Luka 6
6
Ɛnza ŋé mín nvɔ lɔnwɛɛnlilo ŋó kó ó lɔ
Matiyu 12.1-8; Maki 2.23-28
1 Lɔnwɛɛnlilo nɔ́ la, Ɛnza ní a yɛ́ kaamɔɔndhye ŋólu tɛ́ɛ tínminnan sɛ́ɛn lɔ́lu kɔɔnnɔn. A yɛ́ kaamɔɔndhye ŋólu tínnza nɔ́lu tɛ́ɛ kɛ́ fɔ́nɲɔɔn i tɛ́ɛ ólu lɔ́ kɛ́ a lɔɔ. 2Falizɛn nɔ́lu a fɔ i yɛ́ kó: «Kó mín mánngan kɛ kɛ́ lɔnwɛɛnlilo ŋó lá, mínnɛɛn lá álee ó kɛ́la?»
3 Ɛnza ŋé í yawa kó: «Kɔ́ɔn é Laula ní a táamanɲɔɔn ólu myaan mínngɛ, aa mínngɛ, a mán ó kála bha ŋan? 4Aa lo ɲán min mán Ala yɛ́ bhó ŋo kɔɔnnɔn, faanlɛɛbulu mín nziinin ndɛ́ɛ yénɔn kɛ́ o lɔɔ tó kɛ́ a lɔ dí a táamanɲɔɔn olu mán; Kɛ́ɛke faanlɛɛɲansebhaa ó léelu kákan kɛ o búlu ólu lɔɔ.»
5Ɛnza ŋé fɔ i yɛ́ i kwɔ́ ko: «Mɔɔn Dhyénjɛ ó lée lɔnwɛɛnlilo ŋó kunndii o lé.»
Ɛnza ŋé cɛ bhóofaanin mán lɔ́ lákɛɛnyala
Matiyu 12.9-14; Maki 3.1-6
6 Lɔnwɛɛnlilo ŋó lɔ gbɛ́ɛ lá, Ɛnza ŋé lo sɛ́ɛbho o kɔɔnnɔn kɛ́ a lámyaan kɛ́ mɔɔn ólu kála. O wáati ó lɔ́, cɛ lɔ́ tɛ́ɛ yénɔn, o bhóobhɛɛ o tɛ́wɛɛ fáa a man. 7Sɛliya kaamɔɔn ólu ní Falizɛn ŋólu tɛ́ɛ Ɛnza nakɔɔsila ní a yáa mɔɔn lɔ lákɛɛnya lɔnwɛɛnlilo ŋó lá, ké ii sɔ nzɔ́ɔ a lá. 8Wáa Ɛnza ndɛ́ɛ i míliya ó lɔ, o lɔ́, aa fɔ cɛ bhóofaaninman ó yɛ kó: «I wíi kɛ́ i lɔ mɔɔn ólu cɛ́man yánun.» Aa i wíi kɛ́ i lɔ. 9O kwɔ́, Ɛnza ŋé fɔ i yɛ́ kó: «Ní a manɲaankɛla, mínnɛɛn lé kákan kɛ kɛ́ lɔnwɛɛnlilo ŋo lá? Kɛ́ kóɲwaan kɛ́ lɔnwɛɛnlilo ŋó la bháa, wáman kɛ́ kóyoo ne kɛ́? Kɛ́ mɔɔn bwási bháa, wáman kɛ́ a hálaki?» 10Ɛnza ŋé i bɛ́ mánfɛɛ tó kɛ́ fɔ cɛ ó yɛ kó: «Í bhóo ó lɔ́sawa.» Cɛ ó a bhóo o lɔ́sawa, a bhóo o kɛ́ɛnya.
11Falizɛn ŋólu mwɛ́nnɛn koyoongɛ, i tɛ́ɛ ɲɔɔn mánɲaankɛla kó ii sé kɛ́ mínnɛɛn lé kɛ́ Ɛnza nán.
