Luka 5
5
Ɛnza ŋé a yɛ́ kaamɔɔndhye njónan ólu kíila
Matiyu 4.18-22; Maki 1.16-20; Yaya 21.1-11
1Lo nɔ lá, kɛ́ Ɛnza ndó Genezalɛti bhála ó lá, yaman ó tɛ́ wɛ́ɛ a lamiin tó í tɛ́ ɲɔ́ɔn díin ndíin nan kɛ́ Ala yɛ́ kóman ó lɔ́myɛn. 2Aa kúun nvyáa yé bhála ó lá. Sɔnmɔnnin ŋólu tɛ́ wɛ́ɛ bhɔ́ ó kɔ́ɔnnɔn, i tɛ́ɛ i yɛ́ jɔ ólu kwóla. 3Ɛnza ŋé ló kúun ŋólu kée ngɔ́ɔnnɔn mín ndɛ́ɛ Simɔn tá lé. Aa fɔ́ Simɔn yɛ́ kó aa kúun ŋó manbhɔ tíin ŋó lá dɔ́ɔnin. O kwɔ́, kɛ Ɛnza síinin ndó kúun ŋó kɔɔnnɔn, aa lámyaan kɛ mɔɔn ólu kála.
4Aa wɛ́ɛ kóman ó la sán mín nɔ́n, aa fɔ Simɔn yɛ́ kó: «Jí ó dún nún ŋé ywáa mín nɔ́n, táa ní kúun ŋó lé ó ywáa ó lɔ́ kɛ́ i yɛ́ yɔ ó láfii.»
5Simɔn é a yawi kó: «Kaamɔɔn, án ŋwɛ́ɛn bháala ó kɛ́ kɛ́ kɛ́ɛn bhɔ́, án mán fósi sɔ́ɔ. Waa i yɛ́ saanin ó kósɔn, né yáa yɔ ó láfii jí ó lɔ́.» 6O lɔ, íi yɔ ó láfii. I yɛ́ yɔ o yɔ́ɔ shɛ́ɛman myáan fɔ yɔ ó lamyaan kɛ́ fála nvála. 7Ii i bhóo láwii kɛ́ i táamanɲɔɔn ólu kíi kúun ndɔ́ ó kɔɔnnɔn kó ii nan i dhyɛman. Ólu táa, ii kúun nvyaa ólu bɛ́ lafa yɔ́ɔ ó lá fɔ kúun ólu tɛ́ fɛ́ kɛ́ yíi jí ó kɔ́ɔ. 8Simɔn Piyɛli é ó yé mínngɛ, aa i kúnmɛɛn nɔ́kɛɛ Ɛnza ngɔɔ kɛ́ fɔ kó: «Mantii ó, í kɛ́nan í mangbaa né la, kɛ mansɔɔ née yúumutɔ le lé.»
9Aa ó fɔ le kɛ mansɔɔ a tɛ́ɛ sháannan lé. Ale ní mínnu tɛ́ɛ ɲɔ́ɔn nvɛ́ kúun ó kɔɔnnɔn, i bɛ́ tɛ́ɛ sháannan kɛ mansɔɔ i wɛ́ɛ yɔ́ɔ shɛ́ɛman nzɔ́ɔ. 10Zebede dhyénjɛ ólu, Zaki ní Yaya tɛ́ɛ Simɔn bháalakɛɲɔɔn le lé, ólu tɛ́ɛ sháannan. Waa Ɛnza ŋé fɔ Simɔn yɛ́ kó: «I kɛ́nan sháan. Kɛ́ta bí mán, i káa mɔɔn lé ɲíin Ala yɛ́.»
11Oo kɛ́ mínngɛ, ii i kwɔ́sɛɛ kɛ́nan i yɛ́ kúun ólu bhyáa bhála ó la, kɛ́ í yɛ́ fé ŋólu bɛ́ tó yé kɛ́ bhyáa Ɛnza ngwɔ.
Ɛnza ŋé kwaantɔ lɔ́ kɛ́nnɛnyala
Matiyu 8.1-4; Maki 1.40-45
12Lo nɔ la Ɛnza ndɛ́ɛ só lɔ́ la, cɛ kwaantɔ lɔ é nan lo o só o la, a yɛ kwaan o tɛ́ wɛ́ɛ tínmin a lɔ. Aa Ɛnza ɲé mínngɛ, aa táa i bíin a kɔɔ kɛ́ a dɛ́li kó: «Mantii ó, ni i kɛ́ sɔ́n, ii sé kɛ́ né kɛ́ɛnya.» 13Ɛnza ŋé í bhóo láwii kɛ í bhóo túu a lá, kɛ́ fɔ kó: «Ŋwɛ́ɛn sɔ́n, kɛ́ɛnya.» O ywáaninngee ŋó lɔ́, kwáantɔ óo kɛ́ɛnya. 14O kwɔ, Ɛnza ŋé fɔ cɛ o yɛ́ kɛ́ a mangbɛya a yɛ́ cɛ́ɛne kó: «Í kɛ́nan fɔ mɔɔn sí yɛ́ kó né lée i lákɛɛnya lɛ. Waa táa i yɛ́ɛ yáa faanlɛɛɲansebhaa ó lá. Musa é fáanlɛɛ mín ngófɔ sɛ́nnɛnyali ó ta fa nvɛ́, ii ó bhɔ́ kɛ́ a yáa mɔɔn ólu lá kó i wɛ́ɛ kɛ́ɛnya.»
