Luka 19
19
Ɛnza ŋé táala Zashe yɛ lú ó man
1Ɛnza nónin ŋó kwɔ́ Zeliko só ó kɔɔnnɔn. A tɛ́ɛ só ó lɔ́tinminnan. 2Nísɔɔnmyaanbhaa ólu yɛ ɲɛ́nmɔɔn lɔ tɛ́ɛ yé, o tɔ́ɔ kó Zashe. Nanfoo shɛ́ɛman ndɛ́ɛ a bhóo. 3Zashe tɛ́ɛfɛ kɛ Ɛnza ɲé, wáa a tɛ́ tɛ sé kɛ a yé yaman ó kósɔn, kɛ mansɔɔ a tɛ́ɛ sún né. 4Aa bwée kɛ táa i yɛ́ɛ fígisun nɔ la ɲɛ́nnzhaafɛ ké aa Ɛnza ɲé, kɛ mansɔɔ Ɛnza ngákan kɛ tínmin yé. 5Ɛnza ŋé sé o ywáa ó lɔ mínngɛ, aa í ɲángbaan sáman kɛ fɔ kó: «Zashe, i láteeya kɛ i yíi jónan. Kɛ mansɔɔ né kákan kɛ ɲíi i bhóo lúman bí.»
6Zashe é i láteeya kɛ i yíi jónan, kɛ́ Ɛnza nɔ́bhyɛ ni nisɔdhyaa le. 7Mɔɔn ólu ó yé mínngɛ, í bɛ́ɛ Ɛnza mankomankoman kó: «Cɛ míin wɛɛ sɔ́n kɛ táa í yíi yúumutɔ ó fɛ yé.»
8Wáa Zashe lɔ́nin ŋé tó Mantii ó ɲánkɔɔ kɛ fɔ kó: «Mantii ó, né yáa mbóofe ŋó fán ngée ndí faannda ŋólu mán, ni kɛ kɛ́ ké né wɛ́ɛ mɔɔn lɔ tɔ́nɲɔɔn kɛ a bhóofe ŋó myáan a lá, né yáa o ɲɔ́ɔn náannin lákwɔsɛɛ o tíi ó mán.»
9Ɛnza ŋé fɔ i yɛ kó: «Kísili ó wɛ́ɛ sé bhó míin ngɔɔnnɔn bí, kɛ mansɔɔ cɛ míin ŋé Bulaaman dhyé ŋó lɔ le lé. 10Mɔɔn Dhyénjɛ ó wɛ́ɛ nan kɛ́ mɔɔn túunnin ŋólu ɲíin kɛ́ i kísi.»
Mansacɛ ó dhyénjɛ o yɛ́ saanan ó
Matiyu 25.14-30
11Mɔɔn mínnu tɛ́ɛ Ɛnza nɔ́myɛnnan, áa saanan lɔ lá i yɛ, kɛ mansɔɔ i tɛ́wɛɛ súnɲan Yeluzalɛmu la. Óni mɔɔn ólu tɛ́ɛ í mílila kó Ala yɛ́ Mansaya ó káa yáa o wáati ó lé lɔ. 12A kó: «Faanman nɔ dhyé ndɛ́ɛ táala yamaanja nɔ lɔ, ké íi a kɛ mansa lé o yamaan ó lɔ, kɛ í kwɔ́sɛɛ. 13Sánnin aa táa, aa a yɛ bháalakɛdhye ndá ngíi kɛ sɛ́ɛnnguu kée ngée ndí i bɛ́ kée ngée mán, kɛ fɔ i yɛ kó: Áa feekɛ ni o le sánnin ni ngwɔ́sɛɛ kɛ́nan. 14Wáa a kó ó tɛ́ mán ndí a yɛ yamaanlɔ mɔɔn ólu yɛ. Ólu mɔɔn bhyáa kɛ́ táa fɔ mansacɛba ó yɛ kó: i tɛ́fɛ ké cɛ míin ŋán i síi i kúnnan.
