MARKOS 14
14
Ka jingïasylla pyrshah ïa U Jisu
(Mat. 26:1-5; Luk. 22:1-2; Ïoan. 11:45-53)
1 #
Eks. 12:1-27
Ka la long mynta ar sngi shuwa ka Jingkhawai Niam Ka Jinglait bad U Kpu Bakhlem Thiat. Ki rangbah lyngdoh bad ki nonghikai ka Hukum ki la wad ka lad ban kem jar jar ïa U Jisu bad ban pynïap ïa u. 2“Ngim dei ban leh ïa kane ha ka por Ka Jingkhawai Niam,” ki la ong, “lymda kumta ki paidbah ki lah ban khih kulmar.”
La pynsleh ïa U Jisu ha Bethania
(Mat. 26:6-13; Ïoan. 12:1-8)
3 #
Luk. 7:37,38 U Jisu u la don ha Bethania ha ka ïing u Simon, u briew uba pang 'ñiangthohlieh. Katba U Jisu u dang bam, kawei ka kynthei ka la wan shapoh ryngkat bad ka dabi alabastar ba la dap da ka jingsleh iwbih baremdor haduh katta katta na u nard bakynsai. Ka la pynpait ïa ka dabi bad ka la theh ïa ka jingsleh iwbih halor ka khlieh U Jisu. 4Katto katne ngut na ki briew kiba don hangta ki la bitar bad ki la ïa-ong para ma ki, “Kaei ka jingmyntoi ban pynlehnoh-ei ïa ka jingsleh iwbih? 5Yn jin da la die ïa ka palat laispah ki sbai rupa bad ïa ka pisa ban ai ha kiba duk!” Bad ki la kem daw tyngeh ïa ka.
6Hynrei U Jisu u la ong, “Ieh ïa ka marwei! Balei ba phi pynwit ïa ka? Ka la leh ïa kaei kaei kaba bha bad ba-itynnat na ka bynta jong nga. 7#Deut. 15:11Phin don borabor ïa ki briew kiba duk bad phi, bad ha kano kano ka por ba phi kwah, phi lah ban ïarap ïa ki. Hynrei phin ym ïoh borabor ïa nga. 8Ka la leh ïa kaei kaba ka la lah ban leh; ka la theh ïa ka jingsleh iwbih halor ka met jong nga ban pynkhreh lypa shuwa ka por jong ka jingtep ïa ka met jong nga. 9Mynta, nga ong skhem ha phi, ba shano shano ba yn ïalap ïa ka Gospel ha kylleng ka pyrthei, ïa kaei kaba ka la leh yn ïathuh ban kynmaw ïa ka.”
U Judas u mynjur ban shetkylla ïa U Jisu
(Mat. 26:14-16; Luk. 22:3-6)
10Te u Judas Iskariot, uwei na ki khat-ar ngut ki synran, u la mihnoh ban leit sha ki rangbah lyngdoh khnang ban shetkylla ïa U Jisu ha ki. 11Ki la sngewkmen ban ïohsngew ïa kaei kaba u don ban ong, bad ki la kular ban ai pisa ïa u. Kumta u Judas u la sdang ban wad ïa ka lad kaba biang ban aiti noh ïa U Jisu sha ki.
U Jisu u bam ïa Ka Jingkhawai Niam Ka Jinglait bad ki synran jong u
(Mat. 26:17-25; Luk. 22:7-14,21-23; Ïoan. 13:21-30)
12Ha ka sngi nyngkong jong ka Jingkhawai Niam U Kpu Bakhlem Thiat, ka sngi ha kaba la pynïap ïa ki khunlangbrot na ka bynta ka Jingkhawai Niam Ka Jinglait, ki synran U Jisu ki la kylli ïa u, “Hangno me kwah ïa ngi ban leit bad ban pynkhreh ïa ka jingbam na ka bynta ka Jingkhawai Niam Ka Jinglait?”
13Te U Jisu u la phah ar ngut na ki ryngkat bad kine ki jingbthah: “Khie leit sha ka nongbah, bad uwei u briew uba kit ïa u khiew um, un ïakynduh ïa phi. 14Bud ïa u sha ka ïing ba un rung bad ong ïa u trai jong ka ïing: ‘U Nonghikai u ong, “Hangno ka kamra ha kaba ki synran jong nga bad ma nga ngin ïabam na ka bynta ka Jingkhawai Niam Ka Jinglait?” ’ 15Te un pyn-i ha phi ïa ka kamra kaba haneng kaba heh, ba la pynkhreh bad pynbiang, ha kaba phin ïoh baroh kiei kiei ba la pynkhreh lypa na ka bynta jong ngi.”
