Neto'te 31
31
1Yakob ju' nshumnshum Laban nke ntshob ndù a lo' njoṅ tshu tà yub fa. Bo lo ke ntshob ndù: A lo' à tshu tà be kà nzi yi. 2Yakob yen yen nà, mba num se Laban, njen ndù a ke' bèn mbe num i à mb'a be mbwe là. 3Ndùlala Tshùaben tshob Yakob ndù: Bèn njam mum ngô tà tsho dù' ze bo bwe o là, me nsi be bag wù. 4Yakob ghù bo tsiaṅ Rashél bo Léa ndù bo se' ntèl i mbaṅ mbwe mà tshwèt. 5A tshob bo ndù: Me yen num se tà zin ndù a ke' bèn nebe num àm à mb'a be mbwe là; nda' ndù bag Nsi tàa bèn mbe. 6Tu wut zin lèn mba me na' mfa' yi mum yàm ngù' fa là. 7Mba tà zin lo fùt'àm, mbate yàm nkàbfa' yoṅ tse gham, là Nsi ke bam yi ndù a ghù kebwô num àm. 8A lo ke ntshob ndù: Nyàm nto'nto' nsi be yu nkàbfa', njoṅ njùmbwe fa bwe, bon tshob tum nto'nto'o. Ndùs'a tshob ndù: Nyàm ntshobntshob nsi be yu nkàbfa' là, njoṅ njùmbwe fa bwe, bon tshob tum ntshobntshob. 9Nsi lo' nyàm tà zin mfà me. 10Ngelaṅ ze njùmbwe ke mbèt sôg là, me bù' miag màm njen mum njem ndù nkomnjù mi a ke nko' yub là lo b'a ntshobntshob, nto'nto'o, mbàbmbàbe. 11Angél Nsi tshob me mum njem ndù: Yakob, me bùnte ndù: Tshù me li. 12A tshob ndù: Bù' miag mu ndôte njene, njoṅ nkomnjù fa mi bo tshwèt nko' njùmbwe là b'a ntshobntshob, nto'nto'o, mbàbmbàbe; nummbe me yen ju ze Laban ghù wù là. 13Me #Net. 28.18-22b'a Nsi z'a ṅwag wù Bétél, dù' z'o na' njo' loṅla' bwe, dù' z'o na' ngù nka'ni me là. Ndonni lo tù, tum ntùm yen ngô li, mbèn njam ntùm ngô ze bo bwe o bwe là.
14Rashél bo Léa bùnte Yakob ndù: Bag bèn ngù mo' ju ke ntsi' lo ndà tà yag ké? 15Mb'a na' nswèn yage, mfèt nkàb yag là, bag ke' ke mbe num miag mi à mba ghùn nà ké? 16Njoṅ junkàb fa ze Nsi sô bu tà yag là b'a ze be mba bon be. Ndonni ghù njoṅ ju fa ze Nsi tshob wù là.
17Yakob lo tù, ngù bon tse boa zwi tse ko' num ba kamél. 18A lo' njoṅ nyàm tse fa nèn yi, ndo' njoṅ tshu fa ts'a ghù là. Nyàm ts'a be ko' tse, ts'a na' ngù Padan Aram nà, nèn mbaṅ tàab Isak mà Kanaan. 19Ndùse Laban nèn kebte nyiaṅ mbwe là, Rashél yi ba neto tàab.
20Yakob fùte Laban ze Aram, ke tshob yi ndù a' nèn. 21A kù boa njoṅ tshu tse fa; ntam manze nèn ndut ta'ntse Efrat, nèn nze mbaṅ mbat Galad. 22A be be mbatte lé'njù tat, bo soṅ Laban ndù Yakob kù. 23A lo' fèt tse, boa bo yoṅ i lé'njù sammbàa, nkot'é num mbat Galad.
Laban ta' Yakob ngom i
24Là Nsi ṅwag Laban ze Aram mum njem tèttswe' ntshob yi ndù: Zete netshob mebwô ke kebwô lo num Yakob.
25Laban kote Yakob. Yakob lo te ze ntàb num mbale; mba Laban te ze ntàb boa fèt tse num mbat Galad. 26Laban tshob Yakob ndù: Ke z'o ghù ndù à? Numk'o ntatt'àm, ndo' ngonngon tshàm nèn yi mba bo b'a kuan ntsho l'à? 27Numk'o mbe nèn nke ndemt'àm à? O tatt'àm, nèn ke lé't'àm numke? Mba me lo ghù o lo' à tsiaṅte boa njobkwi nèn yi, mbe nèn nke mbu' ndam, nke mbu' loṅe. 28O ke' bam ndù me tate bonnkat màm tse bandum boa tse bènnzwi. O ghù à mba nkagni là. 29Bu àm ku'ni neghù kebwô wù; là Nsi tàan lo ntshob me nkôg ndù: Zete netshob mebwô ke kebwô lo num Yakob. 30Ndonni, o lo nke nkù ntù num ndà tàan, numk'o ndo mbe nèn nj'é nsi tshàm à? 31Yakob bùnte ntshob Laban ndù: A b'a mbe me lo bwôge, nke ntshob ntù àm ndù b'o kwé ngonngon tsho! 32Mèn z'o nsi yen nsi tsho yi là ke nsi yôge. Me tshob ndonni ndù o lôte tshu tshàm fa mbwe fèt be, ndo' ju z'a be yu là, a be z'o yen nà. Yakob lo ke lèn ndù Rashél bèn nj'é nsi Laban.
