JOŊRE 14
14
Anə Pol də Barnabasi waate kel kə Pepeŋ giidə vil də Ikoniyoma
1Də bə minti anə Pol də Barnabasi tuluŋ giidə vil də Ikoniyoma anəkay, yə ɗeŋ a ve giidə *kuli bə toose kə kaanə Ziwifiŋa pa. Yə waataŋ kel wəra ada pisi waata səm moŋ, kaa ablaw, gə Ziwifiŋ daana kaayaŋ gə minti paapa gə Ziwifi baŋ, doŋ wəra gud Barkaŋa. 2Səma gə Ziwifi gə minti bəlaŋ de gud Barkaŋa baŋ, əsəŋ bə ve sərkəŋa giidə kaa gə minti teŋ paapa gə Ziwifi baŋ, minti yə kolə kuy la cəərə kaa kə doo-deŋa. 3Də teŋ keɗe anə Pol daana Barnabasi hətəŋ neete kəm a ko toŋa ada anə taata. Yə bə waate kela saksaki bay walka gud bə minti ɗiki di wəra bə malə-mele cəərə Barkaŋaŋ. Yə bə waate kaŋa minti Pepeŋ bə ji pisiŋa siriya ŋaanaanə mo. Barkaŋ gaŋ dər kaŋ minti anə Pol waate haa gəəziŋ a kəkəy bə minti wə əynəy səɓaki bə jəəti anə miɗi daana kar gə ŋili kaŋ. 4Səma kaa gə giidə vil taŋ cəmaŋ diri ɓasi. Sirdiŋ cəmaŋ gud gə Ziwifiŋa, kaayaŋ teŋ jəmaŋ gud *kaa kə vaa-veŋa.
5Kəya gə Ziwifiŋ, də kaa gə minti teŋ paapa gə Ziwifiŋ baŋ daana kəkamnaŋ neeteŋ keɗe, ɗampaŋ da hãã bə ɗe a lese kaa kə vaa-veŋ daana bə ɗe a kay də pərki bə əwəy wəra. 6Səma kaa kə vaa-veŋ əskeŋ wəra minti yə bə golde té bə ɗe a awe. Kəya yə gadtaŋ wəra bə ɗe a ŋoyte giidə vil də Listərəŋa daana Derbe də minti giidə seŋka də Likawoniŋa adaŋ, giidə seŋka də agəjaŋ dəŋa gəm. 7Kəya yə waataŋ *Kel pəsaŋ kəmarwaŋ wəra a ko toŋa gəm.
Pol daana Barnabasi waate kel giidə vil də Listərəŋa
8Hulum kəman a jəŋ giidə vil də Listərəŋa, wə neke bə isi cəərə kəmpuru gil ba. Wə waŋ warda də hurufi paŋ faɗi, wə ɗeŋ hõy anə weseka ba. 9Dəyaŋ hõy, bə minti wə cin bə jeɓre kel kə Polaŋ, Pol əsəŋ bə gulu anə ɗeker. Wə asaŋ kay minti de kə hulum nəkaŋ kir minti wə seerə la wəraŋ, 10kəya wə wəətunu kel warda anə koloŋ minti: «Faa la apəya, əsə la wəra ɗeker cəərə kampərama!» Hulum faŋ cəərə kəmpuru anə eŋ gil, kəya wə əsəŋ bə ɗe faɗi.
11Də ko bə minti kaa kə ablaw asaŋ karman bə minti Pol juunuŋ kəyaŋ, yə əsəŋ bə naakte kuya də ku kəmniŋ, ku Likawoniŋ, minti: «Anə pepe kəman koloŋ kusri warda akas kə kaŋ da ana, yə bəŋ wəra adawra sar áŋa kəna!» 12Kəya yə məlaŋ sam a Barnabasi faɗi minti «Zees», yə məlaŋ kə Pol minti «Ermesi#14.12 Zees haa kumna də pərəŋkiŋ gə ablaw kə kaanə Gerekiŋ. Ermesiŋ haa pərəŋki bə ayte ku mini kə pərəŋki neete gə ablaw gəm.» gud bə minti waataŋ daŋge də kel haa tó. 13Hulum bə jəəti keerte bə giidə kuli kə Zeesiŋ, bə minti bə hərsə-hərsi anə maŋ sar ku kəsarkaw gə vil na faɗiŋ, topoŋ kərkəwa da. Wə kooroŋ da diiri ku kəsarkaw gə vil da. Kərkəw teŋ wəra gə ganə-gene də huufi də kəbaŋ gə minti yə a ləpniy wəra pəsaŋ-pəsaŋ. Kəya hulum bə keerteŋ, də kaa kə ablaw, a bəlaŋ neeteŋ haa minti té keere anə Pol daana Barnabasi. 