Luka 18
18
Kítitɛɛbhaa óni finɲanmuso ó yɛ́ saanan ó
1Ɛnza ŋé saanan lɔ lá kaamɔɔndhye ŋólu yɛ, kɛ yáa i la kó i kákan né kɛ Ala dɛ́li wáati bɛ́, ko í kɛ́nan i gbɔ́ɔ nɔ́n fáa. 2Aa fɔ́ ko: «Kítitɛɛbhaa lɔ tɛ́ɛ só lɔ la. O kítitɛɛbhaa ó tɛ́ tɛ sháannan Ala ɲɛn, a tɛ́ tɛ mɔɔn sí bwóɲanla. 3O só kée ŋó kɔ́ɔnnɔn, finɲanmuso lɔ tɛ́ɛ yé o tɛ́ɛ táala a saala kɛ́ fɔ a yɛ kó: Aa a dhyɛman kɛ a yɛ kíti ó tɛ́ɛ ale ní a kɛ́ɛkɛɲɔɔn ó cɛ. 4Muso óo myɛ́n o lɔ́. Kítitɛɛbhaa o tɛ́ tɛ fɛ kɛ sɔ́n. Wáa aa sé wáati lɔ mán, aa fɔ a yɛ́ɛ kɔ́ɔnnɔn kó: ‹Yáanin né mán kɛ sháannan Ala ɲɛn óni né tɛ́ mɔɔn sí bwóɲanla. 5Né yáa finɲanmuso míin dhyɛman kɛ a yɛ́ kó ó ɲanbhɔ a yɛ, kɛ mansɔɔ áa ne sɛ́ɛla kɛ́timin, ní ó tɛ́, a yáa nan né ní ó tɔ́lɔ wáati bɛ́.› »
6O lɔ, Mantii ó fɔ kó: «Aa kítitɛɛbhaa téemɛɛ míin ɲɛn kóman ó lɔ́myɛn. 7Sísan, Ala wɛ́ɛ mɔɔn mínnu lɔ́tɔnmɔn kɛ́ kɛ a tá le, tó ólu dhyɛmanli ɲíinnan a fɛ sú ni tée, a yáa myɛ́n kɛ́ ólu dhyɛman ŋán? 8Ní fɔ́la a yɛ ngó a yáa i yɛ́ ko ó ɲanbhɔ jónan. Wáa mɔɔn Dhyénjɛ ó káa í kwɔ́sɛɛ wáati mínnɔn, a yáa nan lánanya sɔ́ɔ lúukolo ó ka ŋán?»
Falizɛn ŋó ni nísɔɔnmyaanbhaa ó yɛ saanan ó
9Mɔɔn mínnu tɛ́ɛ i yɛ́ɛ yacesiila mɔɔnteenin nu le, tó í tɛ́ tɛ mɔɔn tɔ ólu yacesiila, Ɛnza ŋé saanan gbɛ́ɛ la ólu yɛ kó: 10«Ló nɔ́ la, cɛ fyáa é táa Ala bhatobhomba ó kɔ́ɔnnɔn kɛ́ Ala dɛ́li. Kée ndɛ́ɛ Falizɛn né, a tɔ kée ŋó tɛ́ɛ nísɔɔnmyaanbhaa lé le.
11Falizɛn ŋó í wíi kɛ i lɔ, kɛ́ i sɛ́ɛ a yɛ́ɛ kɔ́ɔnnɔn kó: Aa Ala, née bálika bhɔ́la i yɛ kɛ mansɔɔ ne tɛ́ óyoo mɔɔn tɔ ólu, mínnu soɲan kɛ́la, óni téemɛɛyako ólu kɛ́la, óni ɲɔnmɔɔnya ó, né tɛ́ óyoo nísɔɔnmyaanbhaa míin nin. 12Née sún nónan lɔ́ɔwoocɛ ó kɔɔnnɔn síɲan fyáa kɛ. Ní fé ŋóo fé nzɔ́ɔla, ní o bɛ́ yáa bhɔ́la.
