لَاتَانٛوجِ 41
41
کٛيْطِ ڢِرْعَوْنَ
1ࢡَاوٛ دُوࢡِ طِطِ ڢِرْعَوْنَ حٛيْطِ؞ عٛيِعِ عٛطٛنْ دَرِ دٛوْ ڢٛمٛوندٜ مَايٛ نِيلْ؞ 2عٛيِعِ نَعِ جٛوٜىٰطِطِ نغُرْتِ مَايٛ، طِ بٛوطِّ، ݠَيْطِ؞ طِ ݠُطِّ دُرُغٛ حَا ڢٛمٛوندٜ مَنْ؞ 3ࢡَاوٛطٛنْ نَعِ غٛطِّ جٛوٜىٰطِطِ نغُرْتِ مَايٛ؞ طِ ࢩِدُّطِ عٜ ݠٛويْطِ؞ طِ ندَرِ کٛمْبِ نَعِ عَرَنِ غٛ دٛوْ ڢٛمٛوندٜ مَايٛ؞ 4نَعِ ࢩِدُّطِ ݠٛويْطِ ࢩَامِ بٛوطِّ ݠَيْطِ جٛوٜىٰطِطِ غٛ؞ ندٜنْ ڢِرْعَوْنَ ڢِنِ؞ 5عٛطَانِتِ کَدِبٛو، عٛحٛيْطِ ندٜ طِطَوْرٜ؞ ندَا، شَمّٜىٰجٜ مَوْطٜ بٛوطّٜ جٛوٜىٰطِطِ نغُرْتِ عٜ ࢨٛمْبَلْ غٛوتَلْ؞ 6ࢡَاوٛ مَاجٜ، شَمّٜىٰجٜ جٛوٜىٰطِطِ غٛطّٜ ݠُطِ، طٜ شٜوْطٜ، حٜنْدُ ڢُونَانغٜ يٛورْنِ طٜ؞ 7شَمّٜىٰجٜ شٜوْطٜ مٛطِ مَوْطٜ، کٜىٰوْطٜ جٛوٜىٰطِطِ غٛ؞ ڢِرْعَوْنَ ڢِنِ، تَوِ طُمْ کٛيْطٛلْ؞
8ندٜ وٜىٰتِ، حَکِّيلٛ مَاکٛ سَکْلِ؞ عٛعٜوْنٛيِ حِيلَعٜنْ عٜ حِکْمَعٜنْ مِصْرَ ڢُو؞ عٛيٜشِّ ࢡٜ کٛيْطٛلْ مَاکٛ، عَمَّا وَلَا کٛو غٛوتٛ مٛ ڢَسِّتِرَنِمٛ نغٛلْ#دَنِيٜلْ 2:2؞؞
9ندٜنْ دٛکّٛووٛ لَامِيطٛ نجَرَمْجِ غٛ وِعِ ڢِرْعَوْنَ: «بَرْکَامَ، سٜيْ مِعَنْدِتَ عَيْبٜ عَمْ حَنْدٜ؞ 10ࢩَلَادٜ وٛطْندٜ عَتِکَّنِ حُووَنٛوࢡٜ مَ مَسِنْ، عَمَࢡِّ يَمْ ندٜرْ سُودُ مَوْطٛ عَيْنٛوࢡٜ، مِنْ بٜى حٛورٜىٰجٛ تَمْسَنٛوࢡٜ مَ تَمْسٜىٰجٜ؞ 11مِنْ کٛيْطِ مِنْ طِطٛ ڢُو جٜمَّارٜ وٛورٜ؞ عَمَّا مَانَ کٛيْطٛلْ نغٛلٜ ڢُو ڢٜىٰرٛتِرِ بٜى نغٛلَ؞ 12وٛودِنٛ سُکَاجٛ عِبْرَنِنغْکٜىٰجٛ مَشُّطٛ مَوْطٛ عَيْنٛوࢡٜ بٜى عَمِنْ؞ مِنْ نغٜشِّمٛ کٛيْطِ عَمِنْ، عٛڢَسِّتِرِ مَانَ کٛيْطٛلْ کٛو مٛيْ ڢُو؞ 13بَنَ عٛڢَسِّتِرَنِ مِنْ، نٛنْ طُمْ لَاتَنِ مِنْ بٛو: عَلٛرْنِ يَمْ حَا ݠٜلّٜلْ عَمْ، عٛيَ بٛو ࢡٜࢡِلِ طُمْ؞»
