Yaya 12
12
Mwɛnyamu é látikɔlɔ bwɔ́nan Ɛnza nzé nga
Matiyu 26.6-13; Maki 14.3-9
1Tée wɔ́ɔlɔ le tɛ́ wɛ́ɛ tó ke Hɔ́lɔɲanli o ɲánlagbɛ ó a se, Ɛnza ŋé táa Betani, Laza fɛso a tɛ́ wɛ́ɛ min nzayakɛnin nákuun. 2O ywáa ó lɔ, íi Ɛnza nvánnan kɛ. Mati lé tɛ́ɛ súnman ŋó dila i mán. Laza tɛ́ɛ lɔ́minkɛbhaa ólu cɛ́man. 3Mwɛnyamu é latikɔlɔ sɔɔn gbɛ́ɛ ŋó litili tálanjɛ ta. Aa ó bwɔ́ Ɛnza nze ŋó ka, kɛ́ wɛ́ɛ kɛ́ a kúnzhe o ta kɛ́ a se ŋó jɔ́si, latikɔlɔ o swáan óo bhó ŋó myáan. 4Zudasi Sikaliyɔti, min ŋe Ɛnza ɲɛn kaamɔɔndhye ŋó lɔ́ le, ó min ngáa a lo bhóolɔ, óo fɔ kó: 5«Mínnɛɛn le kósɔn an man latikɔlɔ míin nvéle? An ndɛ́ɛ nan wɛ́ɛgbannan ngɛnmɛn sáwa sɔɔ a lɔ, an ndɛ́ɛ se kɛ o wɛ́ɛ o dí bhóokoo ŋólu mán.» 6A tɛ́ɛ ó kóman ó fɔ́la lé cé, ɲɔ́ɔntɛ Fáannda ŋólu hínnɛn tɛ́ tɛ a lɔ, waa so né tɛ́ɛ a lé. Ale lé tɛ́ɛ í yɛ́ wɛ́ɛ ó mala lá, ni wɛ́ɛ min ngɛ́ di a man kó aa o mala, aa ó kɛ a yɛ́ɛ ta le. 7Waa Ɛnza ŋé fɔ a yɛ́ kó: «Muso ó tó hɛ́lɛ lɔ, a wɛ́ɛ látikɔlɔ ó kɛ́ né ka, né sú lo ngó o le kósɔn. 8Ále ní bhóokoo ŋólu yáa kɛ́ kéene yánun wáati o bɛ́ lɔ, wáa né ní ále táa kɛ́ kéene yánun wáati o bɛ́ lɔ.»
Yawudhyaa kúnndii ólu fɛ́ kɛ Laza Fáa
9Yawudhyaa ólu shɛ́ɛman ndɛ́ wɛ́ɛ myɛ́n kó Ɛnza ŋé Betani mínngɛ, íi a lámyaan kɛ́nan yénɔn, í tɛ́ tɛ nánla Ɛnza ngée ngósɔn, wáa i tɛ́ɛ nánla Ɛnza ni Laza le kósɔn, a tɛ́ wɛ́ɛ min nákuun su ŋolu cɛ́man. 10O lɔ, faanlɛɛɲansebhaa olu kúnndii o fɔ kó Laza kákan né kɛ́ fáa. 11Kɛ mansɔɔ Laza lé kósɔn Yawudhyaa ólu shɛ́ɛman é bhɔ́ í kwɔ́ kɛ́ lá Ɛnza nan.
Ɛnza ŋé lónan Yeluzalɛmu
Matiyu 21.1-11; Maki 11.1-11; Luka 19.28-40
12O lusɔgbɛ ó, yamanba min ndɛ́ɛ nánla fɛ́ti ó man, ólu myɛ́n kó Ɛnza ŋé nánla Yeluzalɛmu. 13Íi gáanimbuu ólu tɛ́ɛ kɛ́ bhɔ́ kɛ́ táa a labhyɛ, í tɛ́ɛ gbáanan kɛ́ fɔ kó:
«Ozana mɔɔn min ŋé nánla Mantii o tɔ́ɔla,
tando é ó yɛ́, Izalayɛli yɛ mansacɛ ó.»
14Ɛnza ŋé sofɛɛnin gbée nɔ sɔ́ɔ kɛ i yɛ́ɛ ó ka óyoo a fɔnin yé Ala yɛ Kitabu ó lɔ ɲánminman kó:
15 Siyɔn dhyémuso # 12.15 Ala bhatobhomba ó lɔ́nin ndɛ́ɛ tii mínnga Yeluzalɛmu, o lé tɔ́ɔ tɛɛ kó Siyɔn. O le kósɔn lɔ́lu tɛ́ɛ Yeluzalɛmu kíila ko Siyɔn. a kɛ́nan sháan,
í yɛ́ mansacɛ ó nantɔ o mánfɛɛ nin,
a síinin yé sofɛɛnin gbée ŋo kwɔ́lɔ.
