Neto'te 30
30
1Rashél yen mba bo Yakob ke' bwe mén nà, nto' nete miag lànghe' num mfèl i Léa, ntshob Yakob ndù: Ghù me bwe bon bandum, ntag ndùlala mba m'a' kwù. 2Ntù Yakob ya num Rashél, a tshob ndù: Me ke' b'a Nsi z'a gha neghù o bwe là. 3Rashél tshob ndù: Tshù ngafa' àm ze mènnzwi Bila là, lo' i, a bwe bon me te num nku màm, me tshùa njam i ngù yàm bon bandum. 4Ndùlala, a fà ngafa' i ze mènnzwi Bila Yakob mba nzwi i là. Yakob lo' i. 5Bila jùm, mbwe mén mandum Yakob. 6Rashél tshob ndù: Nsi ghù nunetsin me, mbèn nju' nz'àm, a fà mén mandum me. Ndùlala, a tswi lén se Dan. 7Bila ngafa' Rashél ze mènnzwi bèn njùme, mbwe mo' mbatte mén mandum Yakob. 8Rashél tshob ndù: Me ma' mfèl àm ze mènnzwi ntsho z'a tôgte ze neyen mèn nyiaṅtu là, ndonni me tshùa ntsho. Ndùlala, a tswi lén se ndù Néftali.
9Léa yen mb'a keb bwe là, ndo' ngafa' i ze mènnzwi Zilpa mfà Yakob mba nzwi i là. 10Zilpa ngafa' Léa ze mènnzwi bwe mén mandum Yakob. 11Léa tshob ndù: Ke lèn fu' li à? Léa tswi lén se Gad. 12Zilpa ngafa' Léa ze mènnzwi bwe mbatte mén mandum bàa Yakob. 13Léa tshob ndù: Me b'a ngafen, nummbe ngonngon nsi tsiaṅ àm ngafen ndonni. A tswi lén se ndù Aser.
14A be ngelaṅ netsho' ngefele, Rubèn nèn mà tshwèt, ntsho mfon ntàm tù nkôni bwe. A lo' njoṅ i fa nse' mfà màab Léa. Rashél tshob Léa ndù: Fà màm ntàm tù nkôni mi nshum o se' yi là. 15Léa tshob yi ndù: Mb'o lo' ndu àm nà ke' ku' k'o bèn nke ndiag nekwé mba ntàm tù nkôni nshum àm ké? Ndùlala Rashél tshob ndù: A mbe ndùlala bin yi zi sènni, yen tèttswe' li, ndo' mbate ntàm tù nkôni nshum o yi. 16Yakob be fe tshwèt mfetnjù, Léa tum mbumte bo yi, ntshob ndù: O nsi tsho àm ndà sènni, nummbe m'a lo' kua' ntàm tù nkôni nshum àm njab tshwèt yi. Yakob nèn nzi bo yi yen tèttswe' là.
17Nsi ju' nze Léa ngù a jùm, mbwe mbatte mén mandum tàn Yakob. 18Léa tshob ndù: Nsi fà nkàbfa' me, nummbe me lo fà ngafa' àm ze mènnzwi ndu àm. Léa yab lén se Isakar. 19Léa jùm, mbwe mbatte mén mandum ntôg Yakob. 20Léa tshob ndù: Nsi fà kua' nda'ntum me: Ndu àm nsi ke tsho àm ndà yen yoṅ i li, nummbe me bwe bon bandum yi ntôge. A yab lén mén Zabulon. 21Yen nà lo be tôge, a bwe mén mènnzwi ntswi lén se Dina.
22Tshù, Nsi kwimte Rashél, Nsi ju' nz'é, nga' bam se. 23A jùm, mbwe mén mandum, ntshob ndù: Nsi sô tuswe tu àm. 24A yab lén mén Yosèf ntshob ndù: A bwô ndù Tshùaben bèn mfà mo' mén mandum me.
