Mefaʼ Meziŋ-ntō 8
8
1Sɔ́ɔl a le tshí éwú, ńnɔŋ ŋkɔ̄ŋtɛ ajū mīi, mɛ́ ghʉɛ ánɛ Etiɛn.
Sɔ́ɔl a á ega ndʉɔ́ʼɔ epuɔ Yɛɛ́so
Á fhó aleʼé mɛ́t, mɛ́ pú nzī á lelʉɔ̄ʼ alúŋ epuɔ Yɛɛ́so zīi á Yelósalɛm. Epuɔ Yɛɛ́so metsem é pú ŋkʉ̄ esāŋ á apak ŋgɔŋ Yudéa mbɔɔ Samalía. Meziŋ‑ntō Yɛɛ́so ndaʼ mé cʉ́ʼ nzɛ́t á Yelósalɛm. 2Páʼ mɛ́ le zwhí á Etiɛn lā, emɔ̄ʼ epuɔ Yelósalɛm pīi, pɔ́ naáŋ páʼ Ndém a á si ŋkɔ̄ŋɔ, pɔ́ kʉɛ á yí ntúŋ, ńchʉ́ nnɛ̄t ndā á yí. 3Ḿbiŋ ŋgɔ́ mé Sɔ́ɔl, á ké nnɔ̄ŋ efóko mbʉʼ, ḿbíkɛ alúŋ epuɔ Yɛɛ́so pikí. Ŋ́gʉɔ ŋkúɔ́ á meŋgyā meŋgyā, ŋ́gɔ̄ epuɔ Yɛɛ́so, ḿbaŋa pɔ́ wɔnzwí, ńdɔkɔ ŋgʉ̄ɔ ŋgyáa, mɛ́ néŋɛ á wɔ́p á ŋgyā atʉɛ́.
Fílíio a á ega ntswī ŋke mbɔŋ á Samalía
4Epuɔ Yɛɛ́so pīi pɔ́ ke sāŋ ejʉʼ lā, pɔ́ nɔŋ ntsīa egʉ́ɛ egʉ́ɛ, ńtswīi ŋke mbɔŋ, ńzɛ́t eshúŋɔ áa anu ánɛ Yɛɛ́so. 5Fílíio á gʉɔ azí tɛ ŋkó á tésɔŋ Samalía, ŋ́kʉ́ʼne eshúŋ epuɔ alāʼ mɛ́t, á ŋiŋ yīi Nzaʼ‑Ŋkhʉ yīi Ndém a le laʼnēē, a á ewiɛ́. 6Alāʼ, éfhó á meshhʉ̄ meshhʉ̄, á nɔŋ njúʼɔ, ńzéŋ nnɔ̄ŋ njʉ́ɔ meyiŋne anu mīi a ghʉɛ, é tswii mete Ndém, ńcʉ́ʼɛ ŋkɔ̄ŋɔ á lechʉ̄ nnɛ̄t nzwíʼte anu zīi a lʉ́ɛ́. 7Mesī mīi é genɛ epuɔ, é le zéŋ ŋgē etó ánɛ pɔ́p, ńnɔŋ ŋgāʼtɛ. Mbɔ meŋkeluʼ te nzáne pɔ́ a wɔ ŋŋíʼ‑akhu, é mbú ntē azɔ́p. 8Mía mía lekāk, á lɛ mbú ŋkó á ntē epuɔ tésɔŋ mɛ́t.
