Mose I, 32
32
Yakob dla konɛ e kɛ Esau ya kpe
1Benɛ Yakob ngɛ blɔ ɔ nɔ kɛ yaa a, e kɛ Mawu bɔfo komɛ kpe. 2Benɛ Yakob na mɛ ɔ, e de ke, “Mawu hi he ji nɛ ɔ nɛ;” lɔ ɔ he ɔ, e wo lejɛ ɔ biɛ ke Mahanaim.#32.2 Mahanaim: Ngɛ Hebri gbi mi ɔ, biɛ nɛ ɔ sisi ji “sito he enyɔ.”
3Yakob tsɔ nihi kɛ sɛ e hlami kɛ ho e nyɛmi Esau ngɔ ya ngɛ Edom zugba a nɔ. 4E fa mɛ ke a ya de Esau ke, “Ye nyɔmtsɛ, imi o tsɔlɔ Yakob ɔ, i ngɛ hae nɛ o le kaa i ya to Laban nubwɔ, nɛ i kɛ lɛ hi si be babauu kɛ ba si amlɔ nɛ ɔ. 5I ngɛ na, teji, to, kɛ nyɔguɛhi nyumuhi kɛ yihi. Ye nyɔmtsɛ, i tsɔ tsɔli nɛ ɔmɛ nɛ a ba ha nɛ o le kaa i ma we; i heɔ yeɔ kaa o ma he mi atuu.”
6Benɛ tsɔli ɔmɛ kpale a se kɛ ba Yakob ngɔ ɔ, a de lɛ ke, “Wa ya na o nyɛmi Esau ɔ, nɛ lɛ hu e kɛ nihi lafa eywiɛ ma nɛ a ba kpee mo.” 7Yakob tsui po wawɛɛ nitsɛ, nɛ e hao. E gba e we bi ɔmɛ a mi enyɔ, nɛ e gba to ɔmɛ, kɛ na amɛ, kɛ afukpɔngɔ ɔmɛ a mi ngɔ wo kuu enyɔ mi ja nɔuu. 8E de ngɛ e yi mi ke, “Ke Esau ba tua kuu kake ɔ, kuu enyɔne ɔ maa tu fo kɛ je.”
9Kɛkɛ nɛ Yakob fa kue ha Mawu ke, “Mawu lee! Nɛnɛ Abraham Mawu, kɛ tsaatsɛ Isak Mawu! Yawɛ, mo lɛ o de mi ke ma kpale ye se kɛ ba ye zugba nɔ, ngɛ ye weku li a ngɔ, nɛ o maa pee mi saminya. 10Mɔbɔ nami nɛ se pui gblegbleegble nɛ o je kpo ngɔ ha mi ɔ, i sɛ. Benɛ ma po Yordan pa a, dɛma tso pɛ i hɛɛ ngɛ ye dɛ mi; se piɔ lɛɛ i kpale ba kɛ asafo kuu enyɔ nɛ ɔmɛ. 11I kpa mo pɛɛ nɛ o je mi kɛ je ye nyɛmi Esau dɛ mi. I ngɛ gbeye yee kaa e ma ba tua wɔ nɛ e ma kpata waa kɛ wa yi ɔmɛ, kɛ wa bimɛ ɔmɛ tsuo wa hɛ mi. 12#Mose I, 22.17 Kai kaa mo lɛ o wo mi si ke o maa pee mi saminya. Kai kaa mo lɛ o de ke o ma ha mi nina babauu kaa wo nya zia, nɛ nɔ ko nɔ ko be nyɛe maa kane.”
