Yohane 6
6
Yesu ma mmenia apee nnu aleɛ
(Mateo 14.13-21; Marko 6.30-44; Luka 9.10-17)
1Ɛhe asi ne, Yesu pɛle Galilea ɛpo bɔ besa bɛfrɛ ye Tiberia ɛpo ne hɔle ye si dɔ. 2#Yoh 2.11 Na mmenia pembepembe lili ye si; ɔnate kyɛ né banwu nzɛngyerɛnneɛ bɔ ɔyɔ fa sale mmenia anwonyerɛ ne. 3Yeɛ Yesu hɔle bokaa bie aso, na ɔne ye asuafoɛ nemɔ bɛɛtenane ase wɔ berɛ. 4#Yoh 11.55 Né Yudafoɛ Abɔtra aluolue ne apingye. 5Afei Yesu tole ye nye, na onwuni kyɛ mmenia pembepembe bɛba ye berɛ nen, obisale Filipo kyɛ, “Nisua yeɛ yɛkonya aleɛ yɛkɔtɔ yɛkɔma mmenia ye bekoli ɔ?” 6Na ɛhe de, ɔhane fa sole ye neane, ofikyɛ né ye bɔbɔ ɔse bɔ ɔkɔyɔ ɔ. 7Na Filipo buale ye kyɛ, “Denare ɛyaa nyɔ po ɔngɔso paanoo bɔ ebiala konya kaala koli ɔ tɔ.” 8Na ye asuafoɛ nemɔ nu ko bɔ oli Andrea, Simɔn Petro aliɛma ne, osele ye kyɛ, 9#2 Ahe 4.43 “Abɛɛmaa bie wɔ wa bɔ ole ayuo paanoo nnu ne tiré nyɔ ɔ; nakoso ɛhe de, aso ɔkɔso mmenia wora he di?”
10Na Yesu hane kyɛ, “Ɛ́mɔma mmenia ne bɛ́tenatena ase!” Né nzenzaen pee wɔ berɛ. Na mmienzua bɔ bɛkɔyɛ apee nnu ɔ bɛtenatenane ase. 11#Mat 14.19 Na Yesu fale paanoo ne, ɔlale ase, na ɔhyɛ mane bɛ bɔ bɛtete berɛ ne; na sɔ ala yeɛ ɔyɛle tiré ne koso ɔ, somaa biala bɔ behia ɔ. 12Na bɛ ko yili nen, osele ye asuafoɛ nemɔ kyɛ, “Ɛ́mɔboaboa mboporoka bɔ waha ne noa, ná ebie ammini.” 13Yiti ayuo paanoo nnu bɔ mmenia ne bali maa waha ne, bɛboaboale ye boso mboporoka ne noa beguale ngɛndɛen buru ne nyɔ nu maa beyili fokyefokyee. 14#Deut 18.15, 18; Mat 11.3 Na mmenia ne nwuni sɛngyerɛnneɛ bɔ ɔyɔle nen, bɛhane kyɛ, “Amba, ngɔmhyɛlɛniɛ bɔ ɔ́ba wiase ne, ye ɛhe!” 15#Mak 6.46 Yeɛ Yesu nwuni kyɛ bɛbaahye ye mbendene so bɛfa ye bedi hene, yiti ɔhwene ye nwo, na ye ngome ɔhɔle bokaa ne aso dɔ bieku.
Yesu nate ɛpo nye so
(Mateo 14.22-33; Marko 6.45-52)
16Na odwuli nɔsoa nen, ye asuafoɛ nemɔ hɔle mboanoa, 17bɛtenane ɛlɛen nu, na bɛpɛle ɛpo ne kyɛ bɛkɔ Kapanɔm. Né aleɛ asa, na né Yesu onnya ɔwwale bɛ nwo berɛ. 18Ɛpo ne aso yɛle bagyabagya, ɔnate kyɛ né mvrama serɛserɛ bie otu. 19#Yob 9.8 Na mmerɛ bɔ bɛhane ɛlɛen ne kɔyɛ kwanzii nza anaa nna nen, benwuni Yesu kyɛ ɔnate ɛpo n’anye so ɔba b’ɛlɛen ne nwo; na ɛserɛ hane bɛ. 20#Mat 14.27 Na Yesu sele bɛ kyɛ, “Me ɔ, nnɛma ɛmɔsuro!” 21Na bele anigye bɛmaa ɔɔtenane ɛlɛen ne anu; na berɛ ne ala, ɛlɛen ne dwuli mboanoa nekaa bɔ bɛkɔ ne.
