LUQAASI 9
9
YESUUSI TONAA LAME ROSAANO DANCHA DUDUWO DUDUBBANNO GEDE SOYI
(Mat 10:5-15; Maq 6:7-13)
1Yesuusi tonaa lamenka soqqamaasinesi woshshe battete ayyaana fushshitannonna dhiwantinore hursitanno gede wolqanna roorre uyinsa. 2Gordu Gashshooti gamba yiinota manna baalaho kultanno gedenna dhiwantinore hursitanno gede soyinsa. 3Qoleno, «Hadhinanni woyite doogora ikkannore: Siqqo, ogoro, sagale, woxe woy lame uddano anga adhitinoonte! 4Wosinchimma martinoonni darginni agurtine hadhina geeshsha hakkiicho keeshshe. 5Martinoonniwa mannu haa'ra giweenna'ne hakko katama agurtine fultinanni woyite, malaate ikkannonsa gede lekka'ne buko ganga'ne!» yiinsa.
6Kunnira rosaanosi hakkiichinni fulte Dancha Duduwo dudubbanninna dhiwamaano hursitanni qacha baala hadhu.
HEEROODISI YESUUSIRE MACCIISHSHI
(Mat 14:1-12; Maq 6:14-29)
7Mitu mitu manni, «Cuuaanchu Yohaannisi reyotenni kaino» yaanni duduwanni noo daafira Galiilu gobba gashshaanchi Heeroodisi Yesuusi assinore baala macciishsheenna yaannori baisi. 8Wolu manni, «Himanaanchu Eeliyaasi galagale dayino» yii. Wolootu qolte, «Albi himanaano giddonni mittu reyotenni kaino» yitu. 9Heeroodisi kayinni konne coye macciishshe, «Ani Yohaannisi goowa mursiisoommo. Kuni wo'manka coye assa dandaanno yini manchi isi ayeti?» yee Iso la"ara hasi'ri.
YESUUSI ONTE KUME MANNA ITISE DUUSHSHI
(Mat 14:13-21; Maq 6:30-44; Yoh 6:1-14)
10Soqqamaasine soyinowiinni galagalte higge, assitinore baala Yesuusira kultusi. Isino Beetesayidu katami mule mannu nookkiwa calluwansa haa're ha'ri. 11Mannu Yesuusi ha'rinowa afihu gedensaanni iso faana gane ha'ri. Isino haa're Maganu Gashshootire rosiisinsa; dhibbunni hurtara hasidhe dagginore baalano hursinsa.
12Yanna hashshituta, tonaa lamenka rosaanosi Yesuusiwa shiqqi yite, «Kuni hee'noommo dargi halallaati. Kunnira mannu muli katammanna katammate gobbaanni noo qachuwa ha're, itannorenna galannowa hasi'ranno gede ha'risi» yitu.
13Yesuusi kayinni, «Ittannore ki'ne uuyyensa!» yiinsa.
Insa qolte, «Ninkera ontu timinna lame qulxu'michi callu noonke. Ha'ne sagale hira hoongummoro kunni baalu mannira di"ikkitanno» yitu. 14Mannu kiirono onte kumeeti.
Yesuusi rosaanosi, «Mannu 50, 50 ikke gaamame ofollanno gede asse» yiinsa.
15Rosaanosi Yesuusi yiino gede assite wo'manka ofoshshiishshu. 16Hakkunni gedensaanni Yesuusi onte timanna lame qulxu'micho haa're, gordo hige lae Magano galati. Timma hiiqqaqqe, mannaho iillishshanno gede rosaanosira uyi. 17Baalunku itte duubbu. Rosaanosi mannu iteenna gatinoha timmatenna qulxu'mete hambaa tonaa lame soro wonshite kayissu.
PHEEXIROOSI YESUUSI EWELUMMA KULI
(Mat 16:13-19; Maq 8:27-29)
18Mitto barra Yesuusi callisi huucci'ranni noowa rosaanosi isiwa daggeenna Yesuusi, «Mannu ane ayeti yaanno?» yee xa'minsa.
19Insano, «Mitu, ‹Cuuaancho Yohaannisiiti› yaannohe; wolu kayinni, ‹Eeliyaasiiti› yaannohe; wolu qole, ‹Himanaanote giddonni mittu kaino› yaannohe» yite qoltusi. 20«Ki'ne ayeti yitinannieyya?» yee xa'minsa.
