JOŊRE 13
13
Tiiru Cetcetaŋ ŋeme anə Barnabasi də Sol bə ji joŋre naataŋ
1Adəwaldə kaa kə Tapi gə Antiyosiŋa, *kaa kə jogte ku mini kə Pepeŋ a jəŋ ada, də kaa kə hate kaŋ ada gəm. Kaa teŋ a jəŋ haa anə Barnabasi, Simeyon (səmu bə tokdeŋ minti Kisirkiŋ), Lusiyusi (toŋ haa bə Siren), də Manyeŋ (bə minti yə a suŋ gud kumsi də *Erodi, kumna bə minti Sezar usnu cəərə seŋka də Galileŋaŋ), daana Sol gəm. 2Dər hi kəmana hõy məna, bə minti yə gə tapə-tepe ciiri laki bə ke awalna a Pepeŋ daana yə gə *jaa-je də kuy bay hame tə pə moŋ, Tiiru Cetcetaŋ wəətənəy minti: «Aŋ zen anə Barnabasi la də Sol wəra dəra bə jən joŋre bə minti ten məntənəy wəra cuuruŋ.» 3Adordə minti yə a toosoŋ Pepeŋ daana yə a jaŋ də kuy bay hameŋ, yə məlaŋ kasi wəra ciiri, kəya yə əynəy kəkəy bə ɗe a gəryi faɗi.
Anə Barnabasi daana Sol giidə ajomga də Sipərəŋa
4Bədoona ta, Barnabasi daana Sol koloŋ *kaa kə vaa-ve gə minti Tiiru Cetcetaŋ vəənəy bə ɗe gəryi tə pə moŋ, yə haŋ kəkəy bə koore giidə vil də Selesiŋa, a ku kana. Kəya yə luŋ giidə turti mooto, bə koore giidə ajomga də Sipərəŋ. 5Də bə minti yə tuukuŋ Salamina, vil mooto də minti giidə ajomgaŋa adaŋ, yə waataŋ kel kə Pepeŋ wəra a kaŋ giidə *kuli bə toose kə kaanə Ziwifiŋa. Zaŋ-Markə ateŋa ada bə kəyəya a joŋreŋa gəm. 6Kəya yə məlaŋ guudi kanna giidə kuli bə ajew bə giidə ajomgaŋ na, yə ɗeŋ a le ciiri warna agal naayaŋ na. Yə ɗeŋ a tuuki kay giidə vil də Pafosiŋaŋ, yə ŋəfaŋ də hulum bə zogoy bə Ziwifi kəman a ko toŋa ada, səmu minti Bar-Yeesu (gud sam toŋ minti kormə Zosuwe). Wə ji kusru damdi tó haa *hulum bə jogte ku mini kə Pepeŋ ana, anaaŋa wə paapa hulum bə jogte ku mini kə Pep ba anə ceki. 7Wə haa gud gədaarə Sergiyusi Pulusiŋa, kumna bə ajomgaŋ. Sergiyusi Pulusi toŋ haa hulum bə cuuru pasa. Wə raawaŋ bə mante anə Barnabasi na də Sol girdu na minti yə ɗee la a waate kel kə Pepeŋ a tó, tó də caadə jiɓriy ŋaanaanə mo. 8Səma Elimasi, (haa səmu də ku Gerekiŋ), hulum bə zogoy toŋ, ɓəlaŋ wəra diiri kə'i. Wə a goldoŋ haa kəkəy bə he ku kumnaŋ wəra bay əski kel kə Pepeŋ minti wə ɗele de gud Pepeŋa ŋaanaanə mo. 9Kəya Sol, bə minti yə məntu Pol gəm, Tiiru Cetcetaŋ haraŋ bə ɗusu wəra máŋ hasi. Kəya wə məlaŋ duru cəərə Elimasi anə taki bə gulu, 10wə wəətunu minti: «Tam kormə Nərtiti toŋ je'aŋ! Tam bə ji tiniini də kaŋa, sərkəŋ wəra də ɗosə-ɗose ku tarməyama, tam acukur də kel gə minti teŋ pəsaŋ neŋneŋ keɗe'i! Tam yaake ɓalke də kel ɗekeri gə minti Barkaŋ a kəənəy gədəəgi di warda minti yə jəə la bədoona hõy wəra nuutu mo? 11Jeɓrə la pisi, Barkaŋ mele kəəsu yaŋ sarəma hebkəna, dərəm bəwi yaŋ wəra. Dər hiti toŋa laki kəna, tam bə ase cəwa də wele koŋ pəda gəm hãã giidə Pepeŋ bele.» Kəya hebkən-hebkəna koŋ sarkaŋ wəra dər Elimasi ɗilik-liki faɗi. Wə koloŋ máŋ haa damdi wə dər ko bə gaa-ge tilmə bə duugŋa ana. Kəya wə əsəŋ bə kolte kəna, kəna, bə golde huluma minti wə doo kasi tó la bə kele tiinə tóŋ. 12Kumnaŋ asaŋ kel gə minti jəŋ anəkay, wə doŋ wəra gud Pepeŋa faɗi, gud maa mo hate bə minti yə a hətnu du cəərə Barkaŋa ŋulnu ablaw.
