Jáaŋ 3
3
Yɛɛ́so pɔ́ Nikodɛm
1Mmɔʼ ŋiŋ Falísia a lɛ éwú, lezēŋ tsí é gɔ́ lɛ Nikodɛm, ŋ́gɔ́ mmɔʼ ŋkém epuɔ Yúda. 2Éshʉʼ eshʉ̄ʼ etsōʼ, ńjʉ́ɔ á Yɛɛ́so, ńdé á mbū yí ŋ́gɛ: «Ńziʼnɛ, pek é si nzhɛ́ɛ á légɛ, o ó si ŋgɔ́ á taʼ nziʼnɛ, mbɔ Ndém mé le tó á wú. Ŋiŋ a gɔ le kūʼ á leghʉ meŋkʉʼne anu mīi, o ghʉɛ, tɛ́ gɔ́ yīi, Ndém mé le tó á yí í. » 3Yɛɛ́so á pwɛt á mbū yí ŋ́gɛ: «Kwaʼ anuúnē anuúnē, meŋ shúŋɔ á wú ŋ́gɛ, mɛ́ gɔ te zhí á ŋiŋ leswhī leswhī ɛ́, mbɔ a gɔ le kó á ntē Lefɔ Ndém ɛ́. » 4Nikodɛm á zɛ́tte á yí ŋ́gɛ: «Ŋiŋ a gɔ egaá, ńtswhí tɛ ŋgɔ́ á ndʉɛ, mɛ́ zéŋ nzhí á yí í? Mbɔ a á zéŋ epiŋ á levem mɛ́ wɔ́p, a ezéŋ nzhí á yí lɛ́?» 5Yɛɛ́so á pwɛt á mbū yí ŋ́gɛ: «Kwaʼ anuúnē anuúnē, meŋ shúŋɔ á wú ŋ́gɛ, ŋiŋ a gɔ le kó á ntē Lefɔ Ndém, té gɔ́ yīi, mɛ́ é zhí á yí mé ntshi pɔ́ Azwakne Ndém ɛ́. 6Ŋiŋ yīi, ŋiŋnɔŋ mé zhí á yí, á gɔ̄ áa ŋiŋnɔŋ. Ŋiŋ yīi mɛ́ é zhí á yí, mé Azwakne Ndém, a wɛɛ̄ Azwkane Ndém. 7Ndɛ́ʼ á zéŋ ŋkʉ̄ʼne á wú, páʼ meŋ á lé ŋ́gɛ, “Á mbɔŋ ŋ́gɛ, mɛ́ ezéŋ nzhí á wɛ́.” 8Fefwɛt a tuúʼ á ajʉʼ zīi a á kɔŋ, o ejúʼ páʼ a tɔ́kɔ, ŋ́ké te zhɛ́ á ajʉʼ zīi, a fhɔ́ɔ éwú ú, o te zhɛ́ á ajʉʼ zīi, a gʉɔ mé éwú ú. Á zéŋ ŋgɔ́ ndeŋ ndeŋ épúp, á mbū ŋiŋ yīi, mɛ́ é zhí á yí mé Azwakne Ndém. » 9Nikodɛm á zɛ́tte á yí ŋ́gɛ: «Ajʉɔ anu, á gɔ́ egaá tɛ́ ŋgɔ́ épúp é?»
10Yɛɛ́so á pwɛt á mbū yí ŋ́gɛ: «Wu yīi, o ó si ŋgɔ́ á taʼ nziʼnɛ, ńzíʼnɛ epuɔ Islaɛl, o te si nzhɛ́ɛ emuɔ menu mɛ́t ɛ́ lɛ̄? 11Kwaʼ anuúnē anuúnē, meŋ shúŋɔ á wú ŋ́gɛ, pek é si ŋgē eshúŋɔ menu, é gɔ́ mīi, pek é si nzhɛ́ɛ. Éshúŋɔ ajū mīi, pek é njʉ́ɔ. Pɛ pīiŋ nnɔ̄ŋ te mvéŋɛ anu mɛ́t zīi, pek shúŋɔ ɔ́. 12Meŋ á si eshúŋɔ á wɛ́ menu mīi, é esī atsetsáʼ ntɔ́kɔ, pɛ pīiŋ nnɔ̄ŋ te mvéŋɛ ɛ́. Pɛ gɔ epīiŋ ŋgā, ḿvéŋ emi, meŋ á shúŋ á wɛ́ ŋ́gɛ, é athʉ́ lephū ntɔ́kɔ ɔ́? 13Ŋiŋ a la á lephū kɔ́ʼɔ, ńdaʼ ŋiŋ yīi, a le fhó éwú esóʼo, á Méŋ‑Ŋiŋnɔŋ wuɔ.
