Mefaʼ Meziŋ-ntō 9
9
Yɛɛ́so a á ega ntɔ́ŋɔ á Sɔ́ɔl
1Á le gē egɔ́ á afʉʼ mɛ́t, Sɔ́ɔl á zɛ́t ntswīʼnɛ ntshíɛ athū zí ánɛ lelɔk lewhʉ̄, ŋ́kāk epuɔ Atsyapuɔ Yɛɛ́so. Ńdɛ ŋgʉ̄ɔ njʉ́ɔ á tɛŋgyā wɔ nɔŋ‑epɔʼ, 2ńzɛ́tte ŋ́gɛ a etí mekɛtte, yí elɔk ŋgʉ̄ɔ ŋgyá, á mbū wɔ cʉte‑meŋgyā aswiŋte epuɔ Yúda mīi, é tésɔŋ Damas. Ŋ́gɔ́ éyi, a á kó éwú, ńjʉ́ɔ mbaŋa ká wɔnzwí pīi, é si nziŋɛ ánɛ mɛnzhɛ Yɛɛ́so, á gɔte á wɔ́p, ńtsēŋɛ á wɔ́p, ńdɔk mbīŋ nzem mé Yelósalɛm.
3Á tswí mekɛtte, ńnɔŋ ndɔ̄kɔ ŋgʉ̄ɔ mé Damas. Ńziŋ tɛ nnɔ̄ŋ mbátɛ á tésɔŋ wuɔ mɛ́t, ńdɛ ŋgē ejʉ́ɔ, mmɔʼ ŋkaʼ, é fhó á lephū, ŋ́kɛ̄ʼɛ ánɛ yí. 4Á tsɔ́ʼɔ ŋŋém á esī, ńjúʼ ŋghi ŋiŋ é lé á mbū yí ŋ́gɛ: «Sɔ́ɔl, Sɔ́ɔl, o lʉɔ́ʼɔ á gá ntswí akɔ̄?» 5Á pwɛt ŋ́gɛ: «O gɔ́ áa awɔ́ ŋkɔbé?» Ŋghi mɛ́t é pwɛt ŋ́gɛ: «Meŋ mé Yɛɛ́so yīi, o lʉɔ́ʼɔ á yí lā. 6Lu á esī, ŋgʉ̄ɔ mé tésɔŋ. Mɛ́ e kó éwú, éshúŋ á wú á ajū mīi, o pɔŋteé á leghʉ. » 7Epuɔ pīi, pɔ́ a wɔ Sɔ́ɔl é le nɔ̄ŋ nzīŋɛ, pɔ́ júʼ ŋghi mɛ́t, ŋ́ké nnɔŋ te njʉ́ɔ á ŋiŋ ɛ́. Ńtshíte á ajʉʼ, nchu wɔ́p é pú nzó. 8Sɔ́ɔl á náŋ tɛ ndū á esī, ŋ́ŋáʼa menēk mí, ŋ́ké mbiŋ nnɔ̄ŋ te njʉ́ɔ ejʉʼ ɛ́. Mɛ́ lɛ eshʉ̄ʼ ntséŋne apū zí, ńtsāŋ á yí ndɔk ŋgʉ̄ɔ mé Damas. 9Á gʉɔ ŋkó éwú, ńnáŋ eleʼé tɛ́t té jʉ́ɔ ejʉʼ, té pfɛ́t azō, té piŋ nnú á azō.
