Lúg 1
1
Moo dənée
1Ɨ́ hí̧í̧lí̧ míí Toofíl,
nán ɓu̵u̵lı̵́ na'a vu̵ kɔ́ ba'ad, moo bi bíńda hȩn ka ya̧a̧ sa̧a̧m baa vílí yɛ nɔ. 2Nán moo Tayɨɨ tú"í ká vu̵ ho̧ voo hȩn yȩ kan nɔ́ɔ́ voo sey dəné woolı̵́, ma vu̵ la pad vɔ́ moo yúú woolı̵́. 3Moo woo nɔ, ba' naa, 'ya̧'a̧ yɛ máa, mí á̧ḿ mí vi hȩn du̵u̵lı̵́ na'a yúú hȩn ku̵u̵ ya̧a̧ yȩ vu̵lı̵́ 'waapád, dəŋ sey dəné woolı̵́.
Káń ki máa, mí bíńda ví moo yȩ vu̵ duu kan hi̧naa woo du̵u̵lı̵́ na'a, 4moo i gaa moo ku̵u̵ tú'ud ví yȩ, ba moo yȩ́ńne.
Maleeka o̧ moo ha̧a̧lȩ́ Yoohá̧na ı̵́ mam Tayɨɨ wooné woo
5Sey Heeród ká waa gbanaa hág Yúúdalı̵́ máa, nán hȩn ha"ı̵́ tóó ká du̵u̵lı̵́, yéé woo Zakaríi. Ká dɨ sa̧a̧m nán hȩn ha"ı̵́ ku̵u̵ dɨ hú' ba'ad Abía woolı̵́ máa voolı̵́. Kȩ́ȩ́ woo máa, yéé woo Elísabɛd, ká dɨ zig ı̵́ nii hȩn ha"ı̵́ Harúna woolı̵́. 6Ya voo idú á̧ḿ, vu̵ kɔ́ hȩn hí̧í̧lí̧ Tayɨɨ woo tíŋ́ woolı̵́, vu̵ duu dooká ı̵́ 'yɛ́lı̵́ woo, vu̵ tu̵ moo woo vu̵ 'waapád. 7A̧máa vu̵ kan waa pɛ́lı̵́, moo Elísabɛd kan pa̧n waa pɛ́lı̵́. Ya voo idú á̧ḿ, vu̵ gbo̧o̧ sú̵'ú̵.
8Zá̧ga̧ tóólı̵́ máa, Zakaríi dɨ lig hȩn ha"ı̵́lı̵́ tíŋ́ Tayɨɨ woolı̵́, moo sey ba'ad kɔ́lı̵́ hú' woo ya̧ ma. 9Vu̵ gbɔ sáásáá, moo bi gaa nóo voolı̵́ sa̧a̧mé a la uu zu̵gu̵ sa̧g to̧o̧, lig hȩn ha"ı̵́ ı̵́ 'yɛ́lı̵́ woolı̵́lá. Nán hȩn ha"ı̵́ ká vu̵ baa kɔ́ ı̵́ yo̧go̧, ma sáásáá lá Zakaríi.
10Sey Zakaríi ka dɨ hȩn uulí máa, nán ku̵u̵ 'yɛ́ zó̧ó̧ Tayɨɨ woolı̵́ 'waapád máa, vu̵ dii voo gɔ́ŋ́, vu̵ baa o̧d Tayɨɨ moo. 11Vaŋná maleeka ı̵́ 'yɛ́lı̵́ woo vúd maa Zakaríi, dii ka' nag nán ya zu̵gu̵ uulílı̵́.