16Ki synran ki la leit, ki la rung sha ka nongbah, bad shem kiei kiei baroh kumba U Jisu u la lah ong ïa ki; bad ki la pynkhreh ïa ka jingbam ïa ka Jingkhawai Niam Ka Jinglait.
17Haba la janmiet, U Jisu u la wan ryngkat bad ki khat-ar ngut ki synran. 18#Salm. 41:9Katba ki dang don ha ka miej ban ïabam, U Jisu u la ong, “Nga ong ïa phi, ba uwei na phi un shetkylla ïa nga — uta uba dang ïabam bad nga.”
19Ki synran ki la khih jingmut bad ki la sdang ban kylli ïa u, uwei hadien uwei pat, “Da shisha, mem shym mut ïa nga, hato ym dei kumta?”
20U Jisu u la jubab, “Un long uwei na phi ki khat-ar ngut, uta u ban wieh ïa u kpu jong u ha ka pliang bad nga. 21U Khun U Briew un ïap kumba ki Jingthoh Bakhuid ki la ong ba un ïap; hynrei katno kan long kaba sngewshyrkhei na ka bynta uta u briew uba shetkylla ïa U Khun U Briew! Kan jin da la kham bha na ka bynta uta u briew lada ym shym la kha ïa u!”
Ka jingkhawai U Trai
(Mat. 26:26-30; Luk. 22:14-20; 1 Kor. 11:23-25)
22Katba ki dang ïabam, U Jisu u la shim ïa u kpu, u la duwai ainguh bad u la kdiah ïa u, bad u la ai ïa u ha ki synran jong u, “Shim ïa u, une u long ka met jong nga” u la ong.
23Nangta u shim ïa ka khuri, u la ainguh ha U Blei, bad u la ai ïa ka ha ki; bad baroh ki la dih na ka. 24#Eks. 24:8; Jer. 31:31-34U Jisu u la ong, “Kane ka long ka snam jong nga ïa kaba la pynmih na ka bynta kiba bun, ka snam jong nga kaba pynskhem ïa ka jutang U Blei. 25Nga ong ha phi, ngan ym dih shuh na kane ka waiñ tad haduh kata ka sngi ba nga dih na ka waiñ bathymmai ha ka Hima U Blei.” 26Nangta ki la rwai ïa ka jingrwai bad ki la leit noh sha u lum ki Olib.
U Jisu u ïathuhlypa ïa ka jinglen u Petros
(Mat. 26:31-35; Luk. 22:31-34; Ïoan. 13:36-38)
27 #
Sekh. 13:7
U Jisu u la ong ha ki, “Baroh na phi phin phet noh bad phin iehnoh ïa nga, naba ka Jingthoh Bakhuid ka ong, ‘U Blei un pynïap ïa u nongaplangbrot, bad ïa ka kynhun langbrot yn pynsakma.’ 28#Mat. 28:16Hynrei hadien ba nga la mihpat, ngan leit sha Galilaïa ha shuwa jong phi.”
29U Petros u la jubab, “Ngan ym iehnoh ïa me, wat la baroh kiwei pat kin leh kumta!”
30U Jisu u la ong ha u Petros, “Nga ong ïa me ba ha shuwa ba u syiar un kyn-ih ar sien mynta ka miet, men sa ong lai sien ba mem ithuh ïa nga.”
31U Petros u la kham ban ha kaba jubab ïa u, “Da lei lei ngan ym ong kumta, wat lada ka dei ïa nga ban ïap bad me!”
Bad baroh kiwei ki synran ki la ong kumjuh.
U Jisu u duwai ha ka kper Gethsemane
(Mat. 26:36-46; Luk. 22:39-46)
32Ki la wan sha ka jaka ba la khot Gethsemane, bad U Jisu u la ong ha ki synran, “Shong hangne katba nga dang duwai.” 33U la ïalam bad u ïa u Petros, u Jakob, bad u Ïoannis. Ka jingjynjar mynsiem bad ka jingsngewkhuslai ki la wan ha u, 34bad u la ong ha ki, “Ka jingsngewsih ha ka dohnud jong nga ka long kaba khraw katta katta haduh ba ka la jan pynlwet ïa nga. Ïashong hangne bad to ïai ap.”
