Neto'te 32
32
Yakob nabte wul i nenèn mbumte bo Esau
1Yakob bèn ntam nze, boa ba Angél Nsi bumte. 2Yakob be yen yub ntshob ndù: Yen ni b'a ntshu ntsho Nsi. A yab lén dù' là ndù Mahanaim.
3Yakob tum benntùn mbwe i, mbaṅ mfèl i Esau, mà Seir, ntùm ngô Edom. 4A tshob bo ndù: Tshù mba bin nsi tshob tshùaben àm Esau li: Nkuan o Yakob tshob ndù a tswe la' Laban, ngô bwe tà nkum ndonni. 5A ghù nyàmna', nkekwène, mbwe, ghafa' tse bandum boa tse bènnzwi; a bèn ntum bo se' nsoṅ o ndù o ko ndèn mi. 6Ben tse Yakob tum nà bèn njam ntshob yi ndù: Bag nèn mbaṅ mfèl o Esau; tshù i là z'a tshwèt nse' bin yi bumte boa benntùn nkù kuà là. 7Yakob ju', mbwôg neshu, wul i fét. A ghabte tse ben nkam mbàa, mbwe, nyàmna' boa kamél, ntshob ntù i ndù. 8A be ze Esau se' ma' mo' kam benntùn ndab yub là, mba kam i z'a tù' là nsi yôg àm. 9Yakob le'te Nsi ntshob ndù: Nsi tàa Abraham, Nsi tàa Isak, wù Tshùaben lo tshob me ndù: Bèn njam ntùm ngô dù' ze bo bwe o là, me nsi ghù mebwô wù!
10Me kag neshu num njoṅ mfu' fa mi o fà me, me ze me be nkuan o là. Nummbe me lo dut Yordan bag kôg sàm, ndonni me tshwèt ngabte ben tshàm nkam mbàa. 11Netsho'o, kwé àm bu mfèl àm, bu Esau! Nummbe me tshwèt mbwôg ndù k'a se' mbiagte yage, ke faṅ mà ke bon no. 12Tu wul o lo tshob ndù: Me nsi ghù mebwô wù; me nsi ghù nzwil o be mba nkwango' mi a dibantse là, njàm kà mèn ke ku'ni nesiaṅ yube. 13Yakob #Net. 22.17na' nzi à yen dù' là.
A lo' ju num z'a ghù bu i là, mfà nda' yi mfèl i Esau. 14Mbwe nkù bàa ngù mfotmbwe ṅam mbàa. 15Zwi kamél ṅam ntat ngù bon tshob tse bo ke' num bùn nà, mfô ṅam nkuà ngù mfot mfô gham; zwi kekwèn ṅam mbàa boa kekwèn gham. 16A fà tshen nyàm nà ghafa' tse tse bandum, mba zit tshaṅ nyàm no num ze kam i. A tshob ghafa' tse tse bandum ndù: Bin kwé mbwe me, ke ghù ndù nyàm tamte, mo' kam i ke ntsin ngùanesà num mo'o. 17A tshob mbwe i ndù: Ngelaṅ bin mfèl àm Esau bumte, a bètt'o ndù o b'a ze mèn we, o nèn à yà, yen bwoṅ nyàm ni b'a ze we là, 18o bùnte ndù: A b'a ze nkuan o Yakob; a b'a nda' z'a tum tshùaben Esau là. Mba kua' tu wul i num njam nke nse'e. 19A tshob be ntshob ntshù' mbatte ngafa' bàa, mba ze mbatte tat, boa njoṅ benntùn fa tse bo be njam nyàm nà. 20Bin nsi tshob ndù: Tshù mba kua' nkuan o Yakob là njam nke nse'e. Nummb'a lo ke ntshob ndù: Me nsi fà tshen tshu a mbwe àm nà yi mba nda' là, lo' fite ntù i yi, kà yôg yen i se se. Be mo' ndù a lo' àm mebwô. 21A tshag nda' mbwe, ntù' ngô mà tshwèt yen tèttswe' là.
Yakob bo Nsi zwe zwe'
22A lo nsi yen tèttswe' là, ndo' zwi tse bàa boa ghafa' tse tse bènnzwi bàa boa bon tse ntshob ntshù' gham, ngù bo dut Jabbok. 23A lo' yube, ngù bo dut fube, boa njoṅ tse tshu fa.
24Ndùlala Yakob tù' tù' i. Tshù, mo' mèn zwe zwe' bo yi tà nèn nkum mfôgnjù. 25Yen #Os. 12.3-4mèn nà be yen mb'a ke' ghù netshùa Yakob là, ndab fat se, a sete, fat Yakob sete ndùse bo yi ke nzwe zwe' là. 26Mèn nà tshob ndù: Faṅ me nène, nummbe njù a ke mfoṅe. Là Yakob tshob yi ndù: Me ke nsi faṅ o nène, ke be ndù o yab kàn me. 27Mèn nà tshob yi ndù: Lén so b'a we? A bùnte ndù: Yakob.
28Mèn nà bèn ntshob ndù: Lén so ke nsi bèn b'a Yakob, bo nsi tù' ke tsiaṅ o à ndù Israél; nummb'o zwe zwe' bin Nsi mba benntùn, ntshùa yube. 29Yakob #Net. 35.10bètt'é ndù: Soṅ àm lén so. A bùnte ndù: O bètte lén sàm numke? A yab kàn Yakob be dù' i. 30Yakob #Ghasa'. 13.17-18yab lén dù' là ndù Peniel. Nummb'a lo tshob ndù: Tshù, me yen Nsi se se, mbèn nke nke' njôge. 31Lagnyam be tum a nke ntôg Peniel, nke nke' à neke'e, num fat se s'a sete là.
32A num ndùlala ze bon Israél ke' be fèt nga z'a be njoṅte fat mèn bo ku i là. Nummbe Nsi na' ndab Yakob a num fat se, num nga yoṅte fat se.
Currently Selected:
Neto'te 32: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.