14Səma bə minti anə Pol daana Barnabasi, *kaa kə vaa-veŋ, əskəŋ kel té gə minti kaŋ sə a jəy kəyaŋ, yə caartaŋ dəməəmə də ɓasi də cəərə kumsəŋ wəra#14.14 Hulum bə Ziwifiŋ caartaŋ dəməəmə də kuyuŋ ne wəra ha'aŋ, ge dər kaŋ minti tó jəŋ laawe ablaw gud kel teŋa.. Kəya yə fəŋ tara bə ɗe a ve wəra aduubə də kaa kə ablawa anə nepi bə naakte kuya minti: 15«Kaa kətanti! Aŋ ji toŋ haa maa mo? Are haa kaa kəsarkaŋ akas aŋa ana toki gəm! Are bəənəŋ haa də *Kel pəsaŋ kəmarwaŋ kə Pepeŋ kir minti aŋ kolə kerkeŋ la a kar kə boobo teŋ, minti aŋ harə dərəŋ la cəərə Pepeŋa. Wə haa Pep bə dədərgə bə minti jəŋ ko bə apəyaŋ, seŋkaŋ, kan kəmtəŋ, də kar gə minti giidiya keɗeŋ. 16Dər laate bə ajew daŋ, Pepeŋ a yaakaŋ kaŋ keɗe bə ji karman bə minti gole diri pisiŋ. 17Də teŋ keɗeŋ, kar gə minti wə jiitiniy pəsaŋ a gaŋ dər kaa ne nuutu cuuru wəra minti tó haa naanaanə mo? Gəəzi wə ayaŋ kar a kuɗiŋa haa tó: anə kan gə apəyaŋ daana kar kə hame gə minti aŋ cəməy giidə aka daŋ. Bədoona ana, wə ayaŋ hameŋ wəra anə kaŋkaŋ daana wə ɗostoŋ ku tarməyaŋ wəra də waaleŋ pa.» 18Də kel gə minti yə a wəətənəy diŋ nuutu anə keɗeŋ, kaa kə vaa-veŋ haŋ ku kaŋ wəra haa gəəli-gəəli bə kiiriy.
19Səma sərdə gə Ziwifi kəman pətəŋ giidə vil də Antiyosiŋ da daana də Ikoniyom. Yə fəlaŋ ɗiki də kaŋ wəra falə kəyaŋ, yə məlnəy cəərə kaa kə vaa-veŋa faɗi. Kəya kaŋ əsəŋ bə ke Pola də pərki, yə təɗnu warna kerkə vil na. Yə a ɗəkəŋ haa minti wə meŋ ne wəra. 20Səma, bə minti kaa kə doo-deŋ taaraŋ ciiri warna cuuru naŋ, wə haraŋ bə fe, kəya wə kooroŋ giidə vil da faɗi. Ɗeŋ a deye dibiinim kəyaŋ, yə kooroŋ daana Barnabasi giidə vil də Derbe na faɗi.
Anə Pol daana Barnabasi hare Antiyosi də Siri
21Anə Pol daana Barnabasi waataŋ *Kel pəsaŋ kəmarwaŋ wəra waata giidə vil də Derbeŋa kəyaŋ, kaa ablaw doŋ gud Yeesu. Adordə kel teŋa, yə haraŋ giidə vil də Listərəŋ, Ikoniyom, daana də Antiyosiŋ gəm. 22Giidə vil tá soope'iŋaŋ, yə zeŋ gud kaa kə doo-deŋ minti yə əsə la ŋəŋ a deŋa daana yə wəətənəy minti: «Áŋ gə minti gə doo-deŋ, áŋ kir se gəəli ablaw bə ɗe a ve a *Kumna kə Pepeŋa.» 23Kəya, yə ŋamtaŋ kaa kəmtəŋ gə tiinə kaŋ wəra ada giidə kuli kə kaa kə Tapiŋa ŋel-ŋel keɗe. Adordə bə minti yə *jaŋ də kuy daana yə toosoŋ wəra toosa gəm, anə Pol əynəy kasi Barkaŋ bə minti yə a doŋ guudu, minti wə əməy la.
24Anə Pol daana Barnabasi jəŋ jəə kəyaŋ, yə haraŋ bə he kəkəy bə kooreŋa. Yə haŋ giidə seŋka də Pisidi na tew, yə ɗeŋ a le ciiri warna giidə seŋka də Pamfili na. 25Kəya yə waataŋ kel kə Pepeŋ wəra a kaŋ giidə vil də Pergeŋa. Adoro yə sorkoŋ ku vor na anəkay bə ɗe giidə vil də Atali. 26A ko toŋa kəya, yə luŋ turtiŋ bə ɗe Antiyosi də Siriŋ. Yə a məlaŋ gud gəryi neeteŋ haa giidə vil taŋa ada faɗi gəm. Haa a ko bə minti kaŋ a əynəy kasi Pepeŋa minti wə əməy ciiri la, kir minti yə nakə la bə ji joŋre tó bə minti yə a duunu ku wəraŋ.
27Də ko bə minti yə tuluŋ Antiyosi na anəkay, yə təpaŋ cəərə kaa kə Tapiŋ faɗi. Yə əsəŋ bə tupuy bəlam də kel gə minti Pepeŋ jəŋ joŋreŋ keɗe də té naanaanə ji moŋ. Yə wəətənəy daŋgeŋ haa kel gə minti Pepeŋ a jəŋ kir minti kaa gə minti teŋ paapa gə Ziwifi baŋ nakə la bə de guudu gəm. 28Kəya yə hətəŋ máŋ nuutu ablaw Antiyosi adəwaldə kaa kə doo-deŋa.
Currently Selected:
JOŊRE 14: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.