Luka 13
13
Áa a yóso ólu yɛ́ɛman!
1O wáati o lɔ, Pilati é Galileka lɔ́lu fáa kɛ i tó faanlɛɛbhɔ o la Ala yɛ, fɔ́ ólu yée o ɲáanminnan faanlɛɛ yée óle. Mɔɔn lɔ́lu nan o lákɛɛ Ɛnza ɲɛn. 2Ɛnza ŋé fɔ i yɛ kó: «Áa i milila kó Galileka mínnuu fáa wé, kó ólu yɛ yúumu o tɛ́ɛ bwó kɛ tínmin Galileka ólu tɔ́ ólu bɛ́ ta ó ka ŋán? 3O tɛ́, ní fɔ́la a yɛ ngó. Wáa ní a mán niminsa kɛ a yóo ólu yɛ́ɛman kɛ fala a yɛ kóyoo ŋólu la, a bɛ́ káa saya kɛ́ o ɲan óle mán. 4Silowe sangaso óo bé mɔɔn tá ni sɛ́ɲin mínnu ka kɛ i fáa, áa i milila kó ólu tɛ́ɛ yúumukɛbhaa le lé kɛ tínmin Yeluzalɛmuka ólu ka ŋán? 5O tɛ́, Ní fɔ́la a yɛ ngó. Ní a mán niminsa kɛ a yóo ólu yɛ́ɛman, a bɛ́ káa sayakɛ o ɲan o le mán.»
Fígisun dhyéngɛbhɛɛ ó yɛ saanan o
6O lɔ, Ɛnza ŋé saanan míin ná i yɛ kó: «Fígisun ndɛ́ɛ cɛ lɔ bhóo a yɛ lɛ́zɛnnvyɛ o lɔ. Ló nɔ́ la, cɛ óo táa dhyé ɲíin fígisun o la, wáa a mán dhyé nzɔ́ɔ a lá. 7Oo kɛ mínngɛ, aa fɔ a yɛ bháalakɛdhye ŋo yɛ kó: ‹Né sanɲin sawa lée nín, ní nánla dhyé ɲíinnan fígisun míin nan, wáa né tɛ́ dhyé nzɔ́ɔla a lá. A tɛ́ɛ! A tó kún ndɛ́ a lá sɛɛn o mán.› 8Wáa bháalakɛdhye ŋóo fɔ a yɛ kó: ‹Mantii o, a tó yénɔn ɲán. Né yáa jáan shɛ́n kɛ a lamiin kɛ nɔ́ɔn kɛ́ a kɔɔ. 9Kɛ́dhyaa a yáa i dhyé ngɛ́ sá gbɛ́ɛ. Ní a mán i dhyé ngɛ́, ii a tɛ́ɛ.› »
Ɛnza ŋé muso lɔ lákɛɛnyala lɔnwɛɛnlilo nɔ́la
10 Lɔnwɛɛnlilo nɔ́ la, Ɛnza ndɛ́ɛ mɔɔn ólu kalanan sɛ́ɛbho nɔ́ kɔɔnnɔn. 11Muso lɔ tɛ́ɛ o ywáa ó lɔ, Lámansayoo né tɛ́ɛ o fɛ kabiini sánɲin tá ní sɛ́ɲin. A tɛ́ wɛ́ɛ a kwɔ́ ó lɔ́kuu, a tɛ tɛ́ sháa í láteenan bhée. 12Ɛnza ŋé a yé sán mínnɔn, áa a kíi kɛ́ fɔ a yɛ kó: «Muso o, í wɛ́ɛ kɛ́ɛnya kɛ bhɔ́ i yɛ yangalo o lɔ.» 13Aa i bhóo lá muso ó ka. O ywáaninngee ŋó lɔ, a kwɔ́ óo i látee, aa a lamyaan kɛ́ Ala tando.
14Wáa sɛ́ɛbho ŋó kúnndii ó mwɛ́nnɛn kɛ mansɔɔ Ɛnza ŋé mɔɔn lákɛɛnya lɔnwɛɛnlilo ŋó la. Aa kóman ó tá kɛ́ fɔ yaman ó yɛ kó: «Án ngákan kɛ́ bháala kɛ́ tee wɔ́ɔlɔ le kɔɔnnɔn. Aa nan o ló ŋólu lá, ké aa álee lákɛɛnya. A kɛ́nan nán lɔnwɛɛnlilo ŋó la.»
15Mantii ó a yawi kó: «Álee fyáangafo le lé! A bɛ́ kée ngéenan tɛ́ a yɛ nisi ó, wáman a yɛ sofɛɛnin ŋó fwéenan kɛ́ táa i sɔ jí lá lɔnwɛɛnlilo ŋó la a? 16O san ó lɔ muso míin ndɛ́ Bulaaman dhyémuso o lɔ le a, tó Sɔtaannan tɛ́ wɛ́ɛ a sili ní yangalo le kabiini sánɲin tá ní sɛ́ɲin, a tɛmanngan kɛ muso míin nvwée lɔnwɛɛnlilo ŋó la a? 17Ɛnza ŋé o kóman ó fɔ mínngɛ, a yúu ólu bɛ́ɛ maloya. Yaman ó bɛ́ nisɔ é dhyáa Ɛnza ɲɛ́n kóbhɛɛ kɛnin ŋólu kósɔn.»