Ɛlɔen ne pena Yesu
22Aleɛ hyene nen, ɛlɔen bɔ bɛhale ɛpo ne asi dɔ ne, benwuni kyɛ ɛlɛen biala nne berɛ kyɛ ɛlɛen ko bɔ ye asuafoɛ nemɔ bɛfole ne, nakoso nna Yesu ne ye asuafoɛ nemɔ yeɛ bɛtenane ɛlɛen ne anu ɔ, na mmom ye asuafoɛ nemɔ angome yeɛ bɛhɔle ɔ. 23Nakoso ɛlɛen biemɔ fili Tiberia bɛwale bepingyele nekaa bɔ Awurade lale ase, ná belili paanoo ne. 24Na ɛlɔen ne nwuni kyɛ Yesu nne berɛ, ná ye asuafoɛ nemɔ koso bɛnne berɛ nen, bɛ koso bɛfofole ɛlɛen nemɔ anu bɛhɔle Kapanɔm bɛɛpenane Yesu.
Yesu ole ngoa paanoo ne
25 #
Mat 23.7
Na beenwuni ye wɔ ɛpo ne asi dɔ nen, bebisale ye kyɛ, “Rabi, mmerɛ beni yeɛ ɛwale wa ɔ?” 26Na Yesu buale bɛ kyɛ, “Nahorɛ nu paa, mekã mekyire ɛmɔ kyɛ, nna kyɛ nzɛngyerɛnneɛ bɔ ɛmɔnwuni ye ne ati yeɛ ɛmɔpena me ɔ, na mmom paanoo bɔ ɛmɔlili mane ɛmɔ ko yili ne ati ɔ. 27#Yes 55.2; Rom 4.11; 1 Kor 9.2 Nnɛma ɛmɔyɔ aleɛ bɔ ɔsɛkye ɔ nwo adwuma, na mmom ɛ́mɔyɔ aleɛ bɔ ɔtena berɛ kɔ daa ngoa nu, bɔ Sona Awa ne kɔfa kɔma ɛmɔ ne nwo adwuma; ofikyɛ ye yeɛ Baba Nyameɛ wale ye wato nu wama ye tumi ɔ.” 28Yeɛ bebisale ye kyɛ “Nzikyɛ yeɛ odi kyɛ yɛyɔ, bɔ yɛyɔ a ɔte Nyameɛ nnwumaa ɔ?” 29#1 Yoh 3.23 Na Yesu buale bɛ kyɛ, “Bɔ ɔte Nyameɛ adwuma ɛhe, kyɛ ɛmɔkole bɔ wasoma ye ne bekoli ɔ.” 30#Mat 12.38 Yeɛ besele ye kyɛ, “Nzaade, nzɛngyerɛnneɛ beni yeɛ ɛkɔyɔ, bɔ yɛkonwu ye, bɔ ɔkɔmaa yɛkole wɔ yɛkoli ɔ? Nzikyɛ yeɛ ɛkɔyɔ ɔ? 31#Ɛks 16.15 Yɛ nana mɔ belili mana wɔ ɛserɛ so, kyɛbɔ bahyerɛ ye kyɛ, ‘Ɔmane bɛ paanoo fili nyameɛso maa belili.’ ”
32Yeɛ Yesu sele bɛ kyɛ, “Nahorɛ nu paa, mekã mekyire ɛmɔ kyɛ, nna Mose yeɛ ɔmane ɛmɔ paanoo bɔ ofi nyameɛso ne ɔ; na mmom me Baba yeɛ ɔma ɛmɔ nahorɛ paanoo bɔ ofi nyameɛso ɔ. 33Nyameɛ paanoo ne ole bɔ ofi nyameɛso ba ase, ná ɔma wiase ngoa ne.” 34Yeɛ besele ye kyɛ, “Awurade, ma yɛ paanoo he daa.”
