Yaya 6
6
Dɔmɛ dii koe mɔgɔ wulu loolu ma
1Wo koenu tanbi kɔma, Isa nun a la talibenu bɔɔta ɲɔ, a tɛgɛta Galile ba kɔkɔma, anu be a fɔla ba min ma tugun, Tibɛriyadi ba. 2Jama banba tota a jokkila, bayi a be kabanakoe minnu mala bandibaganu lakendeya koe la, anu be wonu yenna. 3Wo butɔ, Isa nun a la talibenu yɛlɛta kɔnkɛ kunma, anu tagata sigi ɲɔ la. 4Wo ka a taran, Yahudenu la murade Hɔrɔya Sale bata sutuya.
5Awa, anu la sigireŋɛ ɲɔ, Isa ka a ɲa lawuli, a ka jama banba yen nala a ma. Wo butɔ, a ka a fɔ Filipu ye, a ko: «Mɔ si dɛgɛ san kɛ mɔgɛnu ye mina le, anu si min dɔmɔ?» 6A ka wo fɔ a ye dakɔtɔ bɔɛ le la, bayi a si min ma, a ɲan ka wo lɔn. 7Filipu ka a jaabi, a ko: «Hali wo mɔ ka dɛgɛ san tele kɛmɛ fila sɔŋɛ le la, anu bɛ dɔndɔ dɔndɔ ni donden sɔtɔ wo dɛgɛ la, dɛgɛ si ban de, a te anu bɔɔ.» 8Isa la talibe do, Simɔn Piyɛri kɔtɔ kayima, min tɔgɔ Andire, wo ka a fɔ a ye, a ko: 9«Dendeŋɛ do be yan, fondi dɛgɛ loolu nun yɛgɛnden fila be a bolo. Kɔnɔ wo be fen de jarala kɛ mɔgɔ siyama ma?» 10Isa ka a fɔ talibenu ye: «Wo a fɔ kɛ mɔgɛnu ye anu ni anu majigi.» Wo ka a taran, ɲagama siyama le be wo dula tɔ. Wo butɔ, anu naata sigi. Kɔnɔ wo ka a taran, anu kɔnte, kayi wulu loolu ɲɔgɔn be naren. 11Awa, Isa ka wo dɛgɛnu jigan, a ka Ala tantu. A la bandeŋɛ Ala tantula, a ka anu mafatan mɔgɔ sigireŋɛnu ma. A ka yɛgɛ tugun ma ɲɔgɔnna le, han anu fata. 12Anu to fata, a ka a fɔ a la talibenu ye: «Wo a kuntu tɔɛnu madɛn, alako fenfen kana kasara.» 13Wo butɔ, anu ka a bɛ madɛn, anu ka boron tan nun fila lafa wo fondi dɛgɛ loole kuntu tɔɛ la min tota dɔmɔrilanu baa tɔ. 14Wo mɔgɛnu ka Isa la kabanakoe mareŋɛ yen wagate min tɔ, anu tota a fɔla: «Nabiyonmɛ min bɛnta nala dunuya, wolo yati mu kɛ la.» 15Isa ka a lɔn, ka a fɔla, anu be a bitala le, ka a ma mansa la tekku. Wo butɔ, a bɔɔta anu kunma, a tagata tato kɔnkɛ tɔ a dɔrɔn.
Isa la tagamaŋɛ je kunma
16Ɲɔ bata fɔlɔ pinpila, Isa la talibenu tagata jigi ba dala, 17anu jigita kuluŋɛ butɔ, anu tagata. Anu taga tɛmuɛ, anu be katala tɛgɛ koe la ba kɔkɔma, tagala Kapɛrinamu. Dibe bata ban jigila, wo ka a taran Isa ma ke anu ma betunna. 18Wo wagate, fɔɲɔ banba be wulila sɛnbɛ fɛ, a ka ba lafatiya. 19Wo butɔ, anu ka kilo loolu han wɔɔrɔ ɲɔgɔn tagamaŋɛ ma je kunma. Wo tɛmuɛ, anu ka Isa yen kisanna a be tagamanna ba kunma, a be a madonna kuluŋɛ la. Wolo ka a ma, anu kilanta. 20Kɔnɔ Isa ka a fɔ anu ye: «Nde le mu. Wo kana kilan!» 21Anu dita a bakkila kuluŋɛ butɔ. Kɔnɔ wo ka a taran kuluŋɛ kute bata maga duge la. Anu ɲan bata ke anu taga dula.
