Jáaŋ 2
2
Mvhɔ ŋkʉʼne anu zīi, Yɛɛ́so a ghʉɛ
1Á gɔ́ páte eleʼé tɛ́t, mmɔʼ lekāk alaá‑ŋgyā é gɔ́ á tésɔŋ Kána, á ntē apak ŋgɔŋ Ŋgaliléa, mía Yɛɛ́so á gɔ́ éwú. 2Mbɔ mɛ́ ntɔ́ŋ á Yɛɛ́so azí, pɔ́ a megaŋ nnɔ pí, ánɛ lekāk cʉɔ mɛ́t. 3Meluʼ é kó nnáŋ tɛ mmī, mía Yɛɛ́so á lé mé yí ŋ́gɛ: «Pɔ́ té zɛ́t ŋgwɛ̄ meluʼ ɔ́. » 4Yɛɛ́so á pwɛt á mbū yí ŋ́gɛ: «Maá, o tswii akɔ̄ á mbū meŋ ŋ̄? Eza njhʉ̄ e zɛɛ́t te kuʼ. » 5Mɛ́ wɔp á lé á mbū wɔ tɛ́ne‑lekāk ŋ́gɛ: «A gɔ ŋké ndé ŋ́gɛ, pɛ eghʉ̄ akɔ̄ lɛ́, pɛ eghʉ̄ʉ áa aziɛ́. »
6Á le gē egɔ́ épúp, memía meŋgwʉ́ŋ metɔ́, é tshíte á esī ntokó, mbɔ epuɔ Yúda, é gɛ nnéŋɛ ntshi éwú, ńdɔkɔ esōko epe ánɛ pɔ́p, tɛ́ ŋgūʼtɛ á Ndém, páʼ mɛt alāʼ wɔp a zɛtteé épúp. Taʼ ŋgwʉ́ŋ á gɔ́ yīi, mɛ́ néŋɛ ntshi éwú, ajūɔ melíta ŋkhʉ, é ló. 7Yɛɛ́so á lé á mbū wɔ tɛ́ne‑lekāk ŋ́gɛ: «Pɛ enéŋ ntshi á ntē meŋgwʉ́ŋ muɔ tɛ e eló. » Pɔ́ néŋ ntshi éwú tɛ é ló á mbɔŋɔ́. 8Á lé mé pɔ́p ŋ́gɛ: «Tsetsɔŋɔ, pɛ eké ntúʼ, ŋ́gʉɔ ŋgyá á mbū ŋiŋ yīi, a tɛ́nɛ etsō. » Pɔ́ túʼ, ńdɔk ŋgʉ̄ɔ ŋ́gyá mé yí. 9Á tswí, ńzwíʼ, ńjúʼ é gɔ́ meluʼ, mbɔ ntshi wɔ̄, é sɛnne ncʉ́ʼ meluʼ. A te zhɛ́ á ajʉʼ zīi, emuɔ meluʼ é piŋɛ efhɔ́ɔ éwú ú. Táʼ, wɔ tɛ́ne‑lekāk pīi, pɔ́ é túʼ ntshi, é ké nnɔ̄ŋ nzhɛ́ɛ. Á tɔ́ŋ á tɛnzwí ŋge, 10ńdé á mbū yí ŋ́gɛ: «Epuɔ metsem é gɛ nzīi mvhɔ, ŋ́gyáa á mbɔŋ meluʼ á mbū mege. Afʉʼ zīi, pɔ́ zii nnú, mɛ́ ké ŋgyá emi é té tswhi mbɔ̄ŋ ɔ́. O ó mbiŋ eféŋ á mbɔŋ meluʼ tɛ ntshí tsetsɔŋɔ. »
11E é páʼa, ŋgɔ́ mvhɔ ŋkʉʼne anu zīi, Yɛɛ́so a le ghʉ̄ʉ̄. Ŋ́ghʉ̄ɛ épúp á tésɔŋ Kána, á ntē apak ŋgɔŋ Ŋgaliléa, ńdɔkɔ ntswīi á shʉ́shɔ́k yi. Megaŋ nnɔ pí é jʉ́ɔ épúp, éfɛ́ nnɛ̄t ŋgyá mé yí. 12Ajʉɔ anu á tɔ́k épúp, Yɛɛ́so á cú ŋgʉ̄ɔ mé tésɔŋ Kafaanawum, pɔ́ mɛ́ wɔp mbɔɔ epɔ̄ memía pí, mbɔɔ megaŋ nnɔ pí. Ŋ́kó éwú, ŋ́ké nnáŋ áa tsɔ eleʼé shɔ́ʼɔ́ lɛ́.