يُوسُڢُ ڢَسِّتِرِ کٛيْطٛلْ ڢِرْعَوْنَ
14ڢِرْعَوْنَ عُمْرِ ࢡٜنغَدَّ يُوسُڢُ؞ لَوْ ࢡٜنغُرْتِنِمٛ ڢُرْسِنَ؞ يُوسُڢُ لَࢡِ، ࢡٛرْنِ لِمْشٜ لَاࢡْطٜ، عٛوَرِ يٜىٰسٛ ڢِرْعَوْنَ؞ 15ڢِرْعَوْنَ وِعِمٛ: «مِحٛيْطِ، وَلَا بَاوْطٛ ڢَسِّتِرْغٛ نغٛلْ؞ عَمَّا مِنَنِ عَوَاوِ ڢَسِّتِرْغٛ کٛيْطِ طِ ࢡٜعَنْدِنْتٜ؞» 16يُوسُڢُ جَابِ ڢِرْعَوْنَ: «نَا طُمْ مِنْ! طُمْ اَللَّه حٛکَّتَ ڢَسَّرُويٜ حَانْدُنْدٜ حَا ڢِرْعَوْنَ؞» 17ڢِرْعَوْنَ وِعِ يُوسُڢُ کَدِ: «ندٜرْ کٛيْطٛلْ عَمْ، تَوْمِ مِطٛنْ دٛوْ ڢٛمٛوندٜ مَايٛ نِيلْ؞ 18ندَا، نَعِ جٛوٜىٰطِطِ ݠَيْطِ، بٛوطِّ نغُرْتِ مَايٛ؞ طِ ݠُطِّ دُرُغٛ حَا ڢٛمٛوندٜ مَنْ؞ 19ࢡَاوٛ مَاجِ، غٛطِّ جٛوٜىٰطِطِ نغُرْتِ؞ طِ ࢩِدُّطِ، ݠٛويْطِ مَسِنْ؞ مِمٜىٰطَايْ يِعُغٛ ࢡُرْطِ طِعِ ࢩِدُّغٛ ندٜرْ لٜسْدِ مِصْرَ ڢُو؞ 20نَعِ ࢩِدُّطِ ݠٛويْطِ ࢩَامِ نَعِ جٛوٜىٰطِطِ ݠَيْطِ عَرَنِ غٛ؞ 21عَمَّا ࢡَاوٛ طِ ࢩَامِ طِ، وَلَا کٜࢡْتُطٛ طُمْ، نغَمْ ࢩِدّٜىٰنغَ مَاجِ طٛنّٛ بَنَ نَانٜ نٛنْ؞ ندٜنْ مِڢِنِ؞ 22مِحٛيْطِ کٛيْطٛلْ غٛطْنغٛلْ ڢَحِنْ: ندَا، شَمّٜىٰجٜ کٜىٰوْطٜ بٛوطّٜ جٛوٜىٰطِطِ نغُرْتِ عٜ ࢨٛمْبَلْ غٛوتَلْ؞ 23ࢡَاوٛ مَاجٜ، شَمّٜىٰجٜ شٜوْطٜ غٛطّٜ جٛوٜىٰطِطِ ݠُطِ، حٜنْدُ ڢُونَانغٜ يٛورْنِ طٜ؞ 24شَمّٜىٰجٜ شٜوْطٜ مٛطِ شَمّٜىٰجٜ بٛوطّٜ جٛوٜىٰطِطِ غٛ؞ مِيٜشِّ طُمْ حِيلَعٜنْ، عَمَّا وَلَا مٛ وَاوِ ڢَسِّتِرَنغٛ يَمْ طُمْ؞»