Mɔgɛnu la Isa ɲini koe
22Wo tabantaka, jama tugun be sɔren ba dala. Anu to bata ke ɲɔ, anu ka a yen kulun do gbɛtɛ bele ɲɔ, fɔ Isa la talibenu nata min fɛ. Anu mɛn ka a lɔn Isa ma bakki nun a la talibenu kunma wo kuluŋɛ tɔ, anu tun de tagata. 23Wo ka a taran, kuluŋɛ do gbɛtɛnu tagata bɔɔla Tibɛriyadi saa tɔ, anu keta dula tɔ, Marige Isa ka Ala tantu ka min na, mɔgɛnu mɛn ka dɛgɛ dɔmɔ dula min tɔ. 24Awa, wo mɔgɛnu to ka a lɔn, Isa nun a la talibenu bele ɲɔ, anu mɛn tabakkita kuluŋɛnu tɔ, tagala Isa ɲinidula Kapɛrinamu saa tɔ.
Kise dɛgɛ min be fatanna Ala la
25Jama ka Isa yen ba kɔkɔma tɛmuɛ min tɔ, anu ka a fɔ a ye: «Karamɔgɔ, i nata yan muntuma?» 26Isa ka anu jaabi, a ko: «N ni tɔɲa beeyareŋɛ pɔsi fɔ wo ye, wo be n ɲinila le bayi wo bata dɛgɛ dɔmɔ han wo fata. Wo bele n ɲinila n na kabanakoenu le la ko la de! 27Wo kana kata de dɔmɛ sɔtɔ koe la min be bɔrɔla. Wo kata dɔmɛ la ko la, min si mɛ a ni abada kise dii wo ma. Nde Adamadeŋɛ si wo dɔmɛ dii wo ma, bayi n Baaba Ala la manditɛ be nde le ma.» 28Wo butɔ, anu ka a maɲininka, anu ko: «Mɔ si fen de kata ma, alako mɔ ni walenu ma Ala be diren minnu ye?» 29Isa ka anu jaabi, a ko: «Ala be diren wale min ye, wolo mu kɛ la: a bata nde min nasanba kiilá la, wo ni dɛnkɛnɛya nde ma.» 30Wo butɔ, anu ka a fɔ a ye: «Awa ile, i be tɔnkuma miniman mala mɔ ni a yen, ka dɛnkɛnɛya i ma? I be ko miniman mala? 31Mɔ benbanu ka Mana dɔmɔ janfue tɔ, iko a be sɛbɛren ki min na: aa a ka dɛgɛ dii anu ma bɔɔla saŋɛ tɔ, anu ni a dɔmɔ#6:31 Taureta Musa, kitabu filaɲɔgɛ, sora 16. Jaburu sora 78, haaya 24, anun sora 105, haaya 40..» 32Isa ka a fɔ anu ye, a ko: «N ni tɔɲa beeyareŋɛ pɔsi fɔ wo ye, Musa le ma wo dɛgɛ dii wo ma kabɔɔ saŋɛ tɔ. Kɔnɔ n Baaba le be dɛgɛ yati diila wo ma kabɔɔ saŋɛ tɔ. 33Bayi min be jigila bɔɔla saŋɛ tɔ a ni kise dii dunuya mɔgɛnu ma, wolo mu Ala la dɛgɛ la.» 34Anu ka a fɔ a ye: «Marige, wo dɛgɛ dii mɔ ma wagate bɛ tɔ!» 35Isa ka a fɔ anu ye: «Nde le mu kise dɛgɛ la. Min tini na n ma, kɔnkɛ te wo tigi bita abada; min tini dɛnkɛnɛya n ma, ji min sɔgɛ te wo tigi bita abada. 