LOUKAS 13
13
To phai noh na ki pop jong phi lane to ïap noh
1Ha kata ka por, la don hangta katto katne ngut ki briew kiba la ïathuh ha U Jisu shaphang ki nong Galilaïa ïa kiba u Pilat u la phah pynïap katba ki dang ai ki jingkñia sha U Blei. 2U Jisu u la jubab ïa ki, “Namar ba ïa kito ki nong Galilaïa la pynïap ha kata ka rukom, hato phi pyrkhat ba ka pynshisha ba ki la long ki nongpop kiba kham sniew ban ïa baroh kiwei pat ki nong Galilaïa? 3Em, ym kumta! Bad nga ong ïa phi ba lada phim phai noh na ki pop jong phi, phi baroh phin ïap kum ma ki. 4Kumno shaphang kito ki khatphra ngut ki briew ha Siloam kiba la shah pynïap mynba ka jaka ap phira ka hap halor jong ki? Hato phi tharai ba kane ka pynshisha ba ki long kiba kham sniew ban ïa baroh kiwei pat ki briew kiba shong basah ha Jerusalem? 5Em, ym kumta! Bad nga ong ha phi ba lada phim phai noh na ki pop jong phi, phi baroh phin ïap kum ma ki.”
Ka pharshi u diengsoh Dumbur u bymseisoh
6Nangta U Jisu u la ïathuh ha ki ïa kane ka pharshi: “La don shisien uwei u briew uba la don uwei u diengsoh Dumbur uba mih ha ka bri sohwaiñ jong u. U la leit khmih soh Dumbur ha u hynrei um shem ei ei. 7Kumta u la ong ha u nongsumar kper jong u, ‘Ha khmih, la lai snem nga la wan shane da kaba wad soh Dumbur ha une u diengsoh Dumbur, bad ngam shym shem ei ei. Khet noh ïa u! Balei un shu pynsep-ei ïa ka khyndew?’ 8Hynrei u nongsumar kper u la jubab, ‘Iehnoh shuwa, ko kynrad, sa tang shisnem; ngan tih sawdong jong u bad ai sboh katto katne. 9Te lada u dieng u pynmih soh Dumbur ha ka snem kaba bud, katta kan kham bha; lymda kumta, te phi lah ban phah khet noh ïa u.’ ”
U Jisu u pynkhiah ïa ka kynthei kaba khrew ha ka sngi Sabbaton
10Ha kawei ka sngi Sabbaton, U Jisu u dang hikai ha ka synagog. 11Kawei ka briew hangta ka la don u mynsiem bymman uba la pynlong ïa ka ban shitom haduh khatphra snem; ka la kdor ryngkdung bad kam lah ban pynbeit shuh. 12Haba U Jisu u la ïohi ïa ka, u la pyrta ïa ka, “Ko ka briew, pha la lait phar na ka jingpang jong pha!” 13U la buh ïa la ka kti halor jong ka, bad kumta hi ka la pynbeit ïa la ka met bad ka la ïaroh ïa U Blei.
14 #
Eks. 20:9,10; Deut. 5:13,14 U rangbah synshar jong ka synagog u la bitar ba U Jisu u la pynkhiah ha ka sngi Sabbaton, kumta u la kren bad u la ong ha u paidbah, “Don hynriew sngi ha kaba ngi dei ban trei; kumta to wan ha kito ki sngi bad ban ïoh jingpynkhiah, hynrei ym ha ka sngi Sabbaton!”
15U Trai u la jubab ïa u, “Me uba arsap! Uno uno na phi un law ïa la u masi dab lane ïa la ka kada na ka sem bad ïalam shabar ban ai um ha ka sngi Sabbaton. 16Mynta hangne, kane ka briew kaba hiarpateng na u Abraham ïa kaba u Soitan u la khum la khatphra snem; hato ym dei ban pyllait ïa ka ha ka sngi Sabbaton?” 17Ka jingjubab jong u ka pynlong ïa ki nongshun jong u ban sngewlehrain ïa lade, katba ki briew ki la risa ha kiei kiei baroh kiba phylla kiba u la leh.
