Yaya 5
5
Isa la namata lakendeya koe
1Wo koenu tanbi kɔma, Yahudenu la sale do keta, wo butɔ Isa yɛlɛta Darisalamu. 2Wo ka a taran, ji madɛn dula banba do be Darisalamu, min tɔgɔ Hebure kuma tɔ Beteseda. A be saa bonda banba le dondula tɔ, min tɔgɔ Kolofeŋɛnu la Bonda. Ɲinbe kɔtɔ loolu le be ɲɔ. 3Bandibaga siyama le be saren wo ɲinbenu kɔtɔ: ɲabɔnɛnu, anun namatanu, anun minnu bole nun anu kɛŋɛ be mabɛnden. Anu be ji lamaga do le kɔnɔnden. 4⸂Bayi Marige la maleka do si kɛnɛ jigila le wo ji madɛndula tɔ, a ni je lamaga. Wo ji lamaga kɔma, min yo fɔlɔ jigita je tɔ, ka bandiya yo be min na, a si bɔɔ a tigi ma, a ni kendeya.⸃ 5Awa, kaye do be ɲɔ, min bata san bi saba nun sagin ma bandiya tɔ. 6Isa to ka a sareŋɛ yen, a ka a lɔn de a bata mɛ saren ɲɔ bɔɔla bima, wo butɔ a ka a fɔ a ye: «Kendeya sɔgɛ be i la ba?» 7Namata ka a jaabi, a ko: «N tige, mɔgɔ yo bele n ɲɛ min si n najigi kɛ ji madɛndula butɔ je lamaga kɔma. N tini be katala n ni ke ɲɔ, wo si a taran mɔgɛ do fɔlɔ bata jigi ɲɔ butɔ.» 8Isa ka a fɔ a ye: «Ile wuli, i ni i la safeŋɛ jigan, i ni tagaman!» 9Ale kaye kendeyata kisanna. A ka a la safeŋɛ jigan, a fɔlɔta tagamanna.
Wo ka a taran, a mata sulen lɔ́gɛ́ le. 10Awa, Yahude kuntigenu tota a fɔla kaye ye min kendeyata, anu ko: «Sulen lɔ́gɛ́ le bi de! A bele dagɛren i ye bi luŋɛ, i ni i la safeŋɛ jigan i ni a doni.» 11A ka anu jaabi, a ko: «Min ka n nakendeya, wolo ka a fɔ n ɲɛ, aa n ni n na safeŋɛ jigan, n ni tagaman.» 12Anu ka a maɲininka, anu ko: «Mɔgɔ miniman de ka a fɔ i ye, aa i ni i la safeŋɛ jigan, i ni tagaman?» 13Kɔnɔ kɛ kaye min kendeyata, a ma a lakendeyalá lɔn, bayi wo ka a taran Isa bata sama jama tɛma, min be wo dula tɔ nun.
14Wagate do kɔma, Isa naata ale kaye yen Ala batu boŋɛ dala, a ka a fɔ a ye: «I tolomasɔ: kɔtɛ, i bata kendeya. I kana junubu koe ma bitugun, alako ko koroŋɛ kana ma i la min fisa a fɔlɔnɛŋɛ ko.» 15Ale kaye bɔɔta ɲɔ, a tagata a ka Yahudenu lalɔn, a ko aa Isa le ka a lakendeya. 16Isa to tota wo koenu mala sulen lɔ́gɛ́nu tɔ, wolo ka a ma Yahude kuntigenu fɔlɔta kitila a ɲagankata koe la. 17Kɔnɔ Isa ka anu jaabi, a ko: «Fanni n Baaba Ala be walila, fɔ nde tugun ni wali.» 18Wolo ka a ma, Yahudenu tota a faga fɛrɛ ɲinila, ka tanbi fɔlɔnɛŋɛ la, bayi a ma sulen lɔ́gɛ́ tana le tun ma, fɔ a mɛn ka a fɔ le aa ale Baaba le mu Ala la, wo butɔ a bata a yɛtɛ nun Ala lakanya.
Yamɔre don koe Isa bolo
19Wo butɔ, Isa ka anu jaabi, a ko: «N ni tɔɲa beeyareŋɛ pɔsi fɔ wo ye: nde den kayireŋɛ te nɔ fenfen mala n yɛtɛ ma, fɔ ka n ka min yen n Baaba la. Bayi ale be min bɛ mala, nde a la den kayireŋɛ tugun be wo ɲɔgɔn de mala. 20Bayi n Baaba be nde a la den kayireŋɛ kanuren. Ale yɛtɛ be koe minnu mala, a be wo bɛ yitala n na. A mɛn si naa ko donu yita n na, minnu kolo kɛnu ko, han a ni ma wo ye da bala la. 21Bayi n Baaba be mɔgɔ fagareŋɛnu lawulila ki min na, a ni anu lakisi, nde a la den kayireŋɛ tugun sagoe be mɔgɛnu minnu la, n be wonu lakisila. 22Baaba ɲan te mɔgɔ yo makiiti, a be kiite bɛ toren nde a la den kayireŋɛ le ma, 23alako mɔgɛ bɛ ni nde a la den kayireŋɛ biliya, iko anu be ale biliyala ki min na. Min ma nde a la den kayireŋɛ biliya, wo tigi te n Baaba biliya min be n nasanbaren kiilaya la.
