Marko 8
8
Yeesso mejeli alif affare goollicha
(Mattaayo 15:32-39)
1Ibeennetaas on ururoo buure toro kulme, golol la ma khabin. Yeesso abattitiis wahe wihi us iyidah, 2“An ꞌdooꞌda weyti uur isoonugleesda. Maan seyyah dakkhan ani on ileejire wihi icho yamhiin la ma khabaan. 3Chirri an ankaa khabaani goobassicho ilaabo jit ka a sussuuhaan. A mehe gaasichokoo foga kayimaateen.”
4Abattitiis wihi iche ilaabte, “Yiba ka la, gololi geeddaasenye enenyeta tuumman yaakho intoh kaꞌhella?”
5Yeesso la, “Makaate geeddoh khabtaan?” worsate.
Wihi icho ilaabeen, “Makaate teeba.”
6Ulla urur amur ibahche orrommiche. Makaateyyohi teebee khaate, Waakh kalaꞌd ilaabe jejjebche, abattitiis ididdiibe, “Baꞌh gisa,” iyidah. Iche la baꞌh gisse. 7Bahaggi rurrucchul laka wohoor a khabte. Yeesso wahaas laka iweeste, “Waha laka gisa,” iyidah. 8ꞌDooꞌd golossate ichoowka darge. Abatti enjel teeba gololi jejjebane lasoowaache buuho soosuunte. 9Mejeli golossate a geeddi elif affar. Inkoo us enenyet laabe ka, 10chirraas on kooban goya gele, abattitiis khabaayi anki distiriighi ꞌDalmanuuꞌda tabe.
Farissaayo ichehi Yeesso wahanyeyyohoo miigti Waakh tuso iyeelo maranta
(Mattaayo 16:1-4)
11Farissaayotoo timiyye Yeesso leeiriirte usu angey gelin ꞌdoontaa, wahanyeyyohoo miigti Waakh tuso goobi Waakh kayimiy daahte. 12Yeesso uur suujowe, “ꞌDooꞌda iꞌdee a iꞌdoh wahanyeyyohi miigti Waakh tuso idaaha?” yidah. “Rume atin icheeka, wohoo kaldaye miigti Waakh tuso laka ma lasiicho!” 13ꞌDeerka Yeesso Farissaayo katabe, kooban goya inokhte, beyti Gaalilaaya aficheki ꞌdiri irte.
Yeesso abattitiis wihi Farissaayo ꞌdooꞌd abisso katootoocha
(Mattaayo 16:5-12)
14Abatti makaate a kadabte, too kaldaye iche kooban goya kakhabto on menye. 15Yeesso icho tootooche, “Yeedad Farissaayo ichoow yeedad ꞌHeroode iꞌdi booddati makaate fuurissee yuubsada!” iyidah.
16Icho la iskaleehawwoocheene, wihi icho yidaaheen, “Jeenteti inno makaate ikhabine iꞌdaas iessa.”
17Yeesso la, wihi iche kahawwoosso a garta, mehe icho worsate ya, “A iꞌdoh makaatewaayyo ikayeyyeeddaan? Atin uliba walah ma abanna? Uurassiinna ladagahnooche? 18Indo a khabtaane, iꞌdaasenyi walah atin agartaan mele! Nabho la a khabtaane, iꞌdaasenyi walah atin daagtaan mele! Toro ma kasooꞌhessaan a? 19Maanti an makaate chan mejeli elif chane ijejjebche enjel geeddoh makaateti sooꞌhadde kijirto soosuunteen?”
Wihi icho ilaabeen, “Tomon ichoow lamma.”
20“Maanti an makaate teeba mejeli alif affare ijejjebche enjel geeddoh buuhto makaateti sooꞌhadde kijirto soosuunteen?” toro worsate.
Wihi iche ilaabte, “Enjel teeba.”
21“Toro la uliba walah atin abatteen mele?” iyidah.
Yeesso ilkerengeetti Bessaayda ka etoo indo laa samaacha
22Ilkerengeetti Bessaayda yimaateene, ꞌdooꞌdoo la etoo indo laa Yeesso ikeene, hawwaasteene, ꞌdee dahan a kaꞌdaaro. 23Yeesso et dahan khabte, ilkerengeet khariche geeche. Et indo katufe, dahan korche, “Wohoo a agarta?” worsate.
24Et la serey yeye wihi us yidah, “Enenyet a arga, iꞌdi geeyohi sohti iyoogyahiin.”
25Toro et dahano indo korche. Kolaakka et indo furnameene, indo toro haagsateene, walah tuumman mujjum arge. 26Yeesso et minkiis ierge, wihi us iyidah, “Ilkerengeet goya iiran.”
Beetero eti Yeesso yahe cheeka
(Mattaayo 16:13-20, Luuka 9:18-21)
27Yeesso ichoow abattitiis ba ilkerengeetohi ilkerengeetti weene Kaaysareya Fiiliffi kamarsan ikaheen. Jit raahaani, Yeesso abattitiis wihi us worsate, “ꞌDooꞌd an a ayyo essa?”
28Wihi iche ilaabte, “Gaasoo ati a Yoohanahi Enenyet Baattissiyo iche essa, gaasoo a Eliiya essa, gaasoo laka ꞌdooꞌdi goorat Waákh íyeyyeedo a kichekoo, iche essa.”
29“Iꞌdaasenyi atin la? An a ayyo tadeehiin?” worsate.
Beetero wihi us ilaabe, “At a Ki Lasubhe lasugo.”
30Yeesso icho tootooche, uus icho eti us yahe etoo kalday laka icheekine.
Yeesso bolokkhi latuso ichoow omoottiis cheeka
(Mattaayo 16:21-28, Luuka 9:22-27)
31Yeesso ꞌdeerka abattitiis wihi Waakh gooche abinnaan sookhabte. Waha la a saggi Ínam Aadam sinati buure liituso, ewweenki Yaꞌhuud ichoow kuhaaniyyohi wewween ichoow tagaammeti amurre usu iꞌdiiꞌdaane, liiyagiise, chirri maan seyyahe kutte us omoot ikasookaho. 32Yeeda weyti ibabbakkaahiche, Beetero la usu ꞌdol geeche leejaakhe.
33Iꞌdaasenyi Yeesso urgiye abattitiis yeye, Beetero leejaakhe wihi us iyidah, “Seytaankaane fooleey buj! At wahanyeyyohi Waakh menye, iꞌdaasenyi wahanyeyyohi weeli enenyete kamalatta.”
34Yomboka urur ichoow abattitiis wahe wihi us iyidah, “Chiꞌ etoo isooraahin ꞌdoono, awtiis a ꞌdiiꞌdo toro la massalaabatiis barbar a sookorsati a isooraaho. 35A mehe eti tuummane jirotiis ribin ꞌdoono jiroti rummaat a waaya. Iꞌdaasenyi ki ani ichoow Wori Haaggan jirotiis iwaayo, jirotiisti rummaat a riba. 36Etoo maanta a chirri us wohoo ꞌhele chirri us wihi harrata tuumman ꞌhele, jiroti awtiissa Waakh siiche la waaye? 37Ommos weeli enenyet maanta mehe diibin yabuuꞌde jirotiis kadooricha? 38Chirri etoo ꞌdooꞌda weyꞌdane waakkhassi addan wahti uskeel leh goyaka ani ikuuryaawo toro yeedeey kuuryaawo, Ínam Aadam laka maanti us miig Aabbahiis ichoow ti herti Waakhe munyee leesoonokhti, usu a kuuryaawa.”
Currently Selected:
Marko 8: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.