15A kɛnin ŋó kwɔ́ mansacɛ le, aa í kwɔ́sɛɛ a yɛ yamaan ó lɔ. A tɛ́wɛɛ wɛ́ɛ ó dí a yɛ bháalakɛdhye mínnu mán, áa ólu kíi kɛ́nan. Kó ii tɔɔn mín nzɔ́ɔ, ii nan ó yáa. 16Bháalakɛdhye njónan óo nan, óo fɔ kó: ‹Mantii o, ii sɛ́ɛnnguu mín ndí né mán, né wɛɛ ó si tá né sɔ́ɔ tɔɔn le.› 17Kunndii ó fɔ a yɛ kó: ‹Í wɛ́ɛ bháalabhɛɛ kɛ! Íi bháalakɛdhyemɛɛ lé le, í wɛ́ɛ kɛ́ mɔɔn téenin ne kó fítiinin nɔn, né yáa í síi só tá ngunnan.› 18Bháalakɛdhye nváaɲɔɔn óo í mángbaa, óo fɔ kó: ‹Mantii o, ii sɛ́ɛnnguu mín ndí né mán, né wɛ́ɛ ó si lóo sɔ́ɔ tɔɔn le.› 19A kunndii ó fɔ a yɛ kó: ‹Né yáa íle lásii só lóo kunnan.›
20Bháalakɛdhye gbɛ́ɛ é nan kɛ fɔ a kunndii ó yɛ kó: ‹Mantii ó, ii sɛ́ɛnnguu mín ndí né mán, né tɛ́wɛɛ a bhyáa faani lɔ́lɔ kɛ́ a mala a mánfɛɛ nin. 21Né tɛ́ɛ sháannan í ɲɛ́n kɛ mansɔɔ í yɛ kó ó a gbɛ́ɛ. I mán fé mín bhyáa, ii ó lé tála. I mán sɛɛn mín ngɛ́, ii o sunman ŋó le tɛ́ɛla.› 22A kunndii óo fɔ a yɛ kó: ‹Bháalakɛdhye ɲóo, né yáa kíti tɛ́ɛ í ka í gbú yɛ kóman ó kósɔn. I tɛ́ɛ lɔ́ ŋóo ɲɛ́n kó ó a gbɛ́ɛ. Mán fé mín bhyáa, ní óle tála. Mán sɛɛn mín ngɛ́, ní o sunman ŋó le tɛ́ɛla. 23Mínnɛɛn lé kósɔn i mán ɲɛ́n wɛ́ɛ ó ló wɛ́ɛlamalabhaa ólu bhóo, ké ndɛ́ɛ nan a tɔɔn ó sɔ́ɔ a ka.›
24O kwɔ, mɔɔn mínnu tɛ́ɛ yé, a kunndii ó fɔ ólu yɛ kó: Aa sɛ́ɛnnguu ó myáan a lá, kɛ a dí sɛ́ɛnnguu tá ndíi ó mán. 25Ii fɔ a yɛ kó: ‹Mantii ó, sɛ́ɛnnguu tá ŋé ale bhóo kɛ bhá!› 26‹I kunndii óo fɔ kó: lɔ́ é mɔɔn mín móo, lɔ yáa bhyáa o tíi ó tá ó ka; lɔ́ tɛ́ mín móo, yáanin fítiinin míin a bhóo, o yáa myáan a lá. 27Sísan, né yúu mínnu tɛ tɛ́ fɛ kéni kɛ í yɛ mansacɛ óle, aa i myaan kɛ́nan ní i bɛ́ le né ɲánkɔɔ kɛ í fáa né ɲanla.› »
28Ɛnza ŋé kóman ó fɔ kɛ́wɛɛ wáati mínnɔn, aa tínmin i ɲɛ́n, ii sháa ó myáan kɛ́ táa Yeluzalɛmu.
Ɛnza ŋé lónan Yeluzalɛmu
Matiyu 21.1-11,15-17; Maki 11.1-11; Yaya 12.12-16
29Ii gbaa Bɛtifaze ní Betani lá Olivyetii ó tɔ́ɔfɛ mínngɛ. Aa a yɛ kaamɔɔndhye ŋó fyáa bhyáashaa. 30Kɛ fɔ i yɛ kó: «Só míin an ɲɛ́nnzhaafɛ nín, áa táa o la. A kɛ ló ndɛ́nmɛn, a yáa sofɛɛnin dhyé nɔ́ gúunnin ɲé. Mɔɔn sí mán í síi o ka mbá. Áa a fwée kɛ́nan ale. 31Ní mɔɔn lɔ kɛ́ a mánɲaankɛ kó mínnɛɛn la aa a fwéenan, aa ó tíi ó yawi kó Mantii ó lé manko é a lá.»
