Marko 6
6
Ilkerengeetti Naasaret Yeesso ꞌdiiꞌdda
(Mattaayo 13:53-58, Luuka 4:16-30)
1Yeesso intaas katabe, ilkerengeetti goobicheenye Naasaret layadeeh irte, abattitiis khabaayi. 2Seeri Lanaso ka, minki weysiite Yaꞌhuud ka enenyet Yeedi Waakh abin sookhabte, enenyeti buurenye usu daage weyti girmeeste.
Wihi icho worsateen, “Us eta waha tuumman inta us kaabte a intoh? Kharata deeddeenye lasiiche a toh? Saggoh waha weeli enenyet yeelin iubaaꞌdan iyabuuꞌd? 3Eta tagaanki khoꞌdoomme diso menya? Maariya abartiis menya? Yaakoobo ichoow Yuuda, ichoow Yoosse, ichoow Siimon menya leedesse? Waha la albehi leedesse menya inno leejiro?” ꞌDooꞌd la usu kahollowe.
4Yeesso ꞌdeerka wihi us icho iyidah, “Eti Waákh íyeyyeedo goobicho ka ꞌdooꞌdi uuriise ichoow yaaftiis kalday on iinkaanyitin.” 5ꞌDooꞌdoo rucchule khakkhannane us dahan korche samaache on menye, wihi weeli enenyet yeelin iubaaꞌdan intaakka yeelin ma ubaaꞌdan. 6Ulla girmeeste icho ikakhuufinee.
Yeesso abattitiisti tomon ichoow lammee soobahsata ergata
(Mattaayo 10:5-15, Luuka 9:1-6)
Yeesso ꞌdeerka goobassi intaas kamarsan marche, Yeedi Waakh abche. 7Abattitiis tomon ichoow lammacho ba isiwahe, lallamma ka ili kharaat ierge, antohi icho ginnayyo enenyet goya kabahchaan laka siiche.
8Wihi us leefarme la a iꞌda, “Wul on menye, wohoo addan asiꞌdanna. Golol ommos ugar ommos chilimme asiꞌdanna. 9Kobo gessada, ubbaari deere atin khabtaan on menye, koo addan agessanna. 10Meelbaaw atin gessaan ka, minkaas on fiddiya ichoowka maanti atin ilkerengeettaas kabahtaan. 11Meelbaaw atin liikamartiisanne ommos atin liidagansan, ebeeri luhlo atin fuulo sahda geedda atin bahtaan. Waha a garti ichó cheekatti.”
12Abatti bahte, Yeedi Waakh cheekte, enenyet tuumman la, “Uskeeliin kasoonokhda,” itidah. 13Ginnayyohi ittaawe enenyet goya kabihisse, ꞌdooꞌdi ittaawenye khakkhannan laka subakki geeyi oolif ka matah subahte, samaasse.#6:13 Hawweesa 6:30 iche kanyutayyahe.
Omoot Yoohanahi Enenyet Baattissiyo
(Mattaayo 14:1-12, Luuka 9:7-9)
14Karnati ꞌHerood layadeeh la waha tuumman daage, a mehe magah Yeesso weyti ballaaste. Enenyet gaasoo mehe essa ya, “Yoohanahi Enenyet Baattissiyo iche omoot lakasookahche! Miigta iꞌdeenye goytiis ka hil haaggisso, wihi enenyet iubaaꞌdan us yabuuꞌd, a jeentetaas on.” 15ꞌDooꞌd gaasoo laka mehe essa ya, “Eta a Eliiya.”
Gaasoo la mehe essa ya, “Eta a eti Waákh íyeyyeedo, a iꞌdi makhaaballeti goorat Waakh iyeyyeeddo kichekoo.”
16Iꞌdaasenyi ꞌHerood maanti us waha leessi daage ka, mehe yidah ya, “Yoohanahi goorat an matah gooche iche omoot lakasookahche!”