12Zakaríi ka ho̧go̧ máa, vágád wa̧ŋŋɔ, dú̵ú̵ kɔ́gɔ á̧ḿ. 13A̧máa maleeka o̧ddu̵: “Zakaríi, a̧m kɔ́ dú̵ú̵ sá, moo Tayɨɨ ki hȩn ɓá"ı̵́ móó sú̵'ú̵. Kȩ́ȩ́ móó Elísabɛd wú̵ń ha̧a̧m waa wayée waa, mɔ́ń 'yɛ́ddu̵ yéé, Yoohá̧na. 14Zó̧ó̧ wú̵ń dȩ'ȩm gbo̧o̧ ba'a. Nán ɓu̵u̵lı̵́ na'a vú̵ń dȩ' zó̧ó̧ yúú ha̧a̧lȩ́ woolı̵́ á̧ḿ, 15moo wú̵ń mbaa nán gbo̧o̧ nɔ́ɔ́ ı̵́ 'yɛ́lı̵́ Tayɨɨ woolı̵́. Wú̵ń zɔn doo né, kóó doo salı̵́ tóó vu̵, a̧máa néélȩ́ yigid Tayɨɨ woo wú̵ń hi̧' ya woolı̵́ sii na' woo woolı̵́ pi nɔ. 16Wú̵ń kɔ́ waa Izraɛ́l vu̵ ɓu̵u̵lı̵́ na'a vú̵ń vȩ́' ya duu Tayɨɨ ı̵́ 'yɛ́lı̵́ voo. 17Wú̵ń ɓə́əd Tayɨɨ tíŋ́ kɔ́ ı̵́ anábi Elía ká nuŋ yigid kan néélȩ́ Tayɨɨ woo máa wɔgɔ. Wú̵ń tii zó̧ó̧ waa ba'á voo yaan waa voolı̵́. Wú̵ń tii zó̧ó̧ ı̵́ tɔ́g ŋgó̧ó̧lȩ́ voo vú̵ń duu vȩ́' ya kɔ́ hȩn hí̧í̧lí̧ Tayɨɨ woo á̧ḿ. Wú̵ń mbɔ́g zig yȩ 'yɛ́d ı̵́ 'yɛ́lı̵́ bə́'.”
18A̧máa Zakaríi ka ki moo yȩ máa, vi maleeka: “Míń dəŋ née gaa ba moo yȩ́ńnelá? Moo mí gbo̧o̧ sú̵'ú̵, ve' kȩ́ȩ́ míí woo ya̧a̧ sú̵'ú̵ á̧ḿ.”
19 Maleeka duu hí̧i̧du̵: “Míi Gaabiɛ́l, ı̵́ ka dii tíŋ́ Tayɨɨ woolı̵́ má nɔ. Wu̵ ba'an ya, moo a̧n ya o̧m moo to̧o̧ yȩ nɔ. 20A̧m ki ú. Káḿ faa moo míí yȩ, a̧máa hȩn woo wú̵ń dɨ kɔ́yné sey woolı̵́. Moo woo nɔ mɔ́ń mbaa kpo̧o̧gná, mɔ́ń moon moo né há̧á̧ hȩn woo a kɔ́y pȩ́ń.”
21Nán pee vu̵ mbaa laa Zakaríi gɔ́ŋ́. Hȩn woo kɔ́ vu̵ la ɓá', moo Zakaríi ka mbaa ɗii na'a lig hȩn ha"ı̵́lı̵́ má nɔ.
22Sey ka vúd ya máa, moon sı̵́ moo né. Nán pee vu̵ gaa ba ho̧ hȩn tóó dɨ lig hȩn ha"ı̵́lı̵́. Ma bé'ed vu̵ nag mɛ́ń gbóoné, mbaa kpo̧o̧gná.
23Bá' hȩn ha"ı̵́ woo ka 'wáa sú̵'ú̵ máa, daa laa kíi woolı̵́.
24Pig woolı̵́ máa, kȩ́ȩ́ woo Elísabɛd fȩȩ ha̧g, yú̵g ud mbaa ligí sȩȩ nɔ́nɔ́, o̧: 25“Ɨ́ 'yɛ́lı̵́ míí wu̵ kɔ́n zó̧ó̧ nán. Aga ka yee zá̧ga̧ woo máa, tun nɔ́ɔ́ sȩ́ḿ sa̧a̧m nánán voolı̵́.”