35 #
Ɛks 3.14; Yoh 8.12 Na Yesu sele bɛ kyɛ, “Me ole ngoa paanoo ne; ebiala bɔ ɔba me berɛ nen, ɛhɔen ngohũ ye le; yeɛ ebiala bɔ ode me di ne, nzuhɔen ngohũ ye le. 36Nga ngyirele ɛmɔ kyɛ ɛmɔanwu me, nakoso ɛmɔnne benni. 37Bɛ bɔ Baba ne ɔfa bɛ ma me ne, bɛ mukoraa bɛkɔwa me berɛ; na ebiala bɔ ɔba me berɛ ne, mengɔto ye ngɔye le. 38#Yoh 3.13, 31; Mat 26.39 Ɔnate kyɛ mvi nyameɛso mawa ase, nna kyɛ mebaayɔ me bɔbɔ m’apɛdeɛ, na mmom bɔ ɔsomane me n’apɛdeɛ. 39#Yes 27.3; Yoh 10.28 Na bɔ ɔsomane me n’apɛdeɛ ole kyɛ: bɔ ɔfa mane me ne amukoraa, mengɔma nu ko po ngomini ɔ, na mmom ngotingye ye wɔ ayieleɛ kyẽa ne. 40#Yoh 12.45; Mat 25.46 Ɛhe ole me Baba n’apɛdeɛ, kyɛ ebiala bɔ onwu Baa ne, ná ode ye di ne, okonya daa ngoa; na ngotingye ye wɔ ayieleɛ kyẽa ne.”
41Yeɛ Yudafoɛ nemɔ bɛpenepenene bɛ komvi beguale ye so, ofikyɛ ɔhane kyɛ, “Me ole paanoo bɔ ofili nyameɛso wale ase ne.” 42#Luk 4.22; Yoh 7.27, 28 Na bɛhane kyɛ, “Aso nna ɛhe ole Yesu, Yosef awa ne, bɔ yɛse ye baba ne ye maame ɔ? Ɔyɛle sɛɛ bɔ afei ɔkã kyɛ, ‘Mvi nyameɛso yeɛ mmale ase ɔ?’ ”
43Yeɛ Yesu buale bɛ kyɛ, “Nnɛma ɛmɔpenepene ɛmɔ komvi. 44#Yer 31.3; Yoh 12.32 Na ebiala ngora mma me berɛ, sana Baba ne bɔ ɔsomane me ne ɔtwetwe ye ba; na ngotingye ye wɔ ayieleɛ kyẽa ne. 45#Yes 54.13; 1 Tɛs 4.9 Bahyerɛ ye wɔ ngɔmhyɛlɛfoɛ nwomaa ne anu kyɛ, ‘Bɛ mukoraa bɛkɔyɛ mmenia bɔ Nyameɛ ahyirehyire bɛ ɔ.’ Ebiala bɔ wate, ná wasua wafi Baba ne berɛ nen, ɔba me berɛ. 46Nna kyɛ sona bie anwu Baba ne, sana bɔ ofi Nyameɛ berɛ ne, na ye yeɛ wanwu Baba ne ɔ. 47#Mat 25.46 Nahorɛ nu paa, mekã mekyire ɛmɔ kyɛ, ebiala bɔ ode di ne, ole daa ngoa. 48Me ole ngoa paanoo ne. 49Ɛmɔ nana mɔ belili mana wɔ ɛserɛ so, na bewuwuli. 50Ɛhe ole paanoo bɔ ofi nyameɛso ba ase ne, kyɛ sona oli bie, ná wanwu. 51Me ole ngoa paanoo bɔ ofi nyameɛso wale ase ne; na sɛ ebie di paanoo he bie a, ɔkɔtena ase daa; na paanoo bɔ ngɔfa ngɔma wiase ngoa ne, ye ole me nwonaen.”
52Na ɛhe mane Yudafoɛ nemɔ bɛpɛle bɛ nwo besuli bɛ nwo aporowaa kyɛ, “Ɔkɔyɛ sɛɛ né biaa he wahora wafa ye nwonaen wamaa yali?”