10Á ge egɔ́ épúp, mmɔʼ ŋiŋ nnɔ Yɛɛ́so, á gɔ́ á Damas ega mɛ́t, lezēŋ tsí é gɔ́ lɛ Ananias. Yɛɛ́so á shʉʼ á ntē njʉɔ te lí, ńtɔ́ŋ á yí ŋ́gɛ: «Ananias. » Á gɛ: «Atsyapuɔ, meŋ ewuɔ. » 11Atsyapuɔ Yɛɛ́so á lé á mbū yí ŋ́gɛ: «Lu á esī, ŋ́gákne ŋgʉ̄ɔ ánɛ nzhɛ zīi, mɛ́ tɔ́ŋɔ lɛ, “Ndeŋ‑Ndeŋ”. Mba mmɔʼ ŋiŋ e é éwú, mɛ́ tɔ́ŋ á yí lɛ Yúdas. O ekó éwú, ńzɛ́tte mmɔʼ ŋiŋ Táase yīi, a á mba mɛ́t, lezēŋ tsí é gɔ́ lɛ Sɔ́ɔl. A á éwú tsetsɔŋɔ, éswíŋtɛ á Ndém. 12A á njʉ́ɔ mmɔʼ ŋiŋ, á ntē njʉɔ te lí, lezēŋ tsí é gɔ́ lɛ Ananias, á shʉʼ ŋkó á ŋgyā, ńzápa mbū á athū yí, ŋ́gɛ a ezéŋ njʉ́ɔ ejʉʼ. » 13Ananias á lɛ ndé ŋ́gɛ: «Atsyapuɔ, meŋ ke júʼ epuɔ tɛ nzáne, é nɔŋ eshúŋɔ menu ánɛ ŋiŋ wuɔ mɛ́t, éfhó ánɛ páʼ, a á si ŋgēnɛ epuɔ pú épúp, á Yelósalɛm. 14A ke zéŋ ŋgʉɔ njʉ́ɔ wɔ nɔŋ‑epɔʼ epi melʉɛ, ńtswí mete, tɛ a á ega tsetsɔŋɔ, ŋ́gɔ̄ á ŋgɔteē epuɔ metsem pīi, pɔ́ wuʼtɛ lezēŋ cú. » 15Atsyapuɔ á tsɔ́ʼ ŋ́gɛ: «Ké ŋgʉ̄ɔ gʉɔ. Meŋ á tsɔ́ʼ á ŋiŋ mɛ́t ŋ́gɛ, a eghʉ̄ afaʼ zá, ńzéŋ eshúŋ á ŋiŋ yīi meŋ á ewiɛ́, á mbū melāʼ ndɛʼɛ, mbɔɔ á mbū mefɔ pɔ́p, mbɔɔ á mbū epuɔ Islaɛl. 16Meŋ méŋwɛ̄t e shʉʼ etswii á yí ŋgʉɔ̄ʼ zīi, a gɔ́ á njʉ́ɔ mélaʼ má. »
17Ananias á lɛ ŋgʉ̄ɔ tɛ ŋkó á ŋgyā mɛ́t, ńzápa mbū mí á athū Sɔ́ɔl. Ńdé á mbū yí ŋ́gɛ: «Méŋ mɔ́ ga Sɔ́ɔl, Atsyapuɔ Yɛɛ́so mé tó á gá. Á Yɛɛ́so yīi, o ke jʉ́ɔ á yí á mɛnzhɛ, á afʉʼ zīi o ke nɔ̄ŋ eshʉʼɛ mé ega lā. A á tó á gá ŋ́gɛ, meŋ eshʉ̄ʼ ŋghʉ̄, o ezéŋ njʉ́ɔ ejʉʼ. Ŋ́gɛ Azwakne Ndém a ekó tɛ ndó ntē wú. » 18Afʉʼ mɛ́t afʉʼ mɛ́t, amɔ̄ʼ azō á lɛ efhó á menēk Sɔ́ɔl, ńzípɛ, ŋ́gɔ́ páʼ megáʼ esōh lā. Á zéŋ njʉ́ɔ ejʉʼ. Ńdū á esī, mɛ́ noʼ á yí á ntshi. 19Á lɛ mpfɛ́t azō, mete mí é zéŋ eshʉ̄ʼ.
Sɔ́ɔl a á ega ntswī ŋke mbɔŋ Yɛɛ́so á Damas
Sɔ́ɔl pɔ́ a epuɔ Yɛɛ́so é náŋ á Damas tsɔ eleʼé shɔ́ʼɔ́ lɛ́, 20á lɛ nzī á lekʉ̄ʼne ánɛ meŋgyā aswiŋte epuɔ Yúda, ésáʼ ŋ́gɛ, Yɛɛ́so a á Méŋ Ndém. 21Anu jʉɔ mɛ́t á lɛ si ŋkʉ̄ʼnɛ epuɔ metsem pīi, é lɛ si njúʼɔ. Pɔ́ zɛ́tte ŋ́gɛ, ŋiŋ wuɔ mé kɛ té si ŋkʉ́ʼnɛ mbíkɛ epuɔ pīi, é wuʼtɛ lezēŋ Yɛɛ́so á Yelósalɛm ɛ́ kɛ? A kɛɛ́ te eshʉ̄ʼɛ ega páʼā, á ŋgɔteē pɔ́p, étseŋɛ á wɔ́p, élɔk epiŋ nzem mé Yelósalɛm, éyá á mbū wɔ nɔŋ‑epɔʼ epi melʉɛ, pɔ́ eŋāk á wɔp ɔ́ kɛ?