32Céladhye nváa óo, Ɛnza ndɛ́wɛɛ fɔ i yɛ ɲán mín man, ii táa sofɛɛnin ngbee ŋó sɔ́ɔ cé. 33I tɛ́ɛ sofɛɛnin ngbee ŋó fwéenan mínngɛ, sofɛɛnin ndíi ó i mánɲaankɛ kó: «Mínnɛɛn la áa sofɛɛnin ngbee ŋó fwéenan?»
34Ii a yawi kó: «Mantii ó lé manko é a lá.» 35Ii táa sofɛɛnin ngbee ŋó le Ɛnza nzaala. Íi i yɛ faani nɔ́lu lá a kwɔ́lɔ, tó kɛ Ɛnza náyɛɛ a ka. 36Ɛnza ndáa tɔ ó, mɔɔn ólu tɛ́ɛ i yɛ faani ŋólu lɔ́woo lá sháa o ka.
37I tɛ́ɛ wɛɛ súnɲan Yeluzalɛmu lá mínngɛ, ké ii Olivyetiilayii ó la, ale ní a yɛ kaamɔɔndhye nzhɛ́ɛman ŋó, i bɛ́ tɛ́ɛ nisɔdhyaa o lɔ, íi lámyaan kɛ Ala tando í kánnanyɛɛnin né a yɛ káwako kɛ́nin ŋólu bɛ́ kósɔn. 38I tɛ́ɛ fɔ́la kó:
«Mansacɛ míin nánla Mantii ó tɔ́ɔla,
tando óo o yɛ.
Hɛ́lɛ ó waa kɛ́ sángboo ó lɔ,
nɔ́lɔ ó waa lá Ala tɔ́ɔ ó ka sámanlaa ó bɛ́ lɔ!»
39 Falizɛn nɔ́lu tó yaman ó cɛ́man kɛ fɔ Ɛnza ɲɛn kó: «Kaamɔɔn, a fɔ í yɛ kaamɔɔndhye ŋólu yɛ kó íi i lumandhye!»
40Ɛnza ŋé i yawi kó: «Ní í fɔ́la a yɛ ngó: Ní í kɛ í lumandhye, káwaguun ŋólu yáa gbáangɛ i lée ɲɔ́ɔn ná.»
Ɛnza ngó Yeluzalɛmu káa cé
41Ɛnza ŋé súnɲan Yeluzalɛmu lá mínngɛ, aa só ó yé mínngɛ, aa kásikɛ. 42A kó: «Ní ile tɛ́ɛ a lɔ bí, ko i káa hɛ́lɛ ó sɔɔ ɲan mín mán. Wáa sísan o wɛɛ i lóonaankɛ i man. 43Kɛ mansɔɔ Ló nɔ yáa sé, i yúu ólu yáa i lamiin ni kówi ólu lé, i yáa a lamiin kɛ a gbɛ́nnɛn fán ŋó bɛ́ fɛ. 44I yáa a yɛ só ó cé, kɛ ile ni í dhyé ŋólu bɛ́ hálaki, i yáa bhó ŋólu bɛ́ cé káwa ó sí táa tó ɲɔ́ɔnnga. Kɛ mansɔɔ Ala tɛ́ɛ fɛ́ kɛ a dhyɛman wáati mínnɔn, a mán sɔ́n ó man.»
Ɛnza ŋé Ala bhatobhomba ó sɛ́nnɛnyala
Matiyu 21.12-17; Maki 11.15-19; Yaya 2.13-22
45Ɛnza ŋé ló Ala bhatobhomba ó kɔ́ɔnnɔn, aa a lámyaan kɛ feekɛbhaa ólu gbɛ́. 46Aa fɔ i yɛ kó: A sɛwɛnin ɲé kó, ɲɛ́n bhó ŋó káa kɛ́ Ala yɛ sɛ́ɛbho ne le. Wáa álee wɛ́ɛ o kɛ so ŋólu lóonaankɛlaa lé!
47Ɛnza ndɛ́ɛ mɔɔn ólu kalanan Ala bhatobhomba ó kɔ́ɔnnɔn ló ŋóo ló. Faanlɛɛɲansebhaa olu kúnndii óni sɛliya kaamɔɔn ólu ní yaman ó ɲɛ́nmɔɔn ólu tɛ́ɛ Ɛnza nváa kó o ɲanɲiinan. 48Wáa i tɛ́ káa kɛ ɲán mín man, i tɛ́ mán ó lɔ, kɛ mansɔɔ mɔɔn ólu bɛ́ tɛ́ɛ a kómankan ŋó lɔ́myɛnnan.
Currently Selected:
Luka 19: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.