53 #
Mat 26.26-28 Yeɛ Yesu sele bɛ kyɛ, “Nahorɛ nu paa, mekã mekyire ɛmɔ kyɛ, sɛ ɛmɔanni Sona Awa ne nwonaen, ná ɛmɔanno ye mogya a, ye de ɛmɔlle ngoa wɔ ɛmɔ nu. 54Na ebiala bɔ odi me nwonaen ná ɔno me mogya nen, ole daa ngoa, na ngotingye ye wɔ ayieleɛ kyẽa ne. 55Ɔnate kyɛ me nwonaen te aleɛ amba, yeɛ me mogya te anonneɛ amba. 56#Yoh 15.4-7 Ebiala bɔ odi me nwonaen ná ɔno me mogya nen, ɔte me nu, na me koso nde ye nu. 57#Yoh 3.17 Kyɛbɔ Baba teasefoɛ ne ɔsomane me nen, sɔ ala yeɛ Baba ne ati nde ase ɔ; yiti ebiala bɔ odi me nwonaen nen, me ti ɔkɔtena ase. 58#Yoh 3.36; 5.24 Ɛhe ole paanoo bɔ ofi nyameɛso wale ase ne. Bɔ ɛmɔ nana mɔ belili ná bewuwuli ne, nna sɔ yeɛ ɔte ɔ; na paanoo he de, ebiala bɔ odi ne, ɔkɔtena ngoa nu daa.” 59Mmerɛ bɔ né ɔ́yɛ ngyerɛkyerɛ wɔ Kapanɔm nyianu sua nu yeɛ ɔhane sɔ dwirɛ nemɔ ɔ.
Daa ngoa nwo dwirɛ
60Na ye asuafoɛ nemɔ anu pee bɛtele sɔ dwirɛ nen, bɛhane kyɛ, “Ngyerɛkyerɛ he de, ɔyɛ se; nwa yeɛ ɔkɔhora kotie ɔ?” 61#Mat 13.57; Mat 11.6 Nakoso Yesu nwuni kyɛ ye asuafoɛ nemɔ bɛ́penepene bɛ komvi wɔ ɛhe anwo nen, osele bɛ kyɛ, “Ɛhe to ɛmɔ sundidua anaa? 62#Mak 16.19 Né nzaade sɛ ɛmɔnwu Sona Awa ne kyɛ ɔ́kɔ anwuro, nekaa bɔ né ɔwɔ daa ne koso ɛ? 63#2 Kor 3.6 Sunzum ne yeɛ ɔma ngoa ɔ; na anwoɔnaen ne de, ɔtte huu. Edwirɛ bɔ mahã mahyire ɛmɔ ne, ɔte sunzum ne ngoa. 64#Yoh 2.25 Nakoso ɛmɔ nu biemɔ wɔ berɛ bɔ benne benni ɔ.” Na ofi ahyɛaseɛ ne, né Yesu se bɛ bɔ benne benni ɔ; ɔne sona bɔ ɔkɔye ye kɔma ne. 65#Yoh 6.44 Na ɔhane kyɛ, “Ɔnate ɛhe ati yeɛ mahã mahyire ɛmɔ kyɛ, ebiala ngɔhora ngɔwa me berɛ, sana Baba ne afa ye wama me.”
66Na ofi sɔ mmerɛ ne, ye asuafoɛ nemɔ anu pee besale bɛ si, na bɛ ne ye annate ko. 67Yiti Yesu bisale mmenia buru ne nyɔ ne kyɛ, “Ɛmɔ koso, ɛmɔpena kyɛ ɛmɔkɔ bie anaa?” 68#Mak 8.27-30 Na Simɔn Petro buale ye kyɛ, “Awurade, nwa berɛ yeɛ yɛkɔhɔ ɔ? Wɔ yeɛ ele daa ngoa dwirɛ ɔ; 69na yale yali, na yanwu ye kyɛ wɔ ole Nyameɛ ye Krongronniɛ ne.”#6.69: Tete Ahyerɛlɛ ne bie kã kyɛ: Kristo ne, Nyameɛ teasefoɛ n’Awa ne.
70 #
Yoh 13.2, 27 Na Yesu buale bɛ kyɛ, “Aso nna me yeɛ maneanea nu maye ɛmɔ, mmenia buru ne nyɔ ye ɔ? Nakoso, aso ɛmɔ nu ko ɔtte abɔnzam?” 71Né ɔne Yudase Yiskariote, Simɔn awa ne; ofikyɛ ye yeɛ né ɔbaaye ye ma ɔ, nakoso né ɔte asuafoɛ buru ne nyɔ nemɔ anu ko.
Currently Selected:
Yohane 6: EBP
Highlight
Share
Copy
Want to have your highlights saved across all your devices? Sign up or sign in
Esahie Bible © Bible Society of Ghana, 2018.