Mose I, 33
33
Yakob kɛ Esau kpe
1Yakob na Esau nɛ e kɛ nihi lafa eywiɛ ma e ngɔ; lɔ ɔ he ɔ, e dla e bimɛ ɔmɛ ngɔ ha Lea kɛ Rahel kɛ mawayi enyɔ ɔmɛ. 2E ngɔ mawayi ɔmɛ kɛ a bimɛ ɔmɛ ngɔ to hɛ mi. Lea kɛ e bimɛ ɔmɛ nyɛɛ se, nɛ nyagbe ɔ, Rahel kɛ Yosef ba. 3Yakob nitsɛ lɛɛ e sɛ hlami, nɛ benɛ e kɛ e nyɛmi ɔ maa ho buami ya a, e kpla si nɛ e kɛ e hɛ mi bu si si kpaago. 4Se Esau tu fo ba kpee Yakob nɛ e fua lɛ atuu. E kɛ e nine fɔ e kuɛ mi, nɛ e fiɔ e nya he, nɛ a fo ya. 5Benɛ Esau na yi ɔmɛ kɛ jokuɛwi ɔmɛ ɔ, e bi ke, “Mɛnɔmɛ o kɛ nyɛɛ ɔ?”
Yakob he nɔ ke, “Bimɛ nɛ Mawu kɛ dloo imi, o tsɔlɔ ɔ ji nɛ ɔmɛ nɛ.” 6Kɛkɛ nɛ mawayi ɔmɛ kɛ a bimɛ ɔmɛ hɛ mɛ kɛ ba, nɛ a ba kpla si. 7Lea kɛ e bimɛ ɔmɛ hu ba, nɛ a ba kpla si. Nyagbe ɔ, Yosef kɛ Rahel hu ba, nɛ a ba kpla si ja nɔuu.
8Esau bi ke, “Lohwe kuukuu nɛ ɔmɛ tsuo nɛ i kɛ kpe ɔ, kɛ ji e sisi kɛɛ?”
Yakob he nɔ ke, “Nike ní nɛ i kɛ ma mo, ye nyɔmtsɛ ɔ kpatami ji nɛ ɔmɛ nɛ.”
9Se Esau de lɛ ke, “Ye nyɛmi, nɔ́ nɛ i ngɛ ɔ hiɛ; ha nɛ enɛ ɔmɛ nɛ a hi si ha mo.”
10Yakob he nɔ ke, “Dɛbi! I kpa mo pɛɛ, ke o kɛ ye tɔmi pa mi ɔ, lɛɛ mo he ye nike ní nɛ ɔmɛ. Anɔkuale mi ɔ, nɛ i na o hɛ mi ɔ, e ngɛ kaa nɔ́ nɛ i na Mawu nitsɛ hɛ mi; ejakaa o ná ye he tsui, nɛ o he mi atuu. 11I kpa mo pɛɛ nɛ o he nike ní nɛ ɔmɛ nɛ i ngɔ ba ha mo ɔ; Mawu nɛ na mi mɔbɔ, nɛ e ha mi nɔ́ tsuaa nɔ́ nɛ hia mi.” Kikɛ nɛ ɔ Yakob hao Esau hluu kɛ ya si Esau kplɛɛ nɛ e he nike ní ɔmɛ.
12Jehanɛ Esau de Yakob ke, “Ha waa ho; ma sɛ o hlami.”
13Yakob he nɔ ke, “Ye nyɔmtsɛ, mo nitsɛ o na kaa jokuɛwi ɔmɛ a hɛ mi fa we lolo. Jehanɛ hu, tohi kɛ nahi nɛ a bimɛ ji nyɔ nya lolo ɔ hu a he ní tsumi fɔɔ si ngɛ ye kuɛ nɔ. Ke a ha nɛ a nyɛɛ tsɔ pe nine ligbi kake po ɔ, lohwe ɔmɛ tsuo pɛpɛɛpɛ ma gbo. 14Enɛ ɔ he je ɔ, ye nyɔmtsɛ, i kpa mo pɛɛ nɛ o sɛ hlami; i kɛ lohwe ɔmɛ kɛ jokuɛwi ɔmɛ maa hi nyɛɛe blɛuublɛuu kɛ yaa si wa ma ba na mo ngɛ Edom.”
15Esau de lɛ ke, “Saminya! Lɛɛ ma si ye we bi ɔmɛ ekomɛ ngɛ hiɛ ɔ nɛ a tsɔɔ nyɛ blɔ.”
Se Yakob he nɔ ke, “Oo! E he hia we! Ke ye nyɔmtsɛ ɔ na ye he tsui kɛkɛ ɔ, lɔ ɔ hiɛ.” 16Esau kpale e se jamɛ a ligbi ɔ kɛ ho Edom ya. 17Se Yakob lɛɛ e pue nɔ kɛ ho Sukot ya. E ya po we ngɛ lejɛ ɔ, nɛ e ma tsu ha e lohwe ɔmɛ hulɔ. Enɛ ɔ he je ɔ, a wo lejɛ ɔ biɛ ke Sukot.#33.17 Sukot: Ngɛ Hebri gbi mi ɔ, biɛ nɛ ɔ sisi ji “tsu” aloo “gba.”
18Yakob kpale e se kɛ je Mesopotamia kɛ ba Shekem ngɛ Kanaan zugba a nɔ fiafiaafia, nɛ e ba ma e bo tsu ɔmɛ ngɛ zugba ko nɔ, ngɛ ma a nya. 19#Yosh 24.32; Yoh 4.5 E he jamɛ a zugba a ngɛ Shekem tsɛ Hamor dɛ kɛ sika hiɔ yi lafa. Hamor ji nɔ nɛ to Shekem ma a sisi. 20Yakob ma bɔ sami la tɛ ngɛ lejɛ ɔ, nɛ e kɛ Israel Mawu ɔ biɛ wo lɛ.
Currently Selected:
Mose I, 33: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.