Lúg 2
2
Ha̧a̧lȩ́ Yesu woo nɔ
(Matío 1:18-25)
1Sey woo máa, Káýzar Ogús gbanii nán Róma voo pa moo o̧ ba u̵u̵ bíńda nán vu̵ 'waapád hág woolı̵́. 2Bindi woo ká dəŋ yȩ, Kiriníyu mbaa guvɛrnə́ər dɨ hág Siiríilí. 3Nán 'waapád vu̵ lúú laa yéé voo bindigo, kóó nɔ́nná kaa aa yée voolı̵́.
4Baa tóó yéé woo Yu̵u̵séfu, lúú kaa Naazaréddı̵́, hág Gáliléelı̵́, dɔg hág Yúúdalı̵́ kaa aa yée Daavíd woolı̵́. Yéé kaa woo Bɛ́tɛlɛhɛmme. 5Dɔg yéé woo bindigo, kan kȩ́ȩ́ sá̧á̧lȩ́ woo Maaríi, ha̧g silí.
6Sey ku̵u̵ dɨ lá wu̵lı̵́ máa, zá̧ga̧ waa ha̧a̧lȩ́ Maaríi woo ya̧ sú̵'ú̵. 7Ha̧a̧ waa big woo, wayée waaɨ. Go̧o̧wo̧ kan sa̧a̧m, hu̵u̵wu̵ nɛ́ŋ́ ndaa zɔnnélı̵́, moo ká vu̵ nugun ya úud lig gáálı̵́ né.
Maleeka tóó gbɔ vúd maa waa tu̵ mbee vu̵
8Hág dágá yȩlȩ́, waa tu̵ mbee tóó ká vu̵ dɨ mbee voo tu̵lı̵́ viddí wu̵lı̵́ hó̧g tíŋ́. 9Vaŋná maleeka ı̵́ 'yɛ́lı̵́ Tayɨɨ woo tóó gbɔ vúd maa vu̵ wu̵lı̵́. Túlí ı̵́ 'yɛ́lı̵́ woo tú gbɔ kan vu̵ daa. Dú̵ú̵ kɔ́ vu̵ du̵u̵n də́ń né, 10a̧máa maleeka o̧d vu̵: “I kɔ́ dú̵ú̵ sá. Mí dɨd ví moo zó̧ó̧ dȩ"ȩ́ o̧lȩ́ȩ. Nán Izraɛ́l vu̵ 'waapád vú̵ń dȩ' zó̧ó̧ yúú woolı̵́. 11I ki sú̵m, vu̵ ha̧a̧d ví ı̵́ nán sənné ɓəə kaa Daavíd woolı̵́ sú̵'ú̵. Wu̵ Krístu, wu̵ ı̵́ 'yɛ́lı̵́ baa ví. 12Hȩn i ho̧ gaanɔ wu̵lı̵́ máa, wu̵ yɛ nɔ. Víń nuŋ waa pə̧́ə̧d waa tóó, vu̵ go̧o̧wo̧ kan sa̧a̧m, ud dɨ nɛ́ŋ́ ndaa zɔnnélı̵́.”
13Vaŋná, maleeka tóó vu̵ ɓu̵u̵lı̵́ na'a be"ı̵́, vu̵ vúd maa ya maleeka pee, vu̵ na' Tayɨɨ, vu̵ o̧:
14“Ba na' ví Tayɨɨ be"ı̵́.
Nán ku̵u̵ to̧o̧d Tayɨɨ hágá yɛlı̵́ máa, u̵u̵ mbaa ká̧'a̧dɨ!”
Waa tu̵ mbee vu̵ laa kaa Bɛ́tɛlɛhɛmmé
15Sey maleeka ku̵u̵ lúú vȩ́' dɔg be"ı̵́ máa, waa tu̵ mbee vu̵ ó̧ń ya voolı̵́: “Ba laa ví Bɛ́tɛlɛhɛmmé bɔ, ba la ho̧ ví hȩn ka ya̧a̧, hȩn ı̵́ 'yɛ́lı̵́ Tayɨɨ ka o̧d ba ví yȩ nɔ.”
16Vu̵ lúú laa vaŋná, vu̵ nuŋ Maaríi kan Yu̵u̵séfu, kan waa pə̧́ə̧d ud mbaa dɨ nɛ́ŋ́ ndaa zɔnnélı̵́.
17Ku̵u̵ ho̧go̧ máa, vu̵ o̧d nán vu̵ moo maleeka ba o̧d vu̵ yúú waa yȩ woolı̵́ pee. 18Nán 'waapád ku̵u̵ ki moo yȩ máa, kɔ́ vu̵ la ɓá'. 19A̧máa Maaríi baa dȩ́' moo yȩ vu̵ zó̧ó̧lȩ́, baa taa vu̵. 20Waa tu̵ mbee vu̵ fíí la, vu̵ na' Tayɨɨ yúú hȩn 'waapád ku̵u̵ ki, ku̵u̵ ho̧ yȩlȩ́. Hȩn 'waapád ya̧a̧ kɔ́ ı̵́ maleeka ká o̧d vu̵ máa wɔgɔ.
