Marko 7
7
Amurreti Waakh ichoow hugummeti enenyet a isbuusanyahiin
(Mattaayo 15:1-9)
1Farissaayotoo ichoow tagaammetoo amurre ilkerengeetti weene Yeerusaleem katimiyye, Yeesso khaarisse. 2Abattitiistoo dahanohi biꞌdire kagolossatti, geeddi icho igolossan dahano idikhan argeen. 3A mehe Farissaayo ichoow yaafohi Yaꞌhuud tuumman, hugumme aacchinyetichooda raahaane, ma golossataan geeddi icho koloo dahano idikhan. 4Toro la chiꞌiche sokko katimiy, ma golossataan sammata icho koloo dahano idikhan. Saggaas on u hugummeti noole raahta iꞌdi maanta ti kokkoobbe ichoow karmohi gaꞌdaarre ichoow ibiriikkhe ladikho.
5ꞌDeerka Farissaayotaas ichoow tagaammetaas amurre wihi icho Yeesso worsateen, “Abattitaah a iꞌdoh hugumme aacchinyeteen iraahine, dahanohi biꞌdire ikagolossatta?”
6Wihi us ilaabe, “Iskaayyeessooy, Isaaya maanti us wori Waakhe atin miinsan kaayyeede a eysiiche. Wihi chiiran,
“ ‘ꞌDooꞌda af on ka ikoolicha,
iꞌdaasenyi uuricho goyaka foga ileejiraan.’
7Immarah on iwahtaan.
Hugummeti enenyet soouume iꞌdi amurreti Waakh u enenyet abchaan.#7:7 Isaaya 29:13.
8Amurreti Waakh a ꞌdiissaane, hugunki enenyet jurkhissaan.”
9Yeesso toro mehe iyidah ya, “Atin jita ekkeysi atin amurreti Waakh ꞌdol ilaabtaane ꞌdee hugummetiin raahtaan ka enenna a tagaammee. 10A mehe Muusa amurane cheeke, ‘Aabbahaah ichoow abartaah inkaanyit’ ichoow ‘Eti aabbahiis ommos abartiis falo a layigaase.’ 11Iꞌdaasenyi mehe elattaan ya, etoo a geeddi us aabbahiis ommos abartiis, ‘Gargaari atin ikasugtaan a siinti an Waakh ibahche,’ iyadeeh on. Gargaara Korban iche layadeeh. 12Etaas ꞌdeerka gargaari us aabbahiis ommos abartiis gargaaro a tiratteen gon. 13Iꞌdaas ka antohi Yeedi Waakh a ꞌdiiꞌddaane, hugunkiin enenyet abissaan. Atin wahanyeyyohi iꞌdaasenye ittaawenye yeessaan.”
Wihi enenyet biꞌdirroocho
(Mattaayo 15:10-20)
14Yeesso toro urur tuumman isiwahe wihi us iyidah, “Idagansada, waha la abda. 15Walah enenyet khar ka gelo usu biꞌdirroocho mele, wihi enenyet uuriis kasoobaho on enenyet biꞌdirroocha.” #7:15 Chiirnaanneti Yeedi Waakhe uumacchee gaasoo chiirnaanka a kakhayte. 16 “Eti dogo khabo a daago giꞌde.”
17Inkoo Yeesso urur katabe ka minkoo gele. Intaas ka abattitiis mammahti kootte us yidah, wihiis a mehe worsatte. 18“Atin laka walah atin gelo mele?” worsate. “Ma abattaan a, walah enenyet khar ka gelo biꞌdirroocho mele. 19A mehe rubeytiis ma gelaane, iꞌdaasenyi holoolo on gelaane sartiis kabahaan.” Yeesso la wahaas us yidah ka, saggi golol tuumman biꞌdir ieheynane tuse.
20Yeed orey iwoye, “Enenyet wihi goytiis kasoobaho iche biꞌdirroocha. 21A mehe enenyet uuriis goya iche mali suuje kayamiit iꞌdi maanta, ꞌdooꞌdi isidisanne isleeurꞌdo, hatto ichoow ogoossi dubunuunu lagelo. 22Wihi addan a mejeli makhaabassi tiis ieheynan leeurꞌdo, ꞌdamaam, uskeeli layeelo, ekkeysi, sohoꞌddarri, kalꞌdarri, ham, rannyaat ichoow ꞌdalammoon. 23Uskeelaas tuumman a ki enenyet goytiis kasoobaho biꞌdirroocho.”
Makhaabassi yaaftoo Giriige Yeesso kakhuufte
(Mattaayo 15:21-28)
24Yeesso ili Gaalilaaya kakahe, ilassi ilkerengeetti Tiiro idow irte. Minkoo gele usuhi enenyet saggi us intaas ikijiro abti ma ꞌdoono. Iꞌdaasenyi emeettiis ma dagsanto. 25Makhaabassoo inanticheti rucchul ginna dakhatti uus iche emeettiis daagte on timiyye luhlohiis ka il guꞌdubte. 26Makhaabassa la a yaaftoo Yaꞌhuud ieheynane ili Siiriya ka intoo Foniikiya layadeehe kadelatte. Yeesso hawwaassatte, wihi iche itidah, “Ginna inanteey goya kabihi!”
27Iꞌdaasenyi arám iiyeyye, “Alley, koloo nyaakhut a golossati, a mehe gololi nyaakhute lakhaato kararre liikhubo ma haaggan.”
28Wihi iche ilaabte, “Aa, Kamuraaw! Iꞌdaasenyi kararre laka, kombor iliche ka wihi nyaakhut kididdihe a suunatta on gon.”
29ꞌDeerka wihi us iyidah, “Jeenteti wihi at tidah u, tab ginna weel a kabahtee.”
30Goob iratte inantiche ichehi siriir kajiifto ꞌhesse, ginna la a kabahte.
Yeesso etoo dogo laa samaacha
31Yeesso saahka ilassi Tiiro idow kabahe, ilassi Siidon goya tabe, ilassi Ilkerengeetohi Tomone leeyimiyye Beyti Buurenye Gaalilaaya yimiy. 32Etoo dogo laaye yeyyeed leeꞌhoolyahe liikeene, enenyet tuumman Yeesso hawwaaste, ꞌdee dahan a korcho a samaacho.
33Ét ꞌdol geeche, nabho farro gesse, farro iskatufe, hanjuf harrab kaꞌdaare. 34Serey yeye, “Eꞌh!” yidahye, toro, “Effaaꞌda” yidah. Iꞌdaakka la “Furam!” iche leessa. 35Chirraas on et dogo bakkaaheene, harrabiis furname, mujjum yeyyeede!
36Yeesso urur amur ibahche uus icho wahaas cheekin. Iꞌdaasenyi urur geedda us amur ibahcho, geeddaas ꞌdirihiissa yeed taaꞌhiche. 37ꞌDooꞌd weyti girmeeste, mehe essaan ya, “Wihi us yeele tuumman weyti haagganyihiin. Dogowaayyo ichoow afwaayyo laka a haaggicha!”
Currently Selected:
Marko 7: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.