LUQAASI 10
10
YESUUSI LAMALAYINA LAME ROSAANO SOYI
1Hakkunni gedensaanni Yesuusi wole lamalayina lame rosaano doore, isi ha'rara hedino katammanna darga baala alba ikkite hadhanno gede lame lame asse soyi. 2«Gamba assinanni gidi lowoho; gamba assanno manni kayinni shiimaho. Gide gamba assannoha lowo manna soyanno gede, gidu anna huuccidhe!» yee kulinsa.#Mat 9:37-38 lai. 3Ge'reewu gede hiyyeeyyete giddora soyemmo'nena hadhe.#Mat 10:16 lai. 4Hadhinanni woyite woxe gurdi'nannire, ogoro woy koatte anga adhitinoonte. Manna keere haadhinanni doogote yanna huntinoonte.#Mat 10:7-14; Maq 6:8-11; Luq 9:3-5 lai. 5E'inanni mine baala balaxxine, «Keeru kunni minira ikko» yiiyye. 6Hakko mine keere baxanno manchi hee'riro, keeri'ne ledosi hee'ranno. Hakkuyi ka'a kayinni keeri'ne galagale ki'nera higanno. 7Loosinohura daafurisi gumi hasiisannosina, uyinoonni'nere ittinanninna agginanni e'inoonni mine keeshshe. Minunni mine sa'inoonte.#1Qor 9:14; 1Xim 5:18 lai. 8Mitto katama martineenna haa'ni'nehu gedensaanni, uyini'nere itte. 9Hakko katami giddo noo dhiwamaasine hurse; mannahono, «Maganu gashshooti ki'newa gamba yiino» yitine kulle. 10Martinoonni katami manni hagiidhe haa'ra giwi'nero, katamu gudumaale fultine, 11«Katami'neta lekkanke buko ganga'ninoommo. Maganu Gashshooti ki'newa gamba yiinota kayinni affe» yiiyyensa. 12Halaale kuleemmo'nena, yoote barra hakku katami Soddoomu qorichishamihunni roore qorichishamanno.#Kal 19:24-28; Mat 11:24; Mat 10:15 lai.
AMMANTINOKKI KATAMMA
(Mat 11:20-24)
13«Koraaziini atera aanne'e! Beetesayida atera aanne'e! Ki'ne giddo assinoonni maalale Xiroosinna Sidoona assinoonniha ikkoommero, hakko hee'ranno manni xiddu imaana uddi're, umoho buluulo giggishshi're bi're bi'renni aagintaawe higannohu baino.#Isa 23:1-8; Iyu 3:4-8; Amo 1:9-10; Zak 9:2-4 lai. 14Yoote barra, qorichu ki'nenni roore Xiroosiranna Sidoonaha shotannonsa. 15Ati Qifirinahoomino, ufuufante gordo iillootto; ikkollana dirrite gaannaame eatto» yii.#Isa 14:13-15 lai.
16Yesuusi rosaanosira, «Ki'nere macciishshannohu anere macciishshannoho; ki'ne giwannohu ane giwinoho; ane giwannohu soyinoeha giwannoho» yiinsa.#Mat 10:40; Maq 9:37; Luq 9:48; Yoh 13:20 lai.
LAMALAYINA LAMUNKU ROSAANO SONKOONNIWIINNI HIGGU
17Lamalayina lamunku rosaano sonkoonniwiinni hagiirrunni higge, «Mooticha, su'mikkinni durriisu nafa hajajaminonke» yitu.
18Yesuusi qole, «Sheexaanu banqote gede gordunni dirranna afoommo. 19Hamashshonna idda kaddinanni gede diina qeeltinanni wolqa oommo'ne. Gawajjanno'neri mitturino dino.#Far 91:13 lai. 20Su'mi'ne gordu taje giddo borreessamino daafira ikkinnina, durriisu hajajamino'nehura hagiidhitinoonte!» yiinsa.
YESUUSI HAGIIRRE
(Mat 11:25-27; 13:16-17)
21Hatte yannara Yesuusi Qullaawu Ayyaaninni hagiidhe, «Gordunna baattote Mooticha Anna'ya, konne coye egennaammahonna hayyoolete maaxxe affinokkirira leellishootto daafira galaxxeemmohe. Ee, Anna'ya, kuni ati ikkara halchootto coyeti» yii.
