LUK 16
16
Kekroi Kethirklongkle Ahemari
1Jisu amethang asangho atum aphan pulo, “Ahut isi inut akiripo ahemari chebilo. Ansi alangli kechobi ahemari alanglimar-atar akejoijepisi hijikthap varet-lo pusi akaprek atum kiripo aphan thanlo. 2Lasi alangliphan hangsi pulo, ‘La ne nanglamjir karjulongbom alam kopuson mati? Nang hemari akam alakha nangchepi non, pima non pen apara nang hemari akam longle lo.’ 3Hemari aning arlo chepulo, ‘Nephan ke kam nepaklem longlelo. Ne kopisi klem poma? Neke ku ta tak-un-e, lapen kechohang chorek ke ne therakduk. 4Toh! Ne kopisi klem nangjima, ne chinilo! Nemen thandet setta hem nephan kechakji ajirpo ne cheripo.’
5“Lasi ahemphu along apreng kedo an atum aphan amethang adung inut inut hangsi alangli aphrang abang aphan pulo, ‘Nehemphu along ko-ansi nangpreng doma?’ 6Alangli thak-lo, ‘Oliv ajangthu mon pharo isi.’ Hemari pulo, ‘Ho! Lahelo nangpreng alakha aloh; ingnira phokep-le toknon.’ 7Ansi alangli anut kaprek aphan arjulo, ‘Lapen nangke nangpreng ko-an doma?’ Alangli thak-lo, ‘Thoila suri isi asoktipli.’ Hemari pulo, ‘Ho! Nangpreng aloh, enra pharo nerkeple toknon.’
8“Labangso pen ajok ahemphu abang hala ahok-he ahemari aphan rolo. Pima alangli chepareset pen klemlo. Atheke kethe-ang asomar atum apar labangso apirthe amonit atum amethang akam keklem ahut remuchot.”
9“Ne nangtum aphan nangpulang, nangtum pirthe akhi pen jirpo cheri-inon. Anke la ikdet lote nangtum aphan kevirvepin ahem along nang-chakpo. 10Bihek akam ahokpet pen keklem abang ke akethe akamta ahokpet pen klemji, lake ning thek-long. Bihek akam keklem pameme abang ke akethe akamta klem pamemedetji. 11Lasi, nangtum jongsi labangso apirthe akhi pen klem-i pameme tangte, nangtum akhi binong pen klem pameji puke kopusi ning nangchethepoma! 12Nangtum jongsi bang amar atar pen klem-i pameme tangte, komatsi nangtum aphan nangmethang akhi nangpipoma?
13“Badu abanta hemphu banghini ingduk un-e, alangli inut aphan lang-seletji, lapen anut kaprek aphan inghonji. Alangli inut abang aphan alam kroikriji, lapen anut kaprek aphan ke alam arjujedetji. Nangtum la sonni, atheke Arnam lapen tangka aphan ingduk rappet un-e.”#Mat 6.24
Jisu Pharisi Atum Aphan Kangchek
(Mat 11.12-13; 5.31-32; Mar 10.11-12)
14Pharisi atum la arjulongsi Jisu aphan meng-lo, pima halatum ke tangka chinghon-o. 15Jisu halatum aphan pulo, “Nangtum monit atum angno ke dhoromi amonit asonsi chepaklang-lo, bonta Arnam nangtum aning chinilo. Pima monit atum ador kepathe amar hei hei Arnam angno ke thangta kalilo.
16“Jon Baptist vangve ako ke aron lapen Arnam amontri atum alam ajakong dolang. Halabangso ahut pen Arnam a-Rat a-Birta Keme alam than-pachethang bomlo, lapen monit atum la kelutdunji aphan bor-ilo.#Mat 11.12-13 17Bonta aron angbong ketok amek atokbor isi kevirdet apar sining longle kevir joimulo.#Mat 5.18
18“Badutame, amethang apiso chetisi akaprek pen kechepangri abang ke beisa klemtang-lo; lapen ketitang arloso pen kechepangri abangta beisa klemtang-lo.#Mat 5.32; 1 Kor 7.10-11
Kiripo Lapen Lazarus Alamjir
19“Ahut isi inut akiripo dolo. Alangli arnivangta ador kesopik ape chepin-deng-lo lapen ador kesopik a-ansi cholo. 20Lapen Lazarus pu inut keboidet abang dolo. Alangli bang bithe bitha areng amek saide, lapen kiripo atebul pen keklo a-an-chore kepacholongjisi, 21alangliphan inghap angho alongsi bidet-lo. Methan atumta vangsi areng amek chonglek-lo.
22“Aphisi la keboidet abang thilot-lo, lapen sining apherangke atum alangliphan ponsi Abraham adung bidamlo. Kiripo thilot-lo, lapen pipdet-lo. 23Lapen ha chom, kethitang atum kedo adim arlo jasemet aduk phosi alangli angsong anat langsi Abraham lapen adung Lazarus kangni thek-long-lo. 24Lasi alangli hangsersi pulo, ‘O po, Abraham! Nephan ingjinsora, Lazarus ari chimun ehong angchun lang panimra nede kepachamjile alangliphan nangtoitha; pima ne labangso ame ade angkang along sungpik-lo!’
25“Bonta Abraham pulo, ‘Chematha-thutha, po, nangke kerengbom ahut kadokave kemesen amar an longpet-lo, lapen Lazarus-ke kehingno amar an long-lo. Bonta non alang ke dak aning arong chepilo, lapen nangke sungpik-lo. 26Lapen aparta, netum lapen nangtum adak herangpi bitang-lo, lapen ajok nangtum along kekapji aning kehang atum kap un-e, lapen hadak pen netum alongta kap un-e.’ 27Ansi kiripo pulo, ‘Tangte po Abraham, ne choningrilo, Lazarus aphan nepo ahem toitha, 28hadak nekorte bangpho dolang. Halatum labangso akesungpik adim kevangvedetji aphan alangliphan toira halatum aphan jasemetle than pare damtha.’
29“Abraham pulo, ‘Nang korte atum aphan kepacheretoiji aphan Moses lapen montri atumta dolo; nang korte atum halatum kethan alam parjunang.’ 30Kiripo thak-lo, ‘La anvetke chokchelang, po Abraham! Bonta kethitang atum angbong pen inut abang halatum along damlote halatum apap hei hei pen aning chiruiji.’ 31Bonta Abraham pulo, ‘Latum jongsi Moses lapen montri atum alam arjuje tangte, kethitang atum angbong pen inut thur setta halatum aphan pakroi thekthe.’ ”
Karbi Holy Bible © Bible Society of India, 2010.
Used by permission. All rights reserved worldwide.
