Yohane 5
5
Yesu anamuchiriha muthu vanthiyani
1Ddimallille nndda Yesu aaya o Yerusalemu o Ehakallallo ya Ayuda. 2Mu Yerusalemu vakhuviru ni mullako wa Enkhosa vaakhalla nthiya#5.2 vakhuviru…nthiya: apaalle vakhuviru ni nthiya na Enkhosa vaakhalla nipuro. nooromolliwa Betisaida#5.2 Betisaida: Ddoolemba ddimodda ddakhalle ddookhalla ni mawu awi Betezata. mu ellotello ya Eheberi naakhalla ni makhote matthanu. 3Mukhotemmo mwaakonaatthi athu oovoriiwa anchichi, amodda yaari oohoona amodda yaari ookhwa meto amodda oorakalla.#5.3: Ddoolemba ddimodda ddakhalle ddaanaanjereravo mavesi 3b-4: Alliwaalla yatiyera wi maaddi ettanusiwe. Vawi enthawi ddimodda mungelo a Apwiya aanakittha aattanusa maaddaayo. Muthu awaamba oovollowa m'maaddini oothanusiwaayo aanachira ereta ddaye ddittheddene. 5Vano vaakhalla muthu mmodda avoriiwalle miyakha 38. 6Yesu aamoona olliyooyo vaavo nave aadduwella wi muthooyo aavoriiwa enthawi yoorekama, sika aamukoha wi, “Munnapaalla ochirihiwa?”
7Muthu oovoriiwoolle ahaakhulla wi, “Mi nginna ookiiyaatthi munthiyanimmu maaddi yattanusiwa. Nave kapaalla wi kivollowemo, kinamuphwanya muthu mmodda avollowillemo khalle.”
8Yesu aallota wi, “Venya, kusa mwinllaawo weete.” 9Nave enthawi yeeyo muthooyo aachirihiwa, akusa mwinllaaye, aamba weeta.
Nllapo nenno naari na Sabata. 10#Neh 13.19; Yer 17.21Vano attekweene a Ayuda* yaamulleella muthu oochirihiwoolle wi, “Nna tti nllapo na Sabata nave malamulwaahu khenawaakhullella weyaano okusa mwinllaawo.” 11Nave ahaakhulla wi, “Muthu oyo aakichirihalle sika akilleelle wi kikuse mwinllaaka keeteke.”
12Yaamukoha wi, “Muthooyo ttaani uulleelle wi okuse mwinllaawo weeteke?”
13Koma muthu oochirihiwoolle khaamudduwenlle kaambiiwa Yesu aavollweella muwari mwa mulloko wa athu anchichi ayo yaari vaavo.
14Ddimallille nndda Yesu aakumanana mu enyumba ya Mulluku amulleella wi, “Ngoona, woochira vano, ohichimwettho wi yoonanara yookhwaranya eretaawo eheereye wa weyaano.”
15Muthooyo aavenya aalleella attekweene a Ayuda wi tti Yesu aamuchirihalle. 16Sika Ayuda yahaamba omuhoosa Yesu kaambiiwa aachiriha nllapo na Sabata. 17Koma Yesu awaakhulla wi, “Attiitthaaka ennaphara orive mutteko. Nave miyaanottho kinapaalleya wi kiphareke mutteko.”
18Ekaamba ya yeella Ayuda yahaanjerera opaalla omwiipha vawi khaathwanre lamulo na nllapo na Sabata navettho aanamweera Mulluku wi tti Attiitthinnya wiillikaniha yeekhaaye ni Mulluku.
Olamulello wa Mwaana a Mulluku
19Yesu awaakhulla alliwaayo wi, “Ddawoona, kinimuulleellani wi, miyaano Mwaana ngiwora weera ddeko mwa meekhaaka koma kineera yeeyo kinooneemi Attiitthaaka yeeraka. Nnddo eneeriiwa, emoddamoddave yeeyo miyaano kinneerattho ddennddo. 20Vawi Attiitthaaka ennakikonda miyaano nave ennakooniha miyaano ddittheddene eneeriiwa. Nave eneerokooniha ddeko ddookhwaranya nndda wi muttikhine. 21Vawi Attiitthaaka ennaavenyiha athu ookhwa enaavaha okumi, emoddamoddave yeeyo miyaano kinnavaha okumi wa ayo kinaapaalleemi. 22Attiitthaaka khenamweeruza arive muthu koma aakivaha miyaano olamulello ottheene waweeruza, 23wi attheene yakititimihe miyaano emoddamoddave yeeyo enaatitimiheriiwa Attiitthaaka. Oohikititimiha miyaano khenaatitimiha Attiitthaaka ayo yaakirumalle.