Pol giidə vil də Antiyosi də Pisidiŋa
13Kəya Pol də kaa gə minti bə gəryi guuduŋ, luŋ kan gə Pafosi wəra də turtiŋ bə koore giidə vil də Pergeŋ giidə seŋka də Pamfiliŋa. Bə minti yə tuukuŋ ada na anəkay, Zaŋ-Markə yəəkənəy faɗi, wə haraŋ Zeruzalem. 14Kə anə Pol də Barnabasi, yə jəŋ Perge jəə kəya, yə haŋ kəkəy bə raawte na anə hoŋ. Yə raawaŋ warna hãã giidə vil də Antiyosiŋ na də Pisidiŋ. Bə minti *hi bə faake kə Pepeŋ tuukuŋ, yə kooroŋ giidə *kuli bə toose kə kaanə Ziwifiŋ, yə vaŋ aləwa, yə əstəŋ je'-je'i. 15Kəya hulum kəman əsəŋ bə aŋke kela giidə kefter bə *ku gili kə Moyisiŋa, giidə kefter kə *kaa kə jogte ku mini kə Pepeŋa gəm. Bə minti wə təwaŋ aŋke bə kefter wəra tawə, kəkamnaŋ cəərə kuli bə tooseŋ gaŋ hulum da a wəətəy minti: «Kəsaanə areŋ, aŋ jəəne də kel kə waate kuŋa kir minti aŋ teŋe dər kaŋ diiriŋ, kəkəy cəərəŋa bə wəətəy.» 16Kəya Pol faŋ apəya, wə haŋ kəəsu a kaŋ apəya minti yə zenə la kəm mo. Wə wəətənəy minti: «Aŋ kaanə *Israyel, də kaayaŋ gə minti paapa kaanə Ziwifi baŋ, səma aŋ bə ɗe gud Pepeŋa, aŋ jeɓren kun la keɗe. 17Pep kə kaanə Israyel a ŋəmaŋ kəmoomo də áŋ gə Israyel warda hãã. Wə ayaŋ jeweŋ a kamnə áŋ haa tó, də ko bə minti yə a kafkam kə kaanə Eziptəŋ. Kəmoomo də áŋ teŋ fəlaŋ kəkəy bə ve warda Eziptə da ha'aŋ, gud səɓaki nuutuŋa pa. 18Bədoona, wə həlnəy hãã laate hor-hor waaɗe giidə fula. 19Kəya Pepeŋ ayaŋ ɗiki du wəra minti kaa gə giidə vil seeɗa'i də seŋka də minti sama minti Kanaaŋa tawə la wəra. Adoro wə haŋ seŋka kə kaa teŋ, wə ayna a kaa nuutuŋ minti a kolə la wəra neete. 20Kel teŋ laataŋ kəs-kəsi waaɗe də hor-hor wiiɗiw bə ji.