33Laban tsho ntùm ntàb Yakob, ntum bwe nèn ntùm ntàb Léa mba ntùm ze ghafa' tse bènnzwi bàa, ke yen sàm ju. Ndùlala, a tum ntsho ntùm ntàb Rashél. 34Rashél lo lo' ba neto njab bam diaṅ kamél, ntswe num bo. Laban mom njoṅ dù' fa mum ntàb, ke fon sàm ju. 35Rashél tshob tàab ndù: A ke' bwô ndù tshùaben àm ya ntù me, nummbe ngokèt bènnzwi num num àm. Laban diag, ke yen neto tse.
36Yakob ya ntù, nkam Laban ntanta, ntshob yi ndù: Yàm kebwô ke mfànnu màm no yà k'o ntsho' ngwù njam àm à? 37Mb'o mom njoṅ tshu tshàm fa là, ke z'o yen bwe ndù a tum à netèt tshundà tsho à? Tshob njoṅ i fa mbwe fèt tshàm boa fèt tsho, mba bo tshob yub nu num bwe, netèt be ntu bàa. 38A b'a ngu'njù ṅam mbàa mba me tshwèt mfa' la' o là; njùmbwe tsho, mbwe tsho ke' to' sô bam, me ke to' fèt nkomnjù mi a tum netèt mbwe tsho là. 39Me lo ke be lo' fe nyàm ze ju ghom i là nse' yi mbwe o. Me lo ke mbat'é be yàm tu, njoṅ i fa o bètte là tum be bu àm, k'a be ndù bo yi à mbwôgtshù ke tèttswe' lo. 40Nyam lo ke mbib àm mbwôgtshù, mfùag ṅùn àm tèttswe'; miaglo lo mi miag àm. 41Tshù, a ndonni ngu'njù ṅam mbàa mba me be ntùm ndà o là; me fa' wù ngu'njù ntshob kuà gham num ngonngon tsho bàa, mfa' num bon nyàm tsho ngu'njù ntôge, o bate yàm nkàbfa' yoṅ tse gham. 42Nsi tàa, Nsi Abraham, Ngafétwut ze Isak be mbwôg i là, lo mbe ke be njam àm mb'o ta' àm ndonni mbu ndaṅe. Nsi yen yàm ngùtni bo nge' ze mbu màm yen nà. A lo mbe tèttswe' nkôg nkeb ntsha.
Yakob bo Laban kom kàn
43Laban bùnte ntshob Yakob ndù: Ngonngon b'a tshàm, nshumnshum be tshàm, bon nyàm boa njoṅ tshu fa ts'o yen nà b'a tshàm. Me nsi ghù ndùke ngonngon tshàm boa bon bandum tse bo bwe l'à? 44Ndonni, se' be wat kàn netèt be, yen nà nsi be kwénta netèt be. 45Yakob lo' loṅ, nte i nsi mba loṅla' là. 46Ntshob fèt tse ndù: Bin tse'te ndoṅ. Bo lo' ndoṅ, nkùmte fèt se, ntswete bwe, njù jujù bwe. 47Laban yab lén se ndù Jegar-Shahaduta, Yakob yab lén se ndù Galed.
48Laban tshob ndù: Sen fèt ndoṅ ni b'a nkwénta netèt be! A ndùlala ze bo yab lén se ndù Galed là. 49Laban bèn njab lén se mba ndù Mitspa, nummbe Laban lo tshob ndù: A bwô Tshùaben ke ndôte be, ngelaṅ be fagte, mèn be ke bèn neyen mfèl i se se là. 50A be z'o ma'ni ngonngon tshàm, a be z'o so tsemo' bènnzwi nkwi'te num ngonngon tshàm nà, o zete, ndèn ndù mènntùn ke bèn mbe netèt be. Yen ndù Nsi bèn mbe nkwénta netèt be.
51Laban tshob Yakob ndù: Tshù fèt ndoṅ mba loṅla' se me te netèt be là. 52A bwô ndù sen fèt ndoṅ ni, sen loṅla' li be nkwénta ndù me ke nsi tôg sen fèt ndoṅ ni, o ke se' ntôg sen fèt ndoṅ nà bo loṅla', neghù kebwô. 53A bwô ndù Nsi Abraham bo Nakor be ngakeb ntsha netèt be. Yakob lo' Ngafétwut ze Isak be mbwôg i là nkàn mfe yi. 54Yakob fà ju le'te Nsi num mbale, ntsiaṅ fèt tse bo à bo jù jujù. Bo jù jujù, nzi num mbale.
55Laban lo nsi mà nkebnjù, ntate bonnkat mi boa ngonngon tse, njab kàn bo nène. Laban lo mbèn njam la' i.
Currently Selected:
Neto'te 31: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.