9Mmɔʼ ŋiŋ a lɛ á ntē tésɔŋ ega mɛ́t, lezēŋ tsí é gɔ́ lɛ Simɔŋ, ńnɔŋ esáʼa lekaŋ tɛ fhó tɛ afʉʼ, ŋ́gɛ yí é mía ŋiŋ. Epuɔ Samalía é nɔŋ njʉ́ɔ épúp, á cʉ́ʼɛ ŋkʉ̄ʼnɛ á wɔ́p kʉʼne. 10Epuɔ metsem, tɛ efhó ánɛ ewɔŋkhʉ̄, ŋ́gʉɔ ŋkó ánɛ melʉɛ, é le pú nnɔŋ ŋkúʼtɛ anu zí, ńnɔŋ ntɔ́ŋɔ á yí lɛ: “Mete‑Ndém, méte Ndém mīi, emɔ̄ʼ é té emiɛ́ tsya.” 11Mɛ́ lɛɛ́ te njúʼɔ anu zí, ńdɔkɔ ŋghʉ̄ɛ mega á. Púp melaʼ mīi, tɛ efhó tɛ eséŋɛ lɛ́, á nɔŋ ndɔ̄kɔ lekaŋ tsí, ŋ́ghʉ̄ɛ menu mīi e kʉʼne epuɔ. 12Páʼ Fílíio a á shʉʼ eshúŋ ŋke mbɔŋ ánɛ Yɛɛ́so Klísto, ŋ́kɛ́ʼte páʼ Lefɔ Ndém é épúp, éshúŋ epuɔ lā, epuɔ metsem é cʉ́ʼɛ mvéŋɛ áa anu zí, ḿbaŋa pɔ́ a wɔnzwí. Mɛ́ noʼ á wɔ́p á ntshi. 13Kwaʼ Simɔŋ yí méŋwɛ̄t á júʼ azí, ḿvéŋ, mɛ́ noʼ á yí á ntshi. Á fhó épúp, ńcʉ́ʼɛ nnáŋa áa lezēŋ akhu Fílíio, ńjʉ́ɔ meyiŋne pɔ́ meŋkʉʼne anu mīi, a lɔkɔ mete Ndém ŋghʉ̄ɛ, á kʉʼne á yí tɛʼ.
14 Meziŋ‑ntō Yɛɛ́so pīi é ŋgɔ́ á Yelósalɛm, é tshí njúʼ páʼ epuɔ Samalía é véŋ ŋke Ndém, ńtó á Piɛ pɔ́ Jáaŋ á mbū pɔ́p. 15Pɔ́ gʉɔ ŋkó éwú, ńjʉ́ɔ á wɔ́p. Éswíŋte á Ndém ánɛ athū zɔ́p ŋ́gɛ, Ndém a elɛ ntó á Azwakne zí á mbū pɔ́p, 16melaʼ mīi, Azwakne Ndém á le zɛ́t te kó tsɔ ánɛ taʼ ŋiŋ wɔp. Mɛ́ le nōʼ á wɔ́p á ntē ntshi, áa ndaʼ páʼ pɔ́ é fɛ́ nnɛ̄t ŋgyá á mbū Atsyapuɔ Yɛɛ́so. 17Piɛ pɔ́ Jáaŋ é swíŋte á Ndém, ńzápa mbū mɔ́p á athū pɔ́p, Azwakne Ndém á lɛ eshʉ̄ʼ ánɛ pɔ́p. 18Simɔŋ á jʉ́ɔ páʼ meziŋ‑ntō é si nzápa mbū mɔ́p á athū epuɔ, Ndém á néŋɛ Azwakne zí ánɛ pɔ́p lā, ḿbhʉ́ á Piɛ pɔ́ Jáaŋ ŋkāp. 19Ńdé ŋ́gɛ: «Pɛ eyá emá mete mwɔ̄ tɛ ŋgɔ́ yīi, meŋ zápa emá mbū á athū awɔ́ lɛ́, Azwakne Ndém á shʉʼ ánɛ yí. » 20Piɛ á pwɛt á mbū yí ŋ́gɛ: «Tɛ pɛ ŋkāp ju mɛ́t, e elɛ̄ ndákne. O ó jʉ́ɔ ŋ́gɛ, o gɔ́ elɔ̄ɔk ŋkāp tɛ́ nzó ajū mīi, á fhɔ́ɔ á mbū Ndém lɛ́? 21Anu jʉɔ, á té á wú lɛt. O te shʉʼ ewɛ amɔ̄ʼ akim éwú ú, melaʼ mīi, ntē wú é té ndeŋ ndeŋ á mvhɔ Ndém ɛ́. 