13Nísɔɔnmyaanbhaa ó lɔ́nin ndɛ́ɛ a kwɔ́man ywáaja nɔn. A mán sɔ́n kɛ á ɲan o láwii sáman, wáa a tɛ́ɛ a sísi ó mángbasigbasila nílafin ŋó kósɔn, kɛ fɔ kó: ‹Ée Ala, hínnɛn né la, née yúumutɔ lé le.› » 14Ɛnza ŋé fɔ kó: «A tó ké ní fɔ a yɛ ngó Ala é nísɔɔnmyaanbhaa ó yacesii mɔɔnteenin ne sannin aa í kwɔ́sɛɛ lúman. Wáa a mán Falizɛn ŋó yacesii mɔɔnteenin ne, kɛ mansɔɔ mɔɔn óo mɔɔn kɛ́ a yɛ́ɛ lɔ́bwoɲan, o tíi ó yáa i manyii, wáa mɔɔn óo mɔɔn kɛ́ a yɛ́ɛ mányii, Ala yáa ó tíi ó bwóɲan.»
Ɛnza ŋé lwáau bhyáala dhyéɲɛɛnnin ngwáa ólu fɛ
Matiyu 19.13-15; Maki 10.13-16
15Mɔɔn lɔ́lu tɛ́ɛ nánla ni dhyéɲɛɛnnin ngwáa ólu le Ɛnza nzaala ké aa í bhóo túu i la. A yɛ kaamɔɔndhye ŋólu ó yé mínngɛ, íi yámanngɛ i mán. 16Ɛnza ŋé fɔ́ ko íi nan dhyémuu ólu le, tó kɛ fɔ kó: «Aa dhyémuu ólu tó yé ké íi nan né mán, a kɛ́nan i lá bá. Kɛ mansɔɔ mɔɔn mínnu é óyoo dhyémuu lu, Ala yɛ́ Mansaya óo o lée lú tá le. 17Ní fɔ́la a yɛ tínɲan in né ngó, Ní mɔɔn óo mɔɔn mán í bhóo síi Ala yɛ́ Mansaya ó kɔɔ óyoo dhyémuu ólu, o tíi ó táa ló tún.»
Ɛnza é kómanla nanfootii ólu yɛ
Matiyu 19.16-30; Maki 10.17-31
18Yawudhyaa ólu Kunndii lɔ é Ɛnza mánɲaankɛ kó: «Kaamɔɔnbhɛɛ, né kákan kɛ mínnɛɛn le kɛ́ kɛ ɲáanmanɲan wɛ́ɛbhɛɛ ó sɔ́ɔ?»
19 Ɛnza ŋé fɔ a yɛ kó: Mínnɛɛn le kósɔn tó íi ngíila kó kaamɔɔnbhɛɛ? Mɔɔn sí tɛ́ mɔɔnbhɛɛ le fɔ́ Ala kéembe. 20Íi Ala yɛ tɔ́ ŋólu lɔ́: Í manngan kɛ ɲɔnmɔɔnya kɛ, í manngan kɛ mɔɔn fáa, í manngan kɛ soɲan kɛ, í manngan kɛ fwɔnɲan la í mɔɔnɲɔɔn ó la, í fá ní í wóobhaa bwóɲan.
21Aa Ɛnza yawi kó: «Né wɛ́ɛ o sháa ó látaaman Kanbiini né dhyémuu ya tɔ́ɔ o le.»
22Ɛnza ŋé o kóman ó myɛ́n mínngɛ, aa fɔ a yɛ kó: «Fé ngée ne wɛ́ɛ í jɛn. Táa í bhóofe ŋó bɛ́ fele kɛ a wɛ́ɛ ó lɔ́taandaa faannda ŋólu la, o kɛ́ kɛ, i yáa nanfooba sɔ́ɔ sá ŋó lɔ. Í kɛ́wɛɛ o la, íi nan bhyáa né kwɔ́.» 23Wáa cɛ óo o kóman ó myɛ́n mínngɛ, aa i ɲanlasii, kɛ mansɔɔ nanfoobatii lé tɛ́ɛ ale.
24Ɛnza ŋé nanfootii ó ɲanlasiinin ɲé mínngɛ, aa fɔ kó: «Nanfootii ó ló ŋó Ala yɛ́ Mansaya ó lɔ, o lo an gbɛ́ɛ ósɔ! 25Ɲɔ́ɔnmɛɛn ó ló ŋó nɔɔnyanin ŋé kɛ́ɛla ŋó jáan ó fɛ́ kɛ tínmin nanfootii ó ló ŋó ka Ala yɛ́ Mansaya ó lɔ́.»
26Ɛnza nɔ́myɛnmaa ólu fɔ kó: «O lɔ, yɛ́ne káa kísi sa?»