Ɛnza ŋé kaamɔɔndhye ndá ni fyáa lɔ́tɔnmɔn
Matiyu 10.1-4; Maki 3.13-19
12Ó wáati kée ŋó lɔ́, Ɛnza ŋé táa tíi ó kúnnɔn kɛ́ Ala bháto. Aa si í ɲánla Ala bháto ó la. 13Kɛ́ɛn ó bhɔ́ mínngɛ, aa a yɛ kaamɔɔndhye ŋólu kíi, kɛ́ mɔɔn tá ni fyáa lɔ́tɔnmɔn i cɛ́man kɛ ólu kíi kó céladhye ŋólu: 14O kaamɔɔndhye ŋólu tɔ́ɔ ó mánfɛɛ: Simɔn, aa o mín ndɔ́ɔ la íkwɔ kó Piyɛli, óni a lɔ́ɔcɛ Andele, Zaki óni Yaya, Filipu, Batelemi, 15Matiyu, Tomasi, Alife dhyénjɛ Zaki, Tade, Simɔn Zelɔti#6.15 Zelɔti tɔ́ɔ o kɔ́ɔ yáa nan kɛ́ lé kó a wɛɛ í wíi Lomɛn olu kanman., 16Zaki dhyénjɛ Zudasi óni Zudasi Sikaliyɔti mín ngáa Ɛnza ɲanva.
Ɛnza ŋé yaangalotɔ ólu lákɛɛnyala
Matiyu 4.23-25; Maki 3.7-11
17Ɛnza yíitɔ óni a yɛ́ kaamɔɔndhye ŋólu lé kɛ́ bhɔ́ tii ó ka, aa sé kɛ́ɛngbɛba lɔ́lɔ kɛ́ í lɔ yé. Yamanba tɛ́ɛ o ywáa ó lɔ́. A yɛ kaamɔɔndhye ŋólu tɛ́ɛ sháa i cɛ́man. Lɔ́lu tɛ́ bhɔ́la Yeluzalɛmu ní Zude mala ó bɛ́ lɔ́. Lɔ́lu tɛ́ɛ bhɔ́la kɔɔji lá ó sóbaba ólu lá, Tili óni Sidɔn. 18I tɛ́ wɛ́ɛ nan ké ii Ɛnza ɲɛ́n kóman ó lɔ́myɛn óni ké áa i lákɛɛnya. Mínnu tɔ́lɔyanin ndɛ́ɛ Lámansa ólu bhóo, ólu é kɛ́ɛnya. 19Yaman ó bɛ́ tɛ́ɛ ɲán ɲíinan a mán kɛ́ í túu Ɛnza nán, kɛ mansɔɔ sébhaaya lɔ́ tɛ́ɛ bhɔ́la a lɔ́ kɛ́ í bɛ́ lákɛɛnya.
Yɛ́ɛtii nisɔdhyaanin ɲé?
Matiyu 5.1-12
20O wáati ó lɔ́, Ɛnza ŋé a yɛ kaamɔɔndhye ŋólu mánfɛɛ, kɛ́ a fɔ kó:
«Ale min núu faannda né, ale yeemanfanin ɲé,
kɛ mansɔɔ Ala yɛ́ mansaya ó ale tá lé.
21Kɔ́ɔn é ale mínnu lá sísan, ale yeemanfanin ɲé,
kɛ mansɔɔ ale yáa fá.
Ale min núu kásila sísan, ale nisɔdhyaanin ɲé,
kɛ mansɔɔ ale yáa yɛ́ɛkɛ.
22Ni a ɲánngboya kɛ́ kɛ́ mɔɔn ólu lɔ́
ké íi i bá a lɔ́, kɛ́ a nɛɛn
óni kɛ́ a tɔ́ɔyoo nvɔ mɔɔn Dhyénjɛ ó kósɔn,
o wáati ó lɔ́, ale yeemanfanin ɲé.
23Ni ó kɛ kɛ́ wáati mínnɔn,
aa í ɲáanli kɛ́ í gbángban nisɔdhyaa ó bhóo,
kɛ mansɔɔ bhaayeba é a yɛ́ sá ŋó lɔ
ale yeemanfanin ɲé.
I fá ólu tɛ́ɛ céla ólu tɔ́lɔla cé né.
24Wáa bɔɔn o ale nanfootii ólu tá lé,
kɛ mansɔɔ ale wɛ́ɛ a yɛ́ heeyɔɔ ó sɔ́ɔ kɛ́ bhá.
25Ale min núu lɔ́min kɛ́la kɛ́ fá sísan,
bɔɔn ó ale tá lé,
kɛ mansɔɔ kɔ́ɔn yáa álee myaan.
Ale min núu yɛ́ɛkɛla sísan,
bɔɔn ó ale tá lé,
kɛ mansɔɔ a ní ó yáa í lafin, a yáa kasi kɛ́.
