Yohane 6
6
Yesu anachiha mulloko wa athu muullupalli
(Mat 14.13-21; Mrk 6.30-44; Luk 9.10-17)
1Ddimallille nndda Yesu aavenya oya okhopella wa enyanja ya Galileya* eyo yaromolliwattho wi enyanja ya Tiberiya. 2Nave mulloko wa athu muullupalli waamuthwara kaambiiwa yahoona ddoottikhiniha ddaye ddoowaachiriha oovoriiwa. 3Vano Yesu aawella mwaango akeraatthi vatthi ni oohudderaaye. 4Nave enthawi ya Ehakallallo ya Paska a Ayuda yahaatamella. 5Yesu atukhullalle miittho ahoona mulloko wa athu muullupalli owaaka wa olliye. Sika aamukoha Filipo* wi, “Ninaamukulle wuuwi buledi ookwakhwanella waachiha athu attheenaalla?” 6Akohille yeella wi amweese Filipo vawi aadduwella yeekhaaye yawi eere.
7Filipo ahaakhulla wi, “Naari makobiri manchichi khekwakhwanella omukulla buledi awi arive muthu amuche naari vang'ono.”
8Mmodda a oohudderaaye, Andreya, mwanamunne a Simoni Petro aallota wi, 9“Vookhalla musombwe vaava arina mitthi mitthanu dda buledi ookittha mutengo ni ehomba piilli. Koma khekwakhwanellattho athu attheenaalla.”
10Yesu ahaalleella oohudderaaye wi, “Akeraatthiheni athu vatthi. Nave wenko waakhalla manasi manchichi. Sika athu attheene yaakeraatthi vatthi. Vaari allopwana 5,000.” 11Yesu aakusa mitthi dda buledi, avekella omuthokoza Mulluku nave amuvelleella wa athu ayo yaakeraatthiille vaavo. Aheerattho emoddamoddave yeeyo ni ehombanndde. Nave attheene yahaakhella moollikana ni mmo yapaallelliiwa. 12Nave attheene evonne, ahaalleella oohudderaaye wi, “Tthukumanihani ddoohalla wi vihikhalle ello yootathilliwa.” 13Sika yaaddalliha mitaanga khumi ni miilli ni ddoohalla dda mitthi dditthanu dda buledi, nnddo ddahanlle athu attheene echille.
14Athu yoonilliiwa ddoottikhiniha Yesu eerilleeye, yaallota wi, “Ddawoona yoolla tti namallotella#6.14 namallotella: Onani 1.21. oyo anaawe mu ellapo yavatthi!” 15Yesu aadduwella wi yapaalla owa wi empharelle omwene, sika aavenyavo aya omwaangoni yeekhaaye.
Yesu aneeta vamaaddini
(Mat 14.22-33; Mrk 6.45-52)
16Voophiyani misikuwa, oohuddera a Yesu yaakitthella o enyanja. 17Nave waaripa Yesu ahinaphiye wa alliwaayo. Vano yaavollowa mukallawani nave yaallapuwa enyanja oya o Kaperenao. 18Enthawi yeeyo ephevo yamasiva yahoopa nave maaddi yaatthanuwa. 19Oohudderaalle yeetihalle ekallawa olendo wookwakhwana makilomita matthanu apaalle matthanu ni nimodda yaamoona Yesu eetaka vamaaddini aatamellaka ekallaweelle, sika yahoova. 20Koma Yesu aallota wi, “Tti miyaano, muhoove!” 21Vano yaapaalla omuwelliha mukallawanimmo koma enthawi yeeyo ekallaweeyo yaaphiya vanipuroni nno yayiiwa.
Athu enamwaashaasha Yesu
22Osaka wene mulloko wa athu oyo waari vakhopella va enyanja waadduwella wi vaari ekallawa emodda nave wi Yesu khaavollowille vamodda ni oohudderaaye mukallawanimmo nave wi oohudderaaye yaatimullavo weekhiiwa. 23Vano ekallawa ddimodda ddoovenyera o Tiberiya ddaawa vakhuviru ni nipuro nko athu yamuchilliiwa buledi Apwiya ethokozille. 24Athwaalle yoonille wi Yesu khaavo ni oohudderaaye kheyiivo, yaawella ekallawanndde eya o Kaperenao woomwaasha Yesu.