24“Ddawoona, kinimuulleellani wi, oyo aniiwa ni wiiwellella mawaaka nave anakhulupilila mwa yooyo aakirumalle ookhalla ni okumi woohimalla. Yoolla kheeruziwa koma ookhuma khalle wa ookhwa avollowa mu okumi. 25Ddawoona, kinimuulleellani wi, enthawi enimawa nave yoophiya khalle yawi athu ookhwa mu munepa eneerewiiwa okhuwa wa miyaano Mwaana a Mulluku nave ayo eniiwe ni wiiwellella eneerokhalla ni okumi. 26Vawi Attiitthaaka aakhalla ni masiva owaavaha athu okumi, emoddamoddave yeeyo alliwaayo aakivaha miyaano masiva owaavaha athu okumi. 27Nave aakivaha miyaano olamulello waweeruza kaambiiwa miyaano tti Mwaana a Muthu. 28Muhittikhine ni ddenndda, enthawi enimawa yawi ookhwa attheene eneerewiiwa okhuwa waka. 29#Dan 12.2Nave eneerokhumamo mu mahame mwiwa. Ayo yeerille ddaphaama eneerovenyihiwa wa ookhwa nave yaayo yeerille ddoonanara eneerovenyihiwa wi yeeruziwe.
Oomweerella omboni Yesu
30“Nginawora weera ello miyaano meekhaaka. Kinaweeruza moollikana ni mmo Attiitthaaka yakilleellelliiwa, sika echiweruzwaaka eri yawoona kaambiiwa ngineera nnddo kinapaalleemi koma ddennddove anapaalla oyo aakirumalle.
31“Kakhalla mboni meekhaaka, ombonaaka khororomelleya. 32Vookhalla mmodda anakhalla mboni a miyaano nave kinnadduwella wi ombonaaye tti woororomelleya. 33#Yoh 1.19-27; 3.27-30Nyuwaano mwaanaarumiha oorumiwaanyu wa Yohane nave olliye aari mboni a yawoona. 34Miyaano nginapaalla omboni wa muthu nave kinallota ddenndda wi nyuwaano mwavullusiwe. 35Yohane aari wonanko enyali ni yoowala nave nyuwaano mwaatthoolla ohakallallana owalanko enthawi yoyeva. 36Koma miyaano kookhalla ni mboni oopaalleya wunchichi ohiyana ni Yohane. Vawi Attiitthaaka aakivaha mitteko wi kimallihe nave mitteko ddennddo kineereemi tti omboni wawi Attiitthaaka aakiruma. 37#Mat 3.17; Mrk 1.11; Luk 3.22Nave Attiitthaaka yaakirumihallaayo, tti mboni. Okhuwa waye khamwaawiwalle nave wooneya waye khamwaawoonille. 38Nave khamunasunga mawiiwa m'murimani mwanyu kaambiiwa khamunakhulupilila mwa oyo aakirumalle. 39Munahuddera mawu a Mulluku kaambiiwa munaganiza wi mwemmo muneerophwanyamo okumi woohimalla. Nave tti mawu a Mulluku yaalla eri mboni, 40koma khamunapaalla owa wa miyaano wi mwaakhelle okumi.
41“Mi nginaashaasha otitimihiwa ni athu. 42Koma kinnadduwella makhallellwaanyu nave kinnadduwella wi khamunna echikondi ya Mulluku m'murimani mwanyu. 43Koowa miyaano mu olamulello wa Attiitthaaka koma khamunakaakhella. Koma mmodda awa mu olamulello waayewaaye, yoolla munnamwaakhella. 44Nyuwaano munnatitimihana koma khamunaashaasha ntitimiho noovahiwa ni Mullukuve. Vano munaakhulupilile mwawiidde? 45Muhiganize wi miyaano kineerewuuvaanyihani vamiitthoni va Attiitthaaka. Mose, oyo munamutiyereenyu, sika anaawuuvaanyiheni. 46Mwamukhulupililalleke Mose, mweerokikhulupilila miyaano kaambiiwa olliye aalemba dda miyaano. 47Koma mwaahikhulupililaka ddoolemba ddaye, munaawore mwawiidde okhulupilila mawaaka?”
Currently Selected:
Yohane 5: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.