25يُوسُڢُ وِعِ ڢِرْعَوْنَ: «کٛيْطِ مَ طِطِ طِعِ، طِ غٛوتِ، بَرْکَامَ؞ اَللَّه عَنْدِنِ مَ کٛ عٛتَمِّ وَطُغٛ؞ 26نَعِ بٛوطِّ جٛوٜىٰطِطِ نغٛنِ دُوࢡِ جٛوٜىٰطِطِ، شَمّٜىٰجٜ بٛوطّٜ جٛوٜىٰطِطِ بٛو نغٛنِ دُوࢡِ جٛوٜىٰطِطِ؞ طُمْ کٛيْطٛلْ غٛوتٛلْ؞ 27نَعِ ࢩِدُّطِ ݠٛويْطِ جٛوٜىٰطِطِ، غُرْتِيطِ ࢡَاوٛ، طُمْ دُوࢡِ جٛوٜىٰطِطِ؞ نٛنْ بٛو شَمّٜىٰجٜ شٜوْطٜ جٛوٜىٰطِطِ، طٜ حٜنْدُ ڢُونَانغٜ يٛورْنِ، طُمْ دُوࢡِ جٛوٜىٰطِطِ بٜى وٜىٰلٛ؞ 28بَنَ مبِعْمَامِ، بَرْکَامَ، اَللَّه عَنْدِنِ مَ کٛ عٛتَمِّ وَطُغٛ؞ 29ندَا، دُوࢡِ جٛوٜىٰطِطِ غَرَنْطِ، حَارَنْدٜ طُوطْندٜ وَطَنْ ندٜرْ لٜسْدِ مِصْرَ ڢُو؞ 30ࢡَاوٛ مَاجِ، وٜىٰلٛ وَطَنْ دُوࢡِ جٛوٜىٰطِطِ، حَا يِمْࢡٜ نغٜجِّتَ حَارَنْدٜ لَاتُنٛوندٜ ندٜرْ مِصْرَ؞ وٜىٰلٛ تَمْݠِنَنْ لٜسْدِ؞ 31يِمْࢡٜ نغٜجِّتَنْ طُمٜ وٛنّٛ حَارَنْدٜ ندٜرْ لٜسْدِ، نغَمْ وٜىٰلٛ نغٛعٛ سَاتَنْ مَسِنْ؞ 32ندٜ کٛيْطٛلْ مَنْ تٛکِّتِ وَطِ ندٜ طِطِ حَا ڢِرْعَوْنَ، طُمْ يِطِ وِعْغٛ حَالَ کَعَ تَبِتِ حَا اَللَّه، اَللَّه طٛنْ يَاوْطِنَ وَطُغٛ طُمْ؞ 33بَرْکَامَ، جٛنْتَ کَمْ، طَࢡِّتِتْ غٛطّٛ کَکِّلْطٛ، مَرْطٛ حِکْمَ؞ دَرْنُ مٛ دٛوْ لٜسْدِ مِصْرَ؞ 34وَطْ طُمْ، ࢡٜسْدُ عَيْنٛوࢡٜ لٜسْدِ بٛو؞ کَمْࢡٜ ࢡٜکٛوعَ يٜࢡْرٜ وٛورٜ ندٜرْ جٛوِ حَا ࢩَامْلٜ لٜسْدِ مِصْرَ ڢُو ندٜرْ دُوࢡِ جٛوٜىٰطِطِ طِ حَارَنْدٜ؞ 35ࢡٜمٛوࢡْتَ ࢩَامْدُوجِ دُوࢡِ جٛوٜىٰطِطِ غَرَنْطِ بٛوطِّ طِعِ ڢُو؞ ࢡٜمبَطَ طُمْ دٛوْ عَرْدَانغَلْ مَ، بَرْکَامَ! ࢡٜمٛوࢡْتَ عَلْکَمَارِ نغَمْ ࢩَامْدُ ندٜرْ غُرٜ، ࢡٜعَيْنَ طُمْ؞ 36ࢩَامْدُ مَاجُمْ لَاتٛتٛ ندٜسَارِ لٜسْدِ نغَمْ دُوࢡِ جٛوٜىٰطِطِ بٜى وٜىٰلٛ، نغٛ تَمِّ وَطُغٛ ندٜرْ مِصْرَ؞ بَنَ نِي وٜىٰلٛ نَتِّدِتَّا يِمْࢡٜ لٜسْدِ ندِعِ؞»
يُوسُڢُ لَاتِ طِطَࢡٛ ندٜرْ لَامُ مِصْرَ