Yɛɛ́so a á ega njūŋɔ wɔ táŋ‑esaá á atetá Mía Ŋgyā Ndém
(Mat 21.12-17; Mlk 11.15-17; Lúk 19.45-46)
13Aleʼé lekāk Páska epuɔ Yúda á le nɔ̄ŋ mbátɛ, Yɛɛ́so á pe mé Yelósalɛm. 14Ŋ́gē eshʉʼ á atetá Mía Ŋgyā Ndém, ńjʉ́ɔ wɔ táŋ‑mefɔŋ, mbɔɔ wɔ táŋ‑memvhō, mbɔɔ wɔ táŋ‑ekepēŋ, ŋ́ghʉ̄ wɔ kúmne‑ŋkāp, é gɔ́ éwú. 15Á lɔk meŋkhʉ ncūŋte ntɛ̄, ńdɔk efhó éwú, ńjūŋ á wɔ́p metsem, tɛ mbɔɔ memvhō pɔ́ mefɔŋ. Ńták ŋkāp wɔ kúmne‑ŋkāp, ésāŋ á esī. Ḿbwɛ̄t metɛ́blɛ mɔ́p, ŋ́kápa á esī. 16Ńdé á mbū wɔ táŋ‑ekepēŋ ŋ́gɛ: «Pɛ epú efhó á ajʉʼ ega páʼa, éfók azō mɛ́t. Ndɛ́ʼ pɛ ezéŋ ndɔ̄k ŋgyā Mɔʼɔ́ ga, ŋ́ghʉ̄ ŋgyā esaá. » 17Megaŋ nnɔ pí é kímte páʼ, mɛ́ le tí á ntē aŋwaʼne Ndém ŋ́gɛ: «Meŋ mbúu ŋkɔŋ ŋgyā Ndém tɛ emāʼ afɛ̄, tɛ eláʼ ekwhʉ́ melaʼ épúp. »
18Mekém epuɔ Yúda, é jʉ́ɔ épúp, ńdé mé Yɛɛ́so ŋ́gɛ: «O o ghʉ eziɛ́ ŋkʉʼne anu, tɛ́ elɔk etswi á wék á légɛ, o wɛɛ̄ mete, á lelɔk ŋghʉ̄ páʼ, o ghʉɛ épúp lā a?» 19Yɛɛ́so á pwɛt á mbū pɔ́p ŋ́gɛ: «Pɛ eták á Mía Ŋgyā Ndém wuɔ, meŋ mbiŋ ndɔ̄k eleʼé tɛ́t, ńzéŋ mbʉ́ʼɛ ńtshí á ajʉʼ. » 20Pɔ́ lɛ ndé á mbū yí ŋ́gɛ: «Mɛ́ le lɔ̄k ŋguʼ ntsɔp ntokó megēm lekua, tɛ́ mbɔ́ á Mía Ŋgyā Ndém wuɔ. Wu wɔ̄, o ó piŋ ŋ́gɛ, o gɔ elɔ̄ɔk eleʼé tɛ́t, ḿbʉ́ʼɛ ntshí á ajʉʼ lɛ́?» 21Yɛɛ́so a lɛɛ́ ndʉ́ɛ́ á Mía Ŋgyā Ndém páʼā, ndʉ́ɛ́ mbe nnɛ̄t zi. 22Yɛɛ́so a le shʉ̄ʼ nzím ánɛ lewhʉ̄, megaŋ nnɔ pí é kímte páʼ, a le zī ndé páʼa mɛ́t. Ŋ́kímte épúp, ḿvéŋ anu zīi, á ntē aŋwaʼne Ndém, mbɔɔ anu zīi a le léē.
Yɛɛ́so a zhɛɛ́ ajūɔ tsem zīi, á ntē ŋiŋnɔŋ
23Yɛɛ́so a lɛ á Yelósalɛm ánɛ afʉʼ Páska páʼā, epuɔ tɛ nzáne, é jʉ́ɔ meŋkʉʼne menu mīi a ghʉɛ, éfɛ́ nnɛ̄t ŋgyá mé yí. 24Yɛɛ́so á ké te tém nzem zi, ŋ́gyá á mbū pɔ́p ɔ́, melaʼ mīi a le nɔ̄ŋ nzhɛ́ɛ ajū mīi, á ntē pɔ́p metsem. 25A lɛ te nɔ̄ŋ efāʼa á légɛ, mɛ́ eshúŋ á yí shúŋ, páʼ ŋiŋnɔŋ a á épúp ɔ́, melaʼ mīi yí méŋwɛ̄t a á si nzhɛ́ɛ ajū mīi, á ntē ŋiŋnɔŋ.
Currently Selected:
Jáaŋ 2: ybb
Highlight
Share
Copy
Want to have your highlights saved across all your devices? Sign up or sign in
© CABTAL