14Ndeŋ ndeŋ páʼ, Mɔɔ́sɛ a le cuŋtē nnū, ŋ́kwɛ́t ánɛ athʉ́, ŋ́kɔ́ʼne nzēk á késáatswɛt lā, á mbɔŋ ŋ́gɛ, mɛ́ ezéŋ ŋkɔ́ʼne á Méŋ‑Ŋiŋnɔŋ wuɔ épúp. 15Tɛ́ ŋiŋ ntsem yīi, a á fɛ́ nnɛ̄t ŋgyá á mbū yí, a efú ntā á lezēŋ Ndém. 16Ndém a le pú ŋkɔŋ epuɔ menɔŋ kɔŋ, tɛ ŋgyá á Méŋ yi, á tséŋ Méŋ yi, ŋ́gɛ ŋiŋ ntsem yīi, a á fɛ́ nnɛ̄t ŋgyá á mbū yí, a te eláʼ epí í, a a láʼ eta á lezēŋ Ndém. 17Ndém a lɛɛ́ te ntúɔ́ á Méŋ yí á ndo esī atsetsáʼ ŋ́gɛ, a eshʉʼ nzáʼ ntsaŋ epuɔ menɔŋ ɔ́. A lɛɛ́ ntúɔ́ á yí ŋ́gɛ, epuɔ menɔŋ e eláʼ nzápa á nzem yí, ńtswɛ́t. 18Ŋiŋ a fíɛ́ nnɛ̄t ŋgyá á mbū yí, mbɔ a gɔ le pí asāʼ á mvhɔ Ndém ɛ́. Ŋiŋ a piŋɛ te fɛ́ nnɛ̄t ŋgyá mé yí í, mbɔ a á ndáʼ mbí asāʼ, melaʼ mīi, a ka fɛ́ nnɛ̄t ŋgyá á mbū tséŋ Méŋ Ndém ɛ́. 19Pɛ eké njʉ́ɔ á ajū mīi á ghʉ̄ʉ, ŋiŋ a pí á asāʼ á mvhɔ Ndém. A lē ntó ŋkaʼ á ŋgɔŋ ega, epuɔ menɔŋ é si mbiŋɛ kʉ̄ŋnɛ, ŋ́kāŋa áa nzém, melaʼ mīi ŋghʉʉ́‑enu tsɔ́p é té pɔŋ. 20Ŋiŋ yīi, a ghʉʉ̄ anu tepɔŋ, a á páʼā, ńdɔkɔ te ŋkɔ̄ŋɔ ŋkaʼ á. A te kɔ̄ŋ á yí á leziŋ á ajʉʼ zīi, ŋkaʼ é éwú ú, ḿbɔ́k ŋkaʼ á lekɛʼɛ ŋghʉʉ́‑enu tsí. 21Ŋiŋ yīi, a piīŋ ndɔk anuúnē nnáŋ, a kɔɔ̄ŋ á yí á leziŋ á ajʉʼ zīi, ŋkaʼ é éwú. Púp, mɛ́ ejʉ́ɔ ŋghʉʉ́‑enu mbɔŋ tsīi, a ghʉɛ, éfhɔ́ɔ ánɛ yí á lejūʼ nchu Ndém. »
Jáaŋ Mbaptísi pɔ́ Yɛɛ́so
22Ajʉɔ anu á tɔ́k páʼa, Yɛɛ́so pɔ́ a megaŋ nnɔ pí é gʉɔ mé apak ŋgɔŋ Yudéa, ŋ́kó nnáʼ ńnáŋ éwú, á nɔŋ nnōʼo epuɔ á ntshi. 23Jáaŋ á nɔŋ nnōʼo epuɔ azí, á ntshi á Ayinɔŋ, á lepāte Salim. Ntshi é gɔ́ á ajʉʼ mɛ́t tɛ nzá tɛʼ. Epuɔ é nɔŋ eshʉ̄ʼɛ njʉ́ɔ á yí, á noʼo á wɔ́p á ntshi. 24Á le gē egɔ́ afʉʼ mɛ́t, mɛ́ zɛ́t té néŋ á Jáaŋ á ŋgyā atʉɛ́.