37حَالَ کَعَ ڢٛتَّنِ ڢِرْعَوْنَ عٜ سَرَاکِعٜنْ مُمْ ڢُو؞ 38ڢِرْعَوْنَ وِعِ ࢡٜ: «غٛرْکٛ مٛيْ کٜࢡٜتٜنْ بَنَ عٛو، مٛ رُوحُ اَللَّه وٛنْدِ بٜى مُوطُمْ؟» 39ندٜنْ عٛوِعِ يُوسُڢُ: «ندٜ اَللَّه عَنْدِنِ مَ طُمْ ڢُو، وَلَا کَکِّلْطٛ، مَرْطٛ حِکْمَ بَنَ مَاطَ؞ 40عَنْ لَاتٛتٛ دٛوْ سَارٜ عَمْ، يِمْࢡٜ عَمْ ڢُو تٛکّٛتٛ عُمْرٛوجٜ مَ، سٜيْ بٜى لٜىٰسٛ لَامُ تَنْ ࢡُرْدَنْمَامِ؞#کُوطٜ نٜلَاࢡٜ 7:10؞» 41ڢِرْعَوْنَ وِعِ يُوسُڢُ: «ندَا، مِدَرْنِ مَ دٛوْ لٜسْدِ مِصْرَ ڢُو؞» 42ڢِرْعَوْنَ عِتِّ حَلَغَارٜ حَا حٛوندُ مُمْ، وَطِ ندٜ حَا حٛوندُ يُوسُڢُ؞ عٛࢡٛرْنِمٛ لِمْشٜ ࢡُرْطٜ طِغُّغٛ، عٛوَطَنِمٛ کٛطٛيْ کَنغّٜىٰرِ حَا دَاندٜ#دَنِيٜلْ 5:29؞؞ 43عٛوَعِّنِمٛ دٛوْ مٛوتَ ݠُشِّ، تٛکّٛتٛونغَ نغَ لَامِيطٛ، ࢡٜکٛولِ يٜىٰسٛ مَاکٛ: «کَکِّلٜ! لَاوٛلْ!#41:43 کَکِّلٜ! لَاوٛلْ! بٜى عِبْرَنِنغْکٜىٰرٜ: عَبِرٜکْ! عَبِرٜکْ! » بَنَ نٛنْ ڢِرْعَوْنَ دَرْنِرِمٛ دٛوْ لٜسْدِ مِصْرَ ڢُو؞ 44ڢِرْعَوْنَ وِعِ يُوسُڢُ: «مِنْ وٛنِ ڢِرْعَوْنَ؞ غٛطّٛ ندٜرْ لٜسْدِ مِصْرَ ڢُو ࢡَنغْتَتَا جُنغٛ مُمْ مَلَّ کٛسْنغَلْ مُمْ بِلَا دُنغَيٜىٰرٜ مَ؞» 45ڢِرْعَوْنَ عِنْدِ يُوسُڢُ عِنْدٜ جَڢْنَتْ-ݠَنٜيَکْ، تٜعَنِمٛ عَسْنَتْ ࢡِي ݠٛتِ-ڢٜرَ، لِمَنْجٛ حَا عٛونْ؞ ندٜنْ يُوسُڢُ وُرْتِ، تَارِ لٜسْدِ مِصْرَ ڢُو؞
46يُوسُڢُ وٛودِ دُوࢡِ شَݠَّنْطٜ تَتِ، سَاعِ عٛڢُطَّ حُووَنْغٛ ڢِرْعَوْنَ، لَامِيطٛ مِصْرَ؞ يُوسُڢُ عُمِّ، دِلِّ تَارٛيَاغٛ لٜسْدِ مِصْرَ؞ 47ندٜرْ دُوࢡِ جٛوٜىٰطِطِ، لٜسْدِ رِمْرِمْنِ طُوطُّمْ مَسِنْ؞ 48يُوسُڢُ مٛوࢡْتِ ࢩَامْدُ لٜسْدِ مِصْرَ ڢُو ندٜرْ دُوࢡِ جٛوٜىٰطِطِ غٛ؞ عٛسِغِ ࢩَامْدُ ندٜرْ غُرٜ، ندٜرْ وُرٛ کٛو نغٛيٜ، عٛسِغِ ࢩَامْدُ غٜسٜ تَارِيطٜ وُرٛ مَاجُمْ؞ 49يُوسُڢُ سِغِ عَلْکَمَارِ طُوطْندِ مَسِنْ بَنَ نجَارٜىٰندِ مَايٛ، حَا ࢡٜعَشِّ عٜتُغٛ، نغَمْ طُمْ لِمَتَاکٛ؞