35U la leit kham ha pajih, u la dem pyllup ha khyndew, bad u la duwai ba lada don ka lad, un ym hap ban ïaid lyngba ïa kata ka por jong ka jingshah shitom. 36“Ko Pa,” u duwai, “Ko Pa jong nga! Baroh kiei kiei ki long kiba lah ha me. Shim noh na nga ïa kane ka khuri jong ka jingshahshitom. Pynban ym ïa kaei kaba nga kwah, hynrei ïa kaei kaba me kwah.”
37Nangta u la wan phai pat bad u la shem ïa ki lai ngut ki synran ba ki ïohthiah. U la ong ha u Petros, “Ko Simon, me ïohthiah? Hato mem lah ban ïaishah bad nga wat tang shi kynta?” 38Bad u la ong ïa ki, “To sumar bad to duwai ba phin ym hap ha ka jingpynshoi. Ka mynsiem ka kwah hynrei ka doh ka tlot.”
39U la leit noh sa shisien bad u la duwai, da kaba ong ïa kijuh ki ktien. 40Nangta u la wan pat sha ki synran bad u la shem ba ki ïohthiah; kim shym la lah ban khyllie ïa la ki khmat. Bad kim shym la tip ïa kaei ban ong ïa u.
41Haba u la wan pat ha ka sien kaba lai, u la ong ïa ki, “Hato phi dang ïohthiah bad dang shongthait? Ka la biang! Ka kynta ka la poi! Khmih, ïa U Khun U Briew yn ai noh mynta ha ka bor jong ki briew kiba pop. 42Ïeng joit, ïa ngin ïaleit noh. Ha khmih, hangne u don u briew uba shetkylla ïa nga!”
Ka jingkem ïa U Jisu
(Mat. 26:47-56; Luk. 22:47-53; Ïoan. 18:3-12)
43U Jisu u dang kren mynba u Judas, uwei na ki khat-ar ngut ki synran u la poi. Ryngkat bad u, la don u paidbah ba la kieng atiar da ki waitlam bad ki dieng tangon, ïa uba la phah da ki rangbah lyngdoh, ki nonghikai jong ka Hukum, bad ki rangbah nongïalam. 44U nongshetkylla u la lah ai ha u paidbah ïa ka dak: “U briew ïa uba ngan doh u dei uta ïa uba phi kwah. Kem ïa u bad ïalam ïa u da kaba ap phira bha.”
45U Judas tang mar ïapoi, u la leit sha U Jisu bad u la ong, “Ko Nonghikai!” bad u la doh ïa u. 46Kumta ki la kem ïa U Jisu bad ki la batskhem ïa u. 47Hynrei uwei na kita kiba ïa-ïeng hangta u la sei ïa ka waitlam bad u la pom ïa u mraw jong u Rangbah Lyngdoh, bad ïoh mait ïa ka shkor jong u. 48Te U Jisu u la kren bad u la ong ha ki, “Hato phi donkam ban wan ryngkat bad ki waitlam bad ki dieng tangon ban kem ïa nga, la kumba nga dei u riewsniew? 49#Luk. 19:47; 21:37Man ka sngi nga la don bad phi ban hikai ha ka Templ, bad phim shym la kem ïa nga. Hynrei ki Jingthoh Bakhuid ki dei ban urlong shisha.”
50Te baroh ki synran ki la iehnoh ïa u bad ki la ïaphet noh.
51Uwei u samla, uba kup tang da ka jaiñ linen, u bud ïa U Jisu. 52Ki la pyrshang ban kem ïa u, hynrei u la phet lyngkhuit, da kaba iehnoh ïa ka jaiñ shadien jong u.