Vu̵ 'yɛ́d Yesu yéé
21Bá' ka'andaddú̵ woo ka ya̧ máa, vu̵ dɔd Yesu do̧ŋ. Vu̵ 'yɛ́ddu̵ yéé Yesu. Maleeka 'yɛ́ddu̵ yéé yȩ tíŋ́ ha̧g mɛm na"oo woolı̵́.
Vu̵ tú' Yesu lig hȩn ha"ı̵́lı̵́
22Maaríi ka ha̧a̧ Yesu máa, buu su̵gu̵d kɔ́ ı̵́ Múúsa ká pad vu̵ moo máa wɔgɔ. Pig woo, Yu̵u̵séfu vu̵ kan Maaríi vu̵ pa̧ŋ waa laan tú"í tíŋ́ Tayɨɨ woolı̵́ Yerúsalemmé 23kɔ́ ı̵́ ku̵u̵ bíńda debtere ı̵́ 'yɛ́lı̵́ Tayɨɨ woolı̵́ máa wɔgɔ: “Waa big, wayée waa 'waapád, Tayɨɨ woo nɔ.”
24Vu̵u̵ bi ha'ad Tayɨɨ hȩn kan gag pɛ ma idú tóó tée kan gbɔkii idú kɔ́ ı̵́ debtere ı̵́ 'yɛ́lı̵́ Tayɨɨ woo ka o̧ wɔgɔ.
25A̧máa nán tóó ká dɨ Yerúsalemmé, yéé woo Simió̧ŋ. Nán Tayɨɨ duulíi, kɔ́ hȩn hí̧í̧lí̧ Tayɨɨ woo, mbaa laa ı̵́ sənné zig Izraɛ́l woo á̧ḿ. Yigid Tayɨɨ woo dɨ woolı̵́. 26Yigid yȩ ká o̧ddu̵ ban nɔɔ né, ban ho̧ ı̵́ nán sənné Tayɨɨ ba ka ba"u̵ ya máa pȩ́ń.
27Ma yigid Tayɨɨ woo pa̧ŋŋɔ laan lig hȩn ha"ı̵́lı̵́.
Sey ı̵́ ha̧a̧lȩ́ Yesu woo ku̵u̵ pa̧ŋŋɔ laan lig hȩn ha"ı̵́lı̵́, moo bi kɔ́ hȩn moo Tayɨɨ ka o̧d vu̵ yȩ nɔ máa, 28Simió̧ŋ fȩȩ ya Yesu nag woolı̵́, dȩn Tayɨɨ nag, o̧:
29“Ɨ́ 'yɛ́lı̵́ míí, 'ya̧'a̧ yɛ a̧m gbɔn mí laa nɔmmé
kan ká̧'a̧d kɔ́ ı̵́ káḿ o̧ wɔgɔ.
30Aga nɔ́ɔ́ míí ho̧ ı̵́ nán sənné káḿ ba' máa sú̵'ú̵,
31ı̵́ káḿ mbɔ́ggu̵ nɔ́ɔ́ zig nán voolı̵́ 'waapád yɛ nɔ.
32Wu̵ ya túlí a tú'ud zig tóó vu̵ hi̧naa móó má nɔ.
Zig móó Izraɛ́l wú̵ń nuŋ na"ȩ́ yúú woolı̵́ á̧ḿ.”
Moo anábi moolȩ́ Simió̧ŋ woo nɔ
33Yesu ba' woo kan na' woo ku̵u̵ ki moo yȩ máa, kɔ́ vu̵ la ɓá'. 34Simió̧ŋ bag vu̵ hȩn, pig woolı̵́ máa, o̧d Yesu na"oo Maaríi: “A̧m ki ú. Yúú waa yɛ woolı̵́, Tayɨɨ wú̵ń sə̧' nán Izraɛ́l vu̵ moo ɓu̵u̵lı̵́ na'a, a̧máa Tayɨɨ wú̵ń luu tóó vu̵ dɔg yúba. Nánán vú̵ń ho̧ hȩn gbo̧o̧ Tayɨɨ woo yúú waa yɛ woolı̵́, a̧máa vú̵ń duu sɛ́nnɔ né. 35Hȩn yȩ wú̵ń kɔ́y moo moo taalı̵́ nán ɓu̵u̵lı̵́ na'a voo a vúd gɔ́ŋ́. Ɨ́ móó máa, hȩn woo wú̵ń sam zó̧ó̧ kɔ́ ı̵́ ka vu̵n sam kan táaɨ zu wɔgɔ.”
