غُرْتَاکِ 10
10
مَسِيبٛووٛلْ جٛوٜىٰتَتَࢡٛلْ: مَسِيبٛ بَࢡَّتِّ
1جَوْمِرَاوٛ وِعِ مُوسَى: «يَحْ حَا ڢِرْعَوْنَ، نغَمْ مِسَاتِنِ حٛورٜ مَاکٛ عٜ کٛعٜ سَرَاکِعٜنْ مَاکٛ، حَا مِوَطَ عَلَامَاجِ عَمْ طِعِ شَکَ مَࢡّٜ، 2نغَمْ حَا عَيٜشَّ ࢡِکّٛيْ مَ عٜ تَانِرَاࢡٜ مَ نٛ مِتٛرِّرِ مِصْرَعٜنْ، حَالَ عَلَامَاجِ عَمْ طِ مبَطْمِ شَکَ مَࢡّٜ؞ ندٜنْ عٛنْ عَنْدَنْ مِنْ وٛنِ جَوْمِرَاوٛ؞» 3مُوسَى عٜ هَـٰرُونَ نجٜحِ حَا ڢِرْعَوْنَ، مبِعِمٛ: «ندَا نِي جَوْمِرَاوٛ، اَللَّه عِبْرَنِنغْکٜعٜنْ وِعِ: حَا ندٜيٜ عَتٛکّٛتٛ سَلَاغٛ لٜىٰسْنُغٛ حٛورٜ مَ يٜىٰسٛ عَمْ؟ عَشُّ عُمَّاتٛورٜ عَمْ يَحَ حَا ندٜ جَغَّنٛ يَمْ! 4تٛ عَسَلَکٜ يٛوڢْتُغٛ عُمَّاتٛورٜ عَمْ، جَنغٛ مِوَدَّنْ بَࢡَّتِّ ندٜرْ مَرَلْ لٜسْدِ مَ؞ 5طِ شُدَّنْ لٜسْدِ ڢُو حَا غٛطّٛ وَاوَتَا يِعُغٛ ندِ؞ طِ ࢩَامَنْ کٛ لُتِّنٛ دِغَ مَلِّمَلّٛوجٜ؞ طِ ࢩَامَنْ لٜطّٜ ݠُطّٜ ندٜرْ لَدّٜ مٛوطٛنْ ڢُو؞ 6طِ کٜبِّنَنْ شُوطِ مَ عٜ شُوطِ سَرَاکِعٜنْ مَ عٜ شُوطِ مِصْرَعٜنْ ڢُو؞ طُمْ لَاتٛتٛ مَسِيبٛووٛلْ نغٛلْ مٜىٰطَايْ لَاتَاغٛ دِغَ زَمَنُ کَاکِرَاࢡٜ مٛوطٛنْ طٛنّٛ حَا لٜسْدِ ندِعِ حَا وَرْغٛ حَنْدٜ؞» ندٜنْ مُوسَى وُرْتِ سَارٜ ڢِرْعَوْنَ، عٛدِلِّ؞
7سَرَاکِعٜنْ ڢِرْعَوْنَ مبِعِمٛ: «عٛو طٛ، ندٜيٜ عٛعَشَّتَ وَدَّنْغٛ عٜنْ سَرُّ؟ عَشُّ إِسْرَاءِيلَعٜنْ ࢡٜعٜ نجَحَ نغَمْ ࢡٜنجَغَّنٛ جَوْمِرَاوٛ اَللَّه مَࢡّٜ! حَا جٛنْتَ عَعَنْدَا مِصْرَ طٛنْ حَلْکَ نَ؟» 8ࢡٜعٜوْنِتِ مُوسَى عٜ هَـٰرُونَ يٜىٰسٛ ڢِرْعَوْنَ؞ عٛوِعِ ࢡٜ: «ندِلّٜ، عٛنْ نجَغَّنٛ اَللَّه جَوْمِرَاوٛ مٛوطٛنْ؞ عَمَّا ࢡٜيٜ نجَحَتَ؟» 