Yesu, buledi oovaha okumi
25Athu yaamphwanyilliiwa Yesu vakhopella va enyanjeelle, yaamukoha wi, “Ahuddihi, mwawiille niini wuno?”
26Yesu ahaakhulla wi, “Ddawoona, kinimuulleellani wi, munakaasha miyaano kaambiiwa mwaamucha buledi nave muvona, ohiri kaambiiwa mwahoona ddoottikhiniha ddaka. 27Muhiphareke mutteko wi muphwanye yoocha eyo enoonongeya koma muphareke mutteko wi muphwanye yoochave eyo enavaha okumi woohimalla. Ella sika yoocha eyo mi Mwaana a Muthu kinuuvaheemini nyuwaano kaambiiwa Mulluku, Attiitthaaka, yaakiiyaatthi echizindikiro yoosimikiza dda miyaano.”
28Sika yaamukoha wi, “Ninaphwanella weera tini wi niphare mitteko dda Mulluku?”
29Yesu ahaakhulla wi, “Eyo Mulluku anapaalleeye wi mweere tti yawi mumukhulupilileke oyo aamurumalleeye.”
30Sika yahaakhulla wi, “Muneere ddoottikhiniha ddawi tini wi noone ni wuukhulupililani? Muneere tini? 31#Eks 16.4,15; Mas 78.24Makhollwaahu yaacha mana muchipululuni moollikana ni mmo mawu a Mulluku enallotelliiwa wi, ‘Ahaavaha buledi oovenyera oddullu wi emuche.’ ”
32Yesu aallota wi, “Ddawoona, kinimuulleellani wi, khe Mose uuvahilleni#6.32 khe Mose uuvahilleni: apaalle Mose uuvahilleeyeni khaari. buledi oovenyera oddullu, Attiitthaaka sika enuuvahani buledi awoona oovenyera oddullu. 33Vawi buledi anavelleelliwa ni Mulluku tti miyaano kikitthalle ovenyera oddullu nave kinavaha okumi va ellapo yavatthi.”
34Yaamuveka wi, “Munivaheke buledi yooyo mallapo mattheene.”
35Yesu ahaalleella wi, “Mi tti buledi oovaha okumi; oyo anawa wa miyaano khavolliwattho ettalla nave oyo anakikhulupilila miyaano khavolliwattho nthona. 36Vano kahuulleellani wi mookoona miyaano koma khamunakikhulupilila. 37Arive muthu oyo Attiitthaaka yakivahilliiwa aneeroowa wa miyaano. Nave arive muthu oyo anawa wa miyaano ngimukhoota. 38Vawi ngaakitthalle ovenyera oddullu wi keere opaalla waka koma wi keere opaalla wa oyo aakirumalle miyaano. 39Opaalla wa oyo aakirumalle miyaano tti wawi kihimutathille arive muthu a ayo yaakivahilliiwa koma wi kaavahe okumi va nllapo noomallihella athu attheene ookhwa. 40Vawi opaalla wa Attiitthaaka tti wawi arive muthu oyo anakoona miyaano ni okhulupilila mwa olliyooyo, akhallena okumi woohimalla. Nave va nllapo noomallihella kineerewaavenyiha wa ookhwa.”
41Vano Ayuda yahaamba owinya kaambiiwa Yesu aallota wi, “Mi tti buledi ookittha ovenyera oddullu.” 42Yaallota wi, “Olliyoolla khahiyo Yesu, mwaana a Yosefe? Ninnaadduwella attiitthinnya ni amennya. Vano anallotella tini wi, ‘Kakitthalle ovenyera oddullu?’ ”
43Yesu ahaakhulla wi, “Muhinawinyaka dda miyaano wa mmodda ni mukhwaaye. 44Khaavo muthu anawora owa wa miyaano, Attiitthaaka, ayo yakirumalle miyaano, yaahimuhoollella wa miyaano. Nave va nllapo noomallihella kineeromuvenyiha wa ookhwa. 45#Yes 54.13Anamallotella yaalemba wi, ‘Arive muthu aneerohuddihiwa ni Mulluku.’ Muthu oyo iiwalle wa Attiitthaaka nave ahuddera wa alliwaayo, annawa wa miyaano. 46Nginallota wi, ookhallavo muthu oyo awoonille Attiitthaaka koma meeneve kavenyenre wa Mulluku sika kiwoonille. 47Ddawoona, kinimuulleellani wi, yooyo anakhulupilila ookhalla ni okumi woohimalla. 48Mi tti buledi oovaha okumi. 49Makhollwaanyu yaacha mana muchipululuni nave yaakhwa. 50Koma buledi oovenyera oddullu ookittha wi arive muthu oyo anaamuche ahikhwe. 51Mi tti buledi oovaha okumi, yooyo aakitthalle ovenyera oddullu. Muthu amucha buledi yoolla, aneerokhalla ni okumi woohimalla. Nave buledi oyo kinamuvaheemi wi athu a va ellapo yavatthi ekhalle ni okumi, tti mwiillaaka.”