50عَارْتِ حِتَاندٜ ندٜ وٜىٰلٛ ڢُطَّ، عَسْنَتْ ࢡِي ݠٛتِ-ڢٜرَ لِمَنْجٛ حَا عٛونْ، دٜبّٛ يُوسُڢُ دَࢩَنِ طُمْ ࢡِࢡّٜ وٛرْࢡٜ طِطٛ؞ 51يُوسُڢُ عِنْدِ حَمِّرَاوٛ: مَنَسَّ#41:51 مَنَسَّ يِطِ وِعْغٛ مٛ يٜجِّتِنَنْ غٛطّٛ؞ ، عٛوِعِ: «اَللَّه يٜجِّتِنِ يَمْ تٛرَّ عَمْ عٜ سَارٜ بَابَ عَمْ ڢُو؞» 52مِࢩِرَاوٛ بٛو عٛعِنْدِ طُمْ: عٜڢْرَيِمْ#41:52 عٜڢْرَيِمْ يِطِ وِعْغٛ حٛکُّغٛ دَࢩْغٛلْ؞ ؞ عٛوِعِ: «اَللَّه حٛکِّ يَمْ دَࢩْغٛلْ ندٜرْ لٜسْدِ ࢡِلَّارٜ عَمْ؞»
53دُوࢡِ جٛوٜىٰطِطِ طِ حَارَنْدٜ ندٜرْ لٜسْدِ مِصْرَ تِمِّ؞ 54دُوࢡِ جٛوٜىٰطِطِ طِ وٜىٰلٛ نغَرِ، بَنَ يُوسُڢُ وِعْنٛ؞ وٜىٰلٛ وَطِ ندٜرْ لٜسْطٜ ڢُو، عَمَّا ندٜرْ مِصْرَ ڢُو ࢩَامْدُ طٛنْ#جَبُورَ 105:16؛ کُوطٜ نٜلَاࢡٜ 7:11؞؞ 55ندٜ يِمْࢡٜ ندٜرْ لٜسْدِ مِصْرَ نَنِ وٜىٰلٛ، ࢡٜنغٛوکَنِ ڢِرْعَوْنَ نغَمْ حٜࢡُغٛ ࢩَامْدُ، عَمَّا ڢِرْعَوْنَ وِعِ مِصْرَعٜنْ ڢُو: «نجٜحٜ حَا يُوسُڢُ، مبَطٜ کٛ عٛوِعَتَ عٛنْ؞#يُحَنَّ 2:5؞» 56ندٜ وٜىٰلٛ وَطِ ندٜرْ لٜسْدِ ڢُو، يُوسُڢُ مَࢡِّتِ شِغٛرْطِ عَلْکَمَارِ، عٛسٛورَّنِ ندِ مِصْرَعٜنْ، نغَمْ وٜىٰلٛ سَاتِ ندٜرْ لٜسْدِ مِصْرَ مَسِنْ؞ 57يِمْࢡٜ کٛو تٛيْ ندٜرْ دُنِيَارُ ڢُو نغَرِ حَا مِصْرَ، حَا يُوسُڢُ، شٛودِ عَلْکَمَارِ، نغَمْ وٜىٰلٛ نغٛعٛ سَاتِ مَسِنْ ندٜرْ دُنِيَارُ ڢُو؞
Currently Selected:
لَاتَانٛوجِ 41: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.