LUKA 5
5
Yesu eeharuuseerós ar geera ngiwa ateét
(Mat 4:18-22; Marko 1:16-20)
1Qoomár Yesu iwa sihhiit afaá tlawtá Genesareti kuna tliíq nee múk yaariír oo axweesantá Mungú ngaa axamisuú ay. 2Yesu miringér tsár gana afaá tláwtí ár. Ala múk siyoó ohiím aa ti'iít baraadae, ta baratsufay'ín hamtliit. 3Yesu iri baraá miringamoó Simoní dáh, guri firín nguwa surkusi gár niinawe afaá tlawto. Iri gawaadií iwiít, boo/oó muu guri intsaahhatimís.
4Yesu axweesanto iwa hhe'eés, Simon guri báy, «Miringamo surkuseek baraá tla/ángw tlawi, baratsufayhúng /aytisaak baraá ma'aay, siyó ku oohiindá'.»
5Simon iri oó', «Aáko, gadiyér ur tina ló'wa slaaqatís xweeraawo, ala gár taa slawaán i káhh. Ala as adoosíng taa oi baratsufaay u /aytiís.» 6Naxés adoodá' kawa tleéhh, siyoó yaariír kuri sláy. Baratsufay'ín iri lak tsatimiít. 7Mukdá' nee inooín algadiyuusá' oo baraá miringamoó hatlá', kuri kuútl ar daba', as kiwa alee/iisár ay. Tindiri hardáh, miringe tsaraawo kari hatsiís, iri lak /ee/etiín baraá ma'aay. 8Simon Petro adoodá' ngiwa ár, iri tumbarara'aát dír ya'aá Yesu, iri oó', «Aáko, dir'eene quútl, asma aníng a heé tlakusmo.»
9Asma Simoni nee mukdá' sleémeero ti alkoomá' tana ló'wa waa/oó/ as siyoódá' yaariír taa sláy. 10Yakobo nee Yohane sleeme, daaqoó Sebedayo, kudá' nee Simon algadiyuusá', adoodá' kari waa/oó/. Yesu Simon guri báy, «Ma da'ayumitaar, iimír hamí kuúng daxta a heé múk huuwahuúw amor'eé' alé.»
11Miringer'ín kawa dír afaá ma'áy duúx, umuúqo gaaro kay didií geexáy, inooín Yesu kway eehár.
Yesu heé tiqtír tsatmit nguwa hungu/uús
(Mat 8:1-4; Marko 1:40-45)
12Yesu iwa baraá gixsár wák i dirii'i baraá gixsaduudae, heé tiqtír tsatmit i deer baraadae. Inós Yesu nguwa ár, iri dirós i tumbarara'aát, guri firín iri oó', «Aáko, kuúng bar slá', i aleesleér iwa hheehhe'es.»
13Inós guri dakós i gan'aás, guri kwatiít iri oó', «Án a slaá', hhoohhoúw.» Hamtidár kilae tiqtirós tidár tsatmit iri hungú/. 14Guri báy, «Tí ma heé bawaar, ala tláw ti laqaan dír kaahamusmoó Mungú. Ilahhooadá' Mose aa hara'ayín asma hungu/umaawók haniiseek, tí i lamabu'uungw tleehhit dir'ine.»
15Ala kangós iri ak tsiyaayaaxaát, boo/oó muu iri burumburiít as kuwa iiárií qamin, nee tiqtir'ín kawa hungu/uumisi. 16Ala inós siiwarkaaro in tlaatláy amór muu iwa kahhi, as iwa firór ay.
Yesu heé tiqtír sol'omit nguwa hungu/uús
(Mat 9:1-8; Marko 2:1-12)
17Looarka wake iwa intsaahhatimisi, múk Farisayo nee intsaahhatuusér hara'ayár Mosewo, kudá' baraá umuúqo gixsár Galilayár dahhá' nee yaamaá Yudea nee Yerusalemuro, taa didaádií iwiít. Nee Yesu aleesleemuú Aako gu kón oo ir hungu/uumisi. 18Naxés muu nina hardáh, ta heé tiqtír sol'omituú kón, ku loohiis ar hhafta. Geera kun dahaasár wa slaa' baraá do', as kuwa dír geeraawósí qaasi. 19Pa/ángw kur dahaasi baraá do' iwa qwaár, asma boo/oó muu, tari tsa/án gawaá daanduú do', dír aweerisa kari tleéhh, kuri aweeriís ar hhaftuuwós dír tla/ángw i alé geeraá Yesu. 20Inós haratlintaaor'ín ngiwa ár, heedaádá' guri báy, «mulqúmo, tlakweemaawók kaa gurtláy.»