26Ni mɔɔn bɛ́ é ale tɔ́ɔɲwaan fɔ́la,
bɔɔn ó ale tá lé,
kɛ mansɔɔ i fá ólu tɛ́ɛ céla fɔnɲanfɔ ólu bwóɲanla cé né.»
Án yúu ólu yɛ́ dhyáaɲɔɔnya ó
Matiyu 5.39-47
27«Waa ale mín núu nɔ́myɛnnan, ní i fɔ́la a yɛ́ ngó a yúu ólu kó á dhyáa á yɛ́, kɛ́ kóɲwaan kɛ́ a tɔ́lɔbhaa ólu yɛ́. 28Aa lwáau kɛ́ a dáanbhaa ólu yɛ́, áa Ala dɛ́li a tɔ́lɔbhaa olu yɛ. 29Ní mɔɔn lɔ kɛ i tóo kée ŋó cé, ii i tɔ́ kée ŋó sii a yɛ́. Ní lɔ kɛ í yɛ́ déekeba ó myaan i lá, i kɛ́nan fɔ kó a kɛ́nan í yɛ́ deeke ó tá. 30Ní mɔɔn ó mɔɔn kɛ́ fé nɔ́ kófɔ i yɛ́, ii a di mán. Ní mɔɔn lɔ kɛ́ í yɛ́ fé nɔ́ myaan i lá, i kɛ́nan a kó mánɲaankɛ a la. 31Álee fɛ́ ké mɔɔn tɔ ólu a kó min ngɛ́ a yɛ́, aa ó ɲɔ́ɔn ngɛ́ olu yɛ́.»
32«Á kó a dí mínnu yɛ́, ní ó kée ŋólu kɛ dhyáa á yɛ́, ale káa tɔɔn mínnɛɛn lé sɔ́ɔ o lɔ́? Kɛ mansɔɔ, yúumutɔ ólu ŋé ó ɲɔ́ɔn ngɛ́la. 33Mɔɔn min núu kóɲwaan kɛ́la a yɛ́, ní aa kóɲwaan kɛ́la o gbɛɛgbɛɛ o lé yɛ́, a káa tɔɔn mínnɛɛn sɔ́ɔ o lɔ? Kɛ mansɔɔ, yúumutɔ ólu é ó ɲɔ́ɔn ngɛ́la. 34A yíi é mɔɔn mínnu ka kó i yáa a yɛ́ yúu ó saa, ní ale yúu dila ólu gbɛɛgbɛɛ o le mán, ale káa tɔɔn mínnɛɛn le sɔ́ɔ o lɔ? Kɛ mansɔɔ, yúumutɔ ólu ŋé yúu dila ɲɔ́ɔn mán kɛ́ í hákii tó a ɲɔ́ɔn nzɔ́ɔ kó lɔ́ kwɔla. 35Waa, á yúu ólu a dhyáa á yɛ́ kɛ́ kóɲwaan kɛ́ i yɛ́. Áa yúu lá mɔɔn ólu lá, kɛ́ ɲán o kwɔ́. O lɔ, a yáa tɔɔnba sɔ́ɔ. Ale yáa kɛ́ Fé mbɛ kunndii ó dhyé ŋólu lé, kɛ mansɔɔ, aa kóɲwaan kɛ́la kóɲwaanlɔmɛɛ ólu ni mɔɔnyoo ŋólu yɛ́. 36Áa hínnɛn mɔɔn ólu lá óyoo a Fá é hínnɛnla ɲán mín mán.»
Ale kɛ́nan ɲɔ́ɔn ndɔ́nɲɔɔn
Matiyu 7.1-5
37«A kɛ́nan kíti tɛ́ɛ lɔ ka, o ɲan o man Ala táa kíti tɛ́ɛ ale ka. A kɛ́nan dɔ ólu yaayii, o ɲan o man Ala táa ale yaayii. Áa yafa dɔ ólu mán, o ɲan o man Ala yáa yafa álee mán. 38Aa dɔ ólu sɔ, o ɲan o man Ala yáa álee sɔ. Í yáa mínnan mɛ́ɛbhɛɛ tá kɛ́ a tá ó swáan kɛ́ a díinndiin kɛ́ a yúuyuu kɛ́ a fá fɔ kɛ́ bwɔ́, kɛ ó yɛ́ɛman a yɛ́ fáanin ó jífa ó lɔ́. Kɛ mansɔɔ aa dɔ ólu tá ó swáan swáanninkɛfe mín nɔ́n, Ala káa a tá ó swáan o kée ŋó lé lɔ́.»