U Jisu ha khmat ka Dorbar
(Mat. 26:57-68; Luk. 22:54-55,63-71; Ïoan. 18:13-14,19-24)
53Nangta, ïa U Jisu la ïalam sha ka ïing u Rangbah Lyngdoh, ha kaba la ïalumlang ki rangbah lyngdoh, ki rangbah nongïalam bad ki nonghikai jong ka Hukum. 54U Petros u la bud na jngai bad u la leit shapoh ka phyllaw jong ka ïing u Rangbah Lyngdoh. U shong hangta bad ki nongap phira, u pynsyaid ïa lade harud ding. 55Ki rangbah lyngdoh bad ka dorbar baroh kawei ki la pyrshang ban wad ki sakhi pyrshah ïa U Jisu khnang ban pynïap noh ïa u, hynrei kim shym la shem kano kano ruh. 56Bun ki nongsakhi ki la shu sakhi lamler pyrshah ïa U Jisu, hynrei ki jingïathuh jong ki kim ïahap satia.
57Nangta katto katne ngut ki briew ki la ïeng bad ki la ïathuh ïa kane ka jinglamler pyrshah ïa U Jisu; 58#Ïoan. 2:19“Ngi la ïohsngew ba u ong, ‘Ngan pynjot ïa kane ka Templ kaba ki briew ki la tei, bad hadien lai sngi ngan tei ïa kawei pat kaba ym shym la shna da ki briew’ ” 59Wat la kumta ruh, kim shym la lah ban pynlong ïa ki jingïathuh jong ki kiba ïahap.
60U Rangbah Lyngdoh u la ïeng ha khmat jong ki baroh bad u la kylli ïa U Jisu, “Hato mem don ka jubab ïa ka jingmudui kaba ki la wanrah pyrshah ïa me?”
61Hynrei U Jisu u la sngap jar bad um ong shikyntien ruh. U Rangbah Lyngdoh u la kylli biang ïa u, “Hato me long U Messaïah, U Khun jong U Blei ba la kyrkhu?”
62 #
Dan. 7:13
“Nga long,” U Jisu u la jubab, “bad phin ïohi ïa U Khun U Briew uba shong ha ka liang kamon jong U Badonbor Baroh bad ba u wan ha ki lyoh jong ka bneng!”
63U Rangbah Lyngdoh u la tar ïa la ki jaiñkup bad u la ong, “Ngim donkam shuh kino kino ki sakhi! 64#Leb. 24:16Phi la ïohsngew ïa ka jingkrenbeiñ Blei. Kaei ka jingrai jong phi?”
Baroh ki la rai pyrshah ïa u: U long ba la rem bad dei ban pynïap noh ïa u.
65Katto katne ngut na ki, ki la sdang ban bynthiew ïa U Jisu bad ki la tap-matlah ïa u bad ki la shoh ïa u. “Ïathuh uei uba la shoh ïa me!” ki la ong. Bad ki nongap phira ki la shim ïa u bad ki la thab ïa u.
U Petros u len ïa U Jisu
(Mat. 26:69-75; Luk. 22:56-62; Ïoan. 18:15-18,25-27)
66U Petros u dang don shapoh ha ka phyllaw haba kawei na ki khynnah shakri jong u Rangbah Lyngdoh ka la ïaid nangta. 67Haba ka la ïohi ïa u Petros ba u dang syaid ding, ka la peit shaiñ ïa u bad ka la ong, “Ma me ruh, me la long bad U Jisu uba na Nasareth.”
68Hynrei u la len ïa kata. “Ngam tip ... ngam sngewthuh ïa kaei kaba pha kren,” u la jubab, bad u la leit noh sha ka baranda. Hamar kata ka por u syiar u la kyn-ih.
69Kata ka khynnah shakri ka la ïohi ïa u hangta bad ka la sdang ban ong biang kumjuh ha kiba ïa-ïeng hangta, “U long uwei na ki!” 70Hynrei u Petros u la len biang ïa kata.
Katto katne por hadien, kiba ïa-ïeng hangta ki la mudui biang ïa u Petros, “Mem lah ban len ba me long uwei na ki, namar ma me ruh, me long na Galilaïa.”
71Nangta u Petros u la ong, “Nga smai ba nga kren ïa ka jingshisha! Ai ba U Blei un pynshitom ïa nga lada ngam long kumta! Ngam tip shaphang uta u briew uba phi kren!”
72Ha kata ka por u syiar u kyn-ih ha ka sien kaba ar, bad u Petros u la kynmaw kumno ba U Jisu u la lah ong ïa u, “Shuwa ba u syiar un kyn-ih ar sien, men ong lai sien ba mem ithuh ïa nga.” Bad u la pait ka dohnud bad u la lynñiar kthang.
Currently Selected:
MARKOS 14: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.