16O kó ó kɛ́ wáati ó lɔ, kaamɔɔndhye ŋólu mán bhɔ́ o ɲánle, waa Ala é Ɛnza bwóɲan mínngɛ, í hákii é tó yíila o ka kó ó kóman ólu tɛ́ wɛ́ɛ sɛ́wɛ ale lé kósɔn. O lé wɛ́ɛ kɛ́ a yɛ́.
17Ɛnza ŋé Laza min ngíi kɛ́ lábhɔ kábulu ó kɔ́ɔnnɔn, kɛ lákuun kɛ bhɔ́ sú olu cɛ́man, oo kɛ mɔɔn mínnu ɲanla, olu o sɛ́ɛya o ladi. 18Yaman tɛ́ɛ a labhyɛnan kɛ mansɔɔ í tɛ́wɛɛ myɛ́n kó a wɛ́ɛ ó káwako kɛ́.
19 Falizɛn ŋólu tɛ́ɛ fɔ́la ɲɔ́ɔn ɲɛ́n kó: «Áa a mánfɛɛ a tɛ́ sé kɛ́ fósi kɛ́ cɛ miin nan bhée, mɔɔn bɛ́ lée í bhyáala a kwɔ́».
Gɛlɛki lɔ́lu fɛ́ kɛ́ Ɛnza yé
20 Gɛlɛki lɔ́lu tɛ́ wɛ́ɛ nan fɛ́ti ó mán ké íi Ala bháto. 21Olu táa Filipu fɛ́ yé míin bhɔ́la Bɛtisayida, Galile mala ó lɔ, kɛ́ a dɛ́li kó: «Ngáamɔɔn, án ni fɛ́ kɛ́ Ɛnza ɲé.»
22Filipu é táa o fɔ Andele yɛ́, í fyáa ó bɛ́ táa o fɔ Ɛnza ɲɛ́n. 23Ɛnza ŋé í yawi kó: «Mɔɔn Dhyénjɛ ó kákan kɛ́ bwóɲan sɔ́ɔ wáati min nɔn, ó lé wɛ́ɛ sé ní. 24Tínɲan in ne ní fɔ́la a yɛ́ ngó, ni sí ó mán twée lúukolo ó lɔ, a le kée née tóla, waa ni a kɛ́ twée, aa i fɛ́ɛ, ó lɔ aa sé kɛ́ dhyé nzhɛ́ɛman ngɛ́. 25Mɔɔn min ní o waa dí a yɛ́, ó tíi o yáa bɔɔn a ní o lɔ, waa ni mɔɔn min ndɛ́ a ní ó yacesiila dínɲan míin nɔn, ó tíi o yáa a ní ó sɔ́ɔ ko kwáa kɛ, kɛ ɲáanmanɲan wɛ́ɛbhɛɛ ó sɔ́ɔ. 26Ni mɔɔn míin fɛ́ kɛ́ bháala kɛ́ né yɛ́, o tíi o kákan ne kɛ bhyáa né kwɔ́, née ywáa min nɔn, né yɛ́ bháalakɛdhye ŋólu káa kɛ́ o ywáa o le lɔ́. Ní mɔɔn mínngɛ bháala kɛ́ né yɛ́, Nvá yáa bwóɲan lá ó tíi o ka.»
Ɛnza ŋé a sayako o fɔ́la
27«Sísan né ní ó tɔ́lɔnin yé, né káa mínnɛɛn lé fɔ? Nvá, ŋwɛ́ɛn fɔ ngó ii né bwási ó wáati ó tɔ́lɔya ó mán a? Wáa né nankun ŋó lée wé. 28Nvá, i gbú tɔ́ɔ ó a bwóɲan!» O wáati ó yɛ́ɛ lɔ, kómankan nɔ é bhɔ́ sángboo ó lɔ́, kɛ́ fɔ kó: «Né wɛ́ɛ a bwóɲan, né yáa wɛ́ɛ kɛ́ a bwóɲan íkwɔ.»
29Yaman min ndɛ́ɛ yé, ó lɔ́lu fɔ kó sá né wɛ́ɛ pɛ́lɛ, lɔ́lu kó malɛɛka lɔ́ lée kóman a yɛ́.
30 Ɛnza ŋé fɔ í yɛ́ íkwɔ kó: «Áa kómankan min myɛ́n, o man kɛ́ né kósɔn, óo kɛ́ ale lé kósɔn. 31Sísan dínɲan kítitɛɛ wáati ó wɛ́ɛ sé, dínɲan kunndii ó yáa gbɛ́ kɛ́ a lábhɔ. 32Né kwɛ́nnin, né kɔɔ kɛ tá kɛ́ bhɔ́ lúukolo o ka wáati min nɔn, né yáa mɔɔn ólu bɛ́ sánman kɛ́nan nvɛ́.»
