لَاتَانٛوجِ 29
29
يَعْقُوبُ يٛتِّ سَارٜ لَبَنْ
1يَعْقُوبُ تٛکِّتِنِ لَاوٛلْ مُوطُمْ، يٜحِ غَلْ لٜسْدِ يِمْࢡٜ ڢُونَانغٜ؞ 2ࢩَنْدٜرٜ ڢٜىٰرٜ عٛيِعِ ࢡُلْندُ ندٜرْ لَدّٜ؞ تٛکّٜ دَمّٛوجِ تَتِ طٛنّٛ مبَالِ کٛمْبِ مَارُ، نغَمْ تٛنْ وَيْنَاࢡٜ نجَرْنَتَ تٛکّٜ؞ حَيْرٜ مَوْندٜ طٛنّٛ مَࢡِّ ندُ؞ 3تٛ تٛکّٜ ڢُو مٛوࢡْتَکٜ، ࢡٜتَلَّ حَيْرٜ دِغَ حُنْدُکٛ ࢡُلْندُ، ࢡٜنجَرْنَ دَمّٛوجِ، ࢡَاوٛطٛنْ ࢡٜلٛرْنَ حَيْرٜ غٛ ڢَحِنْ دٛوْ حُنْدُکٛ ࢡُلْندُ حَا نٛکُّورٜ مَارٜ؞ 4يَعْقُوبُ ࢨَمِ وَيْنَاࢡٜ: «دٜىٰرْطِرَاࢡٜ عَمْ، دِغَ تٛيْ عِوْطٛنْ؟» ࢡٜنجَابِ: «مِنْ عِوِ دِغَ حَرَنْ؞» 5عٛࢨَمِ ࢡٜ: «عٛنْ عَنْدِ لَبَنْ ࢡِي نَحٛرْ نَ؟» ࢡٜمبِعِ: «مِنْ عَنْدِمٛ؞» 6عٛࢨَمِ ࢡٜ: «عٛجَمٛ نَ؟» ࢡٜنجَابِ: «عٛجَمٛ؞ ندَا، رَحِيلُ، ࢡِيِيکٛ دٜبّٛ، طٛنْ وَرَ بٜى بَالِ؞» 7عٛوِعِ ࢡٜ: «ندَا، نَانغٜ ࢡَنغْتَکٜ، وَکَّتِ مٛوࢡْتُغٛ دَبَّاجِ سِوَا؞ نجَرْنٜ طِ، ندٜنْ عٛنْ لٛرْنَ طِ حَا نغَيْنَاکَ»؞ 8ࢡٜمبِعِ: «مِنْ مبَاوَتَا وَطُغٛ طُمْ، سٜيْ تٛ تٛکّٜ ڢُو مٛوࢡْتَکٜ؞ ندٜنْ مِنْ تَلَّ حَيْرٜ دِغَ حُنْدُکٛ ࢡُلْندُ، مِنْ نجَرْنَ بَالِ؞»
9يَاکٜ عٛطٛنْ وٛلِدَ بٜى مَࢡّٜ تَوٛنْ، رَحِيلُ وَرِ بٜى بَالِ بَابَ مُوطُمْ، نغَمْ عٛ غَيْنَاکٛ؞ 10ندٜ يَعْقُوبُ يِعِ رَحِيلُ، ࢡِي لَبَنْ کَاوُ مُوطُمْ بٜى دَمّٛوجِ، عٛࢡَدِتِ، عٛتَلِّ حَيْرٜ دِغَ حُنْدُکٛ ࢡُلْندُ، عٛيَرْنِ بَالِ لَبَنْ، کَاوُ مَاکٛ؞ 11ندٜنْ عٛحٜبِّ رَحِيلُ، عٛڢُطِّ وٛيُغٛ بٜى سَوْتُ؞ 12عٛڢَامْتِنِ رَحِيلُ نٛ عٛبَنْدِرِ بٜى بَابَ مَاکٛ، عٛ ࢡِي رٜبٜکَّ؞ رَحِيلُ دٛغِّ، عَنْدِنِ طُمْ بَابَ مُوطُمْ؞ 13ندٜ لَبَنْ نَنِ حَبَرُ دٛوْ يَعْقُوبُ، ࢡِي دٜىٰرْطِيکٛ دٜبّٛ، عٛدٛغِّ حَا عٛڢٛتّٛيَ بٜى مَاکٛ؞ عٛحَرْلِمٛ، عٛحٜبِّمٛ، عٛيَحْرِمٛ ندٜرْ سَارٜ مَاکٛ؞ يَعْقُوبُ بٛو عَنْدِنِ لَبَنْ حَبَرُ ڢُو؞ 14لَبَنْ وِعِمٛ: «ڢَکَتْ عَ بَنْدِرَاوٛ عَمْ ࢡَدِيطٛ؞» يَعْقُوبُ ڢَࢡِّ حَا مَاکٛ لٜوْرُ؞
يَعْقُوبُ تٜعِ لٜيَ عٜ رَحِيلُ
15لَبَنْ وِعِ يَعْقُوبُ: «عَحُووَنْتَمْ مٜىٰرٜ نغَمْ عَ بَنْدِرَاوٛ عَمْ نَ؟ وِعْ عَمْ طُمٜ لَاتٛتٛ نغٜىٰنَارِ مَ؟» 16لَبَنْ وٛودِنٛ ࢡِࢡّٜ رٜوْࢡٜ طِطٛ؞ عِنْدٜ عَدَّاجٛ، لٜيَ، عِنْدٜ مِࢩِرَاوٛ بٛو، رَحِيلُ؞ 17غِتٜ لٜيَ ݠُرٜ، عَمَّا رَحِيلُ عٛ نغَرْنِيطٛ ࢡَنْدُ عٜ دَارْطٜ؞ 18يَعْقُوبُ يِطِ رَحِيلُ، عٛوِعِ لَبَنْ: «مِحُووَنْتٜ دُوࢡِ جٛوٜىٰطِطِ نغَمْ رَحِيلُ، ࢡِيَ مِࢩِرَاجٛ؞» 19لَبَنْ وِعِ: «ندِکَّ مِحٛکّٜ مٛ، ࢡُرَنْ دٛوْ حٛکُّغٛ مٛ غٛطّٛ ڢٜىٰرٜ؞ جٛوطَ حَا عَمْ؞» 20يَعْقُوبُ حُووِ دُوࢡِ جٛوٜىٰطِطِ نغَمْ رَحِيلُ؞ طِ لَاتِ حَا مَاکٛ بَنَ ࢩَلْطٜ سٜطَّ نٛنْ، نغَمْ عٛيِطِمٛ مَسِنْ؞
21ندٜنْ يَعْقُوبُ وِعِ لَبَنْ: «حٛکَّمْ دٜبّٛ عَمْ، نغَمْ ࢩَلْطٜ عَمْ طٜ مِحُووَنْتٜ شِکِ، مِنَسْتَنْ حَا مَاکٛ؞» 22لَبَنْ مٛوࢡْتِ وٛرْࢡٜ وُرٛ ڢُو، وَطَنِ ࢡٜ ࢩَامْدُ ࢡَنغَلْ؞ 23ندٜ مَنغَرِبَ وَطِ، عٛحٛوعِ ࢡِيِيکٛ لٜيَ، عٛيَحْرِمٛ حَا يَعْقُوبُ، کَنغْکٛ عٛحَوْتِ بٜى مَاکٛ؞ 24لَبَنْ حٛکِّ کٛرْطٛ مُوطُمْ زِلْݠَ حَا لٜيَ، ࢡِيِيکٛ، عٛلَاتٛ کٛرْطٛ مَاکٛ؞ 25ندٜ وٜىٰتِ، يَعْقُوبُ يِعِ طُمْ لٜيَ؞ عٛوِعِ لَبَنْ: «کٛنِ مبَطَّامِ طُمْ؟ نَا نغَمْ رَحِيلُ مِحُووَنِ مَ نَ؟ کٛنِ مبَطَّا يَمْ رِکِشِ؟» 26لَبَنْ جَابِ: «حَا عَلْعَادَ وُرٛ عَمِنْ، مِࢩِرَاوٛ عَارْتَتَا عَدَّ مُمْ تٜعٜىٰغٛ؞ 27تِمِّنْ عَسَوٜىٰرٜ ࢡَنغَلْ بٜى مَاکٛ، ندٜنْ مِحٛکّٜتٜ عٛيَ بٛو، دٛوْ کُوغَلْ نغَلْ عَتَمِّ حُووَنْغٛ يَمْ دُوࢡِ جٛوٜىٰطِطِ غٛطِّ ڢَحِنْ؞»
