LUKA 6
6
Yaahasa daanduú deelór Sabaáto
(Mat 12:1-8; Marko 2:23-28)
1Yesu deelór Sabaátoro baraá qaymór angaáno ganar waaraáhh, nee eeharuuseerós, angaáno guna giqeér, guri pikimís nee guri /ák. 2Múk Farisayo bahh'alé eeharuuse kari báy, «Adór ta tlehhita' baré i hariindaaká deelór Sabaátoro?»
3Yesu giri báy, «Aga soomusi'iikáhe adoodá' Daudi aa tleéhh qoomár iwa qwariít? Inós nee mukdá' ti al koomá', 4tana dáh baraá Doó Mungú. Inós mikaáteedá' taa qaás as Mungú gari /aáy, gari haniís dír mukdá' nee inós ti koomá', tidá' dir'ine hariimaaká ngiwa /ayiya', aqo har kaahamuusér Mungú kilós gan /ák.»
5Giri báy, «Garmoó Hee an Aakoó deelór Sabaáto sleeme.»
Yesu heé aa dawa sol'oot nguwa hungu/uús
(Mat 12:9-14; Marko 3:1-6)
6Deelór hatlá' ar Sabaátoro Yesu ina dáh baraá doó saaliingw, iri intsaahhatimís. Heeko dakós oo doó /iyáy aa sol'oot i baraadií dirii'. 7Intsaahhatuusér hara'ayár Mose nee múk Farisayo kuri gigidín kuwa ari, áx gu hungu/uúsi deelór Sabaátoro, asma loohír kur sakwasleemuuti kawa slay. 8Ala Yesu tidá' ta baraá muner'ín i axweesi gari tsaáhh, heedaádá' dakós aa sol'oot guri báy, «Tláw, baraá tla/aangw i sihhiiteek.» Heedaádá' iri tláy iri didaádií sihhiít. 9Yesu giri báy, «Án kuungá' nu yaahaás, xáy, i hariínda deelór Sabaátoro gár hhoo' tleehhamooro laqaá gár tlaakw. Hee kuwa hungu/uusi laqaá kuwa gaasi?» 10Múk didaádií dirií' sleémeero guri ilií duxún, heedaádá' guri báy, «Dakók gan'aaseek.» Dakós guri gan'aás, iri hunguú/.
11Inooín tari buúhh, tiri i axweesiyé' daanduú Yesuwo as adór ku laqi kawa slay.
Yesu ya/abuusér mibaá nee tsár ngiwa tsawaár
(Mat 10:1-4; Marko 3:13-19)
12Qoomaadae Yesu iri gawaá tloomár i tláy as iwa firór ay. Looa gari gawaadá' wa tleés, iwa Munguú firiirin. 13Looa niwa tleér, eeharuuseerós gari ateét. Eeharuusér mibaá nee tsár gari baraaín wa tsawaár, kudá' aa báy ya/abuuse. Inooín a kuká': 14Simon, kudá' aa umuú hatlá' i tsaát aa báy Petro, nee hhiyaawós Andrea, nee Yakobo nee Yohane, nee Filipo nee Bartolomayo, 15nee Matayo nee Tomas, nee Yakobó Alfayo nee Simonudá' yaamuuwós aleeslaáqw,#6:15 Simonudá' yaamuuwós aleeslaáqw: Gídaabá, inós a heé wák oo yaamuuwós aleeslaáqw dír múk Romár wa ale, kudá' yaamuuín ngi sawaawuti'ii'imá'. dír múk Romár wa ale, kudá' yaamuuín gi sa waawuti'ii'iím. 16Nee Yuda oo Yakobo nee Yuda Iskarioti kudá' Yesu gwaa sakii/.