36Kɔnɔ wole, hali wo be n yenden, wo ma dɛnkɛnɛya n ma. N ka wolo fɔ wo ye nun. 37N Baaba be mɔgɛnu minnu bɛ donden n bolo, wo bɛ si na ke n ma. Min tini na n ma, n te wo tigi aɲɛ feu! 38N bele jigiren bɔɔla saŋɛ tɔ, n yɛtɛ sagoe ma koe la, ade, n be jigiren n Kiilá sagoe le ma koe la. 39Min ka n kii, wo sagoe le mu kɛ la: A be diren de, a ka mɔgɛnu min bɛ dii n ma, wo hayi dɔndɔ kana sama n bolo, fɔ n ni anu lawuli faga ma lun tɔɛ. 40N Baaba sagoe tugun de mu ka: min yo ka nde a la den kayireŋɛ lasaga, a dɛnkɛnɛyata n ma, wo tigi si abada kise sɔtɔ le. Nde tugun si i tigi lawuli le faga ma lun tɔɛ.»
41Awa, Isa to ka a fɔ, aa dɛgɛ min jigita bɔɔla saŋɛ tɔ, aa ale mu wolo la, Yahude donu be a makumala anu da kɔtɔ. 42Anu tota a fɔla: «Bɔ Isa ma ka, Yusufu la deŋɛ? Mɔ ka a baaba nun a nɛɛnɛ lɔn. Kɛ be a fɔla fenna aa ale be jigiren bɔɔla saŋɛ tɔ?» 43Isa ka anu jaabi, a ko: «Wo kana kuma fɔ ɲɔgɔn tɛma wo da kɔtɔ. 44Mɔgɔ yo te nɔ nala n ma, fɔ n Baaba min ka n kii, wo tini min kun sɔ n na. Nde tugun si naa wo tigi lawuli faga ma lun tɔɛ. 45A be sɛbɛren nabiyonmɛ la kitabue tɔ ɲɔgɔnna le, ka a fɔla:
Ala le be lɔnnɛ diila a bɛ ma. # 6:45 Annabi Esayi sora 54, haaya 13.
Min bɛ ka n Baaba la kuma lamɔɛ, a ka lɔnnɛ sɔtɔ, wo tigi si naa ke n ma. 46A bele toren de iko mɔgɔ do bata n Baaba Ala yen, ade, fɔ nde min fatanta Ala la, nde le bata n Baaba yen. 47N ni tɔɲa beeyareŋɛ pɔsi fɔ wo ye: min tini dɛnkɛnɛya n ma, abada kise be wo tigi ye. 48Malakise dɛgɛ mu nde le la. 49Wo benbanu kan, anu ka Mana dɔmɔ janfue tɔ, kɔnɔ anu naata na faga le. 50Dɛgɛ min be jigila bɔɔla saŋɛ tɔ, wolo mu nde la. Ka mɔgɔ min yo ka a dɔmɔ, wo tigi kan te faga. 51Malakisi dɛgɛ min jigita bɔɔla saŋɛ tɔ, wolo mu nde la. Ka mɔgɔ min ka kɛ dɛgɛ dɔmɔ, a si kisi dan bele a la. N be dɛgɛ min diila, n bali bangue le mu a la. N si a dii, alako dunuya mɔgɛnu ni kise sɔtɔ.»