Pheexiroosi qole, «Ati Maganu Beetto Kiristoosaati» yii.
21Yesuusi hakka woyite konne coye mannaho kultannokki gede hajajinsa.
YESUUSI HOODE HA'RA
(Mat 10:38-39; 16:20-28; Maq 8:34-38; Luq 14:25-27)
22Yesuusi rosaanosi, «Manchi Beetti lowo qarra adha hasiissannosi; geerrunna qeesootu roorrooti, Seeru rosiisaano mishshannosi; shinannisi. Ikkollana sayikki barra reyotenni ka"anno» yiinsa.
23Baalunkura qole, «Hoode'ya ha'ra hasi'rannohu umosi aguro; barru barrunkunni masiqalasi duqqe hoode'ya dayo! 24Lubbosi gatisi'ra hasi'rannohu baalu hu'nanno; ane daafira yee lubbosi hunannohu baalu kayinni gatisi'ranno. 25Mannu gobba baalate jiro afi're lubbosi hu'niro, ma lexxanno? 26Anenna qaale'ya fokkannoha baala, Manchi Beetti umisi ayirrinyinni, Annisi ayirrinyinninna qullaawa sokkaasine ayirrinyinni daanno yannara fokkannosi. 27Halaale kuleemmo'nena, konniicho noori giddonni Maganu gashshooti daanna la'a geeshsha mitu mitu reyitannokkiri no» yiinsa.
YESUUSI AYIRRINYESI LEELLISHI
(Mat 17:1-8; Maq 9:2-8)
28Konne coye coyi'rihunni settu barri gedensaanni Yesuusi Pheexiroosi, Yaiqoobinna Yohaannisi calluwansa haa're huucci'rara mittu ilaali iimira fuli. 29Huucci'ranni hee'reenna albisi soorrameenna wolu daniha ikki; uddanosino waajjo qoffe ikkitu. 30Hatte yannara hedeweelcho lamu manni dagge isi ledo hasaabbanni no. Insa Museetinna Eeliyaasiiti. 31Ayirrinyunni leellite, Yesuusi Yerusaalamete qarra adhannotanna reyannota hasaabbanni no. 32Hatte yannara Pheexiroosinna ledosi noori goxxe no. Baqqi yitanno woyite, Yesuusi ayirrinyenna ledosi noore lame manna affu. 33Lamunku manni Yesuusiwiinni hadhu yannara Pheexiroosi Yesuusa, «Rosiisaancho'ya, ninkera konniicho hee'ra danchate. Kunnira, sase daase, mitto atera, mitto Musera, mitto Eeliyaasira qanso!» yii. (Pheexiroosi hatto yaanno woyite, umisi ma coyi'ranni nooronni diafino.)
34Pheexiroosi konne coye coyi'ranni hee'reenna gomichu daye goleennansa waajjitu. 35Gomichu giddonni, «Doodhoommohu Beetti'ya konneeti; isi yaannota macciishshe!» yitanno huuro daggu.
36Huuro maacciishshinihu gedensaanni Yesuusi callisi uurre gati. Rosaanosi la'inore baala ayerano kultukkinni sammi yitu.
YESUUSI BUSHU AYYAANI AMADINO BEETTO HURSI
(Mat 17:14-18; Maq 9:14-27)
37Layinki soodo Yesuusinna sasunku rosaanosi ilaalunni dirritanno woyite, lowo manni daye Yesuusi ledo xaadi. 38Mannu giddonni mittichu manchi, «Rosiisaancho'ya, kuni afi'roommo mittootina hursattoe gede huucci'reemmohe. 39Kuneeti bushu ayyaani hedeweelcho amade raashshiishannosi; baattote aana tuge hambiishshanni gongo'mishannosi. Bisosi mundiishshe lowo geeshsha shetise aguranno. 40Konne busha ayyaana fushshitara rosaanokkira kulummota didandiitino» yii.
41Yesuusi, «Ki'ne amma'na noo'nekkiri shokkadda ilama, ani ki'ne ledo mageeshshi geeshsha hee'reemmo? Ki'nere mageeshshi geeshsha cinceemmo? Hanni beetto anewa abbe!» yii.