Maleeka o̧ moo ha̧a̧lȩ́ Yesu woo
26Sey ha̧g Elísabɛd woo ka ya̧ sȩȩ gúú máa, Tayɨɨ ba' maleeka Gaabiɛ́l kaa Naazaréddı̵́, hág Gáliléelı̵́, 27ba"u̵ la náá gíb waa tóó woolı̵́, yéé woo Maaríi, ká kȩ́ȩ́ sá̧á̧lȩ́ Yu̵u̵séfu woo nɔ. Yu̵u̵séfu sú̵u̵ ká zig Daavíd woo nɔ á̧ḿ. 28Maleeka dɔ́ ya Maaríi woolı̵́ ligí, vá"u̵ o̧: “Zó̧ó̧ a dȩ'ȩmɔ́. Tayɨɨ ı̵́ 'yɛ́lı̵́ móó kɔ́m zó̧ó̧ nán sú̵'ú̵, wu̵ dɨ mbaalı̵́ kan mɔ́.”
29Maaríi ka ki moo yȩ máa, vágád wa̧ŋŋɔ, víń zó̧ó̧ woolı̵́, hȩn vá"ı̵́ woo ȩn ı̵́ yo̧go̧lá?
30Ma maleeka duu o̧ddu̵: “Dú̵ú̵ a kɔ́m sá Maaríi. Tayɨɨ kɔ́m zó̧ó̧ nán sú̵'ú̵. 31A̧m ki ú. Mɔ́ń nuŋ ha̧g, mɔ́ń ha̧a̧ waa wayée waa, mɔ́ń 'yɛ́ddu̵ yéé, Yesu. 32Wú̵ń mbaa nán gbo̧o̧ȩ. Tayɨɨ be"ı̵́ wú̵ń beewu̵ Waa woo nɔ. Tayɨɨ ı̵́ 'yɛ́lı̵́ wú̵ń 'yɛ́gɛ gbanii pig aa yée Daavíd woolı̵́. 33Wú̵ń waa gbanii nán Izraɛ́l voolı̵́ há̧á̧ káákáá. Gbaŋ waalı̵́ woo wú̵ń 'wáa né.”
34A̧máa Maaríi ka ki ná' máa, duu vi maleeka: “Hȩn woo wú̵ń dəŋ née kɔ́yyá? Moo mí kan ná nag né.”
35 Maleeka duu hí̧i̧du̵: “Yigid Tayɨɨ woo wú̵ń yaa móólȩ́. Néélȩ́ Tayɨɨ be"ı̵́ woo wú̵ń wáá yigid woo yúú móólȩ́. Moo woo nɔ waa a̧m dɨ ha̧a̧lȩ́ yȩ, Tayɨɨ wú̵ń beewu̵ Waa woo nɔ. 36-37A̧m ki lá mɔ́, mɛm móó Elísabɛd ka gbo̧o̧ yȩ si̧', nuŋ ha̧g wayée waa; sȩȩ gúú woo wu̵ yɛ nɔ, moo hȩn tóó mban Tayɨɨ né. Ká vu̵ beewu̵ wakȩ́ȩ́ zi̧i̧i̧.”
38Pig woo máa Maaríi hí̧i̧du̵: “Mí gba'a ı̵́ 'yɛ́lı̵́ Tayɨɨ woo nɔ. Hȩn woo a kɔ́y kɔ́ ı̵́ káḿ o̧ yȩ wɔgɔ.”
Ma maleeka daa lúú la.
Maaríi dɔg Elísabɛd ho̧lȩ́
39Sey woo Maaríi lúú vaŋná dɔg kaa tóólı̵́ yúú gu̵u̵lı̵́, hág Yúúdalı̵́. 40Dɔ́ kíi Zakaríi woolı̵́, vá' Elísabɛd.
41Sey Elísabɛd ka ki hȩn vá"ı̵́ Maaríi woo máa, waa nam sii Elísabɛd woolı̵́. Yigid Tayɨɨ woo dɔ́ hi̧' Elísabɛd woolı̵́. 42Ma Elísabɛd moo moo dɔg yúba, o̧: “Tayɨɨ bagam hȩn mba wakȩ́ȩ́ tóó vu̵ sú̵'ú̵. Tayɨɨ bag waa ka dɨ sii móólȩ́ yȩ á̧ḿ. 43Kɔ́ née na' ı̵́ 'yɛ́lı̵́ míí woo ka yaa míílí̧ ı̵́ yo̧go̧lá? 44A̧máa sey káń ki la hȩn vá"ı̵́ móó ná' máa, waa nam sii míílí̧ kan zó̧ó̧ dȩ"ȩ́. 45Zó̧ó̧ dȩ'ȩm sú̵'ú̵, moo káḿ 'yɛ́ zó̧ó̧ yúú moo ı̵́ 'yɛ́lı̵́ woolı̵́, hȩn woo ban kɔ́yyú̵ yȩ nɔ!”