52Wo butɔ, Yahudenu ka ɲɔgɔn masɔ́sɛ́ ma, anu ka a fɔ: «Bɔ, kɛ be nɔla a bali bangue diila mɔ ma kama le, mɔ ni a dɔmɔ?» 53Isa ka a fɔ anu ye, a ko: «N ni tɔɲa beeyareŋɛ pɔsi fɔ wo ye, ka wo ma nde Adamadeŋɛ bali bangue dɔmɔ, ka n base min, kisi bele wo ye. 54Kɔnɔ min tini n bali bangue dɔmɔ, a ka n base min, wo bata abada kise sɔtɔ. N si wo tigi lawuli le faga ma lun tɔɛ. 55Iyon, dɔmɛ yati le mu n bali bangue la. Minfeŋɛ yati le mu n base tugun na. 56Min tini n bali bangue dɔmɔ, a ka n base min, wo tigi la ko bata to nde ye, nde la ko tugun bata to ale ye. 57N be kise tɔ ki min na n Baaba kise tige fɛ, min ka n kii, awa min tini nde dɔmɔ, wo tigi tugun be kise sɔtɔla nde fɛ ɲɔgɔnna le. 58Dɛgɛ min jigita bɔɔla saŋɛ tɔ, wolo mu nde la. A bele toren iko wo benbanu ka dɛgɛ min siila dɔmɔ, anu naata na faga. Kɔnɔ min tini nde dɔmɔ, wo tigi si abada kise sɔtɔ le.»
59Isa ka kɛ koenu fɔ, a be mɔgɛnu kawandila wagate min tɔ Yahudenu la kawandi ma boŋɛ tɔ Kapɛrinamu saa tɔ.
Abada kise kuma
60Awa, a la talibenu ka wo mɔɛ wagate min tɔ, anu siyama ko: «Kɛ kuma bɛlɛ de! Ɲɔmɔ le ɲan si nɔ a bitala?» 61Isa to ka a lɔn a yɛtɛ la, a la talibenu be kumala anu da kɔtɔ wolo la, wo butɔ a ka a fɔ anu ye: «Kɛ kuma bata wo ladumɛn ba? 62Ka a taranta go, wo ka nde Adamadeŋɛ yen yɛlɛla saŋɛ tɔ n bɔɔta ka min na? 63Ala Hakkili Saniyandeŋɛ le be mɔgɛ lakisila. Bali bangue kan te nɔ fenfen mala malakise la. Ala Hakkile Saniyandeŋɛ min be abada kise diila, wo be wo sɔtɔla nde la kumanu le sabu la n be minnu fɔren wo ye ka. 64Kɔnɔ donu be wo tɛma yan, anu bele dɛnkɛnɛyaren.» Isa ka wo fɔ le, bayi minnu bele dɛnkɛnɛyaren, Isa ka wonu lɔn bɔɔla a fɔlɛ la, anun mɔgɛ min si naa a janfa. 65A mɛn ka a fɔ: «Wolo mu, n be a fɔren wo ye, mɔgɔ yo te nɔ nala n ma, fɔ n Baaba ni dɛnkɛnɛya dii wo tigi ma.» 66Bɔɔla wo wagate le, a la talibenu siyama saagita a kɔma, anu bele tagamanna ɲɔgɔn na bitugun.
67Wo butɔ, Isa ka a fɔ a la talibi tan nun fila ye: «Wole go? Wole tugun be diren tagala le ba?» 68Simɔn Piyɛri ka a jaabi, a ko: «Marige, mɔ si taga ɲɔmɔ ma? Abada kise kuma be ile le bolo! 69Mɔle be dɛnkɛnɛyaren, mɔ mɛn be a lɔnden, ile le mu Ala la mɔgɔ masubɛreŋɛ saniyandeŋɛ la.» 70Isa ka anu jaabi, a ko: «N ma wo mɔgɔ tan nun fila le masubɛ ba? Adun, mɔgɔ dɔndɔ be wo tɔ, Adama Sentanɛ le mu a la.» 71Yaga, a be Judasi le ma, Simɔn Isikariyoti la den kayireŋɛ. Bayi hali a to be wo talibi tan nun fila tɛma, ale le be naala a janfala.
Currently Selected:
Yaya 6: MOG
Highlight
Share
Copy
Want to have your highlights saved across all your devices? Sign up or sign in