Kəya wə ŋamtaŋ kəkamnaŋ bə ke dər kaŋ cəərə joŋre nuutuŋa tiinə kəmoomo də áŋa. Pepeŋ ŋəmtənəy kəkamnaŋ teŋ tiiniy na saksaki hãã dər Samiyela, hulum bə jogte ku mini nuutuŋ. 21Bə minti Samiyel kəm caw, kaanə Israyel a bəlaŋ minti kumna boblo əsə la cəərə té. Kəya Pepeŋ isniy Sol kumnaŋ ciiri faɗi. Sol haa kormə Kisiŋ, gidiirə kaanə Beŋjameŋ. Wə laataŋ hor-hor waaɗe a kumnaŋa. 22Səma bə ɗeŋ a deye kəyaŋ, Pepeŋ sərmunu wəra a kumnaŋa. Kəya wə isniy *Davidi máŋ kumnaŋ ciiri. Pepeŋ waataŋ wəra cəərə Davidi minti: ‹Ten fəlaŋ Davidi, kormə Zeseŋ, wə haa hulum bə minti giidən bəluŋ. Wə topon ku digi də minti giidən bəlaŋ yaŋ wəra keɗe'i#13.22 Ps. 89.21.› 23Ana gəəzi, Pepeŋ bə ayaŋ Hulum bə seereŋ a kaanə Israyel damdi wə a waataŋ wəra anaŋ, haa gud kaasaw də Davidi faɗi. Hulum bə seere toŋ haa Yeesu. 24Ajew də minti Yeesu ɗəlaŋ joŋre nuutuŋ wəra adəwaldə kaŋaŋ, Zaŋ a jəŋ bə waate kela wəra a kaanə Israyel keɗe'i minti yə kolə kirki la a baymele neeteŋ, yə jəətə batem la wəra. 25Bə minti hiti kə Zaŋ wəra maŋ bə teweŋ, wə kəm bə waate saksaki minti: ‹Aŋ ɗiki minti ten haa mindi mo? Ten kəm paapa hulum bə minti aŋ bə məwaŋ ba. Hulum toŋ bə tuli yaŋ ador dəna daana ten paapa bə nakə-neke bə pi kalmasi kemkem nuutuŋ wəra ba.›
26Kəsaananti, aŋ gə minti waŋ wəra a kaasaw də *Abrahamaŋ, də kaayaŋ gə minti paapa kaanə Ziwifi baŋ, səma aŋ bə ɗe gud Pepeŋa, ku mini tó bə cəərə seere bə kaŋ, Pepeŋ əynu da a áŋ. 27Də teŋ keɗe, kaanə Zeruzalem də kəkamna kə kaanə Ziwifiŋ asaŋ minti Yeesu kəna mindi mo ba. Yə əskəŋ gud kel gə minti kaa kə jogte ku mini kə Pepeŋ a jiiriniy bə gəm, jəəne nuutu minti yə a yaŋ bə əŋkətəya saksaki dər hi bə faake nuutuŋaŋ. Ana ɗaw, yə doŋ wəra haa ku kel teŋ bə minti yə ɗeŋ duuru ku kəətiŋ minti wə fəlaŋ meŋ. 28Yə nuutu gə asə-ase wəra minti wə jeŋ karman bə baymele kir minti wə falə meŋ la guudu bə pa, də teŋ keɗe yə waataŋ *Pilati minti wə əwu la wəra. 29Pepeŋ a waataŋ kel wəra dayday cəərə Yeesu. Adordə minti kaanə Zeruzalem də kaa kəmtəŋ kə kaanə Ziwifiŋ doŋ ku kel teŋ gə jeerə-jeere kə Pepeŋ wəra keɗeŋ, yə surkunu warda kampar kəbaŋ gə largaŋ da, yə haŋ titi du bə ɗe a gaara a tələŋkə də ceɗə-ceɗe a pərkiŋaŋ. 30Səma Pepeŋ hərnu wəra dədərgə adordə məŋa. 31Kəya Yeesu jəŋ hiti ablaw bə ke dər kaŋa cəərə kusru. Kaa teŋ haa kaa gə minti a pətəŋ da duuru keɗe giidə seŋka də Galileŋ da bə ɗe Zeruzalem. Koloŋ bə ji kəmnə də kəkəya cuuru a kaanə Israyel hebkəna haa kaa teŋ gəm.