24N ni tɔɲa beeyareŋɛ fɔ wo ye, min ka n na kuma mɔɛ, a ka a bita, a dɛnkɛnɛyata n Kiila ma, abada kise be wo tigi ye. A te bɛn kiite ma. A ɲan bata bɔɔ bɔnɛ tɔ, ka don kise tɔ. 25N ni tɔɲa beeyareŋɛ pɔsi fɔ wo ye, wagati do si naa ke, a ɲan bata ke, fagabaganu si nde Ala la den kayireŋɛ kulɛ lamɔɛ le. Minnu ka n kulɛ lamɔɛ, wonu si kisi le. 26Kise tige le mu n Baaba la, a bata sɔn kise to koe la nde a la den kayireŋɛ tugun bolo iko ale. 27A mɛn bata yamɔre don n bolo kiiti sa koe la, bayi Adamadeŋɛ le mu n na. 28Wo kana kaabɛ wo ma, bayi wagate do si naa ke le, min bɛ be saarenu tɔ, wonu si n kulɛ mɔɛ le. 29Wo tɛmuɛ, anu si tawuli anu la saarenu tɔ: minnu ka ko ɲinma ma, wonu si tawuli abada kise la, minnu ka ko koroŋɛ ma, wonu si tawuli a bɔnɔ kɛɲa ma. 30Nde te nɔ fenfen mala n yɛtɛ ma. N be a mɔɛla n Baaba la ki min na, n be kiite sala ɲɔgɔnna le. N na kiiti sa be telenden de, bayi n bele n yɛtɛ sagoe le mala, fɔ n Kiila sagoe.»
Isa la seedenu
31Isa mɛn ko: «Ka nde le be maren n yɛtɛ seede la, n na seedeɲɔgɔya tɔɲa ma. 32Do gbɛtɛ le be seedeɲɔgɔya bɔɔla n na ko tɔ, min mu Ala la. N ka a lɔn, ale la seedeɲɔgɔya mu tɔɲa le la.
33Wole yati ka kiilanu kii le Yaya ma. Wo butɔ, a ka seedeɲɔgɔya min bɔɔ n na ko tɔ, wo bɛ mu tɔɲa le la. 34Nde ɲan haju yo bele Adamadeŋɛ do la seedeɲɔgɔya ma, kɔnɔ n be kɛ koenu fɔla le alako le wo ni kisi. 35Yaya mu lanpu bitareŋɛ le la nun, min malaŋɛ be bɔɔla. Wole sɔnta ɲagalinna a la malaŋɛ la, wagate do kɔtɔ.
36Kɔnɔ seede do gbɛtɛ be n bolo, min tanbita Yaya tɛŋɛ la: n be wale minnu mala, wonu yɛtɛ mu n ɲɛ seede le la, ka a fɔla n Baaba le be n kiiren. N Baaba bata wo walenu don n bolo, anu dalafa koe la. 37Iyon, n Baaba min ka n kii, wolo yati be maren n seede la. Wo bele a kumari kulɛ yo mɔɛren, wo mɛn bele a ɲakɔtɔ tugun yenden wo ɲa la. 38A la kuma bele toren wo bue tɔ, bayi a ka nde min kii, wo bele laaren n na. 39Wo be Ala la sɛbɛrenu tefila ka a fɛlɛ a ɲinma la, bayi a be wo juse tɔ, ko abada kise be sɔtɔla wo sɛbɛre le tɔ. Awa, wo sɛbɛrenu tugun de mu n seede la. 40Kɔnɔ hali wolo mu, wo bele sɔnden nala n ma, alako wo ni kisi.
41N bele mamatɔgɛ ɲinila mɔgɛnu la. 42Kɔnɔ n ka wo juse lɔn, wo bele Ala kanuren. 43N bata na n Baaba tɔgɛ la, kɔnɔ wo ma n nabɛn. Ka mɔgɔ do nata a yɛtɛ tɔgɛ la, wo si wo tigi kan nabɛn de. 44Wo be diren de wo ni ɲɔgɔn matɔgɔ, kɔnɔ wo bele katala le Ala ni wo matɔgɔ, min dɔrɔn mu. Wo butɔ, wo si nɔ dɛnkɛnɛyala kama le? 45Wo kana a mira nde si n madi n Baaba ma wo la ko la. Wo be wo la lannanteya bɛ saren Musa min ma, ale le si a madi wo la ko la. 46Ka wo laata Musa la nun, wo si laa nde tugun na, bayi a ka n na ko sɛbɛ le. 47Kɔnɔ ka wo bele laaren a la sɛbɛrenu la, fen de ɲan si nɔ a mala wo ni laa nde tɛn kuma la?»
Currently Selected:
Yaya 5: MOG
Highlight
Share
Copy
Want to have your highlights saved across all your devices? Sign up or sign in