15O bɛ́ kwɔ́, Ɛnza ndɔ́ɔ é bhɔ́ kɛ́ táa ɲɛ́n fɔ mɔɔn shɛ́ɛman ndɛ́ɛ tóla kɛ́ táa i ládhyɛ a tɔ́ɔfɛ ké íi a yɛ́ kóman ó lɔ́myɛn, wáman ké aa i lákɛɛnya. 16Waa Ɛnza ngée ndɛ́ɛ táala dhyɛ́ ó lɔ́ kɛ́ Ala dɛ́li yé.
Ɛnza ŋé kuugba lɔ kɛ́ɛnyala
Matiyu 9.1-8; Maki 2.1-12
17Lo nɔ lá, kɛ́ Ɛnza ndó mɔɔn ólu kálanan, Falizɛn ŋólu ni sɛ́liya kaamɔɔn lɔ́lu síininndɛ́ɛ yé. I tɛ́ wɛ́ɛ nan kɛ́ bhɔ́ Galile mála sódhyenin ŋólu bɛ́ lá, óni Zude mala ó lɔ́ óni Yeluzalɛmu kɔ́ɔnnɔn. Mantii Ala yɛ́ sébhaaya ó tɛ́ɛ Ɛnza nvɛ́ kɛ yaangalotɔ ólu lákɛɛnyala. 18Cɛ lɔ́lu táa kuugba lɔ́ lé o ywáa ó lɔ́. A lánin ndɛ́ɛ gbasa o ka. I tɛ́ɛ ɲán ɲíinan kɛ́ lo ni ó cɛ ó lé bhó ŋó kɔɔnnɔn kɛ́ a lá lá Ɛnza ɲánkɔɔ. 19I mán ɲán sɔ́ɔ a mán kɛ ló ní ale yaman ó kósɔn. O lɔ, ii táa i yɛ́ɛ bhó ŋó kúnnɔn kɛ ó ywáa lɔ wáa. Kɛ kuugba ó tó gbasa ó ka, íi a láyii o jáan ó fɛ́ yaman ó cɛ́man ni yúu lɔ lá Ɛnza ɲánkɔɔ. 20Ɛnza ŋé a yé kó ó mɔɔn ólu wɛ́ɛ lá ale la mínngɛ, aa fɔ kó: «Cɛ, i yɛ yúumu ólu wɛ́ɛ yafa i mán.»
21 Sɛliya kaamɔɔn ólu ní Falizɛn ŋólu a lámyaan kɛ́ fɔ i kɔ́ɔnnɔn kó: «Míin ŋé yɛ́ɛtii le tó aa Ala tɔ́ɔ cáannan tá? Yɛ́ɛtii é sé kɛ mɔɔn ó yɛ yúumu ólu yafa a mán ni Ala kée ndɛ́?»
22Waa Ɛnza ŋé i míliya ó lɔ kɛ́ fɔ i yɛ́ kó: «Mínnɛɛn le kósɔn aa í milila tá? 23A fɔ ó kó: ‹I yɛ́ yúumu ólu wɛ́ɛ yafa,› wáman kɛ́ fɔ a yɛ́ kó: ‹I wíi kɛ́ táamankɛ,› o kóman fyaa ó lɔ́, a mínnɛɛn lé fɔ a dí? 24Waa ní a fɛ́ ké aa lɔ kó sé é mɔɔn Dhyénjɛ ó yɛ́ kɛ́ mɔɔn ó yɛ́ yúumu ó yafa kɛ́ tó dínɲan lɔ́.» O lɔ, aa fɔ kuugba ó yɛ́ kó: «Ní fɔ́la i yɛ́, í wíi kɛ́ í yɛ́ gbasa ó tá kɛ́ táa lúman.»
25O ywáaninngee ŋó lɔ́, cɛ óo i wíi mɔɔn ólu ɲánla kɛ́ a yɛ́ gbasa ó tá kɛ́ táa a bhóo lúman. A táatɔ ó tɛ́ɛ Ala tando lá. 26I bɛ́ é káwakoya. Íi Ala tando. I sháanninba óo fɔ kó: «Án wɛ́ɛ káwananngo yé bí lɛ́!»