21Intsaahhatuusér hara'ayár Mose nee múk Farisayowo tiri yaahamiisiyé' ta kaahi, «A heemá heewí /aymi'iiká' gi káh, awa Mungú /ooslisliingw? Heé tlakweema gurtleemuuwo gi aleesláw a heemá, a har Mungú kilosekáhe?»
22Yesu axweesantaín gari tsaáhh, giri báy, «Gár ta baraá munerhúngií aldakuta' a milá? 23Gár ák inslaahh ooaro a gaalá, tawa oói, ‹Tlakweemaawók kaa gurtláy,› laqaá, ‹Sihhiít, hi'iimiít›? 24Ala kuungá' xuaak adór Garmoó Hee aleesleemu ngur kón baraá yaamuwo oo tlakweema ngiwa gurtlay.» Heedaáduú tiqtír sol'omit guri báy, «Án kuúng un baw, sihhiít, hhaftuuwók gagaareek, waátl amór do'ók.»
25Hamtidár kilae iri geeraaín wa sihhiít. Hhaftuuwós guri gagaár, iri waátl amór do'ós, i hara Munguú xirfayeemiis. 26Sleémeero tari waa/oó/, Mungú kuri xirfayeemiís, tari da'ayuút ta kaahi, «Laarí muruú waa/oo/amo ugwa araán.»
Yesu Laáwi nguwa ateét
(Mat 9:9-13; Marko 2:13-17)
27Aluuwo Yesu iri ti'iít, ohomusmoó koódi guri ár, umuuwós a Laáwi, i baraá doó ohmér koódírí dirii', guri báy, «Aníng eeharáng.» 28Umuúqo gaaro gay geexáy, iri tláy, guri eehár.
29Laáwi muruú /aymár yaariír guri tleéhh dír do'ose as Yesu. Boo/oó úr oo ohomuusér koódi nee múk hatlá' oo nee inooín taa al/ayin i deer. 30Naxés múk Farisayo nee intsaahhatuuser'ín ar hara'ayár Mosewo eeharuusér Yesu kari i qununuú/, ta kaahi, «Mas al/ayiindá' nee mas alwahaanda' nee ohomuusér koódi nee tlakuuseero?»
31Yesu giri báy, «Múk slaqoohhó' qwaslaarmo gu leelehhitiiká, ala aqo har múk tiíq. 32Aníng naa hardihiiká as múk hota ganaá' ateetiim, ala nina hardáh as tlakuuse iwa hhu'u'uun.»
Yaahasa daanduú gwaawito
(Mat 9:14-17; Marko 2:18-22)
33Mukko Yesu guri báy, «Eeharuusér Yohane nee ar múk Farisayowo in gwaawaawiín nee in firaariín daqtá yaariire, ala eeharuuseerók i /ayiín nee i wahaán.»
34Ala Yesu giri báy, «War/aá heé duuxuuxuúm kiwa /aymár /ita' i aleesleerá'a, qoomaadá' nee heedá' duuxuuxuúm tawa dinkwárií dirii'i? 35Ala deelo i hardát ar heedaádá' duuxuuxuúm kuwa hingeesi. Daqadá' an qoomár inooín tawa sangw gwaawin.»
36Giri slaqsaywí báy sleeme, «Hee i kaahh oo warqamo gu tsaát gawaá inqwaarír /abén wa ale, guri waraaq ar inqwaarír aa gwa'. Adoorí birnga tleéhh, inqwaaridá' /aben gaa tawó tsaát, slám warqamoodá' /abén nee inqwaaridá' aa gwa' ti oohiaaká. 37Tam hee i kaahh oo difaáír /aben ga qamaamiím baraá tlakwa'aá qaren awa kaahari. Birnga qaás, difaáidá' /aben tlakwi'iidá' gi tsú/, difaái iri ku'út, tlakwi'iidá' niri hhitituutiyá'. 38Ala difaáír /aben dír ki qamaamin a baraá tlakwa'aá /aben awa kaahari. 39Hee i kaahh oo difaáír a hamat ga wáh iri ar /abén ilatleeruus, asma i kaahi, ‹Tidá' aa hamat an tidá' ak tsuu'.› »
Currently Selected:
LUKA 5: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.