22Táʼ, Sɔ́ɔl á ké nzɛ́t ntswīʼnɛ esáʼa ŋke mbɔŋ Yɛɛ́so, ńtɛ̄ʼtɛ. Ŋ́kɛ́ʼte eshúŋ epuɔ, ńnɔŋ nchʉ́ɛ nnɛ̄t ntswī ŋ́gɛ, Nzaʼ‑Ŋkhʉ yīi, Ndém a le laʼnēē, a gɔ́ áa Yɛɛ́so. Ŋ́kɛ́ʼte eshúŋ tɛ epuɔ Yúda á Damas é tapne. 23Á náʼ nzī nnáŋ, epuɔ Yúda puɔ mɛ́t, é cúʼte esāp, páʼ pɔ́ e ghʉ épúp tɛ́ zwhí á Sɔ́ɔl. 24Mɛ́ jhʉ́ á zoʼ eshúŋ á yí. Á gē egɔ́, mbɔ epuɔ mɛ́t é ndáʼ nzī á lepīp menchu akɛ tésɔŋ Damas, ézokó pɔ́ etsōʼ, ŋ́gɛ a a nɔŋ etɔ́kɔ, mɛ́ egɔ̄ á yí nzwhí. 25Táʼ, megaŋ akhu Sɔ́ɔl, é ghʉ etsōʼ, pɔ́ a pɔ́p é kɔ́ʼ á mbe akɛ zīi mɛ́ le pɔ́ɔ̄, ńdɔk ŋkɛ́nne á tésɔŋ, pɔ́ néŋ á yí á ntē túŋ akelaʼ, ésóʼne á yí ntshí á nzem mmɔʼ, á kʉ.
Sɔ́ɔl a á ega ntswī ŋke mbɔŋ Yɛɛ́so á Yelósalɛm
26Sɔ́ɔl á piŋ nzem tɛ ŋkó á Yelósalɛm, ńnɔŋ efāʼa á lekō á nnɔ epuɔ Yɛɛ́so. Epuɔ metsem é ke nnɔ̄ŋ ŋkʉ̄ʉ á yí kʉʉ, melaʼ mīi pɔ́ lɛ te si mvéŋɛ ŋ́gɛ, á anuúnē ŋ́gɛ, a á kwaʼ ŋiŋ nnɔ Yɛɛ́so ó. 27Baanabas á lɛ ŋgʉ̄ɔ njʉ́ɔ á Sɔ́ɔl, ńdɔ̄k á yí ŋgʉɔ njʉ́ɔ meziŋ‑ntō Yɛɛ́so, ḿbɛ́te eshúŋ á wɔ́p, páʼ Sɔ́ɔl a ke jʉ́ɔ á Atsyapuɔ Yɛɛ́so, á mɛnzhɛ Damas, á shúŋne á mbū yí. Ńzéŋ mbɛ́te éshúŋ á wɔ́p páʼ, a kɛ si ntswīi ŋke mbɔŋ Yɛɛ́so esa saá, á mbū epuɔ Damas. 28Á fhó épúp, Sɔ́ɔl á kó á nnɔ epuɔ Yɛɛ́so. Pɔ́ a pɔ́p é kʉ́ʼne egʉ́ɛ egʉ́ɛ á ntē Yelósalɛm, á tswi ŋke mbɔŋ Yɛɛ́so esa saá. 29A le zéŋ ntswī ŋke mɛ́t, á mbū epuɔ Yúda pīi, pɔ́ shúŋnɛ alāʼ epuɔ Glɛk. Pɔ́ a pɔ́p é ké nnɔ̄ŋ ŋŋāk ŋake. Pɔ́ piŋ eshʉ̄ʼ ncʉ́ʼɛ efāʼa áa lezwhī á yí. 30Epuɔ Yɛɛ́so é júʼ épúp, ńdɔ̄k á Sɔ́ɔl, ésóʼo ŋgʉ̄ɔ mé tésɔŋ Sezale. Ŋ́kó éwú, ńtó á yí ŋgyá á Táase.
31Emuɔ menu mɛ́t é tɔ́k páʼā, melúŋ epuɔ Yɛɛ́so mīi é Yudéa, mbɔɔ á Ŋgaliléa, pɔ́ Samalía, é nɔŋ nnáŋa mé apwɛne. Ńnɔŋ ntɔ́tɛ mennɛ̄t mɔ́p, ńjúʼɔ nchu Atsyapuɔ. Azwakne Ndém á nɔŋ ntswítɛ á wɔ́p á lezā ŋgʉ̄ɔ mé mvhɔ.