33A tɛ́ɛ a gbú ta sayakɛseɲan ó lé fɔ́la ó kóman ó lɔ́. 34Yaman óo fɔ a yɛ́ kó: «Án ŋwɛ́ɛn myɛ́n sɛliya ó lɔ kó Kílisi ó káa tó yé né kúdɛyi, ile lo ŋé a fɔ́la dí lé kó mɔɔn Dhyénjɛ ó kákan né kɛ́ i kɔɔ tá? Yɛ́ɛtii é Mɔɔn ó Dhyénjɛ lé?» 35Ɛnza ŋé í yawi kó: «Kɛ́ɛnɲan óo a cɛ́man sánni dɔ́ɔnin njɛ. Ó kɛ́ɛnɲan óo a cɛ́man wáati min nɔn, áa táamankɛ o kɛ́ɛnɲan ó lɔ́, ké sú o kɛ́nan kwó kɛ́ bháa a lɔ, kɛ mansɔɔ mɔɔn min ŋé táaman kɛ́la diwi ó lɔ, ó tíi o tɛ́ a táalaa o lɔnan. 36Kɛ́ɛnɲan óo a cɛ́man wáati min nɔn, áa lá a lá o wáati o lɔ, ké áa kɛ́ kɛ́ɛnɲan o dhyé nu lé.» Ɛnza ŋé wɛ́ɛ ó kóman ólu fɔ́la i yɛ́ mínngɛ, aa bhɔ́ i cɛ́man kɛ́ táa, áa í lóonaankɛ i mán ywáa já nɔn.
Yawudhyaa ólu man lá Ɛnza nan
37Ɛnza ŋé káwako shɛ́ɛman ngɛ́ i ɲánla, ó bɛ́ kwɔ Yawudhyaa olu man la a lá. 38O ɲán ó man, Céla Ezayi é kómanba min nvɔ, ó wɛ́ɛ kɛ́. Aa fɔ kó:
«Mantii ó, yɛ́ɛtii wɛ́ɛ lá án ɲɛ́n kóman ó lá?
Mantii ó wɛ́ɛ a yɛ́ sébhaaya ó yáa yɛ́ɛtii lá?»
39I tɛ́ tɛ sé kɛ́ la a lá kún minnan, Ezayi é ó fɔ kó:
40 «Aa í kɛ́ fyóo ne
kɛ́ í yóso o lágbɛya
ké í kɛ́nan yéli kɛ í ɲán ólu lá.
Ké i kɛ́nan bhɔ́ kó ɲánle í yóso o lɔ.
Ké í kɛ́nan i kwɔ́sɛɛ Ala man,
ké ní í lákɛɛnya.»
41Céla Ezayi é ó kóman ó fɔ kɛ mansɔɔ a tɛ wɛ́ɛ Ɛnza ɲɛn nɔ́lɔya ó yé, o lɔ aa kóman ale lé ká.
42O bɛ́ kwɔ́, Yawudhyaa kunndii ólu shɛ́ɛman ŋé lá a lá, waa Falizɛn ŋólu ɲɛ́nnzhaanɲan ó kósɔn í tɛ́ tɛ sɔ́nnan kɛ o fɔ gbɛ́ lɔ, i tɛ́ɛ sháannan kó i káa i tá bhɔ́ kaangɛbho ngo ó lɔ. 43Kɛ mansɔɔ Adamandhye ŋólu a i tando i manko tɛ́ɛ óle lá kɛ́ tínmin Ala ta ó ka.
Ɛnza ɲɛn kóman o lé káa kíti bé mɔɔn ka
44Oo kɛ́ mínngɛ, Ɛnza ŋé kóman Fáan lá kó: «Ní mɔɔn min ngɛ́ lá né lá, ó tíi o man lá né kéenan, waa Ala míin ne cé, a wɛ́ɛ lá o le lá, 45óni mɔɔn min ngɛ́ né yé, o tíi o wɛ́ɛ njébhaa ó yé. 46Ní nan dínɲan lɔ́ óyoo kɛ́ɛnɲan, ké mɔɔn óo mɔɔn kɛ́ lá né lá, o tíi ó kɛ́nan tó diwi ó lɔ́. 47Ni mɔɔn min ngɛ́ né ta kóman ó myɛ́n, ni a man sɔ́n kɛ ó bháto, a tɛ́ kó né lée ó tíi o yɛ kíti o tɛ́ɛla, kɛ mansɔɔ mán nan kɛ́ Adamandhye ŋólu yɛ́ kíti tɛ́ɛ, wáa ní nan lé ké íi kísi. 48Mɔɔn min ngɛ́ í bá né lɔ́ tó a man sɔ́n ɲɛ́n kóman ó man, o tíi o yɛ́ kítitɛɛbhaa óo yé, ŋwɛ́ɛn kaa min nvɔ, o lé káa ó tíi o yɛ kíti o tɛ́ɛ dínɲan labhano ŋó la. 49Né man kóman yɛ́ɛman, wáa Nvá míin ne cé kɛ́nan, né kákan kɛ́ kaa mínnu fɔ, ó lée ó fɔ́la né yɛ́. 50Ni á lɔ ŋóo ɲáanmanɲan wɛ́ɛbhɛɛ óo sɔ́ɔla o kaa ŋó lé bháaka lɔ́. O lé kósɔn nvá é kó ólu fɔ ɲɛ́n ɲánminman, né lo ŋé fɔ́la cé né.»
Currently Selected:
Yaya 12: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.