9مُوسَى جَابِ: «مِنْ ندِلِّدَنْ بٜى دٜرْکٜعٜنْ عٜ ندٛتِّعٜنْ عَمِنْ ڢُو عٜ ࢡِࢡّٜ عَمِنْ وٛرْࢡٜ عٜ رٜوْࢡٜ، نٛنْ بٛو دَمّٛوجِ عَمِنْ عٜ نَعِ عَمِنْ، نغَمْ مِنْ مبَطَنَنْ جَوْمِرَاوٛ عَمِنْ جُولْدٜ؞» 10ڢِرْعَوْنَ وِعِ ࢡٜ: «جَوْمِرَاوٛ وٛنْدَنْ بٜى مٛوطٛنْ سَاعِ تٛ مِيٛوڢْتِ عٛنْ بٜى رٜوْࢡٜ مٛنْ عٜ ࢡِکّٛيْ مٛنْ ڢُو نَ؟ ڢَکَتْ، عٛنْ نُڢِ کَلُّطُمْ! 11کٛ عٛنْ نُڢِ طٛ وَطَتَاکٛ؞ سٜيْ وٛرْࢡٜ تَنْ نجَحَتَ نجَغَّنٛ جَوْمِرَاوٛ؞ کَنْجُمْ تَنْ عٛنْ مبَاوَتَ ࢨَمُغٛ يَمْ!» ندٜنْ ࢡٜندِيوِ ࢡٜ دِغَ يٜىٰسٛ ڢِرْعَوْنَ؞
12ندٜنْ جَوْمِرَاوٛ وِعِ مُوسَى: «ڢٛرْتُ جُنغٛ مَ دٛوْ لٜسْدِ مِصْرَ نغَمْ بَࢡَّتِّ نغَرَ ࢩَامَ ڢُطْنغٛوجِ غٜسٜ طِ مَلِّمَلّٛوجٜ لُتِّنّٛ ڢُو؞» 13مُوسَى ڢٛرْتِ سَوْرُ مُوطُمْ دٛوْ لٜسْدِ مِصْرَ؞ جَوْمِرَاوٛ يَحْرِ حٜنْدُ ڢُونَانغٜىٰرُ دٛوْ لٜسْدِ ࢩَلَوْمَارٜ ندٜعٜ عٜ جٜمَّارٜ ڢُو؞ ندٜ وٜىٰتِ، حٜنْدُ مَنْ وَدِّ بَࢡَّتِّ؞ 14بَࢡَّتِّ نغَرِ دٛوْ لٜسْدِ مِصْرَ، طِ نجٛوطِ کٛو تٛيْ ڢُو ندٜرْ مَرَلْ مِصْرَعٜنْ، طِ طُوطِ مَسِنْ؞ عِرِنْ مَاجِ مٜىٰطَايْ وَرْغٛ عٜ طِ مٜىٰتَتَا بٛو؞ 15طِ شُدِّ لٜسْدِ حَا ندِ ࢡَلْوِ؞ طِ ࢩَامِ ڢُطْنغٛوجِ لٜسْدِ عٜ ࢡِࢡّٜ لٜطّٜ عٜ طُمْ کٛ مَلِّمَلّٛوجٜ لُتِّنّٛ ڢُو؞ حَاکٛ حٜشّٛ لُتَّايْ حَا لٜطّٜ عٜ ڢُطْنغٛوجِ غٜسٜ کٛو تٛيْ ندٜرْ لٜسْدِ مِصْرَ#وَحَيُ يُحَنَّ 9:2-8؞؞
16بٜى جَاوَلْ، ڢِرْعَوْنَ عٜوْنِ مُوسَى عٜ هَـٰرُونَ، عٛوِعِ ࢡٜ: «مِوَطِ حَکّٜ دٛوْ جَوْمِرَاوٛ، اَللَّه مٛوطٛنْ عٜ دٛوْ مٛوطٛنْ ڢُو! 17نجَاڢَنٜىٰطَمْ عَيْبٜ عَمْ ندٜ ڢَحِنْ! تٛرٜ جَوْمِرَاوٛ، اَللَّه مٛوطٛنْ، عٛعِتَّنَمِّ مَسِيبٛووٛلْ مبَرٛووٛلْ نغٛعٛلْ؞» 18مُوسَى وُرْتِ سَارٜ ڢِرْعَوْنَ، عٛتٛرِ جَوْمِرَاوٛ؞ 19جَوْمِرَاوٛ وِڢْنِ حٜنْدُ حِيرْنَانغٜىٰرُ سَاتُندُ مَسِنْ؞ ندُ يَحْرِ بَࢡَّتِّ، ندُ سَکِّنِ طِ ندٜرْ مَايٛ مَالِيَ؞ وَلَا کٛو مبَࢡَّتُّ نغٛوتُ لُتِّ ندٜرْ مَرَلْ لٜسْدِ مِصْرَ ڢُو؞ 20عَمَّا جَوْمِرَاوٛ سَاتِنِ حٛورٜ ڢِرْعَوْنَ ڢَحِنْ، عٛعَشَّايْ إِسْرَاءِيلَعٜنْ ندِلَّ؞
