Gɔwɔ tɔɔi 2
2
1Bələ ɓə Yálá ə yələkɔlɔn da lɔi di pɛli la, da ɉu hɛnŋaa kəlee. 2Yálá ə gɛ́ kóló kəlee kɛ ə kpɛɛ la, voló mɛ̨ihveelɛ yələ, ə hee, ə vįitɔɔ gɛ kóló kəlee ɓa. 3Ə lúwɔ́ too voló mɛ̨ihveelɛ yələ ɓa, ə ɉəɠə ɉu a nwɔɔ. Mąąhɔlɔɓo, volói ti ɓə, ə ɲee laa kulɔ la gɛ koló kəlee ɓa. 4Pələ ɓə Yálá ə yələkɔlɔn da lɔi di pɛli la.
Hulɔnu da nɛ̨ɛ̨nu di kɛ Yálá-taa lon ma ɓɛ lɔi mɛ̨i
Ɲələi Yai-Laa ə yələkɔlɔn da lɔi di pɛli la tɔlɔɔ, 5Wulu tɔ̨nɔ̨ kpɛli hvo kɛ lɔi mɛ̨i, ə mą kɛ kala ɓɔn dɔ̨nɔ̨ kpɛli, hvo ni kɛ ɓɔn ni lɔi mɛ̨i. Mąąhɔlɔɓo, Yai-Laa hvo ni kɛ tulɔ pu li lɔi mɛ̨i, ɛlɛɛ, nu hvo ni kɛ lɔi mɛ̨i, yii a kóló kɛ lɔi ɓa. 6Lɔi wəleen nɔ ɓə kɛi həɠə, yɛ pənə yɛ pu lɔi mɛ̨i a luwuluwu.
7Nąąlɔwai ɓə Yai-Laa ə nu pɛli la a pɔlɔ, ə yɛnɛ̨ɛ̨ kɛ hvaŋą pu ɉunwɛ̨i, nu ə kɛ a hɛn vulúmąą. 8Yili pulu, Yai-Laa ə yɛa ta pɛli Edɛn, voló həɠəi pələ. Nui ŋɛ̨i ə bɛli, ə vilɛn nąą ɲɛa. 9Wuluɠaai kpɔ ma nɛ̨ɛ̨, gaa ŋąąnɛ̨ɛ̨, ɛlɛɛ, mį́iɛ ɲąąnɛ̨ɛ̨, Yai-Laa ə di hin nąą ɲɛa. Ə yɛnɛ̨ɛ̨ kɛ wulu hin ɲɛa hamąi, ɛlɛɛ, da mɛ̨nį lɛlɛɛ da mɛ̨nį ɲɔ̨nwɔ̨ɔ̨ di kɔ́lɔn nwulu.
10Yá lee ta ə kɛi kulɔ Edɛn, yɛ tɛɛ ɲɛai tii hu, ŋąą yɛ kwɛlɛ ɉu nąąn. 11Dɔlɔɔ laa ɓaa a: Pisɔn, yili ka tii a kɛ Hawila lɔi mąą tinɛ̨n ɉi. Nɔi tii hu ɓə hɛni kaa laa. 12Nɔi tii hu hɛni kaa a nɛlɛɛ. Nąą ɓə nwɔ̨nɔ̨ da bdeliumə da onisə kwɛni hɔlɔɓo laa. 13Ɲá veelɛnąą laa ɓaa a: Gihɔn. Yili ka tii a kɛ Kusə lɔi mąą tinɛ̨n ɉi. 14Ɲá ɉaaɓanąą laa ɓaa a: Tigrə. Yili ka tii a kɛ tɛɛi Asurə taa voló həɠəi pələ. Ɲa nąąn gɛɛnąą laa ɓaa a: Eufratə.
15Yai-Laa ə nu hee Edɛn yɛa, əgɛ, ə ɲɛ̨i kɛ nɔi ɓa, ə kóló kɛ mą. 16Yili pulu, Yai-Laa ə nu liɛwoo kɛ, yɛ mą: «Nwuluɠaai kpɔ gaa ɓɛ ɲɛa, yá pɛli ə́ gəlee ta ɓa mį́i. 17Kɛlaa, yii ɓaa mɛ̨nį lɛlɛɛ da mɛ̨nį ɲɔ̨nwɔ̨ɔ̨ di kɔ́lɔn nwului ŋɛ̨i nwɛi, hvó má ta mį́i, mąąhɔlɔɓo, hvólói yá má ta mį́i la, yá haa.»
18Yai-Laa yɛ nwɔ̨nɔ̨ diɛ: «Mąą hvo nɛ̨ɛ̨li hulɔnu yaa tɔ̨nɔ̨ hvo kɛ yɛnɛ̨ɛ̨. Gáá mąą kpɔnmąąɓomun bɛlii ŋį́ dɛɛ bɔ.» 19Ɉuwɔɠaa da nwɛ̨niɠaai Yai-Laa ə di kulɔ, ə pa a gəlee nu lííla, əgɛ ə gaa, bələi nu kaa pai di laa heei la, əgɛ, naai tii ə lɛɛ diɛ. 20Nu ə, taatɛlɛɛɠaa, lɔwɔ huwɔɠaa da yələi nwɛ̨niɠaa laa hee tɛitɛi. Kɛlaa, yaa kpinįi tii, hvo gulɔmąą kaa di lɔwai, yii a pɛli kpɔnmąą tɛɛi bɔ. 21Nąąlɔwai, Yai-Laa ə yii kɛnɛ̨ tɛ nu ɲɛ̨i, ə yii. Yai-Laa ə nɛɛ mą, ə nu kəŋə gbɛakɔw tɔ̨nɔ̨ kulɔ ɉu, ə nuwu hiɛ nąą. 22Nu kəŋə gbɛakɔwi tii Yai-Laa ə gulɔ ɉu, ə bɛli a nɛ̨ɛ̨nu, ə paa la, ə dɛɛ hulɔnu pɔ. 23Yii lɔ kɛa hulɔnu ə nɛ̨ɛ̨nu kaa, diɛ paa la bɔ, ə tómą kpɔ kɛnɛ̨, yɛ diɛ:
«Yii nwɛi, gaa kpɔlɔɔ a dá!
Gaa kpɔ a gɔ́w ta, yɛ ɓo a núwu ta!
Naa ɓa pai kɛi a: Nɛ̨ɛ̨nu, hulɔnu hiɛ gee pulu,
hvó gaai, hulɔnu ɓə ə kulɔ ɉu.»
24Yili ɓə gaa mą, hulɔnu a həɠə nąn bɔ, ə həɠə nee pɔ, ə yili nɛ̨ą ɓa, da yaa di kɛ a nu tɔ̨nɔ̨.
25Hulɔnu da nɛ̨ą di kɛ a di kpuwulu, kɛlaa, di hvo kɛ kpaan ni yili hu.
Currently Selected:
Gɔwɔ tɔɔi 2: BKPDCG
Highlight
Share
Copy
Want to have your highlights saved across all your devices? Sign up or sign in