Ɛnza ŋé Levi kíila
Matiyu 9.9-13; Maki 2.13-17
27O kwɔ́, Ɛnza ŋé bhɔ́ yé, aa nísɔɔnmyaanbhaa lɔ́ yé mín ndɔ́ɔ kó Levi, a síininndɛ́ɛ nísɔɔnmyaanbhaa ólu yɛ́ bháalakɛlaa ó lɔ́. Ɛnza ŋé fɔ a yɛ́ kó: «Bhyáa ngwɔ́.» 28Levi é a yɛ́ bháala ó tó yé kɛ́ i wíi kɛ́ i bhyáa Ɛnza ngwɔ.
29O kwɔ́, Levi é sunmanmba lɔ́bhyɛ a yɛ́ bhó ŋó lá Ɛnza ɲɛ́n. Nísɔɔnmyaanbhaa shɛ́ɛman ní mɔɔn gbɛ́ɛlu tɛ́ɛ yé. I tɛ́ɛ lɔ́min kɛ́ ni Ɛnza ní a kwɔ́mɔɔn ólu lé. 30Falizɛn ŋólu ní í yɛ́ sɛliya kaamɔɔn ólu tɛ́ɛ í mankomankomanla. Ii Ɛnza ɲɛ́n kaamɔɔndhye ŋólu mánɲaankɛ kó: «Mínnɛɛn le kósɔn áa lɔ́min kɛ́la kɛ minin kɛ ni nísɔɔnmyaanbhaa ólu ní kóyoongɛbhaa ólu le?»
31 Ɛnza ŋé kóman ó tá kɛ í yawi kó: «Mɔɔn mínnu kɛ́ɛnyanin ɲé, ólu manko tɛ́ lɔɔtɔlɔ lá, yaangalotɔ héelu manko é lɔɔtɔlɔ lá. 32Né mán nan mɔɔnteenin ŋólu kíila, waa née nan yúumutɔ héelu kíila ké íi i yósoguun ŋó yɛ́ɛman kɛ́ fala i yɛ́ kóyoo ŋólu lá.»
Ɛnza ŋé kómanla súnno ngó ó lɔ́
Matiyu 9.14-17; Maki 2.18-20
33 Falizɛn nɔlu fɔ Ɛnza ɲɛ́n kó: «Yaya yɛ́ kaamɔɔndhye ŋólu ní Falizɛn ŋólu yɛ́ kaamɔɔndhye ŋólu sún nonan wáati shɛ́ɛman kɛ́ Ala dɛ́li, wáa i tá ólu lɔ́min kɛ́la kɛ́ mínnin kɛ.»
34 Ɛnza ŋé í yawa kó: «Fúu síi lo ŋo la aa sé kɛ́ fɔ kwɛ́ɛnkwaa cɛ ó tɛ́ɛcɛ ólu yɛ́ ko íi súnno kɛ́ íle ní kwɛ́ɛnkwaa cɛ ó tó ɲɔ́ɔn nvɛ́ a? 35Waa ló nɔ́ yáa sé, kwɛ́ɛnkwaa cɛ ó yáa bwási i lá, i yáa súnno o ló ŋolu la.»
36Ɛnza ŋé saanan míin na i yɛ́ kó: «Mɔɔn sí tɛ́ faanikwaa ó fálanan kɛ́ o gúun ŋo tá kɛ́ fáani kɔɔ ó jáan ó lábɛɛ ó lá. Ni ó kɛ́ kɛ, faanikwaa ó wɛ́ɛ cáan, a gúun ŋó táa bhyɛ ní faani kɔɔ ó lé. 37O ɲán ó mán mɔɔn sí tɛ́ lɛ́zɛnnji kwáa ó kɛ́la bhwée kɔɔ ó kɔ́ɔnnɔn. Ni ó kɛ́ kɛ, lɛ́zɛnnji ó yáa bhwée ó cé, lɛ́zɛnnji ó yáa bwɔ́ lúuman; ké bɔɔn wɛ́ɛ kɛ́ bhwée ó lɔ́ lé wé. 38Lɛ́zɛnnji kwáa o kákan né kɛ́ kɛ bhwée kwáa lé kɔ́ɔnnɔn. 39Ni mɔɔn mín nɛ́ɛnin ngɛ́ kɛ́ lɛ́zɛnnji kɔɔ ó mínnan, o tíi ó tɛ́ kɛ́la lɛ́zɛnnji kwáa ó fɛ́, kɛ mansɔɔ aa fɔ́la le kó lɛ́zɛnnji kɔɔ ó lé káɲin.»
Currently Selected:
Luka 5: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.