28يَعْقُوبُ جَࢡِ، تِمِّنِ عَسَوٜىٰرٜ مَنْ بٜى لٜيَ؞ ندٜنْ لَبَنْ حٛکِّمٛ ࢡِيُمْ رَحِيلُ بَنَ دٜبّٛ ڢَحِنْ؞ 29لَبَنْ حٛکِّ کٛرْطٛ مُوطُمْ بِلْحَ حَا رَحِيلُ، ࢡِيُمْ، عٛلَاتٛ کٛرْطٛ مَاکٛ؞ 30يَعْقُوبُ حَوْتِ بٜى رَحِيلُ بٛو، عٛࢡُرِ يِطُغٛ رَحِيلُ دٛوْ لٜيَ؞ عٛحُووَنِ لَبَنْ دُوࢡِ جٛوٜىٰطِطِ غٛطِّ؞
ࢡِࢡّٜ يَعْقُوبُ
31ندٜ جَوْمِرَاوٛ يِعِ لٜيَ غَࢩَاطٛ، عٛوَطِمٛ عٛ دَࢩٛووٛ؞ عَمَّا رَحِيلُ جٛوطِ دِمَرٛ؞ 32لٜيَ رٜىٰدِ، دَࢩِ ࢡِطّٛ غٛرْکٛ؞ عٛعِنْدِمٛ: رُبٜنْ#29:32 رُبٜنْ يِطِ وِعْغٛ ندَارٜ ࢡِطّٛ؞، عٛوِعِ: «جَوْمِرَاوٛ لَارِ تٛسْکَارٜ عَمْ؞ جٛنْتَ کَمْ غٛرْکٛ عَمْ يِطَتَمْ؞» 33کَدِبٛو عٛرٜىٰدِ، عٛدَࢩِ ࢡِطّٛ غٛرْکٛ؞ عٛوِعِ: «جَوْمِرَاوٛ نَنِ مِ غَࢩَاطٛ، نغَمْ مَاجُمْ عٛحٛکِّ يَمْ عٛو بٛو؞» عٛعِنْدِمٛ سِمٜيٛنْ#29:33 سِمٜيٛنْ يِطِ وِعْغٛ نَنُغٛ؞؞ 34کَدِبٛو عٛرٜىٰدِ، عٛدَࢩِ ࢡِطّٛ غٛرْکٛ؞ عٛوِعِ: «جٛنْتَ کَمْ، غٛرْکٛ عَمْ طَکّٛتِرَنْ بٜى عَمْ، نغَمْ مِدَࢩَنِمٛ ࢡِࢡّٜ تَتٛ؞» نغَمْ مَاجُمْ عٛعِنْدِمٛ لٜوِ#29:34 لٜوِ يِطِ وِعْغٛ طَکَّاغٛ؞؞ 35کَدِبٛو عٛرٜىٰدِ، عٛدَࢩِ ࢡِطّٛ غٛرْکٛ؞ عٛوِعِ: «جٛنْتَ مِمَنغْتَنْ جَوْمِرَاوٛ؞» نغَمْ مَاجُمْ عٛعِنْدِمٛ يَحُودَ#29:35 يَحُودَ يِطِ وِعْغٛ مَنغْتٛورٜ؞؞ ندٜنْ عٛعَشِّ دَࢩُغٛ؞
Currently Selected:
لَاتَانٛوجِ 29: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.