Ka pharshi u symbai Tyrso
(Mat. 13:31-32; Mrk. 4:30-32)
18U Jisu u la kylli, “Ka Hima U Blei ka long kum kaei? Bad kaei ngan ïanujor ïa ka? 19Ka long kumne. Uwei u briew u shim ïa u symbai tyrso bad u bet ïa uta ha ka lyngkha jong u. U jingthung u san bad u kylla long u dieng, bad ki sim ki thaw ïa la ki skum ha ki tnat jong u.”
Ka pharshi u thiat
(Mat. 13:33)
20U Jisu u la kylli biang, “Bad kaei ngan ïanujor ïa ka Hima U Blei? 21Ka long kumne. Ka kynthei ka shim khyndiat u thiat bad ka khleh ïa u bad sawphew kilo u 'purew tad haduh ba ka lyngngun kpu baroh kawei ka sieb.”
Ka khyrdop kaba khim
(Mat. 7:13-14,21-23)
22U Jisu u la leit lyngba ki nongbah bad ki nongrit, u da hikai ïa ki briew bad u da thew ïa la ka lynti sha Jerusalem. 23Don kiba la kylli ïa u, “Ko Kynrad, hato tang khyndiat ngut ki briew ki ban lait im?”
24U Jisu u la jubab ïa ki, “Leh ïa kaba bha tam ban rung lyngba ka khyrdop kaba khim; namar bun ki briew da kaba thikna kin pyrshang ban phrung lyngba jong ka hynrei kin ym lah. 25U kynrad jong ka ïing un khie bad un khang ïa ka jingkhang; nangta haba phi ïeng shabar bad sdang ban tied ha ka jingkhang bad ong, ‘To plie ïa ka jingkhang na ka bynta jong ngi, ko kynrad!’ Un jubab ïa phi, ‘Ngam ithuh ïa phi nangno phi ïawan!’ 26Nangta phi baroh phin jubab, ‘Ngi la ïabam bad ïadih bad me; me la hikai ha ka shnong jong ngi!’ 27#Salm. 6:8Hynrei un ong biang, ‘Ngam ithuh nangno phi ïawan. Khie leit noh na nga, phi baroh ki briew kiba bymman!’ 28#Mat. 22:13; 25:30#Mat. 8:11,12A katno phin ïam bad kyr-iat ïa la ki bniat haba phi ïohi ïa u Abraham, u Isaak, bad u Jakob, bad baroh ki nongïathuhlypa ha ka Hima U Blei, katba ïa phi la bret noh shabar! 29Ki briew kin ïawan na mihngi bad na sepngi, na shatei bad na shathie, bad shong ha ka jingkhawai ha ka Hima U Blei. 30#Mat. 19:30; 20:16; Mrk. 10:31Nangta kito kiba mynta ki long kiba khatduh kin long nyngkong, bad kito kiba mynta ki long nyngkong kin long khatduh.”
Ka jingieit U Jisu ïa ka Jerusalem
(Mat. 23:37-39)
31Ha kata ka por katto katne ngut ki Pharisi ki la wan sha U Jisu bad ki la ong ha u, “Me dei ban phet noh nangne bad leit shawei pat, namar u Herod u kwah ban pynïap ïa me.”
32U Jisu u la jubab ïa ki, “Khie leit bad ïathuh ïa uta u myrsiang: ‘Nga beh noh ïa ki ksuid bad nga pynkhiah mynta bad la shai, bad ha ka sngi kaba lai ngan pyndep ïa ka jingtrei jong nga.’ 33Pynban nga dei ban don ha ka lynti jong nga mynta ka sngi, la shai, bad ha ka sngi kaba bud; kam long kaba dei ba ïa u nongïathuhlypa yn pynïap hangno hangno lait tang ha Jerusalem.
34“A Jerusalem, Jerusalem! Pha pynïap ïa ki nongïathuhlypa, pha lynthem maw ïa ki nonglamktien kiba U Blei u la phah sha pha! Katno sien nga la kwah ban kdup ki briew jong pha, kumba ka syiar ka kdup ïa la ki khun hapoh ki thapniang jong ka, hynrei phan ym shah ïa nga! 35#Salm. 118:26Bad kumta ïa ka Templ jong pha yn iehnoh. Nga pynthikna ïa pha ba phan ym ïohi ïa nga tad ynda ka por ka poi haba phan ong, ‘U Blei u kyrkhu ïa uta uba wan ha ka kyrteng jong U Trai.’ ”
Currently Selected:
LOUKAS 13: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.