Yéé Tayɨɨ na"ȩ́ Maaríi woo nɔ
46Maaríi ka ki moo yȩ máa, o̧:
“Mí na' ı̵́ 'yɛ́lı̵́ míí zó̧ó̧lȩ́.
47Zó̧ó̧ míí dȩ' moo Tayɨɨ ı̵́ sənné míí woo nɔ,
48moo Tayɨɨ kuu nɔ́ɔ́ ho̧ mbaalı̵́ gíḿ míí, moo káń gba'a kȩ́ȩ́ woo yɛ nɔ.
Diga zá̧ga̧ ɓəə, zig nán 'waapád kóó sey woo tɛ́lá, vú̵ń o̧n: ‘Du̵u̵d mɔ́ yo̧,’
49moo Tayɨɨ ı̵́ néélȩ́ kɔ́n hȩn gbo̧o̧ sú̵'ú̵.
Wu̵ Tayɨɨ.
50Zó̧ó̧ nán woo wú̵ń dɨ mbaalı̵́ ve' kan ve'
yúú nán ku̵u̵ kiddu̵ tɔ́g máa voolı̵́.
51Kɔ́ hȩn gbo̧o̧ kan nag gbaŋ woo sú̵'ú̵.
Hɨ'ɨ nán yúú na"ȩ́ zó̧ó̧lȩ́ vu̵.
52Ndaa gbanii vu̵ fi láan voolı̵́,
luu nán ku̵u̵ nə' yúú máa vu̵ dɔg yúba.
53Nán go̧o̧m ka ya̧ vu̵ máa, Tayɨɨ pú̵ vu̵ hȩn lálı̵́ du̵u̵, vu̵ ha̧'.
Nɛŋ nán naa vu̵ gbɔ la nag leená.
54Maa zig woo Izraɛ́l nán ba'ad woo,
záń zó̧ó̧ nán woo kɔ́lı̵́ yúú woolı̵́ né,
55kɔ́ ı̵́ ka o̧d a ba ví yée vu̵ wɔgɔ,
ba bíń kɔ́d Ibrahí̧í̧ma zó̧ó̧ nán kan zig woo á̧ḿ káákáá.”
56Maaríi səə kan Elísabɛd zaa kan ya̧ sȩȩ ta̧a̧nɔ́ ó̧, ma daa fíí zu̵u̵ kaa woolı̵́.
Ha̧a̧lȩ́ Yoohá̧na ı̵́ mam Tayɨɨ wooné woo nɔ
57Zá̧ga̧ waa ha̧a̧lȩ́ Elísabɛd woo ka ya̧ máa, ha̧a̧ wayée waa. 58Nán ka' kíi woo vu̵ kan o̧o̧g woo vu̵, vu̵ ki ı̵́ 'yɛ́lı̵́ Tayɨɨ ba kɔ́d Elísabɛd zó̧ó̧ nán gbo̧o̧ ba'a sú̵'ú̵, vu̵ su̵g zó̧ó̧ dȩ' kannɔ.
59Bá' ka'andaddú̵ woo ka ya̧ máa, vu̵ yaa bi dɔd waa do̧ŋŋɨ. Vu̵ hí̧í̧ bi 'yɛ́ddu̵ yéé Zakaríi kɔ́ ı̵́ ba' woo wɔgɔ. 60A̧máa na' woo hí̧í̧ ya̧g o̧: “Áá'a, yéé woo sı̵́ń Yoohá̧na.”
61A̧máa vu̵ o̧ddu̵: “Nán tóó yéé woo ı̵́ yo̧go̧ zig móólȩ́ pɛ́lı̵́.”
62Vu̵ gbóod waa ba'á nag, moo bi gaa ba hí̧í̧ bi 'yɛ́d waa woo yéé nɛ́nná? 63Zakaríi vi aluwa, bíńda yúú woolı̵́ o̧: “Yéé woo Yoohá̧na.”