22«Wo'manka coye Anni'ya uyinoe. Beettu ayetiro Anna agurranna afinohu mittuno dino. Beetto agurranna woy Beettu xawise kulinosiha agurranna Anna afannohu mittuno dino» yii.#Yoh 3:35; 10:15 lai.
23Yesuusi alba rosaanosiwa hige insa calluwaho, «Ki'ne la'inannire la'annori hiitto ba'raadhinoreeti!. 24Lowo himanaanonna mootoolla ki'ne la'inannire la"ate halchite hooggino. Ki'ne macciishshitinannireno macciishshate halchite hooggino» yii.
SHOOSHAQA SAMAARICHA
25Mittu Muse Seeri rosiisaanchi Yesuusa jife la"ara hasi're, «Rosiisaancho, hegere heeshsho afi'rate ma asso?» yee xa'misi.#Mat 22:35-40; Maq 12:28-34 lai.
26Yesuusi qole, «Seeru giddo mayine borreessinoonni? Atino konne Seera ma garinni buuxi'ritto?» yii.
27Manchu daware, «‹Mooticha Maganokki wo'mu wodanikkinni, wo'ma lubbokkinni, wo'ma wolqakkinni wo'ma hedokkinni baxisi. Elokki umikki gede assite baxi› yaanno» yii.#Lew 19:18; Maq 6:5 lai.
28Yesuusi, «Dawarokki garahona, atino hadhe hatto assi; heeshsho afi'rattona» yiisi.#Lew 18:5 lai.
29Seeru rosiisaanchi isonoo seekki'ranni, «Eli'ya ayeti?» yii.
30Yesuusi qole, «Mittu manchi Yerusaalametenni kae Iyyaarko ha'ranni hee'reenna addifulootu amadde uddi'rinore mulqidhe, ganatenni gawajjite foolu callu giddo nooha agurte hadhino. 31Hedeweelcho mittu qeesichi hakkaanni hige sa"anni hee're, konne ganne tungoonni mancho lae shawwu yee sae ha'rino. 32Mittu Lewaawichino hakkaanni hige dayino. Isino konne mancho lae, shawwu yee sae ha'rino. 33Mittu Samaarichi kayinni hatte doogo hige ha'ranni kunni manchiwa dayino. Manchono lae mararinosi. 34Manchunniwa shiqqi yee madasira zayitenna woyine buure hoccunni usurinosi. Hakkunni gedensaanni harrichisira wore wosinu fooliishshi'ranno minira masse seekke towatinosi. 35Layinki barra lame kinchu birra fushshe wosinu mini annira ee, ‹Konne mancho towatisi. Galagale kawaanni hige dayemmo woyite isira fushshoottore baala qoleemmohe› yee kulinosi» yii.
36Yesuusi lede, «Kuri sasunku giddo addifulootu gante tuggu manchira elo ikkinosihu hiikkonneeti?» yee xa'misi.
37Seeru rosiisaanchino, «Hakkonne mararisi manchooti» yee qoli.
Yesuusi, «Atino hadhe hatto assi!» yiisi.
YESUUSI MAARTANNA MAARIYAAMI KEERE HAA'RARA HA'RI
38Yesuusinna rosaanosi doogo hadhanni heedheenna, Yesuusi Maarta yinanni mancho heedhanno qacha mari. Iseno haadhe minisera eessitusi. 39Isera Maariyaami yinanni rodoo noose. Maariyaami Mootichu lekka mule ofolte rosiisannore macciishshitanni no.#Yoh 11:1 lai. 40Maarta loossanno loosi bati'reennase daafurtu. Kunnira Yesuusiwa dagge, «Mooticha, rodoo'ya wo'manka looso ane calla'yara worte agurteenna sammi yite la"atto? Dagge kaa'litannoe gede kulise» yitu.
41Mootichuno, «Maarta, Maarta, ati lowo coyira yaaddanni qarramatta. 42Hasiisannohu mitto coye callaho. Maariyaami dancha coye doodhitino; konne coye isewiinni diadhinannise» yee qolise.
Currently Selected:
LUQAASI 10: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014