Intsaahhatimisuú Yesu nee muu nguwa hungu/uumiís
(Mat 4:23-25)
17Yesu nee inooín tindiri gawaá tloomár wa aweér, iri sihhiít baraá xatsa. Eeharuuseerós ar yaariir i didá', nee boo/oó úr oo muu oo yaamaá Yudea sleémeero ngi daáhh, nee Yerusalemuro nee yaamaá afaá tlawi awa Tiro nee Sidoni. 18Kuká' nina hardihiyé' as nguwa axaasiya', nee tiqtir'ín kawa hungu/uusi. Nee kudá' neetlaame aa daawitamís giri hungu/uús. 19Boo/aay sleémeero inós guna kwatiitár wa slaá', asma /uuruudá' hungu/uumiís oo amoorós daáhh, kudá' sleémeero gi hungu/uumiís.
Múk amohhoó' nee múk hhintleemo gawdén
(Mat 5:1-12)
20Aluuwo Yesu iri amór eeharuuseerósí qaytsiít, giri báy,
«Múk amohhoó' a kuungaásaá narkuute,
asma waawuti'iimár Mungú a toohúng.
21Múk amohhoó' a kuungaásíng qwariitá' hamí,
asma a axá'.
Múk amohhoó' a kuungaásíng /aa/amiimá' hamí,
asma a qaseendá'.
22«Múk amohhoó' a kuungaásíng muu burna aáhh, nee burtunda baynitís dir'ine, tunduwa niqin, nee kuungá' burtunda sií' adór gár tlaákw wa ale asma Garmoó Hee. 23Qwalaala/é' baalaadae, ta ni/iindá', asma ga/aawaagáy, gawaá dooriiwo kuungá' qeemuú úr u sleerá'. Asma adoosíng muu ni kuungií tlehhiiti, an adoodá' aáng baabi'ii'ín naa tlehhiitiyé' dír aaruuse.
24Ala kuungaásingaá daqaare,
a tsaxwaahuúng,
asma qwal/uuhúng sleémeero ugwa hhe'esé' sleemuuwo.
25Kuungaásingaá aaxá' hamí,
a tsaxwaahúng,
asma kuungá' a qwaritá'.
Kuungaásingá' awa qaseseemá' hamí,
a tsaxwaahúng,
asma kuungá' a tsuunqumisá' tay /aa/amiindá'.
26«Kuungá' muu sleémeero burna xirfayeemiís, a tsaxwaahúng, asma baabi'ii'ín aáng adoosíng ngina tleehhiyé' dír aaruusér lama.»
Wakuuse kawa sla'a'
(Mat 5:38-48; 7:12a)
27«Ala kuungaásingá' anií axamiisá', án a kah, Wakuuserhúng sla'aak, kudá' nu ahhiitá' hhooeemií tlehhiitaak, 28kudá' kuungá' lu'umisá' hhooeemií tlehhiitaak, kudá' kuungá' nu slahh'eemisá' aleefiriiriimaak. 29Bar hee tlaaqarmoowók gwaa slaáhh, tlaaqarmoó tsár warqeeseek sleeme. Bar hee inqwaarirók nga hayóh, tam shaáti sleeme ka hanís. 30Umuúqo heé firiiriím qaweek, heé muruuwók gu hayohahiím mu iinuusaar nguwa bui. 31Adoodá' kuungá' ta sla'a' muu ni kuungií tleehhi, kuungá' adoodá' tleehhaak sleeme dir'ine.
32«Asma múk ta sla'a' bar kudá' kuungá' nu slaá', gár hhoo' ar taa laqaandé' a umós? Asma tam múk tlakuuse mukdá' inooín gi slaá', ngu slaiyá'. 33Kuungá' bar hhooeema iga tlehhé' dír mukdá' kuungá' wa hhó', gár hhoo' ar taa laqaandé' a umós? Asma tam tlakuuse adoosíng ga tlehhaahhít. 34Múk kirkimeero ta ya/a/aanda', bar kudá' ta gaárií daamaaraanda', gár hhoo' ar taa laqaandé' a umós? Asma tam tlakuuse i tlakuusér kirkít, as aluuwo kawa ki/isi hariímadá' adoodá' wa ale. 35Ala wakuuserhúng sla'aak, hhooeemií tlehhiitaak, nee kirkime ka ya/aandá', ma ki/isárí daamaara'. Ala kuungá' qeemuú ur u sleerá', daqaní kuungá' a na/aá Kuduú Gawa. Asma inós ku hhoó' dír kudá' sluufaay wasle nee tlakuuseero. 36Gimsé', gurtleemu koomaak, adór Baabuúhúng ir gurtleemuú kon.»