52Vano Ayuda yahaamba okambirana mmodda ni mukhwaaye wi, “Muthu yoolla anaanivahe mwiillaaye mwawiidde wi niche?”
53Yesu aallota wa alliwaayo wi, “Ddawoona, kinimuulleellani wi, mwaahicha mwiilli wa miyaano Mwaana a Muthu ni owirya nikhame naka khamukhalla ni okumi woohimalla. 54Ayo enacha mwiillaaka ni owirya nikhame naka aakhalla ni okumi woohimalla nave va nllapo noomallihella kineerewaavenyiha wa ookhwa. 55Vawi mwiillaaka tti yoocha yawoona nave nikhame naka tti yoowirya yawoona. 56Ayo enacha mwiillaaka ni owirya nikhame naka enakhalla mwa miyaano nave miyaano kinakhalla mwa alliwa 57Attiitthaaka ookumi aakiruma miyaano nave ekaamba ya alliwa kookhallattho ni okumi emoddamoddave yeeyo oyo anakicha miyaano aneerokhalla ni okumi ekaamba ya miyaano. 58Miyaano sika buledi ookittha ovenyera oddullu, nginapwanaphwana ni buledi oyo yaamuchille makhollwaanyu vawi yaakhwa. Koma ayo enamucha buledaakoolla eneerokhalla ni okumi woohimalla.”
59Yesu aallotille ddenndda ahuddiheeye mu enyumba yamavekello o Kaperenao.
Oohuddera anchichi ennahiya omuthwara Yesu
60Anchichi a oohudderaaye yahiiwa ddenndda nave yaanallota wi, “Ehuddiho yeella tti yookatamiha. Anaayiiwesese ttaani?”
61Yesu aadduwella m'murimani mwaye wi oohudderaaye yaanawinya, sika ahaakoha wi, “Munapaalla okihiya miyaano ekaamba ya yeella? 62Muneere tini mwakoona mi Mwaana a Muthu kiwellaka oya wenko kaarimiwo khalle? 63Munepa a Mulluku sika anavaha okumi. Masiva a muthu khenna mutteko. Mawu ayo kaallotilleemi wa nyuwaano enavenyera wa Munepa a Mulluku oyo anavaha okumi. 64Koma amodda a nyuwaano khamunakhulupilila.” Vawi Yesu ahaadduwella khalle vawaambeella vene ayo ehinamukhulupilila ni oyo anaamuvelleelle wi iiphiwe, 65Nave aallotattho wi, “Ekaamba ya yeella kahuulleellani wi khaavo muthu anaawore owa wa miyaano Attiitthaaka yaahimuvaha olamulello wawi awe.”
66Ekaamba ya yeella, anchichi a oohuddera a Yesu yaahiya omuthwara. 67Sika ahaakoha oohuddera khumi ni eellaalle wi, “Nanyeenettho munapaalla okihiya miyaano?”
68 #
Mat 16.16; Mrk 8.29; Luk 9.20 Simoni Petro ahaakhulla wi, “Apwiya, ninaaye wa aani? Tti nyeeneve muri ni mawu oovaha okumi woohimalla. 69Nave hiyaano ninnakhulupilila nave ninnadduwella wi nyuwaano tti Aweella oovenyera wa Mulluku.”
70Yesu ahaakhulla wi, “Kahuutthoollani nyuwaano khumi ni eelli, khe ddiiddo? Koma mmodda a nyuwaano tti Satana!” 71Amwaaka Yudasi, mwaana a Simoni Isikariyoti. Vawi Yudasi sika anamuvelleella wi iiphiwe naari aari mmodda a oohuddera khumi ni eellaalle.
Currently Selected:
Yohane 6: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.