32Are gəm taŋ, are bə waataŋ *Kel pəsaŋ kəmarwaŋ teŋa wəra a nəənəŋ minti: karman bə minti Pepeŋ a wəətunu səmu wəra a kəmoomo də áŋ gə Ziwifiŋ minti tó bə jəw yaŋ, 33wə juunu ne wəra dayna anə səpa keɗe a áŋ kərməyiŋ, a kəkəy bə minti wə haraŋ Yeesu wəra dədərgə adordə meŋaŋ. Kel teŋ jəŋ haa damdi yə a wəra gə jeerə-jeere giidə Gudul ɓasiŋaŋ ana, minti: ‹Tam haa kormon faɗi, ten koloŋ dayna haa bəram faɗi gəm#13.33 Ps. 2.7.›»
34Kəya Pol raawaŋ bə wəətiya pa minti: «Pepeŋ a waataŋ warda anə hãã faɗi minti tó bə ɗe yaŋ a hare Yeesu wəra dədərgə adordə meŋa daana kusuki du bə cimi a tələŋkəŋa ba, wə me hõy pəda gəm. Pepeŋ a waataŋ cəərə kel teŋ da bədoona minti: ‹Gəəzi, pisi katən bə gəəzə-gəəzi daana *cetceti bə minti ten a waataŋ Davidi wəra anə kaŋkaŋ minti ten gaw du yaŋ cuuruŋ, ten gaŋ dəŋ yaŋ cəərəŋa gəm#13.34 Es. 55.3.› 35Gud teŋa ta, giidə Kefter kə Pepeŋa, kel yaŋ gə jeerə-jeere a ko kəmana pa minti: ‹Tam bə yaake hulum bə joŋre nəmti cetcetiŋ bə cimi a tələŋkəŋa ba#13.35 Ps. 16.10.› 36Kə Davidiŋ ha'aŋ, bə minti wə a topoŋ ku digi də minti giidə Pepeŋ a bəlaŋ minti a jəə la bədoona wəra kəyaŋ, wə bə meŋ wəra. Yə gəənu a tələŋkə sar teɗker kə kəmoomo duŋa, kusuki du cimiŋ haa ada na faɗi. 37Səma naayaw tó bə minti Pepeŋ hərnu wəra dədərgə adordə meŋaŋ, toŋ cimiŋ ba. 38-39Kəsaananti, kel teŋ kəya jəə la də dərəŋ: aŋ hebkəna bə əski minti vəəgi bə giidu yaŋ cəərə baymeleŋa haa gud kel gə minti Yeesu jiiniy də kusruŋ. Ku gili kə Moyisiŋ a nəkaŋ bə bədəŋ wəra ku baymele nəətiŋa ba. Səma gud kel gə minti Yeesu jiiniy, hulum bə minti doŋ ne guuduŋ, wə wəra bə bədə-bidi ku baymele nuutuŋa keɗe.
40Gud teŋa ta, aŋ əsə la də geŋgeleŋ kir minti kel gə minti kaa kə jogte ku mini kə Pepeŋ a jiiriniy wəra dayday a awe cəərəŋa ba. Yə jeereŋ minti:
41‹Golə dərəŋ la, aŋ kaa gə minti dafɗe kel kə Pepeŋ,
aŋ ŋələ la ablaw, aŋ a doŋ kir ji zugi minti yə asaŋ la ba!
Gud maa mo, ten bə ji joŋre boblo yaŋ
dər ko bə minti aŋ kəm kəna zugiŋ.
Joŋre toŋ haa joŋre bə minti hulum a bəə la a waataŋ səmu waateŋ,
aŋ sə a de haa minti wə bədoona ba#13.41 Hab. 1.5.›»
42Də ko bə minti anə Pol daana Barnabasi vaŋ warda anəkay giidə kuli bə tooseŋ daŋ tə bə moŋ, kaŋ haraŋ siri da anə faɗi bə bi a wəətəy minti yə bəə la a waate sam kar teŋ kəm ada məna a té pa, dər hi bə faake kə Pepeŋ bə minti caw bə bi daŋ. 43Də ko bə minti kaa gə minti a təpaŋ giidə kuli bə toose kə kaanə Ziwifiŋa meereŋ wəra anəkay, kaa ablaw kooroŋ gud anə Pola daana Barnabasi. Aduubə də kaa teŋa ha'aŋ, kaanə Ziwifi, də kaa gə minti koloŋ kusri gə Ziwifi koleŋ gə minti bə ke awalna a Pepeŋ, ada gəm. Kəya anə Pol daana Barnabasi haraŋ bə nele diiri, bə tiŋiy diri minti yə əsə la ŋəŋ gə malə-mele ɗiki di cəərə pisi kə Pepeŋa.