13-15Yakob hwɔ lejɛ ɔ jamɛ a nyɔ ɔ mi. E nɔ jena a, e hla lohwehi nɛ e hɛɛ ɔ ekomɛ, konɛ e kɛ ya ke e nyɛmi Esau. Lohwe ɔmɛ ji nɛ ɔmɛ nɛ: apletsi yo lafa enyɔ, kɛ akpakpo nyingmi enyɔ; jijɔ yo lafa enyɔ, kɛ agbosu nyingmi enyɔ; afukpɔngɔhi nɛ ngɛ nyɔ hae nyingmi etɛ, kɛ a bimɛ; na yo nyingmi eywiɛ, kɛ na ku nyɔngma; teji eyo nyingmi enyɔ, kɛ teji ku nyɔngma. 16E dla mɛ ngɔ wo kuukuu a mi; kuu tsuaa kuu kɛ e nyatsɛ. E de tsɔli ɔmɛ nɛ ngɛ kuu ɔmɛ a nya a ke, “Nyɛɛ sɛ ye hlami kɛ ho; nyɛ si blɔ ngɛ kuu kake kɛ kuu nɛ nyɛɛ lɔ ɔ se ɔ a kpɛti.” 17E de tsɔlɔ ɔ nɛ sɛ hlami ɔ ke, “Ke o kɛ ye nyɛmi Esau kpe, nɛ e bi mo ke, ‘Mɛnɔ ji o nyɔmtsɛ? Jije o yaa? Lohwe nɛ ɔmɛ nɛ nyɛɛ o hɛ mi ɔ, mɛnɔ lohwehi?’ ɔ, 18de lɛ ke, ‘Lohwehi nɛ o tsɔlɔ Yakob tsɔ nɛ a kɛ ba ke mo, e nyɔmtsɛ Esau ji nɛ ɔmɛ nɛ. Yakob nitsɛ ngɛ se kɛ ma.’ ” 19Yakob de tsɔlɔ enyɔne ɔ, etɛne ɔ, kɛ tsɔli ɔmɛ tsuo nɛ ngɛ lohwe ɔmɛ a nya a hu ke, “Ke nyɛɛ kɛ Esau kpe ɔ, bɔ nɛ nyɛ ma de lɛ ji nɛ ɔ nɛ. 20Nyɛ hɛ nɛ hi nɔ nɛ nyɛ de lɛ ke, ‘O tsɔlɔ Yakob ngɛ wa se kɛ ma’ ” Yakob de ngɛ e yi mi ke, “I kɛ nike ní nɛ sɛ hlami ɔ ma kpata lɛ. Lɔ ɔ se ɔ, ke i kɛ lɛ kpe hɛ mi kɛ hɛ mi ɔ, eko ɔ, e kɛ ye tɔmi maa ke mi.” 21Yakob kɛ nike ní ɔ mane, se lɛ nitsɛ lɛɛ e hwɔ sito he ɔ jamɛ a nyɔ ɔ mi.
Yakob kɛ nɔ ko fia atlibo ngɛ Peniel
22Jamɛ a nyɔ ɔ mi nɔuu ɔ, Yakob te si, nɛ e kɛ e yihi enyɔ ɔmɛ, kɛ e mawayi enyɔ ɔmɛ, kɛ a bimɛ nyɔngma kɛ kake ɔmɛ po Yabok pa a. 23Benɛ e kɛ mɛ po pa a ta a, e ngɔ e níhi tsuo hu kɛ po pa a, 24#Hos 12.3-4 nɛ e ba piɛ lɛ Yakob ɔ nɔ kake ngmelu ngɛ se.
Kɛkɛ nɛ nyumu ko kɛ lɛ ba fia atlibo kɛ ya si makɛ. 25Benɛ nyumu ɔ na kaa e nyɛ we Yakob ɔ, e fia Yakob mlɛ mi nɔ́, nɛ Yakob gbongu huã. 26Nyumu ɔ de Yakob ke, “Ngmɛɛ ye he nɛ ma ho; je ngɛ mi nae!”
Yakob he nɔ ke, “I be hae nɛ o ya, ja o gbaa mi lolo!” 27Nyumu ɔ bi lɛ ke, “Kɛ a tsɛɛ mo kɛɛ?”
Yakob he nɔ ke, “Ye biɛ ji Yakob.”
28 #
Mose I, 35.10
Nyumu ɔ de lɛ ke, “A be o biɛ tsɛe ke Yakob hu. O kɛ Mawu kɛ nimlihi nɔ kunɔ, nɛ o ye kunimi; lɔ ɔ he ɔ, jehanɛ a ma tsɛ mo ke Israel.”#32.28 Israel: Ngɛ Hebri gbi mi ɔ, biɛ nɛ ɔ pɛɛ kaa “e kɛ Mawu nɔ kunɔ.”
29 #
Many 13.17-18
Yakob de nyumu ɔ ke, “Jehanɛ lɛɛ moo tsɔɔ mi o biɛ.”
Se nyumu ɔ bi lɛ ke, “Mɛni he je o ngɛ hlae nɛ o le ye biɛ ɔ? Kɛkɛ nɛ e gbaa Yakob.”
30Yakob wo lejɛ ɔ biɛ ke Peniel,#32.30 Peniel: Ngɛ Hebri gbi mi ɔ, biɛ nɛ ɔ pɛɛ kaa “Mawu hɛ mi.” nɛ e de ke, “I wo kikɛmɛ a biɛ nɛ ɔ, ejakaa i na Mawu hɛ mi kɛ hɛ mi, se i gbo we.” 31Benɛ Yakob je Peniel ɔ, pu gba; nɛ e gbongu ɔ nɛ huã he je ɔ, e nyɛ we nɛ e nyɛɛ tutuutu. 32Kɛ ba si mwɔnɛ nɛ ɔ, Israel bi yi lo nɛ ngɛ mlɛ mi tsami he ɔ, ejakaa Yakob mlɛ mi tsami he ɔ ji he nɛ nyumu ɔ fia nɔ́ ɔ nɛ.
Currently Selected:
Mose I, 32: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.