Ána, anábi wakȩ́ȩ́ȩ
36-37 Anábi wakȩ́ȩ́ tóó ká dɨ Yerúsalemmé á̧ḿ, yéé woo Ána, waa Fanuɛ́l woo nɔ, zig Asɛ́r woolı̵́. Gbo̧o̧ sú̵'ú̵, dɨ kan ve' vo' ka'andaddú̵ zu̵u̵ ndaddú̵. Ka éé wə̧ə̧ máa, lá náá gíb waaɨ. Vu̵ mbaa kan wə̧ə̧ ve' gúndɛm. Pig woo máa, dɔ́ yɛd, kȩȩ wə̧ə̧. A̧máa gbɔn lig hȩn ha"ı̵́ né, baa kɔ́d Tayɨɨ ba'ad vid kan zá̧ga̧ á̧ḿ, kȩȩ hȩn lálı̵́, baa ɓá' Tayɨɨ.
38Zá̧ga̧ ku̵u̵ pa̧ŋ Yesu yaan lig hȩn ha"ı̵́lı̵́ máa, Ána du̵u̵lı̵́ á̧ḿ, na' Tayɨɨ, baa ɓɛ moo yúú Yesu woolı̵́ o̧d nán ı̵́ kú̵u̵ laa Tayɨɨ a səd Yerúsalem máa vu̵.
Fíiní la kaa Naazaréddı̵́
39Ɨ́ ha̧a̧lȩ́ Yesu woo ku̵u̵ kɔ́ hȩn 'waapád kɔ́ ı̵́ debtere ı̵́ 'yɛ́lı̵́ Tayɨɨ woo ka o̧ wɔgɔ máa, vu̵ daa vȩ́' la hág Gáliléelı̵́, kaa voolı̵́ Naazaréddı̵́. 40Waa yȩ na', nuŋ néélȩ́, hi̧' kan moo gaalı̵́. Tayɨɨ kɔ́ddu̵ zó̧ó̧ nán á̧ḿ.
Yesu ka dɨ kan ve' wa̧nɓó' zu̵u̵ idú máa, dɔ́ lig hȩn ha"ı̵́lı̵́
41Ve' 'waapád ı̵́ ha̧a̧lȩ́ Yesu woo vu̵ baa dɔg kaa Yerúsalemmé mam vúnní páskalı̵́.
42Sey Yesu ká dɨ kan ve' wa̧nɓó' zu̵u̵ idú máa, ı̵́ ha̧a̧lȩ́ woo vu̵ ɓɛgɛ dɔgɔn mam vúnní Yerúsalemmé kɔ́ ı̵́ ku̵u̵ baa kɔ́ see máa wɔgɔ.
43Ku̵u̵ vúd mam 'waa, ku̵u̵ dɨ zu̵u̵ vȩ́"ȩ́ máa, Yesu tii mbaa daa Yerúsalemmé. A̧máa ı̵́ ha̧a̧lȩ́ woo vu̵ gaan voo né. 44Vu̵ taa voo ba dɨ sa̧a̧m nán 'yȩ́ḿ voolı̵́. Vu̵ 'yȩm zá̧ga̧a̧.
Pig woolı̵́ máa, vu̵ soowu̵ o̧o̧g voo voolı̵́, kan nán gaalı̵́ voo vu̵. 45Ku̵u̵ ho̧nnɔ né máa, vu̵ vȩ́' dɔg Yerúsalemmé, vu̵ soowu̵ wu̵lı̵́.
46Bá' idú, ta̧a̧nɔ́ woo máa, vu̵ la nuŋŋɔ lig hȩn ha"ı̵́lı̵́. Dɨ mbaalı̵́ sa̧a̧m nán moo Tayɨɨ tú"í voolı̵́, baa ki moo voo, ví vu̵ moo á̧ḿ. 47Nán 'waapád ku̵u̵ ho̧ hȩn gaalı̵́ woo kan moo hí̧í̧lí̧ woo vu̵ kɛbná yȩ máa, la' vu̵ la fid.
48Na' woo kan ba' woo ku̵u̵ ho̧go̧ máa, kɔ́ vu̵ la ɓá'. Na' woo o̧ddu̵: “Waa míí, mɔ́ kɔ́ vɔ́ ȩn ı̵́ yo̧go̧lá? Vɔ́ kan ba' móó á̧ḿ, zó̧ó̧ tó̧' vɔ́ mbaa ná', kóó dɨm soolı̵́ yɛ nɔ!”
49Yesu hí̧i̧d vu̵: “Moo ȩn ví sooná? Ká ví gaan ba míń dɨn hȩn Ba' míí woo vu̵ yu̵ kɔ́lı̵́ máa náa?”
50A̧máa vu̵ kin moo ka o̧n vu̵ yȩ né.
51Ma daa vȩ́' zu̵u̵ kan vu̵ kaa Naazaréddı̵́, baa kid vu̵ tɔ́g. Na' woo baa dȩ́' moo yȩ vu̵ zó̧ó̧lȩ́ 'waapád, záń vu̵ né.
52Yesu na' dɔg nɔ́lȩ́ nɔ́lȩ́. Hȩn gaalı̵́ woo dɨ laalı̵́ tíŋ́ tíŋ́ á̧ḿ. To̧o̧d Tayɨɨ kan nánán vu̵ á̧ḿ.
Currently Selected:
Lúg 2: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.