Mutaalikoo óni búlufunnunnve ŋó sáanan ólu
Matiyu 13.31-33; Maki 4.30-32
18Ɛnza ŋé fɔ íkwɔ kó: «Ala yɛ́ Mansaya ó bhɔ́nin ŋé mínnɛɛn le lá? Né káa a lá mínnɛɛn le mán? 19A bhɔ́nin ŋé yíi lɔ le kóo lá mín ndɔ́ɔ kó mútaali#13.19 A koo waa lɔ́ɔ lé o yóo fwée koo., cɛ lɔ́ é o kóo o kée ndá kɛ́ a lo a yɛ nánkwɔ ó lɔ. Áa i fɛ́ɛ kɛ́ bwóɲan kɛ kɛ́ yíi le. Tó sámankɔɔn ólu nan í bhó ngɛ́ a bhóo ólu la.»
Matiyu 13.33
20Ɛnza ŋé fɔ íkwɔ kó: «Né káa Ala yɛ́ Mansaya ó lá mínnɛɛn le mán? 21Aa lée óyoo muso lɔ wɛ́ɛ sɛ́ɛ tá kɛ́ a kɛ fálininmuu bhɔɔ tálanjɛ yaceya la, sɛ́ɛ fítiinin ŋóo fálininnɛɛ ó funnun.»
Kóyoongɛbhaa ólu táa lo Ɛliyanan lɔ
Matiyu 7.13-14,21-23
22Ɛnza ndáatɔ ó Yeluzalɛmu, a tɛ́ɛ sóba óni sódhyenin ŋólu lɔtinminan, ké aa mɔɔn ólu kalanan.
23Mɔɔn lɔ é a manɲaankɛ kó: «Mantii ó, mɔɔn shɛ́ɛman ndáa kísi a?»
Mantii ó a yawi kó: 24«Aa i lɔ́ja kɛ́ ló lafitiinin ŋó fɛ, kɛ mansɔɔ ni fɔ́la a yɛ ngó mɔɔn shɛ́ɛman yáa ɲánɲiin a mán kɛ́ ló, wáa i táa sé.
25Ní bhóndii ó kɛ́ i wíi kɛ́ la ó sɔ́ɔ sán mínnɔn kɛ́ a tó kɛ́ɛnman, a yáa lámyaan kɛ la ó mángbasi kɛ́ fɔ kó: ‹Mantii ó, lá ó láka án ɲɛ́n.› A yáa a yawi kó: ‹Mán á bhɔ́laa ó lɔ́.›
26O wáati ó lɔ, á yáa fɔ a yɛ kó: ‹Án ŋwɛ́ɛn lɔ́min kɛ́ ní íle, i wɛ́ɛ án ngála án ɲɛn só ó yaman ywáa ólu lɔ.› 27Mantii ó yáa fɔ a yɛ íkwɔ kó: ‹Mán a bhɔ́laa ó lɔ́, álee kóyoongɛbhaa ólu áa bhɔ́ ndɔ́ɔ fɛ́.›
28O ywáa ó lɔ, ní a kɛ́ Bulaaman, ní Shaaka, óni Yangubha óni céla ólu bɛ́ yé Ala yɛ́ Mansaya ó lɔ wáati mínnɔn, kɛ mansɔɔ álee tónin ŋé kɛ́ɛnman, o wáati o lɔ, a yáa kasi kɛ́, kɛ a bhóo ó kin. 29Mɔɔn lɔ́lu yáa nan kɛ bhɔ́ kɔ́ɔn ŋó lɔ́, óni teebe ŋó lɔ́, óni kíinmoo o fɛ́, óni nwaanmoo fán ŋó fɛ́. I yáa í síi lɔ́min ó man Ala yɛ́ Mansaya ó lɔ.
30O lɔ, mɔɔn mín núu kwɔ́shaafɛ, ólu yáa kɛ́ ɲɛnmɔɔn ólu le, tó min núu ɲɛnmɔɔn ólu le, ólu yáa kɛ́ kwɔ́shaafɛ bháa ólu le.»
Ɛnza ŋé Yeluzalɛmu kó fɔ́la
Matiyu 23.37-39
31O wáati ó lɔ́, Falizɛn nɔ́luu í mangbaa Ɛnza nan kɛ́ fɔ a yɛ kó: «Táa ywáa gbɛ́ɛ lɔ ya ŋó bhyáa, kɛ mansɔɔ Elɔdi é fɛ́ kɛ i fáa.»
32Ɛnza ŋé i yawi kó: «Aa táa fɔ o kóngowuu ó yɛ kó: Née Lámansa ólu gbɛ́nan kɛ bhɔ́ mɔɔn ólu fɛ́, kɛ́ yaangalotɔ ólu kɛ́ɛnya bí óni síin, óni a tee sawaɲɔɔnlo ŋó, né yáa wɛ́ɛ ɲɛ́n bháala ó la. 33Wáa dhyaalagboya lée né táa o lé ní ɲɛ́n sháa ó ka bí, síin óni siinngɛnɛn, kɛ mansɔɔ céla ó kákan kɛ́ saya kɛ́ Yeluzalɛmu le.
34E, Yeluzalɛmu, Yeluzalɛmu, íle mín ŋé Ala yɛ céla ólu fáala óni Ala yɛ mɔɔn bhyáashaanin ŋólu bwónan káwa la, síɲan yée lée nín ní fɛ́ kɛ a ládhyɛ óyoo shishɛ óo a dhyé ŋólu ladhyɛla a káwa ó kɔ́ɔ ɲán mín mán, Wáa a mán sɔ́n! 35Oo lɔ mínngɛ, a yɛ bhó ŋó lɔkoo ɲáan tó. Ní fɔ́la a yɛ ngó: a táa ɲé bhée fɔ ló mínnan a káa fɔ kó: Mɔɔn mín ŋé nánla Mantii ó tɔ́ɔla, tando é ó yɛ.»
Currently Selected:
Luka 13: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.