22Ké ŋgɔ̄ nnɛ̄t ju, ŋ́gwáʼ á akwaŋte tepɔŋ zīi, o wɛɛ̄ á ntē wu lā, ḿbiŋ eswíŋte á Atsyapuɔ Ndém, ŋ́gɔ́ amɔ̄ʼ, á lekne anu tepɔŋ zīi, o ó nnɔŋ ŋgɔ̄ á ŋghʉɛ̄. 23Meŋ á jʉ́ɔ ŋ́gɛ, ntē wú é pú eséŋ, ŋ́gwhī páʼ mekāŋ lā, o cʉ́ʼ ŋkwa anu tepɔŋ. » 24Simɔŋ á cʉ́ʼɛ mbwɛ̄tɛ á mbū Piɛ pɔ́ Jáaŋ ŋghʉ̄ɛ áa lɛ: «Pɛ méŋwɛ̄t e eswíŋte á Atsyapuɔ Ndém á athū meŋ, ŋ́gɛ ndɛ́ʼ ntií menu zīi, pɛ lʉ́ɛ́ lā, é shʉʼ ánɛ meŋ. »
25Piɛ pɔ́ Jáaŋ é le māk á letswi ŋke mbɔŋ, ḿmāk á lechʉ̄ nnɛ̄t ŋkɛ́ʼte eshúŋ á ŋiŋ yīi, Atsyapuɔ Yɛɛ́so a á ewiɛ́, ḿbīŋ nzem mé Yelósalɛm. Ŋ́gē epiŋ nzem, ńnɔŋ ŋkʉ́ʼnɛ ánɛ emɔ̄ʼ mekap alāʼ Samalía tɛ nzáne, ńtswīi ŋke mbɔŋ.
Mmɔʼ ŋiŋ Etiopia a á ega, nnéŋɛ ntē ánɛ anu Yɛɛ́so
26 Cɔʼ Ndém á ghʉ ŋŋwāk, ńdé á mbū Fílíio ŋ́gɛ: «Lu á esī, ńdɔ̄k mbuʼ ntsēŋ ŋgʉ̄ɔ. Ńcú ánɛ mɛnzhɛ yīi a fhɔ́ɔ á Yelósalɛm, ŋgʉ̄ɔ mé Ŋgaza. Mɛnzhɛ mɛ́t, mɛ́ gɛ te ntswhīɛ nzápa éwú ú. » 27Fílíio á lɛ ndū á esī, ŋ́gʉɔ ŋkó á mɛnzhɛ, ńziŋ tɛ ŋgwhʉ̄ ánɛ mmɔʼ ŋiŋ Etiopia yīi, a ke gʉ̄ɔ á Yelósalɛm, á ŋguʼteē Ndém. Ŋiŋ mɛ́t á gɔ́ mɔ́ ndʉɛ yīi, yí mé gɛ ntɛ́nɛ á tsitsi maá yīi, a sáʼa ŋgɔŋ Etiopia, lezēŋ lefɔ tsí é gɔ́ lɛ “Kaŋdas”. 28Fílíio á jʉ́ɔ á yí, á nɔŋ mbīŋɛ nzem mé mba zi, ńnáŋ ánɛ mmɔʼ kéléek yīi, mena é le nɔ̄ŋ eshuŋɔ, ńnɔŋ ntɔ́ŋɔ aŋwaʼne ntswi‑ŋke Ndém Izayi. 29Azwakne Ndém á lɛ ndé á mbū Fílíio ŋ́gɛ: «Tshóte nnɛ̄t ŋgʉɔ ntshí á lezēŋ kéléek yi. » 30Fílíio á kʉte ŋgʉ̄ɔ éwú, ŋ́gē eshʉʼe, ńjúʼ mɔ́ ndʉɛ mɛ́t, á nɔŋ ntɔ́ŋɔ aŋwaʼne ntswi‑ŋke Ndém Izayi. Á zɛ́tte á yí ŋ́gɛ: «O ó si ntɔ́ŋɔ aŋwaʼne jɔ̄ páʼā, ńjúʼɔ anu zīi, á lʉ́ɛ́ ɛ?» 31Á pwɛt á mbū yí ŋ́gɛ: «Ŋiŋ mé gɔ te kɛ́ʼte eshúŋ á gá á, meŋ ke ŋgā tɛ́ njúʼ é?» Á lɛ ndé á mbū Fílíio ŋ́gɛ, a ekɔ́ʼ nnáŋ á lezēŋ yí, á ntē kéléek. 32Ajʉʼ aŋwaʼne zīi a lɛ si ntɔ́ŋɔ, á le nɔ̄ŋ ndʉ́ɛ́ ŋ́gɛ:
«A lɛ páʼ mvhō zīi,
mɛ́ lɔkɔ á yí ŋgʉ̄ɔ mé nzaáʼ ntɔ̄ŋ yí lā.