42Beettu Yesuusiwa shiqita bushu ayyaani uulla tuge fittifachiishisi. Yesuusi kayinni busha ayyaana rufi; beettono hurse annaho uyi. 43Mannu baalu Maganunnita jawa wolqa lae dhaggeeffati.
YESUUSI REYOSIRE LEDE COYI'RI
(Mat 17:22-23; Maq 9:30-32)
Wo'munku Yesuusi assino coye dhaggeeffattanna isi rosaanosi, 44«Konne kuleemmo'ne qaale wodanche! Manchi Beetto mannu angara sayinse uyinanni» yiinsa. 45Rosaanosira kayinni kuni coyi dileellinonsa; coyisi tiro go'litinonsa; xa'mitannokki gedeno waajjitino.
BAALANKA ROORANNOHU AYETI?
(Mat 18:1-5; Maq 9:33-37)
46Rosaanosi, «Ninke baalunku giddo rooru ayeti?» yitanni heewisantu. 47Yesuusi kayinni wodaninsa hedo afe, mitto qaaqqo haa're mulesi uurrise, 48Rosaanosira, «Konne qaaqqo su'mi'yanni adhannohu aneno adhanno. Ane adhannohu, ane calla ikkummokkinni ane soyinoehano adhanno. Ki'ne giddo wo'munkura woriidihu baalunkura rooriidiha ikkanno» yiinsa.
NINKE GIBBANNOKKIRI NINKE LEDOREETI
(Maq 9:38-40)
49Hakkunni gedensaanni Yohaannisi Yesuusa, «Rosiisaancho'ya, mittu manchi su'mikkinni durriisa fushshanna anfe, ninke ledoha ikkinokki daafira hoolloommo» yii.
50Yesuusi qole, «Giwanno'nekkihu baalu ki'ne ledoha ikkino daafira agurre» yiinsa.
SAMAARIYU MANNI YESUUSA ADHA GIWI
51Yesuusi iimira ha'ranno barri gamba yiita Yerusaalame ha'rara murci're kai. 52Isi alba ikkite hadhanno sokkaano soyi. Insano baalanka coye qixxeessitara Samaariyu qacha hadhu. 53Ikkollana isi hakkaanni hige sae Yerusaalame ha'ranni noota affino daafira, hakko qachi manni haa'rasira dihasi'rino. 54Rosaanosi Yaiqoobinna Yohaannisi konne coye affe, «Mooticha, iiminni giira dirrite konne manna itte guddanno gede hajanjammora fajjattonkeni?» yitusi.
55Yesuusi kayinni hanqe rufe, «Ki'nera hiittoo Ayyaani noo'nero diaffinoonni. 56Manchi Beetti mannu lubbo gatisara ikkinnina hunara didayino» yii.#9:56 Maqqishshu malaati giddo noo hedo albi borro angatenni borreessinoonnitera noote. Hakkiinni ka'e wole qacha hadhu.
YESUUSI HOODE HA'RA
(Mat 8:19-22)
57Doogo hadhanni heedheenna mittichu manchi Yesuusira, «Ati ha'rattowa baala hoodekki ha'reemmo» yii. 58Yesuusi qole, «Yeedaala galtanno bale afidhino; ceateno heedhanno mini noonsa. Manchi Beetti kayinni umo worannowa nafa diafi'rino» yiisi.
59Yesuusi wole mancho, «Hoode'ya amo!» yii. Hakku manchi kayinni, «Mooticha'ya ballo, balaxe ha're anna'ya madaadhe dayemmona fajjie!» yii. 60Yesuusi qole, «Reyitinori reyitinonsare madaadhitona, ati hadhe Maganu Gashshootire kuli!» yiisi.
61Mittu wolu manchi qole, «Mooticha'ya, ani hoodekki ha'reemmo; balaxe kayinni mini'ya manna keerunni yee dayemmona agarie» yii.#1Mot 19:20 lai. 62Yesuusi daware, «Hawuurranni wenencho amade hee're badhe hige caaqqi yaannohu, Maganu Gashshootira di"ikkanno» yiisi.
Currently Selected:
LUQAASI 9: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014