39Ɛnza ŋé saanan lá i yɛ́ kó: «Fyóondɔ lɔ é sé kɛ́ fyóo ngbɛ́ɛ lɔ yɛ gbéle myáan an? I fyaa ó bɛ́ táa í bé jáan lɔ kɔɔnnɔn an? 40Kaamɔɔndhye ŋo sí mán nvísaa a kaamɔɔn o le. Waa kaamɔɔndhye ŋóo kaamɔɔndhye ŋé kaa ŋó kɛ́ cɛ́ɛne, óo kɛ́la lé óyoo a kaamɔɔn ó.»
41«Tíkoo mín ŋé í bhádhye ŋó ɲán mán, mínnɛɛn lé kósɔn ii ó mánfɛɛ lá, kɛ́ɛ ké lɔ́ɔguun mín ŋé í tá ɲán ó mán, i tɛ́ ó yéla a? 42I lo ŋé sé kɛ́ fɔ i bhádhye ŋó yɛ́ dí lé kó: ‹Bhádhye, i lɔ́ ké tíkoo mín ŋé í ɲán mán, ké ní o bhɔ́ a man. Kɛ́ɛ ké lɔɔguun mín ŋé í tá ó mán, i tɛ́ ó yéla.› Fyáangafo o, lɔ́ɔguun mín ŋé í tá ó mán, o bhɔ́ ótun. O lɔ, i yáa yéli kɛ́ cɛ́ɛne, kɛ́ tíkoo ó bhɔ́ i bhádhye ŋó ɲán ó mán.»
Yíi ó lɔnan a dhyé ŋé mán
Matiyu 7.16-20; 12.33-35
43«Yíibhɛɛ súusuu tɛ́ dhyéɲoo ngɛ́la, yíiyoo nzúusuu tɛ́ dhyémɛɛ kɛ́la. 44Yíi bhɛ́ɛ ó lɔnan a dhyé ŋó le mán. Tólodhye ŋó tɛ́ bhɔ́la ŋwɛ́ɛnnzu ŋó la, lɛ́zɛn ŋó tɛ́ bhɔ́la lɛ́ɛninɲii ó la. 45Mɔɔnbhɛɛ ó fémɛɛ ni nanfoobhɛɛ lé lábhɔla a yóso o lɔ. Tó mɔɔnyoo ŋó féɲoo ni nanfooyoo né lábhɔla a yóso lɔ. Kɛ mansɔɔ mɔɔn yóso ó fánin ɲé fé ŋó mínnan, a lá ó óle fɔ́la.»
Bhónɔbhaa fyaa ó yɛ́ saanan ó
Matiyu 7.24-27
46«Mínnɛɛn lé kósɔn aa ngíila kó Mantii ó, Mantii ó, waa ké née mín nvɔla, a tɛ́ ó kɛ́la?»
47«Mɔɔn óo mɔɔn kɛ́nan né fɛ́ kɛ́ né yɛ́ kóman ó lɔ́myɛn kɛ́ a bháto, o bhɔ́nin ŋé mín nán, né yáa o fɔ a yɛ́. 48O bhɔ́nin ɲé bhónɔbhaa lɔ lé lá mín ŋé lúukolo ó shɛ́n kɛ́ a láyii fɔ kɛ́ sé fáa ó mán, tó kɛ́ a yɛ́ bhó ŋó zúsii o ka. Bhá ó kɛ fá jí ó lá wáati mínnɔn, jí ó wée kɛ́ táa lá o bhó ŋó kɔɔ, waa a mán sé kɛ́ maanmaan, kɛ mansɔɔ cɛ ó a yɛ́ bhó ŋó lɔ cɛ́ɛne lé. 49Waa mɔɔn mín ŋé né yɛ́ kóman ó lɔ́myɛnnan tó a tɛ́ a lá bhátola, o tíi ó bhɔ́nin ɲé bhónɔbhaa lɔ lé la mín ŋwɛ́ɛn a yɛ́ bhó ŋó lɔ́ lúukolo gbáannza o ka, a man a zúsii fáa ka. Sá ŋó nan, jí óo wée kɛ ló bhó ŋó zúkɔɔ, o ywáaninngee ŋó lɔ aa bé, a bénzeɲan óo yóoɲan lé.»
Currently Selected:
Luka 6: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.