LUK 17
17
Pap
(Mat 18.6-7,21-22; Mar 9.42)
1Jisu amethang asangho atum aphan pulo, “Pap kepaplang-i amar hei hei dovek-lo, kepaplangji aning kehang abang ko-an akephere-meme akesung pho nangpo! 2Alangli la bihek atum angbong pen inut aphan pap kepaklem long aparte, alangli chethok him kekoi-i a-arlong homdongra langthepi along varchui memu. 3Lasi nangtum kopisi keklem, lale cherenon!
“Jongsi nangkorte pap klem lote, alangliphan ingcheknon, lapen aning chirui tangte, alangliphan diya non.#Mat 18.15 4Lapen arni isi angbong nangliphan alangli batai throksi pap klemlo, lapen abataitin nangli long vang-ra ‘Nening chiruilo’, pulote alangliphan nangli diya vek nangji.”
Kekroi
5Ketoitang atum Hemphu aphan pulo, “Netum akekroi pathe muchot-tha.”
6Hemphu thak-lo, “Nangtum akekroi hanjang emu athek anle do asonte, nangtum la ingle arong aphan, ‘Nangmethangle chephujokra ha lang-thepi angbongle che-e damnon’ pusi puthekji apot-lo, lapen la nangtum alam arjuji apot-lo.
Ban Adeng
7“Bisar alam, nangtum angbong mane aban abang hai bai damlo, kalite biresak vidamlo. Alangli rit pen vang lote, ‘Non amat vang-ra an chonon,’ pusi nangtum pujima? 8Lapu pupe! Alar nangtum alangphan pulo, ‘Ne an kechoji aphan sik koinon, lapen nangvam chingtinra ne an kecho ahut nephan ru thai non; la an aphile nangke an chonon,’ pusi puji. 9Ban abang hukum kekroi apot akero longle kalima? 10Lasonthotsi nangtum jokta hukum kelong an klemdet aphita lasonle punon, ‘Netum ke thangta kalidet aban atumchot; netum keklem nangji adengsi keklemlo.’ ”
Bangkep Si-i Kelong Atum Aphan Jisu Kepame
11Jisu Jerusalem anat kedam ahut alangli Samaria lapen Galili adet ahoi keng keng damlo. 12Alangli erong kelut dam ahut bang kep si-i kelong atum alangli pen chetong-lo. 13Halatum achar arjapphrongsi alangliphan hangjosi pulo, “O Hemphu, Jisu! Nelitum aphan ingjinsotha!”
14Jisu halatum aphan thek-longsi pulo, “Damnon, lapen kurusar atum asat nang-palang lonang.”#Levi 14.1-32
Tovar kedam ahut halatum ingthir-et-lo. 15Halatum angbong inut ke medet-lo pu chethek-longsi, hang cherbu pen Arnam aphan rosi vangthulo. 16Alangli Jisu akeng-ri domkhrupsi alangliphan chorolo. Halabangso amonit ke Samaria asorlo. 17Jisu pulo, “Bangkep atum medet-lo; hala bang sirkep atum konatma? 18Kopi apotsi la bang adet amonit apar akaprek atum ke nang chiruira Arnam aphan keroji aphan baduta vangvedet loma?” 19Lapen Jisu alangliphan pulo, “Thurra damnon, nang akekroisi nangphan pametang-lo.”
Arnam Arat Kevangji Alam
(Mat 24.23-28,38-41)
20Arnam Arat mantu vangjima pusi Pharisi atum Jisu aphan arjulo. Alangli halatum aphan thaksi pulo, “Arnam Arat ke kethek longphrong pen vangve. 21‘Langtha, daksi do,’ kalite ‘Hadaksi do!’ pusi baduta pupedetji; pima Arnam Arat nangtum angbongsi do.”
22Anke alangli asangho atum aphan pulo, “Monit a-Sopo a-arni hei hei angbong pen isi a-arni nangtum kethek longji ingtungji, bonta nangtum thek longledetji, lason ahut vangji. 23Lapen monit atum lason nangtum aphan puji, ‘Langtha, ladak ho!’ Kalite ‘Langtha, hadak jaho!’ Bonta hong barra ridunri. 24Pima sining kebirlak ahut ihi pen ihi kekhelan asonthotsi Monit a-Sopo amethang kevang arni plangji. 25Bonta aphrangke alangli penang akesung chechak nangjilang, lapen labangso a-ove amonit atum alangliphan chakchedetji. 26Noah arni asonthotsi Monit a-Sopo arnita plangji.#Kech 6.5-8 27Noah telongpi kechethap lapen langthepi vangsi monit atum aphan kepavirkoi ahut anta monit atum chobom, junbom, piso enbom, penan dobomlang.#Kech 7.6-24 28Lapen Lot arni ason thakthak plangji; abangphutinta chobom, junbom, lapen nambom, jorbom; lapen sok ebom lapen hem kimbomlang.#Kech 18.20—19.25 29Lot Sodom pen nangkebar arni, sining pen cheter lapen me ke-et nangklosi halatum aphan pavir-et-lo.#Mat 24.17,18; Mar 13.15,16 30Lasonthot helo, Monit a-Sopo keklang arni keplangji.
31“Halabangso arni mane abang hem asarnung athaksi do tangte, amar atar ke-enji aphan hir nangnelo; lason thak-thaksi rit kedam abangta hem chevang nangnelo.#Mat 24.17,18; Mar 13.15,16 32Lot apiso alam chemathathutha!#Kech 19.26 33Baduta amethang achethe kechepajokji aphan bor-i lote la ingbodetji; badutame achethe pangbolote, alangli la chepajokji.#Mat 10.39; 16.25; Mar 8.35; Luk 9.24; Jon 12.25 34Ne nangtum aphan nangpulang, halabangso ajo, banghini amonit hongplang isinat irap rapji: inut aphan pondetji, lapen anut kaprek aphan otekangbupji. 35Bang hini arlosomar atum him koi rap-rapji: inut aphan pondetji, lapen anut kaprek aphan otekangbupji. 36Banghini amonit atum ritsi doji: inut aphan pondetji, anut kaprek aphan otekangbupji.”
37Asangho atum alangliphan arjulo, “Konatma, Hemphu?” Jisu halatum aphan thak-lo, “Kethitang arpum kedo aling, hadak takun atumta chingrumji.”
Karbi Holy Bible © Bible Society of India, 2010.
Used by permission. All rights reserved worldwide.