Piɛ a á ega ŋgúa epuɔ Yɛɛ́so ánɛ metésɔŋ Lída pɔ́ Jope
32Piɛ á lɛ nzī a lekʉ̄ʼne á ntē alāʼ, ŋ́gúa epuɔ Yɛɛ́so éwú. Éshʉ̄ʼ amɔ̄ʼ aleʼé, ŋ́gʉɔ ŋgūa epi é tésɔŋ Lída. 33Ŋ́kó éwú, ńjʉ́ɔ mmɔʼ ŋkeluʼ, lezēŋ tsí é gɔ́ lɛ Ene, mbɔ a á nɔŋ á ndo ekó agɔ, ŋguʼ lefaá. 34Piɛ á tɔ́ŋ á yí ŋ́gɛ: «Ene, Yɛɛ́so Klísto a á tsetsɔŋɔ, mbɔ a á ghʉ o tēe. Lu á esī, ŋ́kɛ́t á tsitsi ekó wu. » Ene á lɛ ndū á esī efʉʼ mɛ́t efʉʼ mɛ́t. 35Epuɔ Lída pɔ́ a epuɔ metsem pīi, é naáŋ á ntē apepɔ Salɔŋ mɛ́t, é shʉʼ njʉ́ɔ páʼ ŋiŋ mɛ́t a á te, ńjʉ́ɔ épúp, ḿbú efɛ́ nnɛ̄t ŋgyá á mbū Atsyapuɔ Yɛɛ́so.
36Mmɔʼ menzwí a lɛ á tésɔŋ Jope, ŋ́gɔ́ á azí mmɔʼ ŋiŋ Yɛɛ́so, lezēŋ tsí é gɔ́ lɛ Tabīta, mɛ́ tɔ́ŋ mé ashuŋne epuɔ Glɛk lɛ, Dɔlkas ńdɔkɔ ŋ́gɛ, «na ŋgap». A lɛ efʉʼ metsem, ŋ́ghʉ̄ɛ menu mbɔŋ, ńnɔŋ ntswítɛ wɔ te kuʼ ánɛ azō. 37Á lɛ ánɛ meleʼé mɛ́t, á whʉ agɔ, ŋ́kwhʉ́. Mɛ́ sok apfhō zí, ńdɔk mbē ńnɔ̄ŋ ánɛ emɔ̄ʼ ntē ŋgyā ánɛ leleŋ athʉ́. 38Jope wuɔ mɛ́t, a le paté á Lída. Epuɔ Yɛɛ́so é zhɛ́ á légɛ, Piɛ a á Lída. Ńtó epuɔ mémpīa éwú ŋ́gɛ, pɔ́ egʉɔ eswíŋte á Piɛ ŋ́gɛ, tsɔ́ʼɔtsɔ̄ʼ, a elɛ̄ ŋgákne eshʉʼ njʉ́ɔ á wɔ́p.
39Piɛ á kó njúʼ, pɔ́ a pɔ́p é lɛ ndū á esī ŋgʉ̄ɔ. Ŋ́kó éwú, mɛ́ lɔk á yí mbē mé ntē ŋgyā ánɛ leleŋ athʉ́. Mbɔ mepfók tésɔŋ é mbú ncúʼte éwú, ńnɔŋ ndāa, ńtswī á yí menzhó mīi, Dɔlkas a ke nɔ̄ŋ ntémɛ, ŋ́gɔ̄ á ŋgāptɛ, á afʉʼ zīi a ke zɛ́t nte. 40Piɛ á tswi, epuɔ metsem é fhó á ŋgyā ntó. Á tswíʼte á esī, éswíŋte á Ndém, ḿbiŋ mbēkne nnɛ̄t, ńcʉ̄te á apfhō menzwí mɛ́t. Ńtɔ́ŋ á yí ndé ŋ́gɛ: «Tabīta, lu á esī. » Á lɛ ŋŋáʼa menēk mí, ńjʉ́ɔ á Piɛ, ńdū á esī, ńnáŋ á ndo ekó. 41Piɛ á kímne apū zí, á lu á esī ntshí ajʉʼ. Á tɔ́ŋ epuɔ Yɛɛ́so pɔ́ mepfók pwɔ̄, ńtswī á yí á mbū pɔ́p, á gɔ́ nte. 42Anu jʉɔ mɛ́t, á pú esāŋ á tésɔŋ Jope ntsem. Epuɔ tɛ nzá, é pú efɛ́ nnɛ̄t ŋgyá á mbū Atsyapuɔ Yɛɛ́so. 43Piɛ á piŋ nzī á tésɔŋ Jope nnáŋ, ńnɔŋ nnáŋa á ŋgyā mmɔʼ ŋiŋ yīi, a lɔkɔ mentū ndáa meŋgup, lezēŋ tsí é gɔ́ lɛ Simɔŋ.
Currently Selected:
Mefaʼ Meziŋ-ntō 9: ybb
Highlight
Share
Copy
Want to have your highlights saved across all your devices? Sign up or sign in
© CABTAL