Mba fu' tsho Yakob là
25A lo be ngelaṅ Rashél bwe Yosèf là, Yakob tshob Laban ndù: Faṅ me nène, ndù me nèn la' bag, ntùm yàm ngô. 26Fà zwi tshàm boa bon tshàm tse me fa' wù num tu bo là me, me nène, kua' tu wul o lèn mba me fa' wù là. 27Laban tshob yi ndù: Bam me ndù me tshob nu wù. Me tshaṅ ngàm njen ndù Tshùaben tshùa à njam o kà ntam ntse me. 28A bèn ntshob ndù: Soṅ àm njoṅ me nsi fà nkàbfa' wù là, me fà wù. 29Yakob tshob ndù: o lèn mba me na' mfa' wù, nyàm tshùa njam àm mbe là. 30Tshu ts'o na' ngù kà me nse' là lo ke be sàm ju, là fe ngelaṅ me se' là, tshu tsho yàm neshu, Tshùaben bèn ntam ntse wù. Ndonni me nsi fa' num ko' yàm tunndà à ndùke? 31Laban tshob ndù: Ke ze me nsi fà wù à? Yakob tshob ndù: Me ke' bètte nkàbfa', m'a' ke nke' mbéb nyàm tsho, a be z'o ghù ju ze me nsi bètt'o yi là. 32Ndonni, m'a' tôg netèt njoṅ bon nyàm tsho fa. M'a' sô njoṅ bon njùmbwe fa tse nto' be num bo là, nsô njoṅ njùmbwe meba fa netèt njùmbwe, nsô njoṅ mbwe fa ts'a ghù nto'nto' netèt bwe là; mb'a b'a yàm nkàbfa'. 33Yàm nenùn nsi be yàm nkwénta ndamnjù. A be z'o tèt mbwe z'a ke' ghù nto'o, njùmbwe z'a ke' ba nto'nto' là netèt tshàm nyàm nà, mba yen nà b'a tshô. 34Laban tshob ndù: A bwô. A bwô ndù be ghù mb'o tshob là.
35Num sen lé'njù là, Laban sô njoṅ mfot mbwe fa mi bo ghù nto'o, mbe ntshobntshob là, njoṅ mbwe fa tse bo ghù nto' là, njoṅ tse nefôg fa boa tse meba fa netèt njùmbwe, mfà mum mbu nshumnshum tse. 36Ndùlala Laban lo nèn ntswe mo' dù' ghua, ze be mèn zin nguan lé'njù tat kà nkum bwe là. Yakob nke mbéb tshé' nyàm Laban.
37Yakob lo' nkaṅ fènngab, nkaṅ tô boa ṅam mi fi, mfétte njoṅ i fa nto'nto'o, mfaṅ dù' ts'a tsho' ngub bwe a nke mfôg là nge. 38Ndùlala njabte nkaṅtù mi a fétte nto'nto' là mbaṅ let ntse mi mbwe se' nu là, ndù bo be nu mfot ke nko' yube. 39Mbwe tse mfot ko' yub mbaṅ men nkaṅtù là là bwe, bon tshob be mbàbmbàbe, nto'nto'o, bo ntshobntshob.
40Mbe se' mba njùmbwe là, Yakob sô yub njab tù' bo, njab ts'a be nto'nto'o, ts'a be nesèn netèt njùmbwe Laban nà num ze bag. A nabte ze bwoṅ mbwe, ke bèn ntamte yub num tse Laban. 41Njoṅ ngelaṅ fa ze mfot ke nko' mbwe ntùn ts'a dun nà, Yakob yab nkaṅtù ntùm let ntse num miag mbwe, ndù fot ko' yub mbaṅ nkaṅtù. 42Ndùs'a yen ndù mbwe b'a nyu'nyu' tse là, a ke yab ju; ndùlala nyu'nyu' mbwe be tse Laban, mbwe ntùn ts'a dun nà be tse Yakob.
Yakob kù ntum ju Laban nène
43Ndùlala mandum nà tù' kua' ngafu' ze ndùb, ngù mbwe yàm neshu, ngù ghafa' tse bènnzwi boa tse bandum, ngù ba Kamél bo nkekwène.
Currently Selected:
Neto'te 30: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.