25Á shʉʼ ŋgɔ́ á amɔ̄ʼ afʉʼ, amɔ̄ʼ aŋak á tó á tsetsɛlɛ taʼ ŋiŋ Yúda pɔ́ megaŋ nnɔ Jáaŋ. Pɔ́ nɔŋ ŋŋāka ánɛ anu lesok epe, tɛ́ ŋgūʼte á Ndém. 26Megaŋ nnɔ Jáaŋ é gʉɔ njʉ́ɔ á yí, ńdé á mbū yí ŋ́gɛ: «Ńziʼnɛ, ŋiŋ yīi pɛ yí é kɛ á nzéŋ ntshi Juldɛŋ, á ŋiŋ yīi, o ke shúŋ anu ánɛ yí lā, a ayi a á si nnōʼo azí epuɔ á ntshi, tɛ epuɔ metsem é nɔŋ ŋgʉ̄ɔ ntswɛ́ttɛ á yí le. » 27Jáaŋ á tsɔ́ʼ á mbū pɔ́p ŋ́gɛ: «Ŋiŋ a gɔ le wɛ̄ tɛ mbɔɔ akɔ̄ lɛ́, té gɔ́ yīi, Ndém mé yá á mbū yí í. 28Pɛ méŋwɛ̄t azɛ́ é si nzhɛ́ɛ páʼ, meŋ ke lé ŋ́gɛ: “Meŋ te si ŋgɔ́ á Nzaʼ‑Ŋkhʉ ɛ́. Táʼ, ŋ́ké ŋgɔ́ á ŋiŋ yīi, Ndém a le tó á gá ŋ́gɛ, meŋ ezī á leshʉʼ, tɛ́ a eshʉ̄ʼ.” 29Ŋiŋ yīi, menzwí a á si ŋgɔ́ eyi, yí mé tɛnzwí ŋge. Esoó tɛnzwí ŋge a tshií áa legʉ̄ŋ, ńjúʼ ŋghi tɛnzwí ŋge, ntē yí é gáŋte ŋkák. Á tsetsɔŋɔ páʼa, ntē gá é nɔŋ ŋgáŋtɛ ŋkáka épúp, ŋ́káka tɛ ntséknɛ. 30Á si nzɛ́ttɛ ŋ́gɛ, anu zí a etswhí ŋgʉ̄ɔ mé mvhɔ, azá a epīŋ mé nzem.
Ŋiŋ yīi a le fhó á lephū tɛ́ esóʼo
31Jáaŋ á zéŋ ntswīʼne ndé ŋ́gɛ: «Ŋiŋ yīi a le fhó á lephū tɛ́ eshʉ̄ʼ, a puú ntsya epuɔ metsem. Ŋiŋ yīi a á ndo esī atsetsáʼ, á gɔ́ ŋiŋ esī atsetsáʼ, ḿbiŋ eshúŋ áa menu mīi, é ndo esī atsetsáʼ. Ŋiŋ yīi, a piŋɛ efhɔ́ɔ á lephū, [a tsyaā epuɔ metsem], 32ńnɔŋ eshúŋɔ ajū mīi, a á njʉ́ɔ, mbɔɔ azi a á njúʼ. Ŋiŋ á piŋ te véŋ anu zīi, a shúŋɔ ɔ́. 33Ŋiŋ yīi, a á ké mvéŋ anu zīi, a shúŋɔ, a á páʼā ndɔkɔ mvéŋɛ tɛ mvéŋɛ á légɛ, anu zīi Ndém a leéē, á si ŋgɔ́ áa anuúnē. 34Ŋiŋ yīi, Ndém a le tó á yí, a á si eshúŋɔ áa menu mīi, é fhɔ́ɔ á mbū Ndém. Ndém mɛ́t mé si ŋgyáa á yí Azwakne zí té ndhʉ. 35Mɔʼɔ́ yímpɛ Ndém, a kɔɔ̄ŋ á Méŋ yi, mbɔ a le pīŋ ŋgyá ajūɔ ntsem á mbū yí. 36Ŋiŋ yīi, a fɛɛ́ nnɛ̄t ŋgyá á mbū Méŋ yi mɛ́t, a á ndáʼ nzī á leta á lezēŋ Ndém. Ŋiŋ yīi a te si njúʼɔ nchu Méŋ yi mɛ́t ɛ́, a te e fú ewɛ lenāŋ cʉɔ mɛ́t ɛ́. Ndém a naáŋ efʉʼ metsem, ńzáŋ á lɔ́ŋ á mbū yí. »
Currently Selected:
Jáaŋ 3: ybb
Highlight
Share
Copy
Want to have your highlights saved across all your devices? Sign up or sign in
© CABTAL