27Ɛnza ŋé i yawi kó: «Kó mín nzé ndɛ́ Adamandhye ŋó yɛ, o sé é Ala yɛ.»
28Piyɛli é fɔ Ɛnza ɲɛn kó: «Án née wɛɛ, án ŋwɛ́ɛn an ngwɔ́kɛ án bhóofe ŋó bɛ́ la tó kɛ bhyáa íkwɔ.»
29Ɛnza ŋé a yawi kó: «Tó ní fɔ a yɛ tínɲan in né ngó, ní mɔɔn óo mɔɔn kɛ́ jɛn kɛ i kwɔ́kɛ a yɛ bhó ŋó la, óni a muso la, óni a mádhyeman ŋólu la, óni a wóobhaa ni a fa la, óni a dhyé ŋólu la, Ala yɛ́ mansaya ó kósɔn, 30o tíi ó yáa ó fé ŋó ɲɔ́ɔn shɛ́ɛman nzɔ́ɔ dínɲan míin nɔn. A yáa ɲáanmanɲan wɛ́ɛbhɛɛ ó sɔ́ɔ síin.»
Ɛnza ŋé a saya óni a kúunngo ó fɔ́la í kwɔ́
Matiyu 20.17-19; Maki 10.32-34
31Ɛnza ŋé a yɛ kaamɔɔndhye ndá ni fyáa ó kíi kɛ fɔ i yɛ kó: «Áa a mánfɛɛ, án ní táala Yeluzalɛmu. O ywáa ó lɔ, céla ólu tɛ́ wɛ́ɛ kóman mínnu sɛ́wɛ mɔɔn Dhyénjɛ ó yɛ kó ó lɔ, o yáa i lafa o ɲán ó mán. 32I yáa a myaan kɛ a ló síya gbɛ́ɛ olu bhóo, ólu yáa yɛ́ɛbhɔ a lɔ, kɛ́ a nɛ́ɛn, kɛ́ í láji bwɔ́ a ka, 33kɛ́ a gbasi ni gbɛ́nɲɛn óle kɛ́ tó a fáala. Waa tée sawa a fáanin ŋó kwɔ́, a yáa kúun.»
34A yɛ kaamɔɔndhye ŋólu mán bhɔ́ fósi ɲánle ó kóman ó lɔ. O kóman ó kɔɔ ó lóonaankɛnin ŋé tó i man, i mán bhɔ́ o kóman o ɲánle.
Ɛnza ŋé fyóondɔ lɔ ɲán lákala
Matiyu 20.29-34; Maki 10.46-52
35Ɛnza ŋé súnɲan Zeliko la mínngɛ, oo wáati ó lɔ fyóonjɛ lɔ síininndɛ́ɛ sháa gbóo nvɛ́ a tɛ́ɛ lɛ́ɛli kɛ. 36Fyóonjɛ ó yaman ó mánngan ŋó myɛ́n ké íi tínminnan, aa mánɲaankɛli kɛ́ kó: «Mínnɛɛn lé wɛ́ɛ kɛ́?»
37Ii fɔ a yɛ kó Ɛnza Nazalɛtika lée tínminnan.
38Oo kɛ mínngɛ, aa gbáa kó: «Laula Bhɔ́nzɔ Ɛnza, manɲwaan né la!»
39Mɔɔn mínnu tɛ́ɛ i ɲɛn, ólu yámanngɛ a man kó aa í lúmandhye, wáa aa lɔbhyaa a gbáanzeɲan ŋó ka kɛ fɔ kó: «Laula Bhɔ́nzɔ ŋó, manɲwaan né la!»
40Ɛnza ŋé í lɔ, kɛ fɔ kó ii nán ní fyóonjɛ óle a saala. Ii nán ale Ɛnza nzaala mínngɛ, Ɛnza ŋé a manɲaankɛ kó: 41«Ii fɛ ké ní mínnɛɛn le kɛ í yɛ?»
Aa Ɛnza yawi kó: «Mantii ó, ní fɛ kɛ yéli lé kɛ ko kwáa kɛ.»
42Ɛnza ŋé fɔ a yɛ kó: «Yéli kɛ. I yɛ lánanya ó wɛ́ɛ i lákɛɛnya.»
43O ywáaninngee ŋó lɔ, aa yéli kɛ, aa i bhyáa Ɛnza ngwɔ ké áa Ala tando o la. Mɔɔn ólu ó yé mínngɛ, íi Ala tando íkwɔ.
Currently Selected:
Luka 18: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.