17ꞌHerood rubeytiissa ꞌdooꞌd erge, Yoohana lasookhabte, jeela ka lahide. A mehe ꞌHerood ꞌHeroodiyati makhaabál walaaliiski Fiilif layadeehe diste. 18A mehe Yoohana mehe ꞌHerood idowe ya, “Amurre ichoow khaatannaanki at makhaabál walaalaah khaatatti ma israahaan.” 19ꞌHeroodiya ꞌdeerka mogtaas Yoohana isiꞌdatte, ogoos ꞌdoonte. Iꞌdaasenyi ogoos ma tabuuꞌd, 20a mehe ꞌHerood Yoohana karoora, saggi us etoo fissane toro munyee iyahe iche garta. A toorriba laka. Kolbaaw us Yoohana dagansate, mal la gela. Iꞌdaasenyi toro, weyti dagansan ꞌdoona.
21Saahka maane soomarte, ti ꞌHeroodiya ꞌdoonte, a maalinki goorat ꞌHerood dessee. ꞌHerood ꞌdooꞌdi sirgaaliis ka ichoow kiyatiis ka wewween, ichoow kamurreti Gaalilaaya magah khabto soowahe, sukuuku bahche. 22Inám ꞌHeroodiya soogesse, ꞌdurte karnat ichoow martitiis ba hamaadisse.
Karnat wihi us inám iyidah, “Walahbaaw at ꞌdoonto soodah amballa kisiichaa.” 23Daarte, wihi us iyidah, “Walahbaaw at daahto a kisiicha, ichoowka nyuusi ili an andi laka.”
24Iname khar ibahte, abarche mehe worsatte ya “Mehe maanta idaahe?”
Abarche mehe ilaabte ya, “‘Matah Yoohanahi Enenyet Baattissiyo ꞌdoona,’ dah.”
25Iname chirraas on tiriyye, karnat iiratte wihi iche itidah, “Atihi matah Yoohanahi Enenyet Baattissiyo karam isookorisso, toolla kofche isiisso, iche ꞌdoona.”
26Karnat weyti uur suujowe. Iꞌdaasenyi jeenteti wihi us idaatte ichoow jeenteti martitiis u, wihi iname daahte usuhi tirti ma ꞌdoonin. 27Chirraas on ꞌdeerka eti iskareete ꞌdooꞌdi hidan yagiis erge, yeed kaguꞌdde matah Yoohana sookhaat iyidah. Eti iskareet la jeela irte Yoohana matah soogooche, 28matah karam sookorche. Inám karam ikeene, iche la abarche siisse. 29Chirri abatti Yoohana wihi yitah daagte ka, timiyye sartiis khaatte goꞌddoo ka hawwaasse.
Yeesso mejeli elif chane goollicha
(Mattaayo 14:13-21, Luuka 9:10-17, Yoohana 6:1-14)
30 # 6:30 Hawweesa 6:13 iche kanyutayyahe. Maanti ergaano soonokhatte, iche ichoow Yeesso kulmeen ka, wihi iche yeesse ichoow wihi iche enenyet abisse tuumman icheekte. 31ꞌDeerka abattitiis wihi us iyidah, “Kaaleya, intoo khaawwan a iranni, ꞌdee atin laka iꞌdaaru nasa.” Jeenteti ꞌdooꞌdi yamiit ichoow ki nokhti ibuuraatuu, Yeesso ichoow ergaano ba sag icho igolossataan mele.
32ꞌDeerka keley kooban goya kidiheene, intoo khaawwan irteen. 33Iꞌdaasenyi enenyeti buure maanti iche kahto arge, toro la eti icho yahiin garte. ꞌDooꞌd la ilkerengeeto tuumman kasoobahe, luhlo on ka inti Yeesso illeh isohtaan ioryeene, geeddi kooban yomboochaan meel eleeleen. 34Chirri beyti Gaalilaaya afiche ka Yeesso kooban kasooyage ka, urura buure arge. Weyti uur inugleeste, a mehe ꞌdooꞌdaas a iꞌdi iiyti ersim laa. ꞌDeerka wihi ittaawenye Waakh miinsan abinnaan sookhabte.