مَسِيبٛووٛلْ جٛوٜىٰنَيَࢡٛلْ: مَسِيبٛ ࢩِࢡْرٜ
21جَوْمِرَاوٛ وِعِ مُوسَى: «ࢡَنغْتُ جُنغٛ مَ حٜىٰدِ عَسَمَ؞ ࢩِࢡْرٜ لَاتٛ ندٜرْ لٜسْدِ مِصْرَ، طُمْ ࢩِࢡَّ حَا غٛطّٛ وَاوَتَا يِعُغٛ نٜوْرٜ مُوطُمْ؞» 22مُوسَى ࢡَنغْتِ جُنغٛ مُوطُمْ حٜىٰدِ عَسَمَ، ࢩِࢡْرٜ ࢩِࢡُّندٜ لَاتِ ندٜرْ لٜسْدِ مِصْرَ ڢُو ࢩَلْطٜ تَتِ#جَبُورَ 105:28؛ وَحَيُ يُحَنَّ 16:10؞؞ 23ࢡٜمبَاوَايْ يِعْيِعْتِرْغٛ، وَلَا غُرْتِيطٛ سُودُ مُمْ ࢩَلْطٜ تَتِ؞ عَمَّا إِسْرَاءِيلَعٜنْ ڢُو نغٛودِ جَيْنغٛلْ ندٜرْ جٛولٜ مُوطُمْعٜنْ؞ 24ڢِرْعَوْنَ عٜوْنِ مُوسَى، عٛوِعِمٛ: «ندِلّٜ، نجَغَّنٜ جَوْمِرَاوٛ مٛوطٛنْ، عٛنْ مبَاوَنْ يَحْدُغٛ بٜى رٜوْࢡٜ عٜ ࢡِکّٛيْ مٛوطٛنْ! سٜيْ دَمّٛوجِ عٜ نَعِ مٛنْ لُتَّ حَا طٛ؞» 25مُوسَى وِعِ: «نَا نٛنْ! عَنْ مَنْ حٛکُّ مِنْ دَبَّاجِ کِرْسٜتٜىٰطِ عٜ غُلٜتٜىٰطِ نغَمْ جَوْمِرَاوٛ اَللَّه عَمِنْ؞ 26ڢَحِنْ بٛو، مِنْ ندِلِّدَنْ بٜى تٛکّٜ دَبَّاجِ عَمِنْ؞ وَلَا ندَبَّاوَ نغٛوتَ لُتَّتَ حَا طٛ؞ نغَمْ حَا مَاجِ مِنْ کٛوعَتَ نغَمْ لِيعَنَاغٛ جَوْمِرَاوٛ اَللَّه عَمِنْ؞ مِنْ عَنْدَا طِيٜ مِنْ لِيعَنْتٛ جَوْمِرَاوٛ، سٜيْ تٛ مِنْ نجٛتَّکٜ تٛنْ؞» 27عَمَّا جَوْمِرَاوٛ سَاتِنِ حٛورٜ ڢِرْعَوْنَ ڢَحِنْ، عٛيِطَا عَشُّغٛ ࢡٜ حَا ࢡٜندِلَّ؞ 28ڢِرْعَوْنَ وِعِ مُوسَى: «وُرْتَ دِغَ طٛ! رٜىٰنْتَ، تَا عَمٜىٰتَ لَارُغٛ يٜىٰسٛ عَمْ ڢَحِنْ! تٛ عَمٜىٰتِ لٛرَاغٛ حَا عَمْ، عَمَايَنْ!» 29مُوسَى جَابِ: «بَنَ مبِعْطَ، مِمٜىٰتَتَا وَرْغٛ يٜىٰسٛ مَ!»
Currently Selected:
غُرْتَاکِ 10: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.