Muu mu sakwasleemuutara'
(Mat 7:1-5)
37«Muu mu sakwasleemuutara', nee kuungá' tundu sakwasleemuutiiká. Muu mu tawó bareetimaara' kahhó' kuungá' tundu bareetinká. Muu gurtlatlaawaak, kuungá' tundu gurtláy. 38Muruú ta koonda'a muu qaqawaak, kuungá' tundu qáy. Qoomoó taa hatsiís, kway tiíl, kway /umamaa', iri yaamií waa/, an kudá' muu ni kuungí haniisi. Asma qoomaydá' tar qoomeemesa', an kudá' tindi kuungí qoomeesi.»
39Yesu giri slaqsaywí báy, «Heé taampa taampár hatlá' geeraharto ga aleesláya? Tsaraawo ta al baraá bohóngwí /eétiíke? 40Eeharusmo uraywo intsaahhatusmoowós gu ba/iiká. Ala heé intsaahhatisa gaa faak, nee intsaahhatusmoowós tawa al qon, i ya/aán.
41«Kuúng mas suwito'ór baraá iltá heewók an ga/eér, ala waaqaasír baraá iltók a tsatsahhaandaaká? 42Adór heewók kur beer, ‹Xáda, suwito'oosír baraá iltók án ngi hingeés›, bar kuúng waaqaasír baraá iltók a tsatsahhaandaaká? Kuúng a hhaahhafusmo adoosinge. Waaqaasír baraá iltók ala geerií hingeeseek, daqaní suwito'oodár baraá iltá heewók ka sangw aluú wa hingés.»
Xa'ano nee mamuuwós
(Mat 7:16-20; 12:33-35)
43«Xa'anoó hhoó' oo mamaá tlákw laqwaliím i kaahh, laqaá xa'anoó tlaákw oo mamaá hhó' laqwaliím. 44Asma umuú xa'anoowo gár kur tsatsahhan a mamuuwós. Asma /aantsí ka gawaá sla/atá laqayaá koomá' wa buainká, tam mamaá sabiíbu ki gawaá xaa'aá laqayaá koomá' wa buainká. 45Heé hhoó' gár i axweesi a hhooeemaadá' muunaáwós ngwa hatsiisiye'. Heé tlaákw gár i axweesi a tlakweemaadá' muunaáwós ngwa hatsiisiye'. Asma afkú hee gár i axweesi a tidá' muunaáwós iwa hatsi.»
Slaqsoó maraá tsár
(Mat 7:24-27)
46«Aníng mihar babeera', ‹Aáko, Aáko,› ala tidá' án ni kah a tlehhita'aaká. 47Umuúqo heewo oo naa dir'eé' hardah, axweesante'eé' gari axaás, adoodá' i kat gari tleehh, slaqsaywós ngu dirhúng i oó'. 48Slaqsaywós a adór heé doó tleéhh, gway yaamií foola hhe'eés, iihafiirír do' gan tleéhh gawaá tlaa/a. Duxér ma'aay niwa wá/, ma'aay do'dá' nguna i dahiyé' ar /uuru, ala do'dá' ngwaa dingisi'iiká, asma gwaa gawdeés tleehhamooro. 49Ala kudá' axweesante'eé' gaa axaas, adoodá' i kat gari tleehhiiká, slaqsaywós a adór heé do' gwa tleehh gawaá hhasaangw, koo/i gaa gawdeesiiká. Ma'aay niwa amoodií wa/iyé' ar /uuru, nguri adaá dahhiyé'. Adór do'dá' ira huú' ka ló'wa tlaakw.»
Currently Selected:
LUKA 6: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.