Ńzéŋ ŋgɔ́ páʼ mɔ́ njʉnjhʉ zīi,
mɛ́ é si ŋgē ezáʼa menɔŋ mí, á nɔŋ te ŋŋāka lā.
Melaʼ épúp tɛ́, a lɛ te anu lé.
33Mɛ́ le māʼ esē á athū yí, ŋiŋ á piŋ mbú te tɔ́k nzem zi ŋ́gɛ, anu zí a etshí ndeŋ ndeŋ ɛ́.
Awɔ́ a epiŋ eshʉʼ epɛ́te á anu, ánɛ nzwɛt zi,
páʼ mɛ́ é zwhí á yí,
á mbe la ā?»
34Mɔ́ ndʉɛ wɔ̄ á zɛ́tte á Fílíio ŋ́gɛ: «Tsɔ́ʼɔtsɔ̄ʼ, lɛ eshúŋ á gá. Ntswi‑ŋke Ndém wuɔ, a lɛɛ́ ndʉ́ɛ́ menu muɔ páʼā, ánɛ awɔ́? Ánɛ athū zí méŋwɛ̄t, kɛ ánɛ athū ŋiŋ ndɛʼɛ ɛ̄?» 35Fílíio á lɛ efhó ánɛ ajʉʼ aŋwaʼne jʉɔ mɛ́t, ńzī á letswi ŋke mbɔŋ ánɛ Yɛɛ́so, á mbū yí. 36Pɔ́ yí é zɛ́t nzīŋ ziŋ, ŋ́gʉɔ tɛ ŋkó amɔ̄ʼ ajʉʼ, ntshi é gɔ́ éwú. Mɔ́ ndʉɛ mɛ́t á lé á mbū yí ŋ́gɛ: «Ntshi e ewuɔ. Akɔ̄ á gɔ evɛ́ne, tɛ mɛ́ le á gá á ntshi nōoʼ ē?» 37[Fílíio á lé á mbū yí ŋ́gɛ: «A gɔ́ éyi o ó fɛ́ nnɛ̄t ju ntsem, ŋ́gyá á mbū Yɛɛ́so, mbɔ meŋ gɔ enōoʼ á wú á ntshi. » Á pwɛt ŋ́gɛ: «Meŋ á véŋ ŋ́gɛ Yɛɛ́so Klísto, a á Méŋ Ndém. »] 38Ńdɛ ntswī, mɛ́ ghʉ, kéléek á tshí ajʉʼ. Pɔ́ Fílíio metsem é sóʼo, ńcú ŋkó á ntshi. Fílíio á noʼ á yí á ntshi. 39Pɔ́ gɔ́ tɛ efhó á ntshi ntó, Azwakne Ndém á fhó éwú ésāʼ á Fílíio, ńdɔk ŋgʉ̄ɔ. Mɔ́ ndʉɛ wɔ̄, á piŋ te zéŋ á yí njʉ́ɔ ɔ́, táʼ, ŋ́ké ŋgē egʉɔ, ńziŋɛ ŋkáka. 40Fílíio á láʼ ŋgē egɛ yí é ega egʉ́ɛ, ńjʉ́ɔ ŋgɔ́ á tésɔŋ Azɔt. Ńdɛ ntsé á mɛnzhɛ, ńnɔŋ ŋgʉ̄ɔ mé tésɔŋ Sezale, ŋ́kʉ́ʼne ánɛ metésɔŋ ntsem, ńtswī ŋke mbɔŋ.
Currently Selected:
Mefaʼ Meziŋ-ntō 8: ybb
Highlight
Share
Copy
Want to have your highlights saved across all your devices? Sign up or sign in
© CABTAL