35Geedda ka il a ibeennowe, abattitiis itimiyye, mehe itidah ya, “Il kola a ibeennowe, inta la a yib alah. 36ꞌDooꞌd laabe, a irti gosasha ka, ichoow goobassi soodow ka, wohoo icho yamhiin a soogatteen.”
37Iꞌdaasenyi wihi us ilaabe, “Atin rubeytiin wohoo icho yamhiin siicha.”
Icho la wihi icho iyidaaheen, “Rumanka wahaas chilimmeti eti hay siyyeet hil haaggiche laguto khaataan! Nahi chilimmeti geeddaase golol ganno wihi icho yamhiin siinno ꞌdoonta?
38“Makaate geeddoh khabtaan?” worsate, “Nyaama bal yeya,” iyidah.
Chirri iche abatte ka, “Makaate chan ichoow bahag lamma jirta,” tidah.
39Yeesso ꞌdeerka abattitiis amur ibahche, enenyet seley a goggoosso, koobbino ka hoosi ulhaw a koorronti. 40Enenyet ꞌdeerka kukkud ka ichoow tomon chacchan ka orronte. 41Makaateyyohi chane ichoow bahaggi lammee khaate, serey yeye, Waakh kalaꞌd ilaabe, makaateyyo la jejjebche. ꞌDeerka abattitiis idiibe, ꞌdee enenyet a gisso. Bahaggi lammee laka jejjebche icho tuumman gise. 42Enenyet tuumman golossate, darge. 43Abatti la enjel tomon ichoow lamma makaate ichoow bahaggi laajjebche lasoowaache buuhaan soosuunte. 44Mejeli golossate, tiriis a geeddi alif chan.
Yeesso bicche sarche kasohta
(Mattaayo 14:22-33, Yoohana 6:15-21)
45Yeesso chirraas on abattitiis kooban gesse, geeddi us urur kahcho, iche la ortiis inti beyti Gaalilaaya afichekuusenye Bessaayda layadeehe iratta. 46Inkoo us icho bariitiche ka, Yeesso burroo kore, Waakh wahte.
47Chirri il gelebnowe ka, kooban bey ukkuricheeda raahaane, Yeesso la keley on meessi kootteet kijira. 48Saggi abattitiis khoꞌdoommeti kooban lakawoyo ka kooban downaan ileefaddo arge, a mehe hafare icho jeychaa. Geedda baryo kasoodowwaatte ka, Yeesso bey sarche kasohte, iirte, kakutin leheet. 49Iꞌdaasenyi chirri iche usuhi bey sarche kasohti agarte ka, meleyka koogtahe, riirte. 50A mehe iche tuumman a agarte, nahte rubey kabahte. Yeesso chirraas on, “Anahina, a ani roorro akhabina,” iyidah. 51ꞌDeerka kooban kaleedihe, hafar tolossate. Abatti tuumman weyti girmeysatte, 52a mehe girmohi makaateyyohi ittaawe walah iche kaabatte mele. Iꞌdi tahe uurassicho a ladagahnooche.
Yeesso ꞌdooꞌdi khakkhannan Gennaasaret ka samaacha
(Mattaayo 14:34-36)
53Chirri icho beyti Gaalilaaya afichekuus imaaheen ka, intoo Gennaasaret layadeeh yimaateene, kooban hideen. 54Uun iche kooban kasooyagte, enenyet Yeesso kase. 55Ilaas tuumman goya kooryeene, ꞌdooꞌdi khakkhannan siriiro kasoosiꞌdeene, inti Yeesso kijiro icho daageen ka igeecheen. 56Meelbaaw Yeesso irte ka, ilkerengeeto eheetteey, goobab eheetteey ommos gosas eheetteey ka ba, ꞌdooꞌdichoki khakkhannan siriiro kasoosiꞌdaane, sokkoti ꞌdee us yamiit, geecheen. Hawwaasteene, “Alley bal laddi kabuuꞌdaah kalday laka a ꞌdaareen,” iyidaaheen. Eti tuummane ꞌdaare la samaate.
Currently Selected:
Marko 6: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.