Anə Pol daana Barnabasi waate kel a kaa gə minti paapa gə Ziwifi baŋ
44Bə minti *hi bə faake kə Pepeŋ naytoŋ ɗeŋ a tuli kay daŋ, daŋge də kaa gə giidə vil taaraŋ warda neŋneŋ keɗe bə bi a jeɓre kel kə Barkaŋ. 45Səma, bə minti kaanə Ziwifiŋ asaŋ kaŋ ablaw anəkay, giidi əsəŋ bə hətəya faɗi. Kəya yə əsəŋ bə garge tiinə Pola də awəy, bə sərtu gəm. 46Kəya anə Pol daana Barnabasi əsəŋ bə wəətiya wəra bay kan diri minti: «Gəəzi, kel gə minti bəŋ sar Pepeŋ daŋ, a doŋ kir waate acekjew haa a nəənəŋ kəm ɗaw. Səma aŋ bəlaŋ de gud kel teŋa ba daana aŋ bə jeme kəəti də kusrəŋa wəra minti aŋ paapa kaa gə nakə-neke bə fele dədərgə də bay teweŋ ba. Gud teŋa ta, are yaakənaŋ ne, are hare dər are máŋ kəm cəərə kaayaŋ gə minti teŋ paapa gə Ziwifi baŋ bə wəətəy kel kə Pepeŋa ta. 47Gud maa mo Barkaŋ waataŋ sam joŋre bə minti are bə jəw yaŋ warda də ko bə minti wə waataŋ minti:
‹Ten a əsnəm a kaa gə minti teŋ paapa gə Ziwifiŋ baŋ damdi pəɗaki ana,
kir minti tam ɗee la a waate kel kə seereŋ wəra
a kaŋ keɗe hãã a nobe bə seŋkaŋa#13.47 Es. 49.6.›»
48Bə minti kaa gə minti teŋ paapa gə Ziwifiŋ baŋ əskəŋ kel teŋ kəyaŋ, waaleŋ duuniy anəkay, yə əsəŋ bə tokɗe Barkaŋa gud kel nuutuŋa faɗi. Kəya kaa gə minti Pepeŋ a ŋəmnəy wəra minti yə falə dədərgə də bay teweŋ laŋ, koloŋ wəra keɗe kaa kə doo-de.
49Kel kə Barkaŋ bə duusi na warna giidə seŋka də minti agəjaŋ də vil də Antiyosi na keɗe. 50Səma gə Ziwifiŋ əsəŋ bə ve sərkəŋa giidə kəram gə abay-abay gə minti bə ke awalna a Pepeŋ, daana giidə kaa gə samsam gə giidə vilaŋ gəm. Bədoona ana taŋ, yə gaŋ kaŋ bə ɗele anə Pola də Barnabasi daana yə sərmənəy wəra giidə seŋka neeteŋa. 51Kəya anə Pol də Barnabasi pu'uniy tərwə də giidə vil neete də kəmpəriŋ diri na#13.51 A to'osi kə kaanə Ziwifiŋa, tərwə də kəmpəriŋ də minti yə po'a dər huluma ge dər kaŋ haa minti yə gole hulum toŋ damdi wə paapa hulum bə Ziwifi pəda ana. Gud kel teŋ minti: kaanə Ziwifiŋ a bəlaŋ kole kirki a baymele neeteŋ bə tə gəm, haŋ sar anə Pola daana Barnabasi pəda., yə haŋ kəkəy bə koore Ikoniyom faɗi. 52Kə kaa gə doo-de kəmarwaŋ ha'aŋ, Tiiru Cetcetaŋ ɗustiniy wəra daana waaleŋ duuniy giidi wəra fehi!
Currently Selected:
JOŊRE 13: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.