle.
69Oonivaha Oovullusa amasiva,
edduullu ya Davide, oorumeyellaaye,
70Wonanko mmo alonjezilleeye oweella mwa anamallotella aweella murima ayo yaariwo mallapo akhalle,
71wi aneeronivullusa wa adanaahu,
ovenyera m'mattani mwa attheene ayo enaniita hiyaano.
72Aaweerella echifundo makhollwaahu
nave ahuupuwella echipanganwaaye yaweella.
73Wonanko mmo allupelleeye wa Abrahamu, nikhollo nahu,
74wi aneeronivullusa wa adanaahu,
nave nineeromurumeyella moohoova,
75koma mwaweella murima ni mwa echilungamo vamiitthoni vaye
mallapo mattheene ookumaahu.”
76 #
Mlk 3.1
“We, mwanaka, oneeroromolliwa namallotella a Mulluku Muullupalli.
Oneerewaahoollella Apwiya,
wi wookolle ettilla ddiwa.
77Oneerewaalleella athwiiwa wi eneerovullusiwa,
vookhululukelliwani machimwiiwa.
78Ekaamba ya echikondi ni echifundo ya Mullukwaahu,
owala woovenyera oddullu oneerokhuma ni oniwalella hiyaano.
79 #
Yes 9.2
Nave oneerewooneya wa ayo eri mwiipiphini ni m'muuthuuchini wa okhwa,
wi onihoollelle mu ettilla ya murendelle.”
80Mwaanooyo ahunnuwa m'mwiillini ni m'munepani nave aakhalla ochipululuni ophiyera mallapo addoonihelleeye wa Aisraele.
Currently Selected:
Luka 1: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.