Ma ya voo 'waapád, kɔ́ vu̵ la ɓá'.
64Sey woo yɛ́g Zakaríi woo há̧á̧ key dɔg, mɛ́ɛ́ woo yu̵u̵, moo moo, na' Tayɨɨ. 65Dú̵ú̵ kɔ́ nán ka' kíi woo vu̵ 'waapád. Nán Yúúda ku̵u̵ mbaa yúú gu̵u̵lı̵́ máa, vu̵ moo moo yúú hȩn yȩ vu̵lı̵́ 'waapád. 66Nán 'waapád ku̵u̵ ki moo yȩ máa, vu̵ 'yɛ́ moo woo voolı̵́ zó̧ó̧lȩ́, vu̵ o̧: “Waa yȩ wú̵ń mbaa nɛ́nná?”
Moo yȩ́ńná, nag Tayɨɨ ı̵́ 'yɛ́lı̵́ woo dɨ yúú woolı̵́.
Zakaríi moo moo anábi, na' Tayɨɨ
67Yigid Tayɨɨ woo dɔ́ hi̧' ba' woo Zakaríi woolı̵́, moo moo anábi, o̧:
68“Nán 'waapád u̵u̵ na' Tayɨɨ ı̵́ 'yɛ́lı̵́ Izraɛ́l woo nɔ.
Yaa zig woo giiní, səddu̵ sú̵'ú̵.
69Duu pú̵ ba ví nán sənné tóó, ı̵́ ka mba hȩn máa sú̵'ú̵.
Dɨ zig aa yée Daavíd woolı̵́, nán ba'ad Tayɨɨ woo nɔ,
70kɔ́ ı̵́ ká 'yɛ́d anábi woo vu̵ moo ya̧gá̧ gbó̧ŋ́ na'a máa wɔgɔ.
71O̧ ba bíń səd ba ví nag ı̵́ maag baa ví voolı̵́,
kan nag nán 'waapád ku̵u̵ máń ba ví máa voolı̵́ á̧ḿ.
72Kɔ́d a ba ví yée vu̵ zó̧ó̧ nán ı̵́ yo̧go̧,
moo bi duu ya̧g talı̵́ gbo̧o̧ bii yȩ nɔ,
73-74ká sa̧a̧d a ba ví yée Ibrahí̧í̧ma hȩn,
ba bíń səd ba ví nag nán maag baa ví voolı̵́. Moo aa kɔ́d bi ví ba'ad, dú̵ú̵ a sá.
75Moo aa mbaa ví nán bii, aa kɔ́ ví hȩn hí̧í̧lí̧ bii
zá̧ga̧ 'waapád biilí tíŋ́.
76Ɨ́ móó, waa míí, Tayɨɨ be"ı̵́ wú̵ń beem anábi woo nɔ.
Mɔ́ńnɔ ɓə́əd ı̵́ 'yɛ́lı̵́ tíŋ́, moo hi̧naa woo vu̵ mbɔ́ggı̵́.
77Mɔ́ńnɔ tú'ud zig yɛ Tayɨɨ ban kéé hȩn ɓı̵́d woo gbɔ,
ban səddu̵ ı̵́ yo̧go̧.
78Moo zó̧ó̧ nán Tayɨɨ baa ví woo nɔ ma,
túlí ı̵́ be"ı̵́ yaa ba ví giiní kɔ́ ı̵́ zá̧ga̧ wɔgɔ,
79moo bi túd nán ı̵́ ku̵u̵ mbaa ya dimmí, kan ı̵́ ku̵u̵ mbaa bə́' kan nɔm máa voolı̵́,
moo bi pa̧ŋ ba ví laan hi̧naa ká̧'a̧dı̵́.”
80Waa pee na', moo taalı̵́ woo dɨ laalı̵́ tíŋ́ tíŋ́. Mbaa hó̧g tíŋ́ há̧á̧ ya̧ zá̧ga̧ ka vúd ya tíŋ́ waa Izraɛ́l